Esambishelo ka lo toshinga kele l’etombelo w’ɛlɔlɔ
1. Naa yoho mɔtshi yakokaso mbokoya Yeso?
1 Etena kakandakambaka olimu ande w’esambishelo lanɛ la nkɛtɛ, Yeso komengengaka dia nsambisha anto wakahomanaka la nde lo toshinga ndo l’ahole akina wa lo sɛkɛ. (Luka 9:57-61; Joa. 4:7) Nde akakombolaka mbutɛ anto efula losango lande l’ohomba. Ɛlɔ kɛnɛ, esambishelo ka lo toshinga kekɔ yoho ya dimɛna ya nkimanyiya anto dia vɔ nkondja lomba laki Nzambi. (Tuk. 1:20) Tayonga l’etombelo w’ɛlɔlɔ naka sho mbɔsa yɛdikɔ ndo monga la shɛnɔdi.
2. Yɛdikɔ yakɔna yakokaso mbɔsa etena katatasambisha lo toshinga?
2 Tɔshi yɛdikɔ: Ekɔ dimɛna ntshɔ otsha le anto lo dihole dia memala kana mbidjasɛ lo dihole dimɔtshi ko kongaka anto wahomba mbeta lo dihole diakɔ dia wɛ nsawola la wɔ. Mɔnamɔna, endaka ompokami ayɛ, sawolaka la nde la wɔlamu ndo oko onto lasawola l’ɔngɛnyi. Naka wɛ ekɔ lo tasambisha l’opandjudi okina, mbala efula ayoleka dimɛna opandjudi l’opandjudi sɔmana l’onto ɔmɔtshi. Ekɔ nto ohomba sho mbɔsa yɛdikɔ dia nkalola tembola onto lakɛnya nsaki. Naka kokaka, l’ekomelo ka sawo, l’ɔkɔmi tshɛ mbola onto lasawola la yɛ woho wahombayɛ mpomana la nde nto. Apandjudi amɔtshi wekɔ la mbekelo ka sambishaka lo toshinga takɔ tâmɛ ndo dui sɔ mbakimanyiyaka dia vɔ sawolaka l’anto akɔ wâmɛ mbala la mbala ndo ntetemala nomialomia nsaki kawɔ.
3. Ngande wakokaso monga la shɛnɔdi etena katatasambisha lo toshinga?
3 Tonge la shɛnɔdi: Tonge l’ekanelo k’ɔlɔlɔ dia sho mbeya dihole diahombaso memala lo toshinga ndo anto wahombaso memadia dia nsawola la wɔ. Kema ohomba sho nsambisha ambetshetshi tshɛ. Toshishimake ambetshetshi dimɛna. Ɛnyɛlɔ, naka onto ekɔ lo tatshu esadi esadi, mbeyaka ndeka dimɛna sho mbotshika nde mbeta. Etena kasambishaso la ntondo ka dihole diasondjawɔ diangɔ, sho pombaka memala l’omamu diaha mfukutanya kanga diangɔ. Mbala efula, ayoleka dimɛna nsambisha anto etena kashidiyawɔ nsomba diangɔ lo dihole dia mbasambisha etena kâkawasombe. Tosawole la wɔ lo woho wahawatoka wɔma kana nyanga. Ndo nto, tonge la shɛnɔdi etena kawashaso ekanda. Naka onto haleki mɛnya nsaki, sho mbeyaka mbosha traktɛ lo dihole dia periodikɛ.
4. Lande na kele esambishelo ka lo toshinga ekɔ yoho y’esambishelo y’ohomba ndo ya dimɛna?
4 Esambishelo ka lo toshinga tokimanyiyaka dia sho monɛ ntɔngɔ y’akambo wa mɛtɛ efula lo tshenyi ya wonya. (Und. 11:6) Mbeyaka monga ko wanɛ wasambishaso lo toshinga wekɔ anto wakiso kotana lawakawɔ etena kakatasambisha lo luudu la luudu l’ɛtshi kawɔ ka nkɛtɛ. Shi sho kokaka monga l’ekongelo ka ntatɛ nsambisha lo toshinga nɛ di’esambishelo kɛsɔ kekɔ dimɛna ndo mongaka l’etombelo w’ɛlɔlɔ?