Toyalɔngɔsɔlɛ oma ko kakianɛ dia mpamia olimu aso
1. Nshi y’Eohwelo toshaka diaaso diakɔna, ndo ngande wakokaso ndjalɔngɔsɔla dia dikambo diakɔ?
1 Nshi ya Eohwelo tshɛ toshaka waaso w’eyoyo wa sho ‘mboka Jehowa losaka l’efula.’ (Osam. 109:30) Onde tayohamia olimu aso w’esambishelo lo Ngɔndɔ ka sato dia mɛnya lowando lele laso le Nzambi lakakimɔ tshungo? Ɔnɛ mbele etena ka sho ntatɛ ndjalɔngɔsɔla.—Tuk. 21:5.
2. Kakɔna kakayasale wɛ l’apandjudi akina lam’akɔsama yɛdikɔ ya nkitshakitsha lofulo la wenya wakawalɔmbɛ ambatshi mboka wa tshanda lo Ngɔndɔ ka nɛi ɔnɔnyi wetshi?
2 Olimu w’ombatshi mboka wa tshanda: L’ɔnɔnyi wetshi, tshumanelo diaki l’ɔngɛnɔngɛnɔ w’efula etena kakawoke yɛdikɔ yakɔsama dia nkitshakitsha lofulo la wenya walɔmbawɔ ambatshi mboka wa tshanda lo ngɔndɔ ka nɛi. Ɔnangɛso ɔmɔtshi akafunde ate: “Lekɔ lo mbɔtɔ lo kalasa y’adidi ndo lakɛnaka dia halokoke nkamba olimu w’ombatshi mboka wa pondjo. Koko, lakalodia dɛmandɛ dia nkimɔ wenya 30 ndo lakasale la wolo dia nkotsha wenya 50 lo ngɔndɔ ka nɛi.” Kadiyɛso kɛmɔtshi kakamba olimu wa l’emunyi wawɔsɛ wenya tshɛ, akate ate: “Wenya akumi asato ekɔ mɛtɛ wenya wakoka onto nkotsha!” Etena kakewoyama yɛdikɔ shɔ, opandjudi ɔmɔtshi wakakambaka ntondo oko ombatshi mboka, waya kakianɛ l’ɛnɔnyi 80 l’ɛmɔtshi akate ate: “Ɔnɛ ekɔ etena kakamakongɛka l’asolo walomɔlomɔ! Jehowa akeyaka mɛtɛ di’etena kakamakambaka olimu w’ombatshi mboka mbaki etena kakaleke ohomba lo lɔsɛnɔ lami!” Apandjudi akina waki kokoka nkamba olimu w’ombatshi mboka wa tshanda wakayadjɛ oyango wa mpamia olimu awɔ.
3. Naa ɛkɔkɔ watotshutshuya dia nsɛdingola kana sho kokaka nkamba oko ambatshi mboka wa tshanda lo Ngɔndɔ ka sato, ka nɛi ndo ka tanu?
3 Ngɔndɔ ka sato ayonga ngɔndɔ ka lânde ka nkamba olimu w’ombatshi mboka wa tshanda nɛ dia tayonga nto la diɛsɛ dia nsambisha l’asa wenya 30 kana 50. Ndo nto, ntatɛ Lushi la samalo lo ngɔndɔ ka sato 17, tayosala esambishelo ka lânde dia mbelɛ anto dia ndjosangana kâmɛ la so lo Eohwelo kayosalema ngɔndɔ ka nɛi 5. Apandjudi efula wayɔngɛnangɛna dia mpamia olimu awɔ w’esambishelo lo nkamba oko ambatshi mboka wa tshanda lo ngɔndɔ ka nɛi la ka tanu dia nkotsha wenya 50 walɔmbama.
4. Ngande wakokaso mpamia olimu aso w’esambishelo, ndo etombelo akɔna wayotokondja?
4 Etena kayonyosala Ɔtɛmwɛlɔ wa lo nkumbo wa la dikɔlɔ wa mbala kayaye, lande na kahanyasawola dia menda woho wakoka ose nkumbo tshɛ mpamia olimu ande w’esambishelo lo nshi ya Eohwelo? (Tuk. 15:22) Nyɔlɔmbɛ Jehowa dia nde ntshɔkɔla welo anyu. (1 Joa. 3:22) Etena kahamiaso olimu aso w’esambishelo, hatotombola tsho Jehowa, koko sho fudiaka ndo ɔngɛnɔngɛnɔ aso.—2 Kor. 9:6.