Tokambe la mbɔtwɛlɔ kayonga l’etombelo w’ɛlɔlɔ
1. Wetshelo akɔna wakokaso nkondja lo woho wakakambaka Akristo wa lo ntambe ka ntondo la mbɔtwɛlɔ yotshikitanyi?
1 Akristo wa lo ntambe ka ntondo wakasambishaka anto w’oma l’ahole ndo wa l’ɛtɛmwɛlɔ wotshikitanyi lokumu l’ɔlɔlɔ. (Kɔl. 1:23) Kânga mbakawasambishaka losango laamɛ laki l’ɔtɛ a dui ɔnɛ: Diolelo diaki Nzambi, vɔ wakakambaka la mbɔtwɛlɔ yotshikitanyi lo ndjela anto wakawasambishaka. Ɛnyɛlɔ, etena kakandasambishaka ase Juda wakalɛmiyaka Afundelo efula, Petero akashile kɛnɛ kakate omvutshi Jɔɛlɛ. (Etsha 2:14-17) Lo wedi okina, tolembete woho wakakane Pɔɔlɔ yimba nde l’ase Ngirika oko wofundamidiɔ lo Etsha 17:22-31. Ɛlɔ kɛnɛ, anto wa lo bɛtshi dia nkɛtɛ dimɔtshi nɛmiyaka Afundelo ndo sho hatokoke mengenga dia nkamba la Bible etena katatasambisha lo luudu la luudu. Diakɔ diele, tekɔ l’ohomba wa monga la shɛnɔdi etena kasambishaso anto wahalɛmiya Bible kana ɔtɛmwɛlɔ ndo wele lo ɛtɛmwɛlɔ wele bu w’Akristo.
2. Ngande wakokaso nkamba l’ekanda aso dia nkimanyiya anto wetawɔ Bible kana wahakietawɔ?
2 Tokambe l’ekanda aso dimɛna: Ekanda wayotosha anto l’ɔnɔnyi w’olimu ɔnɛ wayotshikitanyemaka l’ɔkɔngɔ wa ngɔndɔ hiende tshɛ ndo tayolekaka nkamba la periodikɛ, traktɛ ndo tobukubuku. Oyadi anto wa l’ɛtshi kaso ka nkɛtɛ hawetawɔ Bible, sho kokaka mbasha okanda ɔmɔtshi wayemula nsaki kawɔ. Hatohombe mbadia divɛsa dimɔtshi lo wendelo wa ntondo kana nshila awui w’oma lo Bible, koko naka ompokami aso ambɛnya nsaki, sho kokaka nkalola l’oyango wa ndjôkimanyiya dia nde monga la mbetawɔ le Otungi ndo l’Ɔtɛkɛta ande wakasambiyama. Lo wedi okina, naka tekɔ lo nsambisha anto wetawɔ Bible, kete sho kokaka nkamba l’ekanda ndo la mbɔtwɛlɔ yakɛnɛmɔla dui sɔ. Ɔnkɔnɛ, sho kokaka mbasha dibuku Bible etshatɔ kana biukubuku Hokamɛ Nzambi kana Hokamɛ Nzambi dia wɛ nsɛna pondjo pondjo lo diaaso tshɛ oyadi ekanda akɔna washaso anto lo ngɔndɔ kakɔ. Oyango aso ele wa nkamba la mbɔtwɛlɔ yayonga l’etombelo w’ɛlɔlɔ.
3. Lo woho akɔna wele etema w’anto wa l’ɛtshi kaso ka nkɛtɛ oko nkɛtɛ?
3 Tɔlɔngɔsɔlɛ nkɛtɛ: Otema w’onto wekɔ oko nkɛtɛ. (Luka 8:15) Nkɛtɛ mɔtshi nɔmbaka dia nɔngɔswama dimɛna dimɛna la ntondo ka ntɔngɔ y’akambo wa mɛtɛ wa lo Bible mbika edio ndo mbola. Esambisha wa lo ntambe ka ntondo wakakondja etombelo w’ɛlɔlɔ lo monɛ ntɔngɔ lo weho wa nkɛtɛ tshɛ ndo dui sɔ diakawaela ɔngɛnɔngɛnɔ w’efula. (Etsha 13:48, 52) Sho lawɔ kokaka nkondja etombelo w’ɛlɔlɔ naka sho mbidja yimba lo mbɔtwɛlɔ yaso.