Tokalole dia tênda anto wakɛ̂nya saki yawɔ
1 Efula ka l’atei aso wakokakɔ dia dianganya periodikɛ la tubukubuku. Ekɔ ohomba nyomotênda anto wakalongola ekanda dia nomialomiaka saki yawɔ. Etombelo mbeyaka nɛmanɛ la woho wa nɔngɔsɔla waembwelo akɔ.
2 Tanyohɛke ɔnɛ ɛlɔngɔlɔngɔ efula wekɔ l’ekiyanu akɔ wamɛ l’epalanga. Numɛlɔ ya Réveillez-vous! yekɔ la artikɛlɛ watɛkɛta di’ekakatanu wa nshi nyɛ lo ndjela lokanyi l’ɛlɔngɔlɔngɔ. Artikɛlɛ ɛsɔ mbishaka alako wayowakimanyiya, vɔ l’ambutshi awɔ, dia mbeya ehomba a mɛtɛ wa lɔsɛnɔ.
3 Naka wɛ akatshike numɛlɔ ka 8 ka “Réveillez-vous!” wa ngɔndɔ kɛnɛ, ondo wɛ ekɔ lo kanyiya dia mɛnyanya kɛnɛ ka 22 ka ngɔndɔ kakɔ kamɛ. Ɔnkɔnɛ wɛ mbeyaka mbuta w’ate:
◼ “Numɛlɔ ka komelo kakamakotshikɛ akatɛkɛtaka dia [ta dikambo diakɔ]. Ana wekɔ lo tôle l’andja wele kema la dikongelo di’oshika dia nshi yayaye. Efula ka l’atei awɔ wekɔ lo mɛnya tokumbɛkumbɛ tawɔ lo ndjâla la lɔkɛwɔ la tɔmbɔki. Lo wedi okina, amɔtshi kotshaka dia momba katikati kawɔ ndo eweso wa ladiko. Artikɛlɛ ɔsɔ, wɛnyami lo numɛlɔ ka komelo ka Réveillez-vous!, nembetshiyaka woho wokoki ɛlɔngɔlɔngɔ ntokomɛ dikambo sɔ. Lambɔfɔnya dia wɛ ayɔngɛnangɛna walelo atɔ.”
4 Wɛ mbeyaka mbɔsa yɛdikɔ dia mbɔtshiya biukubuku ɔnkɔnɛ:
◼ “Lakândola ɔkɛtshanyelo wa tshena pe wakatasale mbala ka ndjihelo lo dikambo dia nshi yayaye. Ohokanyiya woho wayonga lɔsɛnɔ etena kayoshidiya Nzambi kɔlɔ l’asui! [Ɛnyande osato wa lo lɛkɛ 31 la biukubuku Quel est le but de la vie? Comment le découvrir?] Ohênda, avɛsa w’oma lo Bible woshilami lo lɛkɛ 29 la 30, wekɔ lo kɔndɔla ɛngɛnɔngɛnɔ wayêla Diolelo dia Nzambi. [Nsɔna divɛsa dimɔtshi kele aladiɔ lo biukubuku.] Dimi nangaka kotshikɛ biukubuku nyɛ.”
5 Lam’ayoyokalola, ondo wɛ ayoka ɔnɛ onto akɔ okôngaka l’abuku w’ɔtɛmwɛlɔ w’ɔngɛnyangɛnya. Ɔnkɔnɛ wɛ mbeyaka mbotɛ w’ate:
◼ “Oyadi l’ɔtɛmwɛlɔ akɔna weso, sho tshɛ tekɔ l’ekiyanu akɔ wamɛ: odiakanelo, hemɔ ka wolo kana wɛɔma w’olanelo wa kɛtɛ la hiɛlɛlɛ, shi ngasɔ? [Tshikɛ onto akɔ dihole akadimole.] Onde wɛ mbetawɔka dia okandwelo ɔmɔtshi w’oshika wekɔ l’akambo asɔ oka? [Adia 2 Petero 3:13.] Oyango w’ekanda aso nembetshiyama lo lɛkɛ 2 la La Tour de Garde. [Adia etelo ɔtɔi kana ehende.] Anto efula wele kema Ɛmɛnyi wa Jehowa nangaka mbala ekanda aso nɛ dia vɔ mbelaka lokumu la dikongelo, lele l’etshina kalɔ lo Bible.” Naka onto akɔ ekɔ lo mbetawɔ awui akɔ, lembetshiyande woho watshaso dia mbeka Bible.
6 Wɛ mbeyaka pemba mbɔtwɛlɔ kɛnɛ:
◼ “Mbala ka ndjihelo kakamaye, takatɛkɛta dikambo di’andja lo nshi yayaye. Akanyiyɛ dia akambo watomba anɛ na? [Shila akambo amɔtshi wa mɛtɛ w’ahɛ anto asolo l’olongo.] Lam’okawɔ sango ya ngasɔ, amɔtshi ndjambolaka vɔate: lende atatshu andja, shi ngasɔ? Sho mbetawɔka ɔnɛ akambo asɔ mɛnyaka dia tekɔ lo nsɛna lo ‘nshi y’ekomelo’ yakatama lo Bible lo 2 Timote 3:1-5.” L’ɔkɔngɔ a mbala atshina a tokanyi, wɛ mbeyaka mumbola ɔtɛkɛtshi ayɛ kana, oko wɛnande, akambo wasala anto fɔnaka la wanɛ wɔkɔndwami asɔ. Tetemala l’ɔkɛtshanyelo lo tɛkɛta dikambo dimɔtshi dia lo lɛkɛ 89 polo 98 lo dibuku Comment raisonner.
7 Naka sho ndjalɔngɔsɔla dimɛna ndo monga mɛtɛ la saki ka kimanyiya anto, kete toyashikikɛ dia wanɛ wele l’etema w’ɛlɔlɔ wayolonga.—Joani 10:27, 28.