Onde sho koka sambishaka l’akɔlɔ?
1. Lo ndjela dibuku dimɔtshi, wonya akɔna wakatshɔka Pɔɔlɔ dia tosambisha lo luudu la luudu?
1 Lo ndjela kɛnɛ kata dibuku dimɔtshi (Daily Life in Bible Times), ɔpɔstɔlɔ Pɔɔlɔ akasambisha lo luudu la luudu “oma l’eshidi 4 wa dikɔlɔ polo la kati k’otsho.” Hateye shikaa kana ɔsɔ mbaki ekongelo k’oyoyo kaki ɔpɔstɔlɔ Pɔɔlɔ, koko kɛnɛ kele mɛtɛ ele nde aketawɔ dia “nsala akambo tshɛ lo wahɔ wa lokumu l’ɔlɔlɔ.” (1 Kɔr. 9:19-23) Dui sɔ nembetshiyaka dia nde akayalɔngɔsɔlaka dia tosambisha lo luudu la luudu etena kakandakoke totana anto efula wa nsambisha.
2. Lande na kele wenya w’akɔlɔ wekɔ etena ka dimɛna ka nsambisha?
2 L’ahole efula, apandjudi wekɔ la mbekelo ka tshɔka tosambisha lo luudu la luudu la pindju l’atei wa lomingu. Ko onde polo ndo nshi nyɛ ɔsɔ mbele wonya woleki dimɛna l’ɛtshi kanyu ka nkɛtɛ dia nsala dui sɔ? Ombatshi mboka ɔmɔtshi akate lo kɛnɛ kendana la ɛtshi kande ka nkɛtɛ ate: “Lo wenya wa pindju anto hawoleke tanema lawakawɔ. Koko, anto ndekaka tanema lo wenya w’akɔlɔ.” Esambishelo ka l’akɔlɔ toshaka diaaso dia ntana djekoleko apami ndo mbasambisha lokumu l’ɔlɔlɔ. Mbala efula, lo wenya ɛsɔ anto mongaka ki ndo mongaka suke dia nsawola. Naka dui sɔ diekɔ ohomba, kete dikumanyi pombaka kongɛ nsanganya y’otsha l’olimu w’esambishelo l’akɔlɔ.
3. Ngande wakokaso monga la shɛnɔdi etena kasambishaso l’akɔlɔ?
3 Tonge la shɛnɔdi: Etena katatasambisha la dikɔlɔ ekɔ ohomba monga la shɛnɔdi. Ɛnyɛlɔ, naka wɛ ambotshɔ tembola onto ɔmɔtshi lo wonya wende bu l’etena, ɛnyɛlɔ wonya w’olelo wa la midi, kete wɛ kokaka mbotɛ dia wɛ ayoyokalola l’ɔkɔngɔ. Naka wonya wambotatɛ mbidja, kete wɛ pombaka memala lo dihole diakoka onto lotshweyɛ tembola kɛna, yaeyanya le nde aha la ntshimbatshimba ndo tɛnde lande na koyeyɛ ndjowenda. Ekɔ nto dui dia lomba dia monga anto ahende kana djui ndo nyu monga lo toshinga tele atala lɛnɛ eteeta anto. Kema dimɛna ntshɔ tembola anto etena kowoyanga ndala. (2 Kɔr. 6:3) Naka ɛtshi ka nkɛtɛ katanyasambisha kekɔ waale l’otsho, kete ayoleka ɔlɔlɔ nyu sambishaka la ntondo ka wonya mbidja.—Tok. 22:3.
4. Ɛtshɔkɔ akɔna waya oma l’esambishelo ka l’akɔlɔ?
4 Ɛtshɔkɔ wakondjaso: Sho ndekaka monga l’ɔngɛnɔngɛnɔ etena katanaso anto wa nsawola la wɔ. Ndo etena kasambishaso efula, mbakondjaso ndo waaso efula wa nkimanyiya anto akina dia vɔ “shimbamɛ ndo nkondja ewo k’oshika k’akambo wa mɛtɛ.” (1 Tim. 2:3, 4) Onde wɛ hakoke ntshikitanya ekongelo kayɛ dia sambishaka l’akɔlɔ?