Tokoya ɛnyɛlɔ k’amvutshi—Amɔsɛ
1. Lande na kakoka ɛnyɛlɔ k’Amɔsɛ monga kiɔkɔ y’ekeketshelo le so?
1 Onde wɛ amboyaokaka dia wɛ bu l’akoka wa nsambisha l’ɔtɛ wakiyɛ kombɔtɔ kalasa efula ndo wakayole lo nkumbo kele bu l’ekondjelo k’efula? Naka eelo, kete wɛ koka keketshama lo ndjela ɛnyɛlɔ kaki Amɔsɛ. Nde aki olami w’ɛkɔkɔ ndo okambi wa dikambɔ, koko Jehowa akɔɔsɔnɛ dia mbewoya losango lɔmɔtshi l’ohomba efula. (Am. 1:1; 7:14, 15) Woho akɔ waamɛ mbele ɛlɔ kɛnɛ, Jehowa ekɔ lo nkamba l’anto wɔsama oko anto w’anyanya. (1 Kɔr. 1:27-29) Naa wetshelo ekina wendana l’olimu w’esambishelo wakokaso nkondja oma le omvutshi Amɔsɛ?
2. Lande na kakokaso ntshikala nge la ntondo k’ɔlɔshamelo wendana l’olimu aso w’esambishelo?
2 Toshike tanga la ntondo k’ɔlɔshamelo: Etena kakoke Amaziya laki ɔtɛmɔdi wa dikishi ndo ɔlɔmbɛdi wa diolelo di’Isariyɛlɛ dia lo nɔrdɛ diakakengama la waoho dikumi kɛnɛ kakate Amɔsɛ, nde akawotɛ ate: ‘Tshɔka tsha lakanyu, ototshike, sho tekɔ l’ɔtɛmwɛlɔ aso.’ (Am. 7:12, 13) Lo awui wakandatomɛ nkumekanga Jerɔbɔama dia mbotɛ dia nshimba olimu w’Amɔsɛ, Amaziya akengesola ɛtɛkɛta waki omvutshi Amɔsɛ. (Am. 7:7-11) Koko Amɔsɛ komboka wɔma. Ɛlɔ kɛnɛ, ewandji ɛmɔtshi w’ɛtɛmwɛlɔ mbokanaka l’ewandji wa pɔlitikɛ dia vɔ nsoya Ɛmɛnyi wa Jehowa. Koko, Jehowa toshikikɛka ɔnɛ welo tshɛ wakoka anto mbidja dia toshila oshiki wayokita tatala.—Is. 54:17.
3. Naa nsango hiende yewoyaso anto ɛlɔ kɛnɛ?
3 Tewoya anto dombwelo dia Nzambi ndo ɛtshɔkɔ wa lo nshi yayaye: Kaanga mbakewoya Amɔsɛ diolelo di’Isariyɛlɛ dia waoho dikumi losango la kilombo, lo ɛtɛkɛta ande w’ekomelo wele lo dibuku dia lo Bible diele la lokombo lande, nde akewoya daka diaki Jehowa dia mbela paradiso ndo ɛtshɔkɔ efula. (Am. 9:13-15) Lo ɛnyɛlɔ kande, sho lawɔ mbewoyaka anto oyelo wa “lushi la kilombo,” koko ɔsɔ ekɔ tsho etenyi ka “lokumu l’ɔlɔlɔ . . . la Diolelo” lahombaso mbewoya anto. (2 Pet. 3:7; Mat. 24:14) Elanyelo k’anto wa kɔlɔ lo Aramangɛdɔna oma le Jehowa, ayokimanyiya dia nkɛtɛ monga paradiso.—Osam. 37:34.
4. Lande na kayashikɛso ɔnɛ tayotetemala nsala lolango la Jehowa?
4 Lo mɛtɛ nsambisha losango la Diolelo lo andja ɔnɛ woludi l’adɔshi mbidjaka yɛdikɔ yaso ya nsɛna lo yoho yɔtɔnɛ la ndjakimɔ kaso le Jehowa ndo nsala lolango lande l’ohemba. (Jni. 15:19) Koko, tekɔ l’eshikikelo ɔnɛ Jehowa ayotetemala tosha kɛnɛ keso l’ohomba dia nsala lolango lande oko wakandasalɛ Amɔsɛ.—2 Kɔr. 3:5.