Kalasa k’olimu wa teokrasi ka 2015, kayotokimanyiya dia ndowanya wetshelo aso
1 Omembi w’esambo Davidɛ akafunde ate: “Aui wa unyo ami la tukanyi t’utema ami wayali ololo lu ashu aye, we [Jehowa], Dive diami la utshungudi ami.” (Osam. 19:14) Sho lawɔ kombolaka dia ɛtɛkɛta aso ngɛnyangɛnya Jehowa nɛ dia sho mbɔsaka la nɛmɔ diɛsɛ diaso dia mbuta akambo wa mɛtɛ l’etshumanelo ndo l’esambishelo. Kalasa k’olimu wa teokrasi ekɔ yoho mɔtshi yatolowanya Jehowa dikambo di’esambishelo. Olowanyelo ɔsɔ salemaka lomingu tshɛ lo tshumanelo ndekana 111 000 dia l’andja w’otondo. Tɔ kambokimanyiya anangɛso l’akadiyɛso wa l’andja w’otondo ndo w’oma l’ahole wotshikitanyi dia monga esambisha wa lokumu l’ɔlɔlɔ wa tomanamana, wele l’akoka wa mbetsha la diewo dia mbetawoya, la ɔkɔmi, ndo la dihonga.—Ets. 19:8; Kɔl. 4:6.
2 Ekongelo ka kalasa ka lo 2015 kayonga ndo la ɛtɛ w’awui wakasɛdingwama lo biukubuku “Mbɔtwɛlɔ k’Ɔtɛkɛta wa Nzambi” ndo lo “Apandisɛ wa tɔtɛkɛta ta lo Bible” watanema lo Ekadimwelo k’andja w’oyoyo, ndo lo dibuku Étude perspicace des Écritures. Ndo nto, etshikitanu wambosalema lo dikambo dia wenya wakashikikɛma dia akambo w’ohomba w’oma lo wadielo wa Bible ndo sawo No. 1. Etshikitanu ndo alako wendana la woho wayosalema asawo wa lo kalasa asɔ wayɔsɛdingwama l’edingɔ wayela.
3 Akambo w’ohomba w’oma lo wadielo wa Bible: Anangɛso wayolongolaka ɔkɛndɛ ɔsɔ, wayɔsaka minitɛ hiende dia nsɛdingola dui dimɔtshi di’ohomba di’oma lo wadielo wa Bible wa lo lomingu. Ɔlɔngɔswɛlɔ wa dimɛna ekɔ ohomba dia nkahana l’etshumanelo dui dimɔtshi di’ohomba ndo nɛmiya wonya wakawɔsɛkɛ. Koko, etshumanelo wayonga la minitɛ shamalo yatowowashaka dia mbisha kɔmatɛrɛ y’awui w’ohomba wakawatane oma lo wadielo awɔ wa Bible wa lo lomingu l’edja ka sekɔndɛ 30 kana l’ɛse. Dia mbisha kɔmatɛrɛ ka dimɛna l’edja ka sekɔndɛ 30, sho pombaka nɔngɔsɔla ndo ndjaekiya, nɛ dia nsala ngasɔ ekɔ olowanyelo wa dimɛna le so. Ndo nto, dui sɔ diayokimanyiya anangɛso akina dia mbisha kɔmatɛrɛ y’oma l’eyangelo awɔ.
4 Sawo No. 1: Wenya wakawakongɛ dikambo dia wadielo wa Bible wambokitshakitshama lo minitɛ shato kana l’ɛse ndo avɛsa yema tshitshɛ mbayadiemaka. Wanɛ wayolongola ɔkɛndɛ wa mbadia pombaka mbohola mbala la mbala lo mbadiaka la dui dia wolo ndo mbidja yimba lo woho watɛkɛtama tɔtɛkɛta l’oyango wa tokanyi mbokɛma hwe. Ekambi wa Jehowa tshɛ pombaka nsala la wolo dia mbadia dimɛna, nɛ dia wadielo wekɔ ohomba efula l’ɔtɛmwɛlɔ aso. Tekɔ l’ɔngɛnɔngɛnɔ w’efula lo mɛna woho wadia anaso efula dimɛna. Ambutshi mandɔmaka lo welo wa la ngandji wadjawɔ dia nkimanyiya anawɔ dia nkoma ambadi w’amɛna.
5 Sawo No. 2: Sawo nɛ diayoshamaka oma le kadiyɛso kɛmɔtshi l’edja ka minitɛ tshanu. Nde pombaka nkamba l’ɔtɛ a dui wakawawosha. Naka sawo diande mbɔsama oma lo Ekadimwelo k’andja w’oyoyo, kete ombeki pombaka nkamba l’ɔtɛ a dui wakawawosha ndo mbɔtɔnganyiya ɔtɛ a dui akɔ dimɛna la olimu w’esambishelo ndo l’awui wa l’ɛtshi ka nkɛtɛ k’etshumanelo. Naka ɔkɛndɛ ande mbɔsama oma lo dibuku Étude perspicace des Écritures, kete ombeki pombaka mbeka akambo wendana la lokombo l’onto ɔmɔtshi latɛkɛtama lo Bible, nsɔna avɛsa wahomba nkamba la nde ndo mɛnya wetshelo wakokaso nkondja oma le onto akɔ. Nde koka nkotsha ndo avɛsa akina wɔtɔnɛ l’ɔtɛ a dui. Omendji wa kalasa ayowɔsɔnɛka ompokami.
6 Sawo No. 3: Ɔnangɛso kana kadiyɛso kɛmɔtshi mbayoshaka sawo nɛ l’edja ka minitɛ tshanu. Naka kadiyɛso mboshawɔ sawo nɛ, kete nde pombaka disha oko washama Sawo No. 2. Naka ɔnangɛso mboshawɔ sawo nɛ, ko awui akɔ mbɔsama oma lo dibuku Étude perspicace, kete nde pombaka disha oko sawo la ntondo k’ampokami. Ombeki pombaka mɔmbɔla ɔtɛ wa sawo wakawawosha, nsɔna avɛsa wahomba nkamba la nde ndo mɛnya wetshelo wakokaso nkondja oma lo ɛnyɛlɔ k’onto ɔmɔtshi latɛkɛtama lo Bible.
7 Dui di’oyoyo diendana la Sawo No. 3 dikambo di’anangɛso: Naka sawo diakɔ mbɔsama oma lo Mbɔtwɛlɔ k’Ɔtɛkɛta wa Nzambi, kete nde pombaka disha oko ɛnyɛlɔ ka ɔtɛmwɛlɔ wa lo nkumbo kana diɔtɔnganyiya l’olimu w’esambishelo. Mbala tshɛ, omendji wa kalasa mbayɔsɔnaka ɔtɛkɛtshi ndo lokongɛ. Ompokami ande pombaka monga ose nkumbo kande kana ɔnangɛso ɔmɔtshi la l’etshumanelo. Nde koka nkamba l’avɛsa akina waka epole ɔsɛkɛ l’atɔndɔ wa lo Bible wɔtɔnɛ l’ɔtɛ wa sawo. Mbala la mbala, ekumanyi kɛmɔtshi mbayɔsɔnamaka dia nsala etenyi kɛnɛ. Ekumanyi kakɔ koka nsɔna ompokami ndo lokongɛ lalangande. Aha la taamu, ayonga dui di’ekeketshelo le ase etshumanelo lo mɛna woho wakamba ekumanyi la diewo diande dia mbetsha kaamɛ l’ose nkumbo kana l’ɔnangɛso ɔmɔtshi.
8 Dako: L’ɔkɔngɔ wa sawo tshɛ, omendji wa kalasa ayɔsa minitɛ hiende dia mandola ombeki ndo mbosha alako w’ohomba oko wɛnyamidiɔ lo dibuku Kondja Wahɔ oma lo Kalasa k’Olimu wa Teokrasi. Etena kɔtshiya omendji wa kalasa sawo di’ombeki ɔmɔtshi, nde hahombe mbuta ntondo lokongɛ layanga nkamba l’ombeki. L’ɔkɔngɔ w’ombeki mbisha sawo, omendji wa kalasa pombaka mandola ombeki l’otema ɔtɔi, mbuta dako diakakambi l’ombeki ndo mɛnya woho wakandakambi dimɛna la dako diakɔ kana nembetshiya l’ɔkɔmi tshɛ lande na kaki ohomba dia ombeki ndeka mbidja yimba lo dui sɔ.
9 Alako wendana l’ombeki tshɛ tanemaka lo dibuku diele l’ombeki tshɛ dia Kalasa k’olimu lɛkɛ 79 polo 81. L’ɔkɔngɔ w’ombeki mbisha sawo diande, omendji wa kalasa ayodja djembetelo yahombama lo dibuku di’ombeki akɔ ndo ayowombola lo shɔpɔ kana nde akohola dako diendana l’ɔkɛndɛ ande. Ombeki koka mandɔma nto ndo nongola alako akina w’ohomba l’ɔkɔngɔ wa losanganya kana wonya okina. Woho wadjama ombeki wa lo kalasa tshɛ yimba pombaka mbɔsama oko diaaso diawoshawɔ dia mpama lo nyuma.—1 Tim. 4:15.
10 Naka ombeki ambɔlɛ wonya lo sawo diande, kete omendji wa kalasa kana okimanyedi ɔmɔtshi pombaka monga suke dia nsala djembetelo mɔtshi, ɛnyɛlɔ mbida nguga kana mpomɛ dihole dimɔtshi dia mbɛnya lo woshɛshɛ ɔnɛ wonya ande wambokoka. Ombeki pombaka mbeya djembetelo shɔ ko nde shidiya ɔnɔngɔ wadiande kana watɛkɛtande, oma laasɔ ko nde mimɔ oma lo lɔyɛnga.—Enda dibuku Kalasa k’olimu, lk. 282, od. 4.
11 Onto tshɛ lakotsha kɛnɛ kalɔmbama keketshamaka dia mfundja lokombo lo Kalasa k’olimu wa teokrasi. (Enda dibuku Kalasa k’olimu, lk. 282, od. 6.) Wetshelo w’oma lo kalasa kɛsɔ kimanyiyaka ekambi wa Jehowa dia nsambisha ndo mbetsha lokumu l’ɔlɔlɔ la Diolelo la dietawɔ, l’eshikikelo ndo la ngandji. Aha la taamu, anto tshɛ wakondja wahɔ oma lo wetshelo wa lo Kalasa k’olimu wa teokrasi, pombaka ntombola Jehowa.—Osam. 148:12, 13; Is. 50:4.
[Efundelo wa l’etei w’odingɔ wa lo lɛkɛ 5]
Tohame otsha la ntondo lo mbetawɔ ndo nkamba l’alako