Tolowanya akoka aso wa nsambisha—Woho wa nsawola la ompokami aso wele la nkɛlɛ

Ohomba wa dikoka sɔ: Anto efula wahomana laso l’esambishelo wekɔ la loshilambo. Koko, Yeso akatewoyisha di’anto amɔtshi wayotohetsha. (Jni. 17:14) Diakɔ diele, keema dui dia diambo etena kahomanaso la ompokami aso ɔmɔtshi wele la nkɛlɛ. Naka tambohomana la dui dia ngasɔ, sho pombaka nkadimola lo yoho yangɛnyangɛnya Jehowa Ɔnɛ lakanga awui watatasambisha. (Rɔmɔ 12:17-21; 1 Pet. 3:15) Naka sho nsala ngasɔ, kete tayosala diaha mfukutanya akambo. Ndo nto, dui sɔ diayonga tshondo y’esambishelo le ompokami aso, le anto tshɛ wayɛna dui sɔ ndo kɛsɔ ayowakimanyiya dia vɔ ndjohokamɛ Ɛmɛnyi wa Jehowa ekina wayoya dia ndjowaembola.—2 Kɔr. 6:3.

Woho wa nsala dui sɔ:

Tolame wɔladi ndo lɔngɛnyi la dimɛna. Dui sɔ diayotokimanyiya diaha sho mbidja esɔ lo dja. Tatodjake yimba lo kɛnɛ kayosala ompokami aso. (Und. 7:9) Nde mbeyaka momala l’ɔtɛ w’awui ande hita kana l’ɔtɛ wamboyosambisha l’etena ka kɔlɔ. Ompokami aso mbeyaka monga la nkɛlɛ l’ɔtɛ wa losango laso, koko mbala efula vɔ momalaka l’ɔtɛ wewɔ la tokanyi ta kɔlɔ lo dikambo diaso.—2 Kɔr. 4:4.
Kaloya dui la memakana ndo la ɛtɛkɛta w’amɛna. (Tuk. 15:1) Onde wɛ akawemodi oma lo djɔ ko kana akohembodi ɔtɛkɛta? Kaanga mbele sho hatɔlɔmbɛ edimanyielo l’ɔtɛ wambotosambisha onto, wɛ koka mbɔlɔmba edimanyielo l’okitshakitsha tshɛ lo woho wakayosambishisha lo etena kahakoke. Onde nde ekɔ la nkɛlɛ l’ɔtɛ wa dui dimɔtshi dia nkashi diakandoke lo dikambo diaso? Naka ngasɔ, wɛ koka mbotɛ ɔnɛ: “Lamboka mɛtɛ lande na komalayɛ. Koko mɛnamaka dia kɛnɛ kakayoke lo dikambo diaso bu mɛtɛ. Onde dimi koka kolembetshiya?” Onde nde mbidjaka taamu lo dietawɔ diaso dimɔtshi, ɛnyɛlɔ lo kɛnɛ kendana la wotshanyemelo w’onto kana okambelo wa la dikila? Wɛ koka mbotɛ ɔnɛ: “Lamboka. Anto amɔtshi wakikɔ la tokanyi ta ngasɔ. Onde dimi koka kɛnya oma lo Bible lande na ketawɔso dui sɔ?”
Naka ompokami aso ekɔ la nkɛlɛ k’efula, ayonga dimɛna sho minya demba aha la mbokaloya dui. Naka nde ambota dia nde halange Ɛmɛnyi wa Jehowa ndjowenda, tooshikikɛ dia lolango lande layokotshama.

Hemba nsala nganɛ lo ngɔndɔ kɛnɛ:

Nyosale wɛnyɛlɔ etena kasalanyu Ɔtɛmwɛlɔ anyu wa lo nkumbo.
L’ɔkɔngɔ wa nyu mimɔ oma lale ompokami anyu wele la nkɛlɛ, kɛtshanya l’onto latasambisha layɛ woho wakanyakoki mbokadimola lo yoho yoleki dimɛna.