Yanga Dia Mbeya Awui Tshɛ Wele Mɛtɛ

Okakatanu

Tshelo ya nkanɛ anto kɔlɔ ndjaaka mbala efula oma lo nsango ya kashi. Tɔsɛdingole bɛnyɛlɔ diayela nɛ:

Ewandji ɛmɔtshi w’elimu salaka dindja lo mfɔnya ɔnɛ wamato bu la diewo efula dia nkamba elimu walɔmba dia monga la diewo efula, lokalo kana yimba.
Lo Moyen âge, lo Erɔpɛ wakamame ase Juda awui wa kashi ɔnɛ vɔ wambodja lɔlɛngɔ lo tɛkɔ di’ashi ndo diɔ diakɔ diambohandjɔnɛ hemɔ. Lo ɛlɔmbwɛlɔ k’ase Nazi, wakanyomɔsɔngwɛ ase Juda awui wa kashi. Koko mbala kɛnɛ wakaamame ɔnɛ vɔ kamboyokonya dia wodja wa Allemagne monga l’ekakatanu wa wolo wendana la ekondjelo. Awui asɔ wakayokonyaka dia vɔ nkanɛ ase Juda kɔlɔ lo yɛdikɔ y’efula, ndo awui asɔ wekɔ lo ntetemala polo ndo ɛlɔ kɛnɛ.
Anto efula salaka wandja lo mbuta dia onto tshɛ lele la ɛkɔmɔ bu l’ɔngɛnɔngɛnɔ kana lɔsɛnɔ lande lekɔ ololo.

Anto wetawɔ awui asɔ tanaka bɛnyɛlɔ diasukɛ totshelo ta nkanɛ anto kɔlɔ tele lawɔ. Ndo vɔ fɔnyaka dia onto tshɛ lahetawɔ kanyi yawɔ shɔ ekɔ lo dindja.

Tɔndɔ dia lo Bible

“Onto lele bu la ewo bu onto l’ɔlɔlɔ.”—TOKEDI 19:2.

Kakɔna katetsha divɛsa nɛ? Naka hateye awui tshɛ wele mɛtɛ, kete sho mbeyaka ndjɔsa tɛdikɔ ta kɔlɔ. Naka sho mbetawɔ toshimu ta kashi lo dihole dia mbeya kɛnɛ kele mɛtɛ, kete tayokanɛ anto kɔlɔ.

Lande na kele ekɔ ohomba efula mbeya awui wa mɛtɛ wendana l’anto akina?

Naka sho mbeya awui wa mɛtɛ wendana l’anto akina, kete hatotetawɔ awui wa kashi wakoka anto amɔtshi mbuta lo dikambo diawɔ. Ndo kameyaso dia hawotote awui wa mɛtɛ wendana la olui ɔmɔtshi w’anto, kete hatotetawɔ esadi eto kɛnɛ kakatoki lo dikambo di’olui w’anto ɔsɔ.

Ɛnyɛlɔ ka mɛtɛ: Jovica (Balkans)

Jovica, lakatatɛkɛtshi diande lo sawo dietshi lo asawo anɛ, akole lo wodja ande wakandokaka anto wa lɛkɔ wata awui wa kashi, nsango ndo dikongelo dia televiziɔ diasha alapɔlɔ wa kashi lo dikambo dia olui ɔmɔ. Nde mbutaka ate: “Lakayonga la tshelo ya nkanɛ anto kɔlɔ ndo yɔ yakayokonyaka dia mpetsha anto akɔ ndo lakafɔnyaka dia laki la shadiya l’ekanelo kami ka yimba kɛsɔ.”

“Koko etena kakimi l’olimu w’ɔsɔlayi, dimi lakahombe paka nsɛna ndo nkamba kaamɛ l’asɔlayi w’oma l’olui w’anto ɔsɔ. L’edjedja ka wonya, lakayekaka awui efula wendana la wɔ. Lakayotatɛ ndo mbeka ɔtɛkɛta awɔ ndo mpokamɛ mishiki awɔ. Lakayotatɛ ngɛnangɛna monga la wɔ kaamɛ ndo lakayotshikitanyaka ekanelo kami ka yimba. Koko, lakeyaka dia tshelo yami ya nkanɛ anto kɔlɔ mbeyaka nyomokalolɛ nto. Ɔnkɔnɛ, lakayewɔka dia mpokamɛ awui wa kɔlɔ wakawataka lo dikambo diawɔ. Ndo nto, handjenda filimɛ kana tɔsɛkɛsɛkɛ takasalaka anto dia mɔnyɔla anto asɔ. Dimi mbeyaka dia nsaki ka nkanɛ anto kɔlɔ kɛsɔ kokaka mpama ko ndjokoma dia monga la nkɛlɛ otsha le onto ndo mbohetsha.”

Kɛnɛ kakokayɛ nsala

Ohɔ dia anto mbeyaka mbuta awui wa kashi lo dikambo di’olui ɔmɔtshi w’anto, koko eya dia efula k’anto wa l’atei w’olui w’anto ɔsɔ bu la waonga asɔ.
Eya dia wɛ heye oseka kiambokambo tshɛ yendana l’anto akina.
Sala dia mbeya awui wa mɛtɛ oma lo tɔkɔkɔ t’eshika.