Dihindo dia lo Ndjale ka Beela

Kam’akoke Farawɔ di’ase Isariyɛlɛ wambotomba oma l’Edjibito, nde akatshikitanya kanyi yande lo woho wakandaatondja. Nde akadjangɛ andɔshi ande wa ta ate: ‘Nyɔlɔngɔsɔlɛ pusupusu yanyu ya ata ndo nyɛsɔ tayele! Takatakoki mbatshika dia vɔ ntshɔ.’ Nde l’apami ande wakatatɛ ndjela ase Isariyɛlɛ.

Jehowa akatalɔmbɔlaka anto ande lo nkamba la ekundji ka dinge la yanyi ndo la ekundji ka dja l’otsho. Nde akaatome otsha lo Ndjale ka Beela ndo akawatɛ dia vɔ mpanga lɛkɔ.

Oma laasɔ, ase Isariyɛlɛ wakɛnyi Farawɔ la asɔlayi ande wayawatshanya. Vɔ waki lo shasa lam’asa ndjale la asɔlayi w’ase Edjibito. Ase Isariyɛlɛ wakalelɛ Mɔsɛ vate: ‘Sho tayanga mvɔ! Wɛ otototshika l’Edjibito.’ Ko Mɔsɛ akate ate: ‘Tanyokake wɔma. Nyokonge ndo nyende woho wayanga toshimbɛ Jehowa.’ Mɔsɛ akayaɛkɛ mɛtɛ le Jehowa, shi ngasɔ?

Jehowa akatɛ ase Isariyɛlɛ dia vɔ monɛ oma lo mpango. L’otsho ɔsɔ, Jehowa akanya dinge ko dikitsha lam’asa ase Edjibito la ase Isariyɛlɛ. Lo wedi w’ase Edjibito, wodjima wakikɔ. Koko, lo wedi w’ase Isariyɛlɛ, osase wakikɔ.

Jehowa akatɛ Mɔsɛ dia nsembola lonya lande laadiko dia ndjale. Ko Jehowa akatome lɔpɛpɛ la wolo otsho w’otondo. Ndjale kakatema l’ahende ndo otadimbo waki l’atei. Miliyɔ y’ase Isariyɛlɛ, wakakɛndakɛnda lo nkɛtɛ y’ofumbo lam’asa mpele di’ashi otsha lo wedi okina.

Asɔlayi wa Farawɔ wakayele ase Isariyɛlɛ lo nkɛtɛ y’ofumbo. Ko Jehowa akadje asɔlayi lo lofunge. Etshimbi wa pusupusu yawɔ wakatatɛ mongɔ. Asɔlayi wakade ekoko vate: ‘Nyɛsɔ tolawɔ oma lanɛ! Jehowa ekɔ lo mbalwɛlɛ.’

Jehowa akatɛ Mɔsɛ ate: ‘Sembola lonya layɛ laadiko dia ndjale.’ Mbala kakɔ ɔtɔi, mpele di’ashi diakakumɛ asɔlayi w’ase Edjibito. Farawɔ la asɔlayi ande tshɛ wakavu. Ndooko kaanga ɔtɔi lakake.

Lo wedi okina wa ndjale, olui a woke wakatombolaka Nzambi la osambo ɔnɛ: “Nyembee Jehowa, nɛ dia nde ambodja otshumba la lotombo. Nde ambodindja mfalasa la ombahemi atɔ lo ndjale.” Etena kakembaka anto, wamato wakanɔka lokombe ndo wakahomaka ngɔmɔ. Onto tshɛ aki l’ɔngɛnɔngɛnɔ woho wambowotshungɔ.