Kahanya minitɛ dimɛna ndo tenyi dia lo sawo

KÂNGA mbele oyango ayɛ wa ntondo ekɔ wa mbisha wetshelo wa dimɛna, sunganaka nto mbidja yimba lo yɛdikɔ ya wenya yakawakosha. Nsanganya yaso yakakongɛma dia tatɛ ndo komɛ la wonya weyama shikaa. Dia sho ndjitatɛ ndo ndjikomiya la wonya, wanɛ tshɛ wele l’asawo lɔkɔ pombaka nɛnya wonya.

Aha woho wɔsama lɔsɛnɔ l’ahole efula ɛlɔ kɛnɛ, mbakaliɔsamaka lo nshi yakafundamaka Bible. Lo nshi yakafundamaka Bible wenya kɔmbɛdikamaka lo yoho ya shikaa, ɛnyɛlɔ dia mbɛdika wakataka ɔnɛ ‘oko l’eshidi esato’ kana “uku l’eshidi dikumi.” (Mat. 20:3-6; Joa. 1:39) Vɔ kondekaka ndjakiyanya lo wenya shikaa wakahombamaka elimu wa lushi la lushi kambema. Ɛlɔ kɛnɛ, ngasɔ mbɔsama wenya l’ahole amɔtshi wa l’andja.

Koko, kânga mbakoka mbekelo ya lo ngelo kana lolango l’onto konya anto di’aha vɔ ndjakiyanya efula dia nɛmiya wonya, sho koka kondja wahɔ lo mbidjaka yimba dimɛna lo dikambo sɔ. Naka anto efula wayonga l’asawo wa mbisha lo losanganya lɔmɔtshi, kete onto l’onto pombaka nɛnya yɛdikɔ ya wonya y’etenyi tshɛ. Sho koka kamba la dako diata ɔnɛ ‘akambo tshɛ wete dimɛna ndo aha l’ofukutanu’ lo kɛnɛ kendana la yɛdikɔ ya wonya yele l’asawo tshɛ wa lo losanganya laso.​—1 Kor. 14:40.

Kahanya minitɛ dimɛna. Kɛnɛ koleki ohomba ele ndjalɔngɔsɔla. Mbala efula atɛkɛtshi watɔlɛka wenya kondjalɔngɔsɔla dimɛna. Kana wɛna dia le wɔ, mbisha sawo ekɔ dikambo dia tshitshɛ. Kana wele vɔ ndjɔlɔngɔsɔlaka sawo diakɔ paka aya k’emembe. Dia wɛ nɛnya wenya, paka ntondo wɛ ngɛnangɛna awui wa lo sawo diayɛ ndo mona woho wa ndjalɔngɔsɔla dimɛna.

Onde sawo diayɛ mendanaka la wadielo? Naka eelo, kete ntondotondo vusola Wekelo 4 polo 7 wendana la lolimi l’ɔsɛlɔ, diomuyelo, ɔtɔtɔmiyelo, ndo woho wa mbika epole ɔsɛkɛ lo tokanyi toleki ohomba. Oma lâsɔ ko wɛ kamba la dako sɔ etena kadiayɛ awui wakawakosha la dui dia wolo. Ɛdika wonya wɛmamɛ. Onde ayohomba wɛ mbadia esadi esadi dia shidiya lo yɛdikɔ ya wonya yakawakosha? Eta esadi esadi l’ahole wele bu ohomba efula, koko kotomuyaka ndo kotakitshakitshaka vitɛsɛ dia mbika epole ɔsɛkɛ lo tokanyi t’ohomba. Hemba mbala efula. Naka wɛ adia aha la kakema, kete hatonga wolo dia wɛ nɛnya wonya.

Onde wɛ ayɔtɛkɛta l’ekimanyielo ka kɛnɛ kakayafunde lo dikatshi? Bu ohomba funda awui efula amboleka, watekana oko sawo dia ladia, di’aha wɛ ndjɔlɛ wenya. Lo Wekelo 25, wɛ akeke yoho ya dimɛna efula ya sala. Kimɛ awui atanu anɛ: (1) Lɔngɔsɔla awui w’amɛna, koko aha wamboleka efula. (2) Onga la tokanyi toleki ohomba l’ɔtɛ, koko aha kimɛ etondo w’ɛnɔngɔ lo yimba. (3) Funda l’ekongelo kayɛ yɛdikɔ ya wonya yayoyosala l’etenyi tshɛ ka sawo diayɛ kana wenya wahombayɛ mbetsha etena kakomayɛ l’awui amɔtshi. (4) Etena kayalɔngɔsɔlayɛ, enda awui wakokayɛ totamba naka wɛ ambɛna dia wɛ ayanga ndɛ wenya. (5) Hemba sawo diayɛ.

Wohwelo wekɔ ohomba. Etena koholayɛ, dja yimba lo yɛdikɔ ya wonya yele l’etenyi tshɛ ka sawo diayɛ. Ohola sawo diayɛ di’otondo mbala efula edja ndo wɛ ɔlɛnya yɛdikɔ ya wonya yakawakosha. Tɔlɔngɔsɔlake awui wamboleka efula. Susa yema ya wenya woho wa tshika minitɛ mɔtshi nɛ dia mbisha sawo la ntondo k’anto tolekaka mbɔsa wenya oleki etena kaholayɛ wɛmamɛ.

Okahanyelo wa tenyi dia sawo. Okahanyelo wa dimɛna wa yɛdikɔ ya wonya nemanɛka la woho wayokahanyema sawo lo tenyi. Wenya efula pombaka mbɔsama l’etenyi ka lam’asa mbɔtwɛlɔ la ndjihelo, nɛ dia l’etenyi kɛsɔ mɔmbɔma akambo woleki ohomba. Mbɔtwɛlɔ pombaka monga paka l’otale wahomba kokimanyiya dia kotsha eyango esato wɔtɛkɛtami lo Wekelo 38. Ndo etenyi ka l’asa mbɔtwɛlɔ la ndjihelo hahombe monga otale wamboleka di’aha wɛ ndjohomba wenya wa komiya sawo diayɛ lo ndjela kɛnɛ katama lo Wekelo 39.

Welo wayoyodja dia kahanya wenya dimɛna ayokokimanyiya dia mbisha sawo dia dimɛna efula ndo ayɛnya dia wɛ kanɛka anto akina wele l’asawo lo losanganya lakɔ lâmɛ ndo ɔnɛ wɛ kanɛka etshumanelo k’otondo.