Woho wa mbisha dako dia dimɛna

DIKUMANYI di’Akristo pombaka monga l’akoka wa ‘ndaka anto l’ekimanyielo ka wetshelo washa panda.’ (Tito 1:9) Mbala mɔtshi, vɔ nɔmbamaka dia sala dikambo sɔ lam’atomba ekakatanu wa wolo efula. Ekɔ ohomba mbisha alako wɔtɔnɛ la kɛnɛ kalɔmba Afundelo. Diakɔ diahomba dikumanyi kitanyiya dako nɛ: ‘Otetemale sala la wolo dia mbeya ndaka.’ (1 Tim. 4:13) Kânga mbele lanɛ dikumanyi mbalɔmbawɔ ntondo dia sala dikambo sɔ kana wanɛ wakombola diɛsɛ sɔ, tena dimɔtshi ambutshi pombaka ndaka anawɔ kana wanɛ weka l’anto Bible ndaka ambeki awɔ. Lo tena sɔ, vɔ lawɔ wayohomba kitanyiya alako akɔ wamɛ.

Tena diele dako ohomba. Dia mbeya etena konga dako ohomba, ekɔ ɔlɔlɔ sɛdingola akambo wɔkɔndwami lo Bible l’ahole wakashama alako. Ɔpɔstɔlɔ Petero akalake dikumanyi dia mbidja yimba dimɛna l’ɔkɛndɛ awɔ w’anami w’ɛkɔkɔ waki Nzambi. (1 Pet. 5:1, 2) Paulo akalake Tito dia nde ndaka ɛlɔngɔ w’apami dia “ndjala la etema wa ki.” (Tito 2:6) Paulo akakeketsha anyande Akristo dia “mvuta diui otoi” ndo mbewɔ anto walanga mbidja diatɔnelo l’atei w’anangɛwɔ. (1 Kor. 1:10; Romo 16:17; Fil. 4:2) Kânga mbakandola Paulo as’etshumanelo ka la Tɛsalɔnika l’ɔtɛ w’akambo w’ɔlɔlɔ wakawasalaka, nde akâlake dia vɔ nyomoleka kamba dimɛna la wetshelo wakawalongola. (1 Tes. 4:1, 10) Petero akalɔmbɛ anyande Akristo ate “nyoseke saki ya dimba.” (1 Pet. 2:11) Jude akalake anango dia ‘ndɔ ta dia wolo dia mbetawɔ’ lo kɛnɛ kendana la tɔsɛngiya t’oma le anto wa kɔlɔ wakayakimɔ l’awui wa mindo. (Jude 3, 4) Akristo wakakeketshama dia ndakana lam’asawɔ di’aha ndoko onto mbahemamɛ la nkudu ka kɔlɔ kele la pɛkato. (Heb. 3:13) Petero akalake ase Juda waki watonge la mbetawɔ le Kristo ɔnɛ: “Nyuyashimbeli uma lu lolonga la kolo lone.”​—Etsha 2:40.

Naa waonga wahombama dia mbisha alako w’eshika la ntondo k’akambo wa ngasɔ na? Ngande wakoka ɔnɛ lalaka onto mɛnya dia alako akɔ wekɔ ohomba efula aha la nde mbatondjɛ ɛtɛkɛta wa wolo ndo wakoka mbaomadja?

‘La ngandji.’ Naka hatosha dako diaso ‘la ngandji,’ kete diayɔsama oko diamboleka wolo. (File. 9) Lo mɛtɛ, naka yɛdikɔ pombaka mbɔsama esadi, kete ɔtɛkɛtshi la dia mɛnya dikambo sɔ lo wendjo w’ɛtɛkɛta ande. Tɛkɛta la wɔlamu tshɛ koka mɛnya oko bu ohomba mbɔsa yɛdikɔ esadi. L’etena kakɔ kamɛ, dako pombaka mbishama l’otema ɔtɔi ndo la nsaki k’efula. Dako dia la ngandji mbeyaka ndeka tshutshuya ampokami dia mbɔsa yɛdikɔ. Lam’akandatɛkɛtaka lo dikambo diande ndamɛ ndo dia anyande, Paulo akatɛ ase Tɛsalɔnika ate: “Nyu mbeyaka uku akatanyutshela untu l’untu, uku atutshelaka shi an’andi.” (1 Tesalonika 2:11) Emendji w’Akristo asɔ wakalakaka anangɛwɔ la ngandji tshɛ. Ɛtɛkɛta ayɛ wɛnya dia wɛ ndjashaka l’otema ɔtɔi le ampokami ayɛ.

Onga l’ɔkɔmi. Tokomake otunyi w’anto walɔmbayɛ dia vɔ mbɔsa yɛdikɔ. Koko, toyakimɛke dia mbutɛ ampokami ayɛ ‘alako tshɛ waki Nzambi.’ (Etsha 20:27) L’atei w’ampokami ayɛ, wanɛ wele la lowando l’alako wolongodiwɔ hawotokɔsa oko ɔndɔshi awɔ kana ngandji kawɔ oya le yɛ kitakita nɛ dia wɛ akalaki la ngandji dia sala kɛnɛ kele ɔlɔlɔ.​—Osam. 141:5.

Mbala efula, la ntondo ka ndaka onto, paka tatɛ mbândola l’otema ɔtɔi. Kanyiya akambo w’ɔlɔlɔ wasala ananyɔ, akambo wahomba ngɛnyangɛnya Jehowa, ɛnyɛlɔ: mbetawɔ kɛnama oma l’etsha awɔ, ngandji kâtshutshuya dia ndjaketembola, ndo etetemalelo kele lawɔ l’atei w’ekakatanu wa wolo. (1 Tes. 1:2-8; 2 Tes. 1:3-5) Kɛsɔ ayokimanyiya ananyɔ dia vɔ mboka dia wɛ ekɔ lo mbɔsama la nɛmɔ ndo ekɔ lo ndjadja lo dihole diawɔ, ndo dui sɔ diayowakimanyiya dia monga suke dia kitanyiya alako wayoyowasha oma lâsɔ.

“La memakana tshe.” Dako pombaka mbishama “la memakana tshe.” (2 Tim. 4:2) Kakɔna kalembetshiya dikambo sɔ na? Memakana nembetshiyaka mbikikɛ akambo wa kɔlɔ kana ɔsɔmbwɛlɔ. Ɔtɛkɛtshi wele la memakana nongamɛka di’ampokami ande wayokamba la kɛnɛ katande. Mbisha dako lo yoho shɔ ayoshimba ampokami ayɛ di’aha vɔ mbɔsa oko wɛ ekɔ lo mbakanɛ kɔlɔ. Mbetawɔ kele layɛ ɔnɛ ananyɔ l’akadiyɛyɛ nangaka kambɛ Jehowa lo yɛdikɔ tshɛ yɛdimi l’akoka awɔ ayowatshutshuya dia vɔ sala kɛnɛ kele ɔlɔlɔ.​—Heb. 6:9.

‘L’ekimanyielo ka wetshelo wele ɔlɔlɔ.’ Ngande wakoka ekumanyi ‘ndaka l’ekimanyielo ka wetshelo wele ɔlɔlɔ’ na? Ele lo ‘ndjakakatanya la wolo tshɛ l’ɔtɛkɛta wa kɔlamelo lo kɛnɛ kendana la diewo dia ndakanya.’ (Tito 1:9) Lo dihole dia wɛ mbisha kanyi yayɛ hita, alako ayɛ watombe oma l’Ɔtɛkɛta wa Nzambi. Bible akokimanyiya dia mbeya kɛnɛ kahombayɛ mbuta. Shila ɛlɔlɔ wayowokondja naka vɔ kamba la kɛnɛ kata Bible lo dikambo dialakayɛ. Ɛnya kɛnɛ kakoka mbakomɛ nshi nyɛ kana lo nshi yayaye naka vɔ tona kitanyiya kɛnɛ kâlɔmba Ɔtɛkɛta wa Nzambi, ndo kamba l’awui asɔ dia mbetawoya ampokami ayɛ ohomba wa mbɔsa yɛdikɔ yahombama.

Yashikikɛ dia wɛ ambolembetshiya ampokami ayɛ dimɛna kɛnɛ kahombawɔ sala ndo nganɛ wahombawɔ kisala. Ɛnya hwe dia kɛnɛ kakanayɛ la wɔ yimba tomba oma l’Afundelo. Naka Afundelo mbishaka lotshungɔ la mbɔsa tɛdikɔ tɔmɔtshi, kete ɛnya polo lo yɛdikɔ yakɔna yasha Afundelo lotshungɔ lɔsɔ. Oma lâsɔ, l’ɛtɛkɛta ayɛ wa ndjihelo, keketsha ampokami ayɛ lo yoho yayowatshutshuya dia mbɔsa yɛdikɔ mɔtshi.

La ‘ɛtɛkɛta wahonola dikambo.’ Dia ndaka anto akina dimɛna, onto la dia monga l’‘ɛtɛkɛta wahonola dikambo lo mbetawɔ.’ (1 Tim. 3:13) Kakɔna kakimanyiya onto dia tɛkɛta aha la dinyadinya dikambo na? Naka ‘ɛnyɛlɔ kande k’ɔlɔlɔ’ mbɔtɔnɛka la kɛnɛ kalɔmbande anango dia sala. (Tito 2:6, 7; 1 Pet. 5:3) Naka ekɔ ngasɔ, kete wanɛ wakeketshama dia mbɔsa yɛdikɔ wayɛna dia ɔnɛ lawasha dako halongamɛ dia vɔ sala kɛnɛ kele ndamɛmɛ hakisale. Vɔ wayɛna dia vɔ koka mbokoya mbetawɔ kande, oko wayatshutshuyande dia mbokoya kɛnɛ kaki Kristo.​—1 Kor. 11:1; Fil. 3:17.

Dako diotombi oma l’Ɔtɛkɛta wa Nzambi ndo dioshami la ngandji koka monga l’etombelo w’ɔlɔlɔ efula. Wanɛ washawɔ ɔkɛndɛ wa sala dui sɔ, pombaka sala la wolo dia disha dimɛna.​—Romo 12:8.