‘Onde Nzambi bu la losembwe?’

1. Ngande watotonsalaka etena kɛnaso akambo waha la losembwe?

WAMBƆKƆSƆLA osombe ɔmɔtshi wa womoto wa wadi aki odo kɛnɛ tshɛ kele la nde. Womoto ɔmɔtshi la djele ambokasha ɔnande. Wambodja pami kɛmɔtshi kaki kokongola ndooko onongo lo lokanu. Aha la taamu, ndo mbokɛmaka dia akambo asɔ asato waha la losembwe koshaka paa l’asolo. Nsaki ka wolo kele laso ka tshikitanya kɛnɛ kele ɔlɔlɔ la kɔlɔ toshaka nkɛlɛ etena kasalema akambo waha la losembwe. Sho nangaka di’onto losalewɔ kɛnɛ kele bu losembwe futama, k’onto losadi akambo wele bu losembwe kondja dilanya. Ndo naka dikambo sɔ hasalemi, kete sho koka ndjambola dia kana Nzambi mɛnaka kɛnɛ keta, ndo lande na kahandekɛ lonya?

2. Kakɔna kakasale Habakuka la ntondo k’awui waha la losembwe wakandɛnaka, ndo lande na kaki Jehowa kombohangwɛ lo dikambo sɔ?

² Oma k’edjedja, ekambi wa kɔlamelo wa Jehowa wokoyambolaka ambola wa woho ɔsɔ. Ɛnyɛlɔ, omvutshi Habakuka akambola Nzambi ate: “Lande na kamɛnyayɛ awui wa kɔlɔ? Lande na ketawɔyɛ awui wa ngala, awui wa kɔlɔ, diakatanelo ndo awui w’esehe ahole tshɛ?” (Habakuka 1:3, Contemporary English Version) Jehowa kompangwɛ Habakuka lo woho wakandakɛnɛmɔla kɛnɛ kaki l’otema ande lo dikambo sɔ, nɛ dia Ndamɛ mbakadje kanyi ya losembwe l’otema w’onto. Mɛtɛ, Jehowa mbakatosha diɛsɛ dia monga la yema ya kanyi yande ya losembwe la laande.

Jehowa petshaka kɛnɛ kele bu losembwe

3. Lande na kele Jehowa toleka mbeya awui wele bu losembwe?

³ Jehowa mɛnaka akambo wele bu losembwe wasalema. Ndooko dikambo ɔtɔi diahandɛnyi. Bible totɛka lo kɛnɛ kendana l’akambo waketaka lo nshi ya Nɔa ɔnɛ: “Jehowa akɛnyi dia kɔlɔ k’anto kaki efula la nkɛtɛ, ndo tokanyi t’etema awɔ tshɛ mbɛlɛka otsha lo kɔlɔ keto nshi tshɛ.” (Etatelo 6:5) Onde wɛ shihodiaka kɛnɛ kalembetshiya ɛtɛkɛta ɛsɔ? Mbala efula, woho wɛnaso akambo waha la losembwe ndjaka tsho oma lo tokambokambo tɔmɔtshi takatoke kana takatɛnyi shoamɛ, koko, Jehowa, mɛnaka akambo waha la losembwe wasalema l’andja w’otondo. Nde mɛnaka awui asɔ lo tshɛ kawɔ! Nde mɛnaka kaanga nsaki ya l’etema, mbuta ate tokanyi ta kɔlɔ tayokonyaka onto dia nsala awui wele bu losembwe.​—Jɛrɛmiya 17:10.

4, 5. a) Ngande wɛnya Bible dia Jehowa ndjakiyanyaka di’anto wahawasalɛ akambo la losembwe? b) Ngande wakanandema Jehowa ndamɛ la kɛnɛ kele bu la losembwe?

⁴ Koko Jehowa hakomɛ tsho lo mɛna awui wele bu losembwe. Nde ndjakiyanyaka nto dikambo di’anto wahawasalɛ akambo la losembwe. Etena kakahɛnyahɛnyamaka ekambi ande oma le wedja w’atunyi l’esehe tshɛ, Jehowa aki la lonyangu “lam’akandoke akumu wakawakumaka l’ɔtɛ wakawaahɛnyahɛnyaka ndo wakawaasɔkishaka.” (Embadi 2:18) Ondo wɛ ambɛnaka dia lam’ataleke anto mɛna awui waha la losembwe, mbatawaleke ndo nkoma ko hawoyoka wanɛ wasowa l’awui akɔ kɛtshi, koko aha ngasɔ mbediɔ le Jehowa! Aya ɛnɔnyi oko 6000 wɛnande awui waha la losembwe, koko lohetsho lele lande otsha l’awui asɔ hatshikitana kaanga yema tshitshɛ. Bible toshikikɛka woho wahetshande akambo wele oko “lolemi lata kashi, anya wakɛdia dikila diaha la onongo,” ndo “Ɔmɛnyi wa kashi watotaka kashi oko wahɛngande.”​—Tokedi 6:16-19.

⁵ Tende nto nkɛlɛ ka mamba kaki lande otsha le ewandji w’ase Isariyɛlɛ waki komonga la losembwe. Nde akawambola lo tshimbo y’omvutshi ande ate: “Onde nyu hanyohombe mbeya kɛnɛ kele ɔlɔlɔ?” L’ɔkɔngɔ wa nde ntɛkɛta la ɛtɛkɛta wa wolo woho wakawakambaka la lowandji lawɔ lo yoho ya kɔlɔ, Jehowa akate kɛnɛ kakahombe nkomɛ apami wa kɔlɔ asɔ ate: “Wayolelɛ Jehowa dia nyanga ekimanyielo, koko Nde hatowakadimola. Nde ayoshɛ elungi kande oma le wɔ l’etena kɛsɔ, l’ɔtɛ w’etsha awɔ wa kɔlɔ.” (Mika 3:1-4) Jehowa petshaka mɛtɛ awui waha la losembwe! Ngasɔ mbediɔ, nɛ dia ndamɛ mbele onto la ntondo lakanandema l’awui waha la losembwe! Aya nunu di’ɛnɔnyi diosola Satana lo yoho yaha la losembwe. (Tokedi 27:11) Ndo nto, dikambo dioleki tshɛ kɔlɔ di’aha la losembwe diakawasalɛ Jehowa ele woho wakawadiake Ɔnande lele “kosala pɛkato” oko otshi wa kɔlɔ. (1 Petero 2:22; Isaya 53:9) Jehowa mɛnaka ndo nde hanya yimba lo paa yele l’anto wahawasalɛ akambo la losembwe.

6. Ngande wakokaso nsala lam’ɛnaso awui wele bu la losembwe, ndo lande na?

⁶ Diakɔ diele, ekɔ dimɛna dia sho ndjakiyanya la ntondo k’awui wele bu la losembwe, oyadi wɛnaso wasalɛ anto akina kana watosalɛwɔ. Takatongama lo efanelo ka Nzambi, ndo awui waha la losembwe hawɔtɔnɛ kaanga yema la lonto la Jehowa. (Etatelo 1:27) Ko lande na katshika Nzambi dia awui wele bu la losembwe salema?

Dui di’ohomba efula

7. Lembetshiya woho wakɔnyɔma lokombo la Jehowa ndo yoho yande ya nɔmbɔla.

⁷ Okadimwelo lo dimbola sɔ mendanaka efula la dui di’ohomba efula. Oko wakatadiɛnyi, Otungi ekɔ la lotshungɔ la monga owandji wa nkɛtɛ k’otondo ndo w’anto tshɛ wodjashi lɔkɔ. (Osambo 24:1; Ɛnyɛlɔ 4:11) L’etatelo k’ɔkɔndɔ w’anto, lokombo la Jehowa lakalanyema ndo yoho yande ya nɔmbɔla yakɔnyɔma. Ngande wakasalema dikambo sɔ? Jehowa akasekɛ Adama laki onto la ntondo, di’aha nde ndɛ olowa w’oma l’otamba ɔmɔtshi waki l’ekambɔ k’Ɛdɛna lo mbotɛ ate: “Lushi layoyɔlɛ, wɛ ayovɔ.” (Etatelo 2:17) Kaanga mbele ɔlɛmbɛ ɔsɔ kopondjaka Adama la Eva ndooko ɛngɔ, Satana aketawoya Eva dia Nzambi akasuse lotshungɔ lawɔ l’okonda tshɛ. Kakɔna kakahombe salema naka Eva ndɛ olowa? Satana akawotɛ ate: “Hanyotovɔ mɛ. Nɛ dia Nzambi mbeyaka ɔnɛ lushi layonyɔlɛ elowa w’oma lɔkɔ, washo anyu wayodihɔ ko nyayoyala oko Nzambi, ndo nyayeya kɛnɛ kele ɔlɔlɔ la kɛnɛ kele kɔlɔ.”​—Etatelo 3:1-5.

8. a) Kakɔna kakalange Satana mbuta lo sawo diande nde la Eva? b) Kakɔna kakadje Satana taamu lo kɛnɛ kendana la lokombo ndo lowandji la Nzambi?

⁸ Satana akɛnya oma l’ɛtɛkɛta ande dia Jehowa konanga mbutɛ Eva dikambo dimɔtshi di’ohomba efula, koko nde akookese. Ohembanyi akakonya Eva dia ndjambola woho w’onto waki Jehowa. Satana akɛnya dia Nzambi aki onto la kɔlɔ. Ndo nde akadje taamu lo lowandji la Jehowa kana yoho yande ya nɔmbɔla. Satana kombidja taamu lo kɛnɛ kendana la mɛtɛ ka lowandji laki Nzambi. Kɛnɛ kakandadje taamu ko losembwe, dikoka ndo lotshungɔ la lowandji lɔsɔ. L’ɛtɛkɛta ekina, nde akalange sɛma dia Jehowa holɛ lo yoho ya losembwe ndo lo wahɔ w’ekambi Ande.

9. a) Etombelo akɔna wakakondja Adama la Eva oma l’ohedia awɔ, ndo ambola akɔna w’ohomba wakonyiya dikambo sɔ? b) Lande na kaki Jehowa kondjaka atɔmbɔki asɔ paka ko wonya akɔ?

⁹ Adama la Eva kokitanyiya Jehowa nɛ dia wakale olowa wakasekɛma. Ohedia awɔ akakonya lo nongola dilanya dia nyɔi paka oko wakadjanga Nzambi. Koko kashi kakate Satana akonyiya ambola amɔtshi w’ohomba: Onde Jehowa ekɔ mɛtɛ la lotshungɔ la mbolɛ anto, kana anto pombaka ndjalɔmbɔla vɔamɛ? Onde Jehowa kambaka la lowandji lande lo yoho ya dimɛna? Oko wende Kanga-Wolo-Tshɛ, Jehowa akakoke nkamba la wolo ande dia ndjaka atɔmbɔki asɔ tshɛ paka ko wonya akɔ. Koko Satana aha lo dikambo dia wolo wele la Nzambi mbakandadje taamu koko dia woho wakambande la lowandji lande. Diakɔ diele, Jehowa totondɛnya dia nde nɔmbɔlaka la losembwe lo ndjaka Adama, Eva, ndo Satana. Koko dikambo sɔ diotoyoleka monyiya ambola akina efula aha lo kɛnɛ kendana la wolo wa Nzambi, koko lo kɛnɛ kendana la lokombo lande ndo yoho yande ya nɔmbɔla. Yoho yamɛ ya dimɛna ya menda kana anto koka ndjalɔmbɔla dimɛna vɔamɛ, aha l’ekimanyielo ka Nzambi, aki ya mbaatshikɛ etena ka vɔ nsala dikambo sɔ.

10. Kakɔna kambɛnya ɔkɔndɔ lo kɛnɛ kendana la ɛlɔmbwɛlɔ k’ana w’anto?

¹⁰ Kakɔna kambɛnya etena kambeta lo dikambo sɔ? Aya nunu di’ɛnɔnyi diambohemba anto weho tshɛ wa dɔmbwɛlɔ, ɛlɔmbwɛlɔ ka hiadi, ka demɔkrasi, ka socialisme, ndo ka communisme. Koko, etombelo w’oma lo weho wa dɔmbwɛlɔ sɔ tshɛ mbutama l’ɛtɛkɛta w’oma lo Bible wata hwe ɔnɛ: ‘Onto mbolɛka wonayande onto dia mbosalɛ kɔlɔ.’ (Ondaki 8:9) Diakɔ diakate omvutshi Jɛrɛmiya ɔnɛ: “Jehowa le, dimi mbeyaka dimɛna dia onto bu l’akoka wa ndjalɔmbɔla. Lam’akɛndakɛnda onto, nde bu la lotshungɔ la nɔmbɔla kaanga ekolo ande.”​—Jɛrɛmiya 10:23.

11. Lande na kakatshike Jehowa di’anto nsowa?

¹¹ Jehowa akeye oma k’etatelo dia anto wayodiɛnɛ la asui naka vɔ ndjalɔmbɔla vɔamɛ. Ko onde woho wakandatshike di’anto ndjalɔmbɔla vɔamɛ ndo diɛnɛ l’asui w’oma lo dikambo sɔ lo tshanda mɔtshi akɛnya dia nde bu la losembwe? Ndooko! Ɛnyɛlɔ: Ohɔsa dia wɛ ekɔ l’ɔna lahomba nsala epaso ɔmɔtshi wa wolo efula dia nshidiya hemɔ kele la nde. Solo diayɛ diayolongola efula etena keyayɛ dia epaso ɔsɔ ayosha ɔna paa. Koko wɛ mbeyaka nto dia epaso ɔsɔ ayokimanyiya ɔnayɛ dia ndjonga la demba dia dimɛna l’ɔkɔngɔ. Woho akɔ waamɛ mbele, Jehowa akeyaka ndo akate dia naka nde ntshika anto dia ndjalɔmbɔla vɔamɛ, vɔ wayonga l’ekakatanu ndo l’asui. (Etatelo 3:16-19) Koko nde akeyaka nto ɔnɛ dia anto nkondja etshungwelo ka pondjo ndo ka dimɛna oma lo paa, akahombe ntshika etena dia vɔ mɛna etombelo wa kɔlɔ w’oma l’ɔtɔmbɔkwɛlɔ. Ngasɔ mbakahombe dikambo diendana la lowandji la Nzambi nshila mbala ɔtɔi ndo lo pondjo.

Dikambo dia olowanyi w’anto

12. Oko wadiɛnya ɛnyɛlɔ ka Jɔbɔ, akambo akɔna wa kɔlɔ wakatɛkɛta Satana lo dikambo di’anto?

¹² Lam’akandatone losembwe ndo lotshungɔ l’ɛlɔmbwɛlɔ ka Nzambi, Satana kokomɛ tsho lo ntɛkɛta akambo wa kashi lo lokombo la Jehowa lo kɛnɛ kendana la lowandji lande. Nde akatɛkɛta nto akambo wa kashi lo dikambo di’ekambi wa Nzambi, lo mbidja olowanyi awɔ taamu. Enda woho wakandatɛ Jehowa lo dikambo diaki Jɔbɔ laki onto ɔlɔlɔ ate: “Shi wɛ akoodinge nde la luudu lande la diangɔ diande tshɛ la lokombo l’ekokelo? Wɛ akatshɔkɔla olimu w’anya ande ndo dongalonga diande diambofulanɛ lo wodja. Koko dia awui ntshikitana, ohosembola lonya layɛ kele kɔmɔla kɛnɛ tshɛ kele la nde, ndooko onyake nde ayokodja mananu ko washo ayɛ.”​—Jɔbɔ 1:10, 11.

13. Kakɔna kakalange Satana mbuta lo akambo wa kashi wakandahindɛ Jɔbɔ, ndo ngande wendana dikambo sɔ l’anto tshɛ?

¹³ Lanɛ, Satana akasɛmɛ ɔnɛ Jehowa akakambaka la wolo Ande wa nkokɛ dia nsomba kɔlamelo ya Jɔbɔ. Kɛsɔ mɛnyaka di’olowanyi wa Jɔbɔ komonga wa mɛtɛ mɛtɛ, koko nde akatɛmɔlaka Nzambi l’ɔtɛ wa wahɔ wakandakoke nkondja oma le Nzambi. Satana akate ate, naka Jehowa ntshika tshɔkɔla Jɔbɔ, kete pami kɛsɔ ayɔsɛka Otungi ande. Satana akeyaka dia Jɔbɔ aki onto la diambo, nde aki “kanga losembwe ndo onto lele la olowanyi, loka Nzambi wɔma ndo lakayanganya la kɛnɛ kele kɔlɔ.”a Ɔnkɔnɛ, otondonga Satana akalanya olowanyi wa Jɔbɔ, onto akɔna akakoke shika tanga? Satana akadje taamu lo kɛnɛ kendana la kɔlamelo y’anto tshɛ wakambɛ Nzambi. Dia kɛnɛmɔla kɛnɛ kaki l’otema ande, nde akatɛ Jehowa ate: “Onto ayokimɔ kɛnɛ tshɛ kele la nde dikambo dia lɔsɛnɔ lande.”​—Jɔbɔ 1:8; 2:4.

14. Ɔkɔndɔ w’ana w’anto ambowɛnya lo kɛnɛ kendana l’akambo wa kashi wakate Satana lo dikambo di’anto?

¹⁴ Ɔkɔndɔ w’ana w’anto ambɛnya dia Satana akate kashi nɛ dia l’ɛnyɛlɔ ka Jɔbɔ, anto efula wekɔ lo tshikala la kɔlamelo otsha le Nzambi kaanga l’atei w’ehemba. Kɔlamelo yawɔ ngɛnyangɛnyaka otema wa Jehowa, ndo nde kondjaka okadimwelo wa mbisha Otunyi ande, ɔnɛ anto tshɛ hawotshike dia kambɛmi etena kahomanawɔ la ekakatanu. (Hɛbɛru 11:4-38) Apami ndo wamato wele l’etema w’ɔlɔlɔ hawoke Nzambi ɔkɔngɔ. Kaanga etena kahomanawɔ l’ekakatanu woleki tshɛ wolo, vɔ ndjaɛkɛka ndo nongamɛka tshɛ paka le Jehowa dia nde mbaasha wolo wa mbikikɛ.​—2 Kɔrɛtɔ 4:7-10.

15. Akokaso ndjambola lo kɛnɛ kendana la dombwelo diaki Nzambi diakete ndo diayaye?

¹⁵ Koko, losembwe laki Jehowa hendana tsho la lowandji lande ndo la olowanyi w’anto. Bible kɔndɔlaka dombwelo efula diaki Jehowa otsha le anto ndo otsha le wedja. Tɔ kekɔ nto la prɔfɛsiya ya dombwelo diayosala Jehowa lo nshi yayaye. Ngande wakokaso ndjashikikɛ dia Jehowa aki ndo ayoyala la losembwe lo dombwelo diande na?

Bonde kele losembwe la Nzambi ndeka tshɛ

16, 17. Bɛnyɛlɔ diakɔna diɛnya dia wɛnɛlɔ w’anto wekɔ l’elelo lo kɛnɛ kendana la losembwe la mɛtɛ?

¹⁶ Koka mbutama mɛtɛ lo dikambo dia Jehowa ɔnɛ: “Mboka yande tshɛ yekɔ losembwe.” (Eohwelo k’Ɛlɛmbɛ 32:4) Ndooko onto l’atei aso lakoka mbuta ɛtɛkɛta ɛsɔ lo dikambo diande ndamɛ, nɛ dia lam’ele wɛnɛlɔ aso w’akambo wekɔ la elelo, mbala efula hatoleke mana kɛnɛ kele losembwe fundo. Tɔshi ɛnyɛlɔ ka Abrahama. Nde akasɛngasɛnga Jehowa lo dikambo dia elanyelo ka Sɔdɔma, kaanga mbakasalemaka akambo wa kɔlɔ efula lɛkɔ. Nde akambola Jehowa ate: “Onde mɛtɛ wɛ ayolanya anto w’ɛlɔlɔ kaamɛ l’anto wa kɔlɔ?” (Etatelo 18:23-33) Okadimwelo ele ɔnɛ ndooko. Paka l’ɔkɔngɔ wa Lɔta laki onto l’ɔlɔlɔ nde l’anande wa wamato nkoma dimɛna l’osomba wa Zɔara mbakalɔsha Jehowa “mvula ka mbɔkɔ yahɛta ndo dja la Sɔdɔma ndo la Ngɔmɔra.” (Etatelo 19:22-24) Koko Jɔna lo wedi ande “akadunganɛ la nkɛlɛ” lam’akoke Nzambi ase Niniva kɛtshi. Lam’ele nde akashile mbewoya dikambo di’elanyelo k’osomba, omvutshi ɔsɔ akalange dia paka vɔ ndanyema, kaanga mbakayatshumoya ase Niniva l’otema ɔtɔi.​—Jɔna 3:10–4:1.

¹⁷ Jehowa akashikikɛ Abrahama ɔnɛ okambelo Ande wa la losembwe hakomɛ tsho lo ndjaka atshi wa kɔlɔ koko ndo dia shimbɛ anto w’ɔlɔlɔ. Jɔna akahombe nkondja wetshelo w’ɔnɛ Jehowa ekɔ kanga kɛtshi. Naka atshi wa kɔlɔ ntshikitanya dionga diawɔ, kete nde ekɔ “suke dia dimanyiya.” (Osambo 86:5) Otshikitanyi l’anto wele la wɔma l’ɔtɛ wa lowandji lele lawɔ, Jehowa hakambe la dilanya oko yoho ya mɛnya lowandji lande ndo hoke wɔma dia mbɔsama oko kanga ɔhɔdu etena kokande onto kɛtshi. Nde mbokaka onto kɛtshi naka kokaka.​—Isaya 55:7; Ɛzɛkiyɛlɛ 18:23.

18. Ɛnya l’ekimanyielo ka Bible dia Jehowa hasale akambo osalasala la nsaki.

¹⁸ Koko Jehowa hasale akambo osalasala lo ndjela kɛnɛ koyɛ lo wɔɔngɔ. Lam’akayakimɔ wodja ande l’ɔtɛmwɛlɔ wa dikishi, Jehowa akate la wolo tshɛ ate: “Dimi layanga ntshulola nkɛlɛ kami le yɛ ndo dimi layokolombosha lo ndjela mboka yayɛ ndo layokoya la yɛ l’ɔtɛ wa etsha ayɛ tshɛ wa wɔnɔnyi. Sso diami hadiotokooka kandji. Ndo wɛ ayodiɛnɛ l’etombelo wa kɔlɔ w’oma l’etsha ayɛ wa wɔnɔnyi.” (Ɛzɛkiyɛlɛ 7:3, 4) Ɔnkɔnɛ, etena katshininala anto l’akambo wa kɔlɔ, Jehowa mbaalomboshaka lo ndjela etsha awɔ. Elombwelo kande mongaka l’ɔtɛ w’akambo wa mɛtɛ wɛnama. Diakɔ diele, lam’akandoke ekoko w’oma l’osomba wa Sɔdɔma la Ngɔmɔra l’atui ande, Jehowa akate ate: “Dimi layanga mpolɔ dia tenda kana vɔ wekɔ lo nsala akambo wɔtɔnɛ l’ekoko wambokoma polo le mi asɔ.” (Etatelo 18:20, 21) Tekɔ l’ɔngɛnɔngɛnɔ mɛtɛ lo woho wele Jehowa tshikitana l’anto efula watɔsaka tɛdikɔ la ntondo ka mbeya mɛtɛ ka dikambo! Jehowa ekɔ mɛtɛ woho wawɛnya Bible ɔnɛ: “Nzambi ka kɔlamelo kele keema la wɛngɛngɛ.”​—Eohwelo k’Ɛlɛmbɛ 32:4.

Toyaɛkɛ lo losembwe la Jehowa

19. Akokaso nsala naka hatomane dombwelo dimɔtshi diakasale Jehowa kana diayondosala fundo?

¹⁹ Bible hatɛkɛta oseka kiambokambo tshɛ lo kɛnɛ kendana l’akambo amɔtshi wakasale Jehowa kana la woho wayondolombosha anto l’ɔmɔmɔ kana oko olui lo nshi yayaye. Etena kahomanaso l’ɔkɔndɔ kana la prɔfɛsiya kɛmɔtshi kahatamane fundo lo Bible, tokoya kɔlamelo yaki omvutshi Mika, lakafunde ate: “Dimi layɛnya dia lekɔ lo nkonga Nzambi ka panda kami.”​—Mika 7:7.

20, 21. Kakɔna katoshikikɛ dia Jehowa ayosalaka kɛnɛ kele losembwe nshi tshɛ?

²⁰ Sho koka monga l’eshikikelo dia Jehowa ayosala kɛnɛ kele losembwe lo oseka dikambo tshɛ. Oyadi kaanga ekɔ lo mɛnama di’oko ndooko onto ladja yimba etena kasalema akambo waha la losembwe, Jehowa ndakaka ɔnɛ: “Nsɔmbɔya ekɔ dikambo diami.” (Rɔmɔ 12:19) Naka sho mendɛka le Jehowa, kete tayonga la woho w’eshikikelo kaki la Pɔɔlɔ, lakate ate: ‘Onde akambo waha la losembwe tanemaka le Nzambi? Ndooko lushi!’​—Rɔmɔ 9:14.

²¹ Tekɔ lo nsɛna lo “tena dia paa dia wolo mbikikɛ.” (2 Timɔte 3:1) Akambo waha la losembwe ndo “etsha tshɛ wa dihɛnyɔki” tondjaka akambo w’esehe efula. (Ondaki 4:1) Koko, Jehowa hatshikitana. Nde petshaka akambo waha la losembwe nshi tshɛ ndo nde ndjakiyanyaka dikambo di’anto wadiɛnɛ l’akambo asɔ. Naka sho ntshikala la kɔlamelo otsha le Jehowa ndo sukɛ lowandji la nde, kete nde ayotosha wolo wa mbikikɛ polo ndo l’etena kakandashikikɛ dia Diolelo diande ndjɔlɔngɔsɔla akambo tshɛ wele keema losembwe.​—1 Petero 5:6, 7.