EKADIMWELO LO AMBOLA W’OMA LO BIBLE

Woho akɔna w’onto wele Nzambi?

Nzambi ekɔ onto la lo nyuma lahɛnama. Nde akatonge olongo, nkɛtɛ ndo diangɔ tshɛ diele la lɔsɛnɔ. Ndooko onto lakatonge Nzambi, nɛ dia nde bu l’etatelo. (Osambu 90:2) Nzambi nangaka di’anto mboyanga ndo dia vɔ mbeya akambo wa mɛtɛ wendana la nde.—Adia Etsha 17:24-27.

Nzambi ekɔ onto lakokaso mbeya lo lokombo lande. Sho koka mbeya waonga ande amɔtshi lo nsɛdingola diangɔ diakandatonge. (Rɔmɔ 1:20) Koko dia mbeya Nzambi dimɛna, sho pombaka mbeka Bible, Ɔtɛkɛta ande. Tɔ tokimanyiyaka dia sho mbeya lonto laki Nzambi.—Adia Osambu 103:7-10.

Ngande wayaoka Nzambi etena kɛnande awui kɔlɔ?

Jehowa Otungi aso petshaka awui wa kɔlɔ. Nde akatonge anto l’efanelo kande. (Euhwelu k’Elembe 25:16) Diakɔ diele anto efula vɔ lawɔ petshaka awui wa kɔlɔ. Aha Nzambi mbele lo kiɔkɔ y’awui wa kɔlɔ wasalema. Nzambi akatonge anto la lotshungɔ la nsɔna kɛnɛ kalangawɔ. Lonyangu ko, anto efula wekɔ lo nkamba la lotshungɔ lɔsɔ lo yoho ya kɔlɔ ndo wekɔ lo nsala awui wa kɔlɔ. Etena kasalawɔ ngasɔ, Jehowa nyangaka efula.—Adia Etatelu 6:5, 6; Euhwelu k’Elembe 32:4, 5.

Jehowa nangaka losembwe ndo nde halange awui wele kema la losembwe kaanga yema. (Osambu 37:28, 29) Bible ndakaka dia kem’edja Nzambi ayanga nkomiya awui tshɛ wele keema la losembwe.—Adia 2 Petero 3:7-9, 13.