Tênde Akanga Wa Kɔlamelo!

“Jehowa le, akɔna ahokoka wɔma mɛtɛ ndo ahotombola lokombo layɛ, nɛ dia wɛmɛ oto mbele kanga kɔlamelo?”​—⁠ƐNYƐLƆ 15:​4, NW.

JOSEPH F. RUTHERFORD, ɔnɛ lakahɛnɛ C. T. Russell oko ɔnɔmbɔdi wa la Société Watch Tower l’ɔnɔnyi 1917, akatatɛ mbuta ɛtɛkɛta ɛnɛ lam’akandashaka dako di’okundelo waki Russell: “Charles Taze Russell aki la kɔlamelo le Nzambi, kɔlamelo le Kristo, kɔlamelo lo dikambo dia diolelo diaki Mɛsiya. Nde aki la kɔlamelo lo weoho akɔ tshɛ​—⁠ɛɛ, nde aki la kɔlamelo polo ndo lo nyɔi.” Mɛtɛ, ɔsɔ aki lowando l’ɔlɔlɔ efula otsha le okambi wa shikaa wa Jehowa Nzambi. Ndoko awui wakokaso mbuta dia mandola onto oleki mbuta ɔnɛ nde akashidiya tɔfwɛfwɛ ta kɔlamelo, ɔnɛ nde aki la kɔlamelo​—⁠kɔlamelo lo weoho akɔ tshɛ.

² Ekɔ wolo di’onto monga la kɔlamelo. Lande na? Nɛ dia kɔlamelo ndɔshanaka la lokaki. L’atei a wanɛ wele kema la kɔlamelo le Nzambi, ewandji w’ɛtɛmwɛlɔ wa Lokristokristo mbele lo dihole dia ntondo. Oma lâsɔ nto, lokeso lambodiangana woho w’anyanya ɛlɔ kɛnɛ l’atei w’awala lo yɛdikɔ yahatɛnamaka ndoko lushi. Loseka lambekɔnɛ. Lokeso lambodiangana nto l’awui w’ekanda. Lo dikambo sɔ, vɔ totɛka vate: “Ewandji efula wa société l’ase olimu . . . mbetawɔka ɔnɛ paka dipeepe la dinginya mbele la kɔlamelo le société yawɔ ɛlɔ kɛnɛ.” Anto wele la “kɔlamelo y’efula” wekɔ lo mɔnywama. Ɔnɔmbɔdi wa tshunda dimɔtshi diakimanyiya société kina akate ate: “Kɔlamelo yayɛ ya ntondo ndo yakɔ yâmɛ pombaka monga otsha le yɛ wɛmɛ.” Koko, naka sho tɛkɛta dia kɔlamelo y’onto otsha le nde ndamɛ, kete tambolanya kitshimudi ya tshɛkɛta shɔ. Dui sɔ tôholaka kɛnɛ kofundami lo Mika 7:2 (NW) ɔnɛ: “Kanga kɔlamelo akalanyema oma la nkɛtɛ.”

³ Lo yɛdikɔ yoleki woke efula, Satana nde l’ɛdiɛngɛ ande wamboyalɔngɔsɔla dia ntɔlɔsha, wekɔ lo manɛ dia nanya kɔlamelo yele laso le Nzambi. Diɔ diakɔ diatɛwɔ Akristo lo Efeso 6:12 ɔnɛ: “Shu hatolo ta la emunyi la dikila, keli tambolo la waulelu la akambu wa wulu, la embuledi wa la kete wa udjima one, la elui w’edienge wa lu ahuli wa l’ulungu.” Mɛtɛ, sho pombaka ndjelaka diewoyelo diatotɛ ɔnɛ: ‘Nyoyalamake, nyɔsɛnake. Otunyi anyu, Diabolo, atɔkɛndakɛndaka wate kana kimbwe kahangiya, ayanga onto la tɔ ndɛ.’​—⁠1 Petero 5:⁠8.

⁴ Dikambo dikina nto diatofukutanya dia sho monga la kɔlamelo ele nsaki ya lokaki yakatahowɔ oma le ambutshi aso, oko wofundamidiɔ lo Etatelu 8:21 ɔnɛ: “Tukanyi t’utema w’untu [tele] kolo”​—⁠ndo lokaki​—⁠“umaka nshi yandi ya dikenda.” Sho tshɛ tekɔ l’okakatanu waketawɔ ɔpɔstɔlɔ Paulo ɔnɛ nde aki lawɔ lam’akandate ate: “Dimi hatutshaka akambu w’ololo walangami ntsha, keli latutshaka akambu wa kolo wahamalangi ntsha.”​—⁠Romo 7:⁠19.

Kɔlamelo Ekɔ Dikambo dia Lânde

⁵ “Kɔlamelo” ekɔ tshɛkɛta yahafɔnyi la tɔtɛkɛta tokina. Diɔ diakɔ diata dibuku Insight on the Scriptures ɔnɛ: “Mɛnamaka di’oko ndoko tshɛkɛta ya l’Angɛlɛ yɔtɔnɛ dimɛna dimɛna la tɔtɛkɛta ta lo Hɛbɛru ndo ta lo Grɛkɛ, koko ‘kɔlamelo,’ tshɛkɛta yele la kanyi y’omamemelo ndo y’oshikikalo lam’ayiɔsawɔ lo dikambo dia Nzambi ndo di’olimu ande, nangaka mbɛdima popo la tɔtɛkɛta takɔ.”a Lo dikambo dia “kɔlamelo,” Tshoto y’Etangelo akate mbala kɛmɔtshi ɔnɛ: “Oshikikalo, dilɛmiɛlɔ, ngandji, ɔkɛndɛ, okitanyiya.” Lo na afɔna tɔtɛkɛta tɔsɔ na? Tɔ tekɔ toho totshikitanyi ta kɔlamelo.” Mɛtɛ, ekɔ waonga w’ɛlɔlɔ efula wele mɛtɛ weoho wotshikitanyi wa kɔlamelo. Mɛtɛ, sho pombaka nembetɛ ɔnɛ: Afundelo kakatanyaka losembwe la kɔlamelo mbala efula.

⁶ Elembetshiyelo wayela ɛnɛ wekɔ nto ɔlɔlɔ: ‘Kɔlamelo mbeyaka mɛnya oshikikalo la okitanyiya waha pe ndo wa mɛtɛ, ekokelo di’aha mɛngɛnga ndo nkɔ l’ohemba.’ ‘Onto lele la kɔlamelo shikikalaka lo awui ande kana ekɔ l’okitanyiya waha pe le tshunda dimɔtshi kana lo awui amɔtshi wayaokande ndamɛ ate: dimi nkɔhama lɔkɔ; tshɛkɛta shɔ hɛnya paka omamemelo oto koko ndo ohetetalo di’aha nkotwama ndo minganyiama oma l’omamemelo ɔsɔ.’ Ɔnkɔnɛ, onto lashikikala kânga l’atei w’ehemba, w’asui ndo w’ɛhɛnyɔhɛnyɔ, sunganaka mbelamɛ ɔnɛ: “Kanga kɔlamelo.”

⁷ Koko, lo kɛnɛ k’endana la kɔlamelo, ayonga ɔlɔlɔ sho mbisha ɛnyɛlɔ kɛmɔtshi dia mɛnya otshikitanu wakoka monga l’asa kɔlamelo la oshikikalo kana monga shikaa. Lo wodja w’États-Unis, lo lɛkɛ l’edjelo ka wonya, ekɔ wooko ɔmɔtshi watondja ashi wa dja suke l’oshidi a tango tshɛ. Lam’ele wooko akɔ tondjaka ashi mbala la mbala, wakayowelɛka ɔnɛ: Osombe wa Shikaa. Bible tɛkɛta dikambo dia diangɔ dia ngasɔ diele kema la lumu, ɛnyɛlɔ oko ngɔndɔ, ɔnɛ diɔ diekɔ shikaa, nɛ dia diɔ diekɔ paka woho wokodiongaka nshi tshɛ. Osambu 89:37 (NW) tɛkɛtaka dikambo dia ngɔndɔ ɔnɛ: “Ɔmɛnyi wa shikaa l’olongo.” Vɔ mbutaka ɔnɛ ɛtɛkɛta wa Nzambi wekɔ shikaa. Enyelo 21:5 mbutaka ɔnɛ: “One lakadjashi lu kiti ka diulelu akati ati: Ulungi, dimi lambete diango tshe eyuyu. Ndi akati ati: Ufundi, ne dia aui ako weli [shikaa ndo, NW] mete.” Diangɔ sɔ tshɛ diekɔ shikaa, hadiotshikitana, koko diɔ hadiokoke ndjamamɛ dwamɛ lo dikambo dimɔtshi kana monga la waonga w’ɛlɔlɔ wele oko kɔlamelo.

Jehowa, Ɔnɛ Lele la Kɔlamelo Yoleki Tshɛ

⁸ Aha la tamu, Jehowa Nzambi mbele ɛnyɛlɔ koleki dimɛna k’onto lele la kɔlamelo. Jehowa ekɔ la kɔlamelo le dioho di’anto, akawasha ndo Ɔnande ɔnɛ kele anto wakondja lɔsɛnɔ la pondjo. (Joani 3:16) Lo Jeremiya 3:​12, sho mbalaka ɔnɛ: “Nyu asi Isariyele, akanga w’uhedia, nyukaluli, mbata [Jehowa]. Dimi handjunyenda la elundji ka kele ntu, ne dia dimi leko kanga [kɔlamelo, NW].” Dikambo dikina nto diɛnya ɔnɛ Jehowa ekɔ la kɔlamelo ele ɛtɛkɛta wofundami lo Enyelo 16:5 (NW) ɔnɛ: “Wɛ ekɔ kanga losembwe, wɛ, Ɔnɛ lekɔ ndo lakikɔ, Kanga kɔlamelo.” Oma lâsɔ nto, l’Osambu 145:​17, vɔ totɛka ɔnɛ: “Jehowa keli [losembwe, NW] lu etsha andi tshe, ndu [kɔlamelo, NW] lu elimu andi tshe.” Mɛtɛ, Jehowa ekɔ la kɔlamelo ya mamba, diakɔ mbata ndo Enyelo 15:4 (NW) ɔnɛ: “Jehowa le, akɔna ahokoka wɔma mɛtɛ ndo ahotombola lokombo layɛ, nɛ dia wɛmɛ oto mbele kanga kɔlamelo?” Jehowa Nzambi ekɔ la kɔlamelo yoleki tshɛ.

⁹ Ɔkɔndɔ wa wodja w’Isariyɛlɛ lo yoho ya lânde wekɔ la tolembetelo efula tɛnya ɔnɛ Jehowa ekɔ la kɔlamelo le anto ande. Lo nshi y’Embadi kana Toshushi, Isariyɛlɛ akânganaka oma l’ɔtɛmwɛlɔ wa mɛtɛ mbala la mbala, koko Jehowa akanyangaka mbala la mbala ndo akâshimbelaka. (Embadi 2:​15-22) L’edja tshɛ k’ɛnɔnyi nkama tshanu waki Isariyɛlɛ la nkumi ya dikanga, Jehowa akɛnyaka kɔlamelo yande le wodja ɔsɔ.

¹⁰ Kɔlamelo ya Jehowa yakôtshutshuya dia nde mbikikɛ solo oya le anto ande, oko wofundamidiɔ lo 2 Ekondo 36:​15, 16 ɔnɛ: “[Jehowa Nzambi ka, NW] washewo, akâtumelaka aui wa mbaewula esadi le atumami andi, ne dia ndi akalangaka mpandja wudja andi la edjaselu kandi hita. Keli vo wakolaka atumami wa [Nzambi, NW], wakonyolaka aui andi ndu wakasokaka amvutshi andi, edja ndu kele ka [Jehowa] kakahami le wudja wuhu waki kumbeya nkitakita.”

¹¹ Nɛ dia Jehowa ekɔ la kɔlamelo yoleki tshɛ, ɔpɔstɔlɔ Paulo akakoke funda, oko watanemadiɔ lo Romo 8:​38, 39 ɔnɛ: “Dimi lambetawo nti: Aha nyoi, kuyanga lumu, kuyanga andjelo, kuyanga waulelu, kuyanga akambu wa kakiane, kuyanga akambu wayayi, kuyanga wulu, kuyanga utali, kuyanga ohongo, kuyanga engo kekina kakatungama kayeya ntanganya uma lu ngandji ka [Nzambi, NW] keli le Kristu Jesu Khumesu.” Eelo, Jehowa ekɔ lo toshikikɛ ate: ‘Dimi hakɔsɛkaki ndo hakokalɛki pondjo.’ (Heberu 13:⁠5) Ande esambelo kakondjaso mɛtɛ lo mbeya ɔnɛ Jehowa Nzambi ekɔ nshi tshɛ la kɔlamelo lee!

Yeso Kristo, Ɔna la Kɔlamelo

¹² Yeso Kristo mbaki ndo mbele ɔnɛ lakôkoya Jehowa l’ɔlɔlɔ tshɛ lo nshidiya tɔfwɛfwɛ ta kɔlamelo. Diakɔ mɛtɛ diakakoke Petero mvusola kɛnɛ kofundami l’Osambu 16:10 ko kikotsha le Yeso Kristo lo Etsha 2:27 (NW), ata ate: “We hokalɛ anima ami lo Hadɛsɛ, koyanga ntshika onto ayɛ la kɔlamelo mpɔnda.” Yeso Kristo mɛtɛ sunganaka mbelamɛ ɔnɛ: “Kanga kɔlamelo.” Lo weoho akɔ tshɛ, nde ekɔ la kɔlamelo le She ndo lo Diolelo diaki Nzambi diakalakema. Satana akahembe ntondo dia nanya kɔlamelo ya Yeso oma l’ekimanyielo k’ehemba, lo mbotshutshuya dia nde nyanga wahɔ ande hita. Oko wakandakite tatala lo dikambo sɔ, Diabolo akayotatɛ kamba l’asui, ko akayodiakishaka Yeso l’otamba w’asui. Yeso koshisha kɔlamelo yande le She lele l’olongo, Jehowa Nzambi, kânga yema tshitshɛ.​—⁠Mateu 4:​1-11.

¹³ Yeso Kristo ekɔ la kɔlamelo le ambeki ande lo kotsha daka diande diofundami lo Mateu 28:20 ɔnɛ: “Nyulungi, dimi leko la nyu nshi tshe, edja ndu ekumelu k’andja.” Lo ndjela daka sɔ, nde ekɔ lo nɔmbɔla etshumanelo la kɔlamelo tshɛ, tatɛ oma ko Pɛntɛkɔsta ka l’ɔnɔnyi 33 T.D. polo ndo lo nshi yaso nyɛ.

Anto Waki Komonga Kokele Koko Waki la Kɔlamelo

¹⁴ Kayotota kakianɛ lo dikambo di’anto wele bu kokele na? Onde vɔ kokaka monga la kɔlamelo le Nzambi? Tekɔ l’ɛnyɛlɔ ka woke kaki Jɔbɔ. Satana akakɛnɛmɔla dui sɔ lo dikambo diande. Onde Jɔbɔ aki la kɔlamelo le Jehowa Nzambi, kana nde akôkambɛka paka la saki ka kondja wahɔ ande hita? Satana akasɛmɛ ɔnɛ nde otokoka mbɛkola Jɔbɔ oma le Jehowa lo mbêla ɛhɛnyɔhɛnyɔ. Lam’akashisha Jɔbɔ diangɔ diande tshɛ, anande tshɛ ndo yônge yande, wadiɛnde akawotɛ ate: ‘Odja Nzambi etshi kele ovu!’ Koko Jɔbɔ aki la kɔlamelo, nɛ dia nde akawotɛ ate: “We amboteketa uku atoteketaka umuntu l’enginya. Ngandi? Shu tayulungulaka ololo utu uma le [Nzambi, NW], ku hatulungula kolo? Lu dikambu ne tshe Jobo kuntundja diui dia kolo uma l’elomo andi.” (Jobo 2:​9, 10) Mɛtɛ, Jɔbɔ akatɛ wanɛ wakaye dia ndjôsamba ate: “Koyanga nde [Nzambi] ambondjaka, layotetemala mendɛ le nde.” (Jɔbɔ 13:​15, New International Version) Diɔ diakɔ mɛtɛ diaketawɔma Jɔbɔ lo asho wa Jehowa! Omalɔkɔ, Jehowa akatɛ Elifazɛ w’Ose Temana ate: “Dimi lambukuka kele ka wulu, we la engenyi aye ehendi, ne dia nyu konteketa aui w’usimbwi lu dikambu diami, uku akateketaka ukambi ami Jobo.”​—⁠Jobo 42:​7, 10-16; Jakoba 5:⁠11.

¹⁵ Apami la amato tshɛ waki la mbetawɔ wɔkɔndwami lo Heberu tshapita 11 kokaka mbelamɛ ɔnɛ: akanga wa kɔlamelo. Vɔ komonga paka anto wa shikaa ato koko waki ndo la kɔlamelo la ntondo k’ɛhɛnyɔhɛnyɔ. Diɔ diakɔ diâlaso dikambo dia wanɛ wele, “[l’ekimanyielo ka mbetawɔ] . . . wakadihi enyo wa tambwe, wakadimi dja ya wulu, wakahandi pemo ka yombo. . . . Akina waki la dikambu dia ntengama ndu dia nkomwama, ndu di’ekodi, ndu dia kanu. vo wakukama ave, wakahimboma pi la [si], wakashimbama, wakadiakema la tombo. Vo wakakendakenda wolotshi kuhu di’ekoko la dia mbudi; wakahumbi, wakasuyama, wakatshamela kolo.”​—⁠Heberu 11:​33-37.

¹⁶ Afundelo wa lo Grɛkɛ w’Akristo toshaka nto ɛnyɛlɔ ka mamba k’ɔpɔstɔlɔ Paulo. Nde akakoke mbuta l’ɔlɔlɔ tshɛ otsha le Akristo wa la Tɛsalɔnika lo dikambo di’olimu ande ate: “Nyu nyeko emenyi, ndu [Nzambi, NW] eko omenyi, [nganɛ wakatayala la kɔlamelo, la losembwe ndo aha l’onongo oya le nyu, nyu ambetawudi, NW].” (1 Tesalonika 2:10) Ɛtɛkɛta wofundami lo 2 Koreto 6:​4, 5 toshaka djembetelo kina yɛnya ɔnɛ Paulo aki la kɔlamelo, lɔkɔ sho mbalaka ɔnɛ: ‘Sho ndjaɛnyaka l’oseka dikambo tshɛ dia tekɔ ekambi wa Nzambi: sho mbikikɛka awui efula, asui, ehomba la ekakatanu. Wakatɔnɔ lodî ndo todja lo lokanu, wakatɔtɔmbɔshɛ anto; wakatokandja ntumu ya wolo hakoke, djɔ ya djɔ nyɛ, lende atoyilala, yangɔ ya ndɛ nyɛ, lende atoyikondja.’ Akambo asɔ tshɛ mɛnyaka ɔnɛ ɔpɔstɔlɔ Paulo akayaɔsaka la nɛmɔ nɛ dia nde aki la kɔlamelo.

Akanga wa Kɔlamelo lo Nshi Nyɛ

¹⁷ Lo nshi yaso nyɛ, tekɔ l’ɛnyɛlɔ ka dimɛna kakatatshi lo mbɔtwɛlɔ ka sawo diaso nɛ. Tolembete kɛnɛ kofundami lo dibuku Sécurité universelle sous le Règne du “Prince de Paix,” lo lɛkɛ 146, la tshina di’ɔtɛ a dui wahɔnyi wata ɔnɛ: “Kɔlamelo Kânga lo Lokanu.” Lɔkɔ, vɔ mbutaka ɔnɛ: “Oma lo kɔlamelo yaki lande le ɔlɔngɔswamelo waki Jehowa, Joseph F. Rutherford, ɔnɔmbɔdi wa la Société Watch Tower, akafunde lo Diɛla Woke 25, 1918, ate: ‘Nɛ dia lakatone mbeta la Babilɔna wedi, koko lakayatshutshuya dia kambɛ Nkumɛmi la kɔlamelo tshɛ, diɔ diakɔ diemi lo lokanu, ndo lekɔ la lowando lo dikambo sɔ. . . . Dimi nangaka mbetawɔma lo asho wa Nzambi oleki ndjakitshakitsha la tshina dia Nyama ka Djawudi kana mbeta la tɔ wedi ko tomba oma lo lokanu ndo mandɔma le andja w’otondo.’ ”b

¹⁸ Tekɔ la diɛnyɛlɔ di’amɛna efula dia kɔlamelo le Akristo akina efula wakakikɛ ɛhɛnyɔhɛnyɔ. L’atei w’akanga wa kɔlamelo wa ngasɔ mbele ndo Ɛmɛnyi wa Jehowa w’Ase Allemagne lo nshi y’ɛlɔmbwɛlɔ ka Nazi, oko wɛnyamidiɔ lo video ya Purple Triangles, video yakakahanyema efula l’ɔtɛkɛta w’Angɛlɛ. Ndo nto, ekɔ ohomba sho nembetɛ di’ɛnyɛlɔ di’efula k’Ɛmɛnyi wa Jehowa wa kɔlamelo wa l’Afrika, ɛnyɛlɔ wanɛ wa la Malawi. Lɛkɔ, olami ɔmɔtshi wa lokanu akɛnya ɔnɛ Ɛmɛnyi wa Jehowa wekɔ la kɔlamelo lam’akandate ate: “Vɔ hawokalolaki ɛkɔngɔkɔngɔ pondjo. Wekɔ lo tafulanɛ tsho.”

¹⁹ Ndoko onto lakoka mbala Annuaires des Témoins de Jéhovah w’ɛnɔnyi wetshi ko nde hâmbi lo mɛna kɔlamelo yakakɛnɛmɔla Akristo wa mɛtɛ, ɛnyɛlɔ oko wanɛ wele lo wodja wa Grèce, wa Mozambique ndo wa Pologne. Efula ka l’atei awɔ wakɛnyi pâ ka mamba; akina wakadiakema. Lɛkɛ 177 la lo Annuaire 1992 lekɔ la fɔtɔ y’Akristo divwa wa l’Éthiope, wanɛ wakashidiya tɔfwɛfwɛ ta kɔlamelo polo ndo lo ndjakema. Oko weso Ɛmɛnyi wa Jehowa, onde sho kema l’ɔngɛnɔngɛnɔ dia monga la diɛnyɛlɔ di’amɛna dia ngasɔ diatokeketsha dia sho nshidiya tɔfwɛfwɛ ta kɔlamelo?

²⁰ Naka sho tetemala nshika ekolo la ntondo k’ehemba la k’ɛhɛnyɔhɛnyɔ, kete tayohamia nɛmɔ diaso. Lâsɔ, lo lɛkɛ lakɔna lalangaso monga lo dikambo dia kɔlamelo na? Naka tamboshidiya tɔfwɛfwɛ ta kɔlamelo, kete tambɛkama lo wedi wa Jehowa Nzambi ndo tambɛnya ɔnɛ Satana Diabolo ekɔ kanga kashi ka mamba! Ɔsɔku mbayotetawɔma lo asho wa Jehowa Nzambi, Otungi aso, ndo mbayotokondja difuto dia lɔsɛnɔ la pondjo l’ɔngɛnɔngɛnɔ. (Osambu 37:29; 144:15b) Mbala kayaye, tayɔsɛdingola kɛnɛ kalɔmbama dia nshidiya tɔfwɛfwɛ ta kɔlamelo.

[Footnotes]

[Study Questions]

1. Kakɔna kakate J. F. Rutherford dia mɛnya ɔnɛ C. T. Russell, ɔnɛ lakandahɛnɛ, aki la kɔlamelo?

2, 3. (a) Lande na kele ekɔ wolo di’onto monga la kɔlamelo? (b) Wa na wamboyalɔngɔsɔla ndo vɔ lawɔ dia ndɔsha Akristo lo weolo wadjawɔ dia monga la kɔlamelo?

4. Nsaki yakɔna yatofukutanya dia sho monga la kɔlamelo?

5, 6. Kakɔna kakokaso mbuta lo dikambo dia tshɛkɛta kɔlamelo, ndo woho akɔna wakɔmbwama tshɛkɛta shɔ?

7. Naa otshikitanu wakoka monga l’asa kɔlamelo la oshikikalo?

8. Kakɔna kata Afundelo dia mɛnya ɔnɛ lele ɛnyɛlɔ koleki ɔlɔlɔ ka kanga kɔlamelo?

9, 10. Akambo akɔna wakasalɛka Jehowa Isariyɛlɛ dia nde mɛnya kɔlamelo yande?

11. Naa ekeketshelo kana esambelo kakondjaso oma lo kɔlamelo ya Jehowa?

12, 13. Kakɔna katɛnya ɔnɛ Ɔna Nzambi ekɔ la kɔlamelo?

14. Naa ɛnyɛlɔ ka kɔlamelo kakatosha Jɔbɔ?

15. Kakɔna katotɛ Afundelo dia tɛnya ɔnɛ ekambi efula waki Jehowa Nzambi waki la kɔlamelo?

16. Naa ɛnyɛlɔ ka kɔlamelo kakatotshikɛ ɔpɔstɔlɔ Paulo?

17. Ɛtɛkɛta akɔna wakate J. F. Rutherford wakɛnyaka ɔnɛ nde akɔshi tɛdikɔ dia tshikala la kɔlamelo?

18, 19. Naa diɛnyɛlɔ di’amɛna efula dia kɔlamelo diele laso lo dikambo di’anto wa nshi nyɛ?

20. Kakɔna kayotokomɛ naka sho tshikala la kɔlamelo?

[Caption]

[Notɛ ka l’ɛsɛ ka dikatshi]

[Caption]

[Wembola]

[Caption on page 10]

[Diombwɛlo di’osato wa lo lɛkɛ 10]

Charles Taze Russell

[Caption on page 11]

[Diombwɛlo di’osato wa lo lɛkɛ 11]

Yeso mɛtɛ aki la ‘kɔlamelo’ le Jehowa

[Caption on page 12]

[Diombwɛlo di’osato wa lo lɛkɛ 12]

Kânga mbakinde komonga kokele, Jɔbɔ akɛnya kɔlamelo yande le Nzambi

[Caption on page 13]

[Diombwɛlo di’osato wa lo lɛkɛ 13]

Paulo akatotshikɛ ɛnyɛlɔ ka dimɛna k’onto lele la kɔlamelo le Jehowa

[Caption on page 13]

Okonde Ayôkadimola Na?

◻ Lande na kele ekɔ wolo di’onto monga la kɔlamelo?

◻ Lande na kakokaso mbuta ɔnɛ “kɔlamelo” ekɔ tshɛkɛta yotshikitanyi la tɔtɛkɛta tokina?

◻ Naa diɛnyɛlɔ diatosha Afundelo lo dikambo di’anto wele bu kokele koko waki la kɔlamelo?

◻ Naa diɛnyɛlɔ dia kɔlamelo diele laso lo dikambo di’anto wa nshi nyɛ?