Wembola w’oma le ambadi
Kakɔna kakalange ombeki Jakɔba nembetshiya lam’akandate ate: ‘Analengo, tatokombolake di’efula ndjâla embetsha, nyeye nyate tayoyala la elombwelo koleki wolo’?—Jakoba 3:1.
Mɛtɛ, Jakɔba kokeketshaka Akristo ɔnɛ tanyetshake anto akina akambo wa mɛtɛ. Lo Mateu 28:19, 20, Yeso akadjangɛ ambeki ande ate: “Nyete [anto wa lo, NW] wedja tshe ambeki, . . . Nyuwaetshaki dia ntsha akambu tshe wamumunyutela.” Lâsɔ Akristo tshɛ pombaka ndjâla embetsha. Ɔpɔstɔlɔ Paulo akalake Akristo w’Ase Hɛbɛru nɛ dia polo ndo l’etena kɛsɔ ko vɔ watayala embetsha. Nde akafunde ate: ‘Edja kɛnɛ tshike nyambotayalaka embetsha, ko polo ndo ɛlɔ, nyeke l’ohomba wa vɔ nyolakanya akambo w’etatelo w’ɛtɛkɛta w’ekila waki Nzambi.’—Heberu 5:12.
Ko lâsɔ, Jakɔba akatɛkɛtaka lo dikambo diakɔna na? Nde akatɛkɛtaka lo dikambo dia wanɛ wele la waɛsɛ wa lânde wa mbisha wetshelo l’atei w’etshumanelo. Sho mbalaka ɔnkɔnɛ lo Efeso 4:11: “Ndi [Yeso Kristo, Owandji w’etshumanelo] akasha amotshi dia ndjala atumami; amotshi amvutshi; amotshi amembi wa lukumu l’ololo; amotshi esambisha la embetsha.” Anto amɔtshi waki la waɛsɛ wa mbisha wetshelo l’atei wa tshumanelo dia l’eleko ka ntondo oko asalemadiɔ ndo ɛlɔ kɛnɛ. Oko ɛnyɛlɔ, Olui Walɔmbɔla (Collège central) ekɔ didjidji di’“ɔhɔmbɔ wa kɔlamelo ndo wa kɛsɔ” ndo ekɔ l’ɔkɛndɛ wa lânde wa nama wetshelo washama lo tshumanelo dia l’andja w’otondo. (Mateu 24:45, NW) Emendji weteta la dikumanyi dia lo tshumanelo nto wekɔ l’ɛkɛndɛ wa lânde wa mbetsha kana ndakanya.
Onde Jakɔba akatɛka apami wele l’akoka ɔnɛ vɔ hawohombe mbetawɔ ɔkɛndɛ wa ndjâla ombetsha la wɔma w’ɔnɛ watokoyolomboyama oma le Nzambi lo woho woleki wolo? Kema, aha ɔsɔku. Lotumu l’ekumanyi ka l’atei w’etshumanelo lekɔ diɛsɛ dia woke, oko wɛnyamidiɔ lo 1 Timote 3:1, divɛsa diakɔ mbutaka ɔnɛ: “Naka untu ambuyanga ulimu w’umendji wa lu ekelizia, ndi ambulanga ulimu w’ololo.” Lo ndjela dikoka dimɔtshi dialɔmbama di’onto ndjâla ekumanyi ka l’etshumanelo, nde pombaka ndjâla onto “leeya ndakanya.” (1 Timɔteyo 3:2, Dyookaneelo dy’oyooyo) Ɛtɛkɛta waki Jakɔba hawɔlɔshana la wɛnɛ wakate Paulo oma l’ɛlɔmbwɛlɔ ka nyuma k’ekila.
Koko, ondo l’eleko ka ntondo T.D., anto amɔtshi wakayadjaka vɔamɛ oko embetsha, kânga mbakiwɔ kondjala l’akoka ndo mbakiwɔ kɔsɔnama. Mɛtɛ, vɔ wakakanyiyaka ɔnɛ naka vɔ kondja olimu ɔsɔ kete wayoyala anto wa weke kana ndjâla oko ewandji, diɔ diakɔ diakawalangaka ndjakundjiyɛ lotombo lawɔ vɔamɛ. (Ɛdika la Mako 12:38-40; 1 Timote 5:17.) Ɔpɔstɔlɔ Joani akatɛkɛta dikambo diaki Diyɔtɛrɛfɛ, ɔnɛ ‘lakalangaka ndjâla lo dihole dia ntondo, koko kɔmbɔsaka awui w’oma le Joani la nɛmɔ.’ (3 Joani 9) Timote ka ntondo 1:7 tɛkɛtaka dikambo di’anto amɔtshi ‘wakalangaka ndjâla embetsha w’ɛlɛmbɛ, koko vɔ koshihodiaka kɛnɛ kakawataka ndo kakawakɔkɔmiyaka.’ Ɛtɛkɛta wa lo Jakoba 3:1 sunganaka efula le wanɛ wakombola ndjâla embetsha koko wekɔ la tokanyi ndo la saki ya kɔlɔ. Anto wa ngasɔ kokaka salɛ lemba l’ɛkɔkɔ kɔlɔ ko ndjolomboyama lo woho woleki wolo.—Romo 2:17-21; 14:12.
Jakoba 3:1 ekɔ nto dako di’ɔlɔlɔ efula le wanɛ wele l’akoka ndo wakamba olimu oko embetsha. Nɛ dia wakawasha efula, wayowalɔmba efula. (Luka 12:48) Yeso akate ate: “Lu lushi l’elumbwelu, antu wayuta dikambu dia aui tshe a wutata wakawataka.” (Mateu 12:36) Dikambo sɔ diekɔ mɛtɛ, djekoleko lo dikambo dia dikumanyi diakasɔnama l’atei wa tshumanelo, nɛ dia ɛtɛkɛta awɔ wekɔ la shɛngiya yoleki wolo le anto.
Dikumanyi diayokoya la Jehowa lo kɛnɛ kasalɛwɔ ɛkɔkɔ ande. (Heberu 13:17) Ɛtɛkɛta awɔ wekɔ la shɛngiya lo nsɛnɔ y’anto. Diɔ diakɔ diahomba ekumanyi ndjalama ɔlɔlɔ di’aha keketsha tokanyi tande hita kana pɛnyɔla ɛkɔkɔ oko wakasalaka Afarisɛ. Nde pombaka ndjatshutshuya dia kɛnɛmɔla ngandji k’oma ka tshina di’otema oko kɛnɛ kaki la Yeso. Lo dikambo tshɛ diayondetshaka, djekoleko lam’alomboyawɔ onto, ekumanyi pombaka mbɛdikola ɛtɛkɛta watomba oma l’onyɔ ande, aha pɔsɔ lolemi ɔhɔsɔhɔsɔ, tondja ɛtɛkɛta w’aha la takanyi yimba la ntondo kana tondja tokanyi tande hita. Lam’ayondokitshaka wɛkamu ande tshɛ le Jehowa, lo Dui diande, ndo l’alako washande oma lo tshimbo y’ɔlɔngɔswamelo ande, olami w’ɛkɔkɔ ayokondja ɛtshɔkɔ efula oma le Nzambi, koko aha ‘elombwelo koleki wolo.’