Tambetshama Dia Ntsha Lolango La Jehowa
“Umbetshaki dia ntsha lulangu laye, ne dia we keli [Nzambi, “NW”] kami.”—OSAMBU 143:10.
LUSHI tshɛ lasɛna onto ndo lakambande olimu, vɔ kokaka mbolakanya dikambo dimɔtshi di’ohomba. Ngasɔ mbeyɛ ndo mbele anto akina. Ko kakɔna katoyalaka lam’avɔ onto na? Hawokoke mbolakanya ndo nde hakoke mbeka ndoko dikambo l’etena kambondovɔ. Bible mbutaka hwe ɔnɛ wanɛ wambovɔ “haweyi nduku dikambu.” Ndoko ewo lo Sheɔlɛ, lo diombo di’anto tshɛ. (Undaki 9:5, 10) Onde lâsɔ kɛdikɛdi woho wetshamaso ɔnɛ, watatafudia ewo, ekɔ anyanya? Kema, dikambo sɔ nemanɛka l’awui watetshawɔ ndo la woho wakambaso la ewo kakɔ.
2 Naka wekɔ lo tolakanya paka akambo w’andja ɔnɛ ato, kete hatotoyala la lɔsɛnɔ la pondjo lo nshi yayaye. Diɛsɛ ko, miliyɔ y’anto wa lo wedja tshɛ wekɔ lo mbetshama lolango la Nzambi l’oyango wa kondja lɔsɛnɔ la pondjo. Etshina k’elongamelo kɛsɔ kekɔ lo woho walakanyemawɔ oma le Jehowa, ɔnɛ lele Kiɔkɔ y’ewo kasha lɔsɛnɔ.—Osambu 94:9-12.
3 Oko ombeki Ande wa ntondo, Ɔna Nzambi l’enondo aketshama dia sala lolango la She. (Tukedi 8:22-30; Joani 8:28) L’ɔkɔngɔ diko, Yeso akayɛnya ɔnɛ anto nunu la nunu wayetshama oma le She. Elongamelo kakɔna kele la wanɛ wetshama oma le Nzambi na? Yeso akate ate: “Ambufundama lu afundelo w’amvutshi ati: Tshe wayetshama uma le [Jehowa]. Untu tshe latukaka ndu lateyaka aui uma le Papa, ndi atuyakaka le mi. . . . Mete, mete, kanyutelami nti: One letawo, eko la lumu la pundju.”—Joani 6:45-47.
4 Yeso akavusolaka ɛtɛkɛta wa l’Isaya 54:13, ɛtɛkɛta wakawatɛ Siɔna ka l’olongo, wadi Nzambi la lo didjidji. Pɔlɔfɛsi kɛsɔ ndekaka kotshama le ana wa Siɔna, mbut’ate ambeki wa Yeso Kristo 144 000 wakotɔ lo nyuma. Ɛlɔ kɛnɛ, atshikadi wa l’atei w’ana asɔ wekɔ lo sala olimu ndo wekɔ lo nɔmbɔla olimu w’olakanyelo wasalema lo nkɛtɛ k’otondo. Omalɔkɔ, miliyɔ y’anto akina wanɛ wakenga “ului a wuki” wekɔ lo kimanyiyama oma lo yoho yetshamawɔ oma le Jehowa ndo vɔ lawɔ. Vɔ wekɔ l’elongamelo kakɔ ɔtɔi ka mbeka akambo aha la nyɔi mbafukutanya. Lo yoho yakɔna na? Mɛtɛ, vɔ wekɔ l’akoka wa pandɔ lo “[fɔnu ka woke, NW]” kayasukana esadi esadi ko sɛna pondjo lo paradiso ka lanɛ la nkɛtɛ.—Enyelo 7:9, 10, 13-17.
Wambɔtɛtɛ Efula dia Sala Lolango la Nzambi
5 L’ɔnɔnyi 1997, lo tshumanelo olekanyi 80 000 l’andja w’otondo, Ɛmɛnyi wa Jehowa wayolama ɛtɛkɛta wa mbɔtwɛlɔ wa l’Osambu 143:10 lo timba tawɔ, ɛtɛkɛta akɔ v’ɛnɛ: “Umbetshaki dia ntsha lulangu laye.” Ɔsɔ mbayonga divɛsa dia l’ɔnɔnyi 1997. Ɛtɛkɛta ɛsɔ wayofundama bamba lo dihole diɛnama hwe lo Mbalasa ya Diolelo, ndo vɔ wayonga oko diohwelo diɛnya ɔnɛ nsanganya ya l’etshumanelo mbele dihole diasungana efula diakokaso kondja wetshelo w’oma le Nzambi, lɛkɔ kakokaso kondja olakanyelo watatetemala ntshɔ otsha la ntondo. Lam’asanganaso kâmɛ l’anangɛso lo nsanganya dia mbetshama oma le Ombetsha aso wa Woke, sho kokaka ndjaoka woho wakayaoke omembi w’esambo lakafunde ate: “Dimi lakangenangena lam’akawamvutela vati: Tutshu utsha lu luudu la [Jehowa].”—Osambu 122:1; Isaya 30:20.
6 Eelo, sho nangaka mbetshama dia sala lolango la Nzambi koko aha lolango l’ɔndɔshi aso, Diabolo, kana l’anto wele bu kokele. Ɔnkɔnɛ, oko Davidi, sho mbeyaka ndo mbetawɔka Nzambi katɛmɔlaso ndo kakambɛso: “Ne dia we keli [Nzambi kami, NW]. [Nyuma kayɛ kekɔ, NW] ololo, onombolaki lu mbuka k’usimbwi!” (Osambu 143:10) Lo dihole dia nde monga la saki ka mbɔtɔ l’ɔnɔngɔ w’anto wa kashi, Davidi akangɛnangɛnaka monga lɛnɛ atɛmɔlawɔ Jehowa. (Osambu 26:4-6) Lam’ele nyuma ka Nzambi kakalɔmbɔlaka wanya ande, Davidi akakokaka kɛndakɛnda lo mboka ka losembwe.—Osambu 17:5; 23:3.
7 Yeso Kristo, Davidi Koleki Woke, akashikikɛ apɔstɔlɔ ate nyuma ka Nzambi ayowalakanya akambo tshɛ ndo mbaohola akambo tshɛ wakandawatɛ. (Joani 14:26) Tatɛ oma lo lushi la Pɛntɛkɔsta, Jehowa ekɔ lo mbishola ‘akambo wa Nzambi woshami etale,’ nde ekɔ lo mbashola yema yema, akambo akɔ wakafundama lo Dui diande. (1 Koreto 2:10-13) Nde salaka dikambo sɔ lo tshimbo y’ehomɔ kɛnama kakete Yeso ate: “Ɔhɔmbɔ wa kɔlamelo ndo wa kɛsɔ.” Ɔhɔmbɔ akɔ ɔsɔ mbakimɔ mbo ya ndɛ ya lo nyuma yalɛwɔ lo ekongelo k’olakanyelo ka lo tshumanelo dia wodja a Nzambi wa l’andja w’otondo.—Mateo 24:45-47, NW.
Wekɔ lo Têtsha Lolango la Jehowa lo Nsanganya Yaso
8 Akambo wekaso lomingu la lomingu lo Wekelo wa Tshoto y’Etangelo l’atei w’etshumanelo mɛnyaka mbala efula woho wakokaso ndjela kana kamba l’awui wa lo Bible. Dui sɔ mɛtɛ tokimanyiyaka dia sho nɛndja ekiyanu wa lo lɔsɛnɔ. Lo wekelo ekina, sho mbekaka awui wa mɛtɛ wa weke wa lo nyuma kana pɔlɔfɛsi ya lo Bible. Ande efula kalakanyemaso lo wekelo wa ngasɔ lee! Lo wedja efula, Mbalasa ya Diolelo ndolaka tɔ l’anto lo nsanganya shɔ. Koko lo wedja ekina, lofulo l’anto wɔ̂tɔ lo nsangaya lambokitakita. Oko le yɛ, lande na ngasɔ na? Shi ondo anto amɔtshi wekɔ lo tshikɛ olimu wa l’emunyi dihole dia mbashimba vɔ sanganaka kâmɛ ‘dia tshutshuyanaka lo ngandji ndo l’elimu w’ɛlɔlɔ’? Kana onde vɔ mbetshaka wenya efula lo tayangɛnyangɛnyaka kana lo takɔkɔlaka demba kana lo mendaka televiziɔ, ko ndjohombaka ndo etena ka mbɔtɔ lo nsanganya tshɛ? Tôhɔ didjango diakasambiyama oma le Nzambi diofundami lo Heberu 10:23-25. Kema sanganaka kâmɛ dia Nzambi têtsha ekɔ dui diamboleka ohomba nshi nyɛ lam’ele ‘tekɔ lo mɛna ɔnɛ lushi lakɔ laya suke’?
9 Ɔkɛndɛ aso ɔmɔtshi woleki ohomba ele kamba oko ekambi wa Nzambi. Losanganya l’Olimu lakalɔngɔswama dia têtsha woho wa sho kotsha ɔkɛndɛ ɔsɔ dimɛna dimɛna. Sho mbekaka woho wa sawola l’anto, kɛnɛ kakokaso mbuta, kɛnɛ kahombaso sala naka onto ambetawɔ losango laso, ndo kɛnɛ kahombaso sala naka onto ambotona losango laso. (Luka 10:1-11) Lam’ele vɔ tɛkɛtaka dikambo dia tosambo t’ɛlɔlɔ t’esambishelo ndo tiɛnyaka lo tɔkɛnyɔ lo losanganya lɔsɔ lasalema mingu tshɛ, tekɔ lo nɔngɔswama dimɛna efula dia pomanaka l’anto, aha paka l’etena katatatshu lo luudu la luudu oto koko ndo l’etena katatasambisha l’ɛsɛsɛ, lɛnɛ emadjawɔ mituka, lo bisi, lo asɛkɛ wa ndɛkɛ, lo dihole di’ase okanda, kana la kalasa. Lo ndjela dɔmbɛlɔ diaso di’ɔnɛ: “Umbetshaki dia ntsha lulangu laye,” sunganaka sho mbɔsaka diaaso tshɛ diatanema dia sala kɛnɛ kakatokeketsha Nkumɛso ate: “Usasi anyu ahete la ntundu ka antu, dia vo . . . kawutumbuli Shenyu le l’ulungu.”—Mateu 5:16.
10 Lo nsanganya shɔ ya l’etshumanelo, vɔ têtshaka ndo woho wa mbetɛ anto akina ambeki. Naka onto ambɛnya mposa kande kana tambôtshikɛ okanda ɔmɔtshi, kete tayokalola dia towenda l’oyango wa totatɛ mbeka lande Bible. Lo woho ɔmɔtshi, dui sɔ fɔnaka la woho ‘wakadjasɛka’ ambeki ‘laka anto wasungana’ dia vɔ mbaetsha akambo wakawadjangɛ Yeso. (Mateu 10:11; 28:19, 20) Lam’ele tekɔ la dihomɔ di’ɛlɔlɔ efula, ɛnyɛlɔ oko dibuku dielɛwɔ Ewo Katɔla Otsha lo Lɔsɛnɔ la Pondjo, tambɔlɔngɔswama mɛtɛ dia kotsha olimu aso dimɛna dimɛna. (2 Timote 4:5) Lomingu tshɛ, lam’ɔtɔyɛ lo Losanganya l’Olimu ndo lo Kalasa k’Olimu wa Teokrasi, sala tshɛ dia wɛ shihodia awui w’ohomba ko wɛ ndjokamba l’awui akɔ wayokokimanyiya dia wɛ monga okambi wa Nzambi wambolowanyema dimɛna ndo wakotsha lolango lande.—2 Koreto 3:3, 5; 4:1, 2.
11 Nzambi nangaka sho ‘tetemala nyanga diolelo ntondo la losembwe lande.’ (Mateu 6:33) Lâsɔ ohotokoyambola wate: ‘Ngande wakokami ndjela dui sɔ naka olimu ami [kana w’otshukanyi ami] shimbakami dimi mbɔtɔ lo nsanganya na?’ Efula ka wanɛ wambotshunda lo nyuma mbɔsaka tɛdikɔ dia sawola l’ewandji awɔ w’elimu lo dikambo sɔ. Kadiyɛso kɛmɔtshi kaki ombatshi mboka wa pondjo akatɛ owandji ande w’olimu ate dimi pombaka minyɔka la wonya wakoka lomingu tshɛ dia dimi kondja etena ka mbɔtɔka lo nsanganya ya l’etshumanelo. Owandji ande w’olimu akawetawɔ. Koko lam’ele nde aki la saki ka mbeya kɛnɛ kêta lo nsanganya, nde akalɔmbɛ dia mbɔtɔ lo nsanganya ndo nde lawɔ. Lɛkɔ lo losanganya nde akôke washa diewoyelo ɔnɛ losanganya la distrikɛ laya suke. Ɔnkɔnɛ, owandji ɔsɔ w’olimu akayalɔngɔsɔla dia mbetsha lushi l’otondo lo losanganya lɔsɔ la distrikɛ. Wetshelo akɔna wakondjayɛ oma l’ɛnyɛlɔ kɛsɔ na?
Wambetshama dia Ntsha Lolango la Jehowa oma le Ambutshi Awɔ Wôka Nzambi Wɔma
12 Aha lo nsanganya ya l’etshumanelo kana lo nsanganya ya weke oto mbakokawɔ têtsha dia sala lolango la Nzambi. Ambutshi wôka Nzambi wɔma wekɔ lo nɔmbama dia ndakanya anawɔ, mbahokola ndo mbaodja lo yoho yakokawɔ tombolaka Jehowa ndo salaka lolango lande. (Osambu 148:12, 13; Tukedi 22:6, 15) Di’ombutshi sala ɔsɔku, nde pombaka ntshɔka la ‘anande w’akɛnda’ lo nsanganya, lɛnɛ akokawɔ ‘tohokamɛ ndo têka akambo,’ ko kayotota lo dikambo dia mbalakanyaka afundelo w’ekila la ngelo na? (Etumbelu 31:12; 2 Timote 3:15) Nkumbo efula yakamɛ la wekelo wa Bible wa lo nkumbo l’etete mbala la mbala, koko l’ɔkɔngɔ wa nshi ngana tsho ko hawoyeka esangɔ tshɛ kana ndjohembola ndo wekelo akɔ lo pondjo. Onde dikambo sɔ diambonyokomɛka lo nkumbo kanyu? Onde wɛ kanaka ɔnɛ dako sɔ diatotɛ dia salaka wekelo wa ngasɔ lo nkumbo mbala la mbala hasungana kana nkumbo kayɛ tshikitana la nkumbo kina lo yoho yele dako sɔ hatonga ndoko l’etombelo le yɛ? Oyadi lɔsɛnɔ la ngande lele lanyu, nyu ambutshi, tambonyɔsɛngasɛnga dia nyu nyomenda asawo w’ɛlɔlɔ anɛ: “Sango Diaso dia lo Nyuma di’Ɔngɔnyi” la “Afuto w’oma l’Etete,” lo Tshoto y’Etangelo ya Loseketanya 1, 1995 (lo Falase).
13 Wekɔ lo keketsha nkumbo dia mongaka la mbekelo ka sɛdingolaka divɛsa dia lushi la lushi oma lo biukubuku yɛlɛwɔ Tɔsɛdingolake Afundelo Lushi la Lushi. Mbadia divɛsa la kɔmatɛrɛ yadiɔ ko pe ekɔ dimɛna, koko ekɔ ɔlɔlɔ efula nyu kɛtshanyaka lo dikambo dia divɛsa diakɔ ndo mɛnya ohomba adiɔ. Ɛnyɛlɔ, naka nyekɔ lo sɛdingola Efeso 5:15-17, kete ase nkumbo kokaka kanyiya woho wokokiwɔ ‘ndjâtshungwela etena k’ɔlɔlɔ’ dia salaka wekelo w’onto ndamɛ, dia kamba lo woho ɔmɔtshi w’olimu w’ombatshi mboka, ndo sala elimu ekina wa teokrasi. Mɛtɛ, sawo dia lo nkumbo lo dikambo dia divɛsa dia lushi la lushi kokaka kimanyiya ose nkumbo ɔtɔi kana ase nkumbo efula dia vɔ ‘tetemala nyomoleka shihodia kɛnɛ kele lolango la Jehowa.’
14 Ambutshi pombaka mbetshaka anawɔ l’etete. (Euhwelu k’Elembe 6:6, 7) Koko ɔsɔ kema dikambo dia pangwɛka ana tsho kana mbafundɛka awui. Papa la mama pombaka nto mpokamɛka anawɔ, lo yoho shɔ mbayowoleka monga l’akoka wa mbeya awui wahomba nembetshiyama, mbokiyama hwe, nembetshiyama l’ekimanyielo k’ɛnyɛlɔ kɛmɔtshi, kana nyomovusola nto. Lo nkumbo kɛmɔtshi k’Akristo, ambutshi mbishaka anawɔ nsaki ka vɔ mbatɛ akambo aha la mengenga lo mbakeketshaka dia vɔ mimbola wembola wêndana l’akambo wahawoke kana wâkiyanya. Ɔnkɔnɛ, vɔ wakayeya ɔnɛ ɔnawɔ la pami l’ɔlɔngɔlɔngɔ akakakatanaka dia mboka dikambo di’ɔnɛ Jehowa kema l’etatelo. Ambutshi wakakoke mbɔsa akambo w’oma l’ekanda waki la Société Watch Tower ko mbɛ̂nya ɔnɛ anto mbetawɔka ɔnɛ etena la loowa kema l’ekomelo. Wakakambe l’ɛnyɛlɔ kɛsɔ dia vɔ mbomanya fundo, ko ɔna akɔ akoke. Ɔnkɔnɛ, ɔsaka etena ka wɛ kadimolaka wembola w’ana lo yoho yokɛma hwe ndo l’ekimanyielo k’Afundelo, ɔsɔku mbayoyâkimanyiya dia vɔ mɛna ɔnɛ mbeka dia sala lolango la Nzambi kokaka monga dui di’ɔngɛnɔngɛnɔ efula. Dikambo diakɔna nto dieka ekambi wa Nzambi—w’ɛlɔngɔlɔngɔ ndo w’epalanga—ɛlɔ kɛnɛ na?
Tambetshama dia Mbokana Ngandji ndo Ndɔ Ta
15 Lo ndjela ɔlɛmbɛ w’oyoyo waki Yeso, ‘Nzambi akatetsha dia sho mbokana ngandji.’ (1 Tesalonika 4:9) Etena kele wɔladi ndo kele awui tshɛ dimɛna, sho kokaka fɔnya ɔnɛ sho mbokaka anangɛso tshɛ ngandji. Ko kakɔna katoyalaka naka londjo lambotomba lam’asaso kana tamboka nkɛlɛ lo dikambo diambototɛ kana diambotosalɛ Okristo ɔmɔtshi na? Etena kɛsɔ, oshika wa ngandji kaso mbeyaka mbɔtɔ l’ohemba. (Ɛdika la 2 Koreto 8:8.) Kakɔna katolakanya Bible dia sala l’etena ka ngasɔ na? Dui dimɔtshi diatolakanya Bible ele sala tshɛ dia mɛnya ngandji kaso lo yɛdikɔ yokome. (1 Petero 4:8) L’ɔtɛ wa sho nyanga wahɔ aso shamɛ, mboka nkɛlɛ l’ɔtɛ wa towuiwui ta totshitshɛ, kana momba tokumbɛkumbɛ l’otema, sho pombaka sala tshɛ dia tshika ngandji komba lokema la pɛkato. (1 Koreto 13:5) Sho mbeyaka shate ɔsɔ ekɔ lolango la Nzambi, nɛ dia Dui diande mbatolakanya ngasɔ.
16 Kânga mbele anto efula hawokoke mbokanya ngandji la ta, ta ekɔ dikambo dikina diatetshawɔ, koko ɔsɔ ekɔ ta dia woho wotshikitanyi. Davidi aketawɔ ɔnɛ nde akahombaka mendɛ le Jehowa dia nde mbêtsha woho wa nde ndɔ ta, kânga mbele lo nshi yande, dui sɔ akendanaka ndo l’ata wa mɛtɛ wakandalɔ̂ka l’atunyi w’Isariyɛlɛ. (1 Samuele 17:45-51; 19:8; 1 Khumi ya Dikanga 5:3; Osambu 144:1) Kayotota lo dikambo dia ta diaso nshi nyɛ na? Ekoma aso kema wa l’emunyi. (2 Koreto 10:4) Ta diaso diekɔ dia lo nyuma, ndo sho pombaka ndɔta ɛlɔtɔ wa ta wa lo nyuma dia ndɔ ta diakɔ. (Efeso 6:10-13) Lo tshimbo ya Dui diande ndo ya wodja ande wotshumanyi, Jehowa tolakanyaka woho wa sho mbidja otshumba lo ta dia lo nyuma dialɔso.
17 La lokeso ndo lo yoho yahɛnama dimɛna, esangɔ efula Diabolo kambaka l’akambo wa l’andja ɔnɛ, l’ɛtɔlɔki, ndo l’atunyi w’akambo wa mɛtɛ dia nde mbekola timba taso otsha l’akambo wele kema ohomba. (1 Timote 6:3-5, 11; Tito 3:9-11) Ndjâka oko nde mɛnaka ate nde kema l’akoka efula wa tɔlɛndja naka nde tomamɛ mbala kakɔ ɔtɔi ndo lo yoho yɛnama hwe ongo asalande tshɛ dia tɔkɔsha lo totshutshuya dia sho kiyanaka efula ndo lo tadjaka tamu oko akanga wa dinginya, akambo asɔ bu ndo ohomba kânga yema lo nyuma. Oko andɔshi wa ata wasɛna ɔlɔlɔ, sho pombaka mbeya wâle wa ngasɔ wele la ntondo kaso oko tekɔ lo mɛna Satana atɔlɔsha.—1 Timote 1:3, 4.
18 Sho hatokeketsha nsaki y’anto kana lolango la wedja. Jehowa akatolokanya lo tshimbo y’ɛnyɛlɔ ka Yeso dia hatohombe sɛna nto lo dikambo diaso shamɛ, koko sho pombaka monga la woho akɔ wa yimba yaki la Kristo Yeso ndo sɛna dia sala lolango la Nzambi. (2 Koreto 5:14, 15) Lo nshi yakete, ondo takasɛnaka lɔsɛnɔ lahasungana, lɔsɛnɔ la lotshito ndo loludi l’akambo a mindo ndo taketshaka wenya aso wetshetsha. Afɛstɔ wa mindjo, wodjwelo a wanu, ndo akambo a mindo ekɔ awui waleka mɛnama l’andja ɔnɛ wa kɔlɔ. Etena kɛnɛ keso lo mbetshama dia sala lolango la Nzambi, onde sho kema l’ɔngɛnɔngɛnɔ nɛ dia tambokakitɔna l’andja ɔnɛ woludi l’etsha wa mindo? Ɔnkɔnɛ, nyɛsɔ tɔlɔ ta dia wolo dia lo nyuma di’aha sho ndjaɔtshiya lo ditshelo dia mindo dia l’andja ɔnɛ.—1 Petero 4:1-3.
Nde Ekɔ lo Têtsha lo Wahɔ Aso
19 Sho pombaka mbetawɔ ɔnɛ tekɔ lo kondja ɛlɔlɔ efula lo woho wetshamaso dia sala lolango la Jehowa. Lâsɔ mɛtɛ, sho pombaka sala kɛnɛ kalɔmbama le so lo mpokɛ lotui dimɛna woho wa sho mbeka ko ndjoyela elakanyelo watosha Nzambi lo tshimbo y’Ɔnande, Dui diande, ndo wodja ande wotshumanyi. (Isaya 48:17, 18; Heberu 2:1) Naka tayosalaka ɔsɔku kete tayokeketshama dia tshikala nge lo tena dia pâ efula nɛ ndo shika tomamba la ntondo ka mvula ngembe kayaye ndoko edja nto. (Mateu 7:24-27) Koyanga nshi nyɛ, tayɔngɛnyangɛnyaka Nzambi naka sho salaka lolango lande ndo tayoyashikikɛka ɔnɛ alɔmbɛlɔ aso wekɔ lo mbokɛma. (Joani 9:31; 1 Joani 3:22) Ndo nto, tayonga l’ɔngɛnɔngɛnɔ wa mɛtɛ.—Joani 13:17.
20 L’edja tshɛ k’ɔnɔnyi wa 1997, tayokondjaka diaaso esangɔ efula dia mbadiaka ndo sɛdingolaka divɛsa di’ɔnɔnyi ɔnɛ, Osambu 143:10: “Umbetshaki dia ntsha lulangu laye, ne dia we keli [Nzambi, NW] kami.” Lam’ayotadiaka ndo wayotɔsɛdingolaka divɛsa sɔ, katɔsake tena dimɔtshi dia kanaka yimba lo dikambo dia tɛdikɔ takɔshi Nzambi dia sho mbetshamaka, oko wɛnyamidiɔ lo sawo nɛ. Tokanake yimba ngasɔ lo ɛtɛkɛta ɛsɔ, ndo ekanelo ka ngasɔ ka yimba kayale oko dikambo diatotshutshuya dia sho ndjaɔtɔnganyiyaka la dɔmbɛlɔ sɔ tena tshɛ, ndo mbeya ɔnɛ: “one latutshaka lulangu la [Nzambi, NW], atuyalaka pundju.”—1 Joani 2:17.
[Study Questions]
1, 2. (a) Etena kakɔna kahombawɔ tolakanya, ndo l’oyango akɔna wasungana? (b) Bonde kele ekɔ ohomba mbetshama oma le Jehowa?
3. (a) Lande na kakokaso mbuta ɔnɛ Yeso aki ombeki waki Nzambi wa ntondo? (b) Eshikikelo kakɔna kele laso ɔnɛ anto wayetshama oma le Jehowa, ndo etombelo akɔna wayoyala?
4. Woho akɔna wanandema miliyɔ y’anto la wetshelo w’oma le Nzambi, ndo elongamelo kakɔna kele lawɔ?
5. (a) Ele divɛsa dia l’ɔnɔnyi wa 1997? (b) Ngande wahombaso ndjaoka lam’ɔtɔso lo nsanganya y’Akristo na?
6. Lo ndjela ɛtɛkɛta wa Davidi, kakɔna ketawɔso?
7. Ngande wakamba nyuma ka Nzambi olimu l’atei w’etshumanelo k’Akristo na?
8. Bonde kele ekɔ ohomba efula mbɔtɔka lo Wekelo wa Tshoto y’Etangelo?
9. (a) Ngande wakoka Losanganya l’Olimu tɔlɔngɔsɔla dia sala olimu? (b) Ngande wahomba monga dionga diaso lo dikambo di’esambishelo?
10. Ngande wakokaso mɛtɛ kimanyiya ‘wanɛ wasungana’?
11. Ngande wɛnya amɔtshi mbetawɔ kawɔ lo ɛtɛkɛta wa lo Mateu 6:33?
12. Kakɔna kahomba ambutshi w’Akristo salaka la lotutsha ndo l’otema wolo di’ana mbetshama lolango la Jehowa na?
13. Ngande wakoka nkumbo kimanyiyama lo sɛdingolaka divɛsa dia lushi la lushi?
14. Euhwelu k’Elembe 6:6, 7 mɛnyaka ɔnɛ ambutshi pombaka monga embetsha a woho akɔna, ndo dui sɔ mbalɔmbaka dia vɔ ntsha na?
15. Etena kakɔna kakoka oshika wa ngandji kaso k’onto l’ɔnango pembama?
16. (a) Woho akɔna wa ta wetshawɔ Akristo dia vɔ ndɔ? (b) Ngande wakondjaso dihomɔ diahombama?
17. (a) Tosambo takɔna tasala Diabolo dia têkola yimba? (b) Kakɔna kahombaso mbewɔ oko akanga a tomba?
18. Aha sɛna nto lo dikambo diaso shamɛ kɛdikɛdi na mɛtɛ?
19. Ɛlɔlɔ akɔna wayotokondja lo mbetshama lolango la Jehowa ko lisala?
20. Ayonga ɔlɔlɔ kanaka yimba lo dikambo diakɔna lam’ayoyɛnaka divɛsa dia l’ɔnɔnyi l’edja tshɛ ka 1997?
[Caption]
[Questions]
[Caption on page 13]
[Review box on page 13]
Ngande Ayokadimola?
◻ Wa na wetshama ɛlɔ kɛnɛ dia ntsha lolango la Jehowa?
◻ Shɛngiya yakɔna yahomba Osambu 143:10 monga layɔ le so l’edja k’ɔnɔnyi wa 1997?
◻ Ngande wetshamaso dia ntsha lolango la Jehowa?
◻ Kakɔna kalɔmbama le ambutshi w’Akristo lam’etshawɔ anawɔ?