Ele Lo Dihole Dia Ntondo Lo Lɔsɛnɔ Layɛ?
“Unimbitshiya mbuka ka dimi nkendakenda.”—OSAMBU 143:8.
ONDO wɛ mbeyaka ɔnɛ lɔsɛnɔ l’onto ndola l’elimu ndo l’ekiyanu. Naka wɛ kanyiya dikambo sɔ, kete wɛ kokaka mɛna ɔnɛ elimu ɛmɔtshi la ekiyanu ɛmɔtshi wekɔ ohomba efula. Elimu ekina la ekiyanu ekina bu ohomba efula, kana bu ohomba kânga yema tshitshɛ. Naka wɛ mɛnaka ngasɔ kete wɛ ekɔ la kanyi yaki la Nkumekanga Sɔlɔmɔna, onto lakaleke anto tshɛ lomba. L’ɔkɔngɔ wa nde menda elimu wa lo lɔsɛnɔ l’onto dimɛna dimɛna, nde akayokomɛka lo mbuta ate: “Uki [Nzambi, NW] woma, ulamaki elembe andi. Oso eli okende w’untu tshe.” (Undaki 2:4-9, 11; 12:13) Dui sɔ diekɔ la kitshimudi yakɔna le so ɛlɔ kɛnɛ na?
2 Naka wɛ nangaka ‘mboka Nzambi ka mɛtɛ wɔma ndo namaka ɛlɛmbɛ ande,’ kete yaoka dimbola nɛ dia wolo: ‘Ele lo dihole dia ntondo lo lɔsɛnɔ lami?’ Lo mɛtɛ, ondo aha lushi tshɛ mbakanayɛ yimba lo dimbola sɔ, ko bonde kahayadisɛdingola kakianɛ na? Dimbola sɔ mɛtɛ munyiyaka wembola ɛmɔtshi wɔtɔnɛ ladiɔ, ɛnyɛlɔ oko wembola ɛnɛ: ‘Onde dimi mbidjaka yimba efula l’olimu ami, lo lotumu lakambami kana lo diangɔ dia l’emunyi lo yɛdikɔ ya tshambandeko? Nɛmɔ diakɔna diashami ngelo kami, nkumbo kami, ndo wakimi wa ngandji na?’ Ɔlɔngɔlɔngɔ mbeyaka ndjambola ate: ‘Lo yɛdikɔ yakɔna yadjami yimba lo kalasa ndo lo yɛdikɔ yakɔna yɔsatɔ wenya ami? Onde mɛtɛ djimulimu ya mbetshaka wenya, tɔkɛnyɔ, diendenda, weho ɛmɔtshi wa kɔkɔlaka demba kana tekinoloji mbele akambo woleki ohomba le mi?’ Oyadi ɛnɔnyi engana wele laso kana lɔsɛnɔ la woho akɔna lasɛnaso, pombaka sho ndjambola l’ɔlɔlɔ tshɛ shate: ‘Olimu wa Nzambi wekɔ la dihole diakɔna lo lɔsɛnɔ lami?’ Ondo wɛ mbetawɔka ɔnɛ ekɔ ohomba mbidja akambo woleki ohomba lo dihole dia ntondo. Ko ngande ndo lende akokaso kondja ekimanyielo dia mbidja akambo woleki ohomba lo dihole dia ntondo lo yoho yɛnya ɔnɛ tekɔ akanga a tomba?
3 Lo mɛtɛ, ‘ɛngɔ kele lo dihole dia ntondo’ kɛdikɛdi ɛngɔ kele la ntondo ka diangɔ dikina tshɛ kana kahomba mendama ntondo. Oyadi Ɔmɛnyi wa Jehowa mbeyɛ kana ɔmɔtshi a l’atei wa miliyɔ ya wanɛ wêka Dui dia Nzambi l’otema ɔtɔi kâmɛ la wɔ, enda dui nɛ dia mɛtɛ: “Engo tshe keko la etena kato, dikambu tshe l’esi ulungu dieko la etena kadio.” (Undaki 3:1) Lo yoho yasungana, dui sɔ mendanaka ndo la woho wayakiyanyayɛ la ngandji tshɛ lo dikambo di’ase nkumbo kayɛ. (Kolosai 3:18-21) Kɛdikɛdi, wɛ pombaka kotsha ehomba w’ase luudu layɛ lo yoho ya losembwe oma l’ekimanyielo k’olimu wa l’emunyi wakambayɛ. (2 Tesalonika 3:10-12; 1 Timote 5:8) Ndo nto, wɛ mbeyaka mbɔsaka tena dimɔtshi dia salaka djimulimu mɔtshi ya mbetshaka wenya, kɔkɔla demba, kana kɛnya tɔkɛnyɔ. (Ɛdika la Mako 6:31.) Koko l’ɔkɔngɔ a wɛ kana yimba ɔlɔlɔ, wɛ ayɛna ɔnɛ l’atei w’akambo asɔ tshɛ ndoko dikambo diakokayɛ mbidja lo dihole dia ntondo lo lɔsɛnɔ, shi mɛtɛ? Ekɔ dikambo dikina dioleki ohomba efula.
4 Ondo wɛ mbeyaka ɔnɛ awui wa lo Bible watɔlɔmbɔla tokimanyiyaka efula dia sho mbidja akambo woleki ohomba lo dihole dia ntondo ndo mbɔsa tɛdikɔ t’eshika. Ɛnyɛlɔ, lo Filipi 1:9, 10, vɔ kɔkɔmiyaka Akristo dia ‘tamanya monga l’ewo k’oshika ndo la shɛnɔdi ya tshɛ.’ L’oyango akɔna na? Ɔpɔstɔlɔ Paulo akate nto ate: ‘Dia nyu menda akambo woleki ohomba.’ Kema ɔsɔ ekɔ dikambo di’oshika? Oma l’ekimanyielo k’ewo k’oshika, Okristo wele la shɛnɔdi kokaka shikikɛ kɛnɛ kahombande mbidjaka yimba ntondo—kɛnɛ kahomba monga lo dihole dia ntondo—lo lɔsɛnɔ lande.
Ɛnyɛlɔ dia Sho Mbeya Kɛnɛ Kahomba Monga lo Dihole dia Ntondo
5 Sho tanaka dikambo dimɔtshi di’ohomba diendana l’ewo lo ɛtɛkɛta ɛnɛ waki Petero: “Nyu nyaketama dia dikambu diako, ne dia Kristu akanyusuwela, akanyutshikela [ɛnyɛlɔ, NW], dia nyu mbuyela lu wanya andi.” (1 Petero 2:21) Eelo, dia sho kondja tolembetelo takoka tokimanyiya dia sho mbeya kɛnɛ kahombaso mbidja lo dihole dia ntondo lo lɔsɛnɔ laso, sho kokaka menda kanyi ya Yeso Kristo lo dikambo sɔ. Pɔlɔfɛsi ka l’Osambu 40:8 kakate ɔnkɔnɛ lo dikambo diande: “Dimi latongenangenaka dia ntsha lulangu laye, we [Nzambi kami, NW]. Ee, olembe aye ambufundama l’utema ami.” Ɔnkɔnɛ mbakandate kanyi yakɔ yâmɛ ate: “Ma diami, dieli ntsha lulangu la one lakantumi, la dia nshidiya ulimu andi.”—Joani 4:34; Heberu 12:2.
6 Tolembete ɔnɛ sala lolango la Nzambi mbele nyango dikambo. Ɛnyɛlɔ ka Yeso kɔkɔmiyaka kɛnɛ kahomba ambeki ande mbidja lo dihole dia ntondo lo nsɛnɔ yawɔ, nɛ dia nde akate ɔnɛ “untu tshe layumana mbeka, ayuyala uku umbetsha andi.” (Luka 6:40) Ndo lam’ele Yeso akakɛndakɛndaka lo yoho yakalɔngɔsɔla She, nde akɛnya ɔnɛ onto kondjaka ‘ɔngɛnɔngɛnɔ wa mamba’ naka nde mbidja lolango la Nzambi lo dihole dia ntondo lo lɔsɛnɔ lande. (Osambu 16:11; Etsha 2:28) Onde wɛ mbeyaka kɛnɛ kalanga mbuta dikambo sɔ? Lam’ele ambeki wa Yeso wambɔsɔna dia mbidja lolango la Nzambi lo dihole dia ntondo lo nsɛnɔ yawɔ, vɔ ‘wayɔngɛnangɛna woho w’anyanya’ ndo wayokondja lɔsɛnɔ l’oshika. (1 Timote 6:19) Ɔnkɔnɛ, tekɔ l’ɛkɔkɔ efula wahombaso mbidja osalelo wa lolango la Nzambi lo dihole dia ntondo lo nsɛnɔ yaso.
7 Kombeta ndoko edja l’ɔkɔngɔ wa Yeso ndjâlambola le Nzambi dia sala lolango lande, Diabolo akayange woho wa mbonganyiya. Lo yoho yakɔna na? Ele lo akambo asato wakandôhembe. Mbala tshɛ kakandôhembaka, Yeso akawoshaka ekadimwelo wotumbi oma l’Afundelo ndo wokɛma hwe. (Mateu 4:1-10) Koko ehemba ekina wakokongɛka—wakɔ̂hɛnyahɛnya, wakawosha sɔnyi, Judasɛ akôfunge, wakômamatanyiyɛ awui a kashi, ndo wakayowodiaka l’otamba w’asui. Koko l’atei w’ehemba ɛsɔ tshɛ, ndoko wɔnɛ wakakɔsha Ɔna Nzambi la kɔlamelo. L’etena kɛmɔtshi ka pâ efula, Yeso akalɔmbɛ ate: “Aha uku alangami, paka uku alangaye. . . . , diatshami uku alangaye.” (Mateu 26:39, 42) Shi ɛnyɛlɔ kɛsɔ kakatotshikɛ Yeso pombaka tonanda polo ndo l’evɔ, ndo totshutshuya dia sho ‘monga l’etete lo dɔmbɛlɔ’?—Romo 12:12.
8 Eelo, etena kadjaso akambo woleki ohomba lo dihole dia ntondo lo lɔsɛnɔ laso, ɛlɔmbwɛlɔ ka Nzambi kekɔ ohomba efula, djekoleko lam’eso la ntondo k’atunyi w’akambo a mɛtɛ ndo k’andɔshi wa lolango la Nzambi. Tôhɔ Davidi, Nkumekanga ka kɔlamelo, woho wakandasɛngasɛnga Nzambi dia nde mbɔlɔmbɔla l’etena kakandahomana l’ekakatanu w’oma le atunyi. Tayoshihodia dikambo sɔ lam’ayotɔsɛdingola etenyi kɛmɔtshi k’Osambu 143. Dikambo sɔ pombaka tokimanyiya dia sho mɛna woho wakokaso keketsha diokanelo diasaso la Jehowa ndo keketshama dia tetemala mbidja osalelo wa lolango la Nzambi lo dihole dia ntondo lo nsɛnɔ yaso.
Jehowa Mbokaka ndo Tokotshɛka Alɔmbɛlɔ Aso
9 Kânga mbakinde otshi wa pɛkato ndo onto lokovɔ, Davidi aki la mbetawɔ ɔnɛ Jehowa ayohokamɛ ɔsɛngɔsɛngɔ ande. Nde akɔ̂sɛngasɛnga l’okitshakitsha tshɛ ate: “[Jehowa] li, uki dombelo diami, uhukami osengosengo ami! Unkaluya diui lu kolamelu yaye ndu lu ololo aye! Tunumbuyaki, dimi ukambi aye, ne dia nduku untu leli ololo lu ashu aye.” (Osambu 143:1, 2) Davidi akeyaka ate dimi bu kokele, koko otema ande tshɛ waki le Nzambi. Diɔ diakɔ diakinde l’eshikikelo ɔnɛ Nzambi ayowokaloya dui lo losembwe. Kema dikambo sɔ tokeketshaka? Kânga mbahatakotsha kɛnɛ tshɛ kalɔmbama lo losembwe la Nzambi, sho kokaka monga l’eshikikelo ɔnɛ nde tohokamɛka naka etema aso tshɛ wekɔ le nde. (Undaki 7:20; 1 Joani 5:14) Lam’atetemalaso lo dɔmbɛlɔ, sho pombaka mbidja yimba dia “nembia akambu wa kolo l’akambu w’ololo” lo nshi ya kɔlɔ nyɛ.—Romo 12:20, 21; Jakoba 4:7.
10 Davidi aki l’atunyi, oko weso ndo sho lawɔ l’atunyi. Oyadi lam’akandatalawɔlawɔka Saulo, dui diakosokoya la wolo dia nde toyashɛ l’ahole wele ndoko onto, l’ahole wele wolo onto koma lɛkɔ, kana lam’akawɛnyaka atunyi ande pâ l’etena kakinde nkumekanga, Davidi aki la tena diande di’ekiyanu efula. Nde akalembetshiya woho wakawonandaka akambo asɔ lam’akandate ate: “Utunyi akasuya [anima, NW] ami . . . Ndi akambidjasha lu ahuli wa udjima . . . Okone lumu lami lambolembiama, ndu utema ami ambukalema.” (Osambu 143:3, 4) Onde wɛ ambohomɔka dikambo dimɔtshi diakananda asolo ayɛ woho ɔsɔ?
11 Ɔhɛnyɔhɛnyɔ w’oma le atunyi, ehemba woye oma l’ekondjelo ka pâ, hemɔ ka wolo, ndo ekiyanu ekina ndjokonyaka ekambi ɛmɔtshi wa Nzambi lo vɔ ndjoshisha ndo elongamelo. Tena dimɔtshi, etema awɔ ndjoyalaka ɛlɛkɔlɛkɔ keto. Ndjâka oko onto l’onto la l’atei awɔ ndelaka ɔnɛ: ‘Lam’ele wɛ ambɔmɛnya shɔkɔ la fɔnu efula, ombisha lɔsɛnɔ nto . . . Onyinge kele osambe.’ (Osambu 71:20, 21) Ngande wambowokimanyiyama na?
Woho Wakokaso Nshika Tanga la Ntondo k’Otunyi
12 Osambu 143:5 mɛnyaka kɛnɛ kakasale Davidi lam’akandatehaka lo wâle ndo l’ehemba a weke: “Dimi latuhoka nshi y’edjedja, latukanaka yimba lu etsha aye tshe, [dimi tetemalaka mbidja yimba l’otema ɔtɔi l’elimu w’anya ayɛ, NW].” Davidi akohɔ akambo wakasalɛka Nzambi ekambi ande ndo wakandôtshungola nde ndamɛ. Nde akakane yimba lo kɛnɛ kakasale Jehowa lo dikambo dia lokombo Lande la woke. Eelo, Davidi akatetemala mbidja yimba yande lo etsha wa Nzambi.
13 Shi esangɔ efula sho mbohɔka akambo wasalɛ Nzambi anto ande? Eelo! L’atei w’akambo akɔ, sho mbohɔka ndo ɛkɔndɔ w’‘olui a woke w’ɛmɛnyi’ wakasɛnaka la ntondo ka Kristo ndja lanɛ la nkɛtɛ. (Heberu 11:32-38; 12:1) Akristo w’akitami wa l’eleko ka ntondo wakakeketshamaka nto dia mbohɔka “nshi ya ntundu” ndo akambo wakawakikɛ. (Heberu 10:32-34) Ko kayotota lo kɛnɛ kêndana l’akambo wakomɛ ekambi wa Nzambi wa nshi nyɛ, ɛnyɛlɔ oko akambo wɔkɔndwami lo dibuku dielɛwɔ Les Témoins de Jéhovah: Prédicateurs du Royaume de Dieu na?a Ɛkɔndɔ wofundami lo dibuku sɔ ndo l’ekanda ekina waki la Société Watch Tower tokimanyiyaka dia sho mbohɔ woho wakakimanyiya Jehowa ekambi ande dia vɔ mbikikɛ ehemba lo nshi yasekɛ Lɛɛta olimu w’esambishelo lo ahole amɔtshi, lo nkanu, lo tena diawaɔtwɛ elui w’anto dia ndjâlɔsha, lo mpango ya nkanu ya wolo ndo lo ahole wakambawɔ lotumu l’opipi. Ehemba wekɔ lo wedja wambohandjɔ vwa l’awui w’ata, ɛnyɛlɔ oko lo Burundi, lo Liberia, lo Rwanda, ndo lo wodja wakawetaka ntondo ɔnɛ Yougoslavie. Lam’akaye ɛhɛnyɔhɛnyɔ oma le atunyi, ekambi wa Nzambi wakakikɛ nɛ dia vɔ wakatetemala nama diokanelo diasawɔ la Jehowa wolo nge. Lonya lande lakasukɛ wanɛ wakadje osalelo wa lolango lande lo dihole dia ntondo lo nsɛnɔ yawɔ.
14 Koko, wɛ mbeyaka mbuta ɔnɛ watapɛnyahɛnyaka woho wa ngasɔ ndo wɛ mbeyaka fɔnya ɔnɛ ekɔ wolo di’ɛhɛnyɔhɛnyɔ wa ngasɔ komɛmi. Koko, Nzambi hakimanyiya anto ande nshi tshɛ paka l’atei w’akambo wakoka anto amɔtshi mɛna ɔnɛ akambo wa pâ hakoke. Nde kimanyiyaka anto efula wele “anto k’anto” lo akambo “wele bu akambo wa diambo.” Enda ɛnyɛlɔ ɔtɔi kɛnɛ l’atei wa bɛnyɛlɔ efula: Onde wɛ akohɔ fɔtɔ kɛnɛ kele la diko? Onde tɔ kokimanyiyaka dia wɛ mbohɔ akambo wasalɛ Nzambi anto ande? Fɔtɔ kengo kakatombe lo Tshoto y’Etangelo ya Diɛla Woke 1, 1996 (lo Falase). Onde wɛ akashile mbadia ɔkɔndɔ waki Penelope Makris? Ande ɛnyɛlɔ ka dimɛna efula ka kɔlamelo y’Okristo lee! Onde wɛ kokaka mbohɔ akambo wakandakikɛ oma le asukanyi ande, woho wakandalɔshana la hemɔ ya wolo, ndo woho wakandayatshutshuya dia tshikala l’olimu w’ombatshi mboka wa pondjo? Kayotota dia dikambo di’ɔngɛnɔngɛnɔ diakôkomɛ la Mytilene na? Otondo a dikambo v’ɔnɛ: Onde wɛ mbɔsaka bɛnyɛlɔ sɔ oko awui watokimanyiya sho tshɛ dia mbidjaka akambo woleki ohomba lo dihole dia ntondo, dia mbidja osalelo wa lolango la Nzambi lo dihole dia ntondo lo nsɛnɔ yaso?
15 Naka sho kanaka yimba lo etsha wa Jehowa, oko akasalaka Davidi, kete tayokeketshama. Dia nde kotsha sangwelo diande, Jehowa akɔshi tɛdikɔ dia mbisha anto panda lo tshimbo ya nyɔi k’Ɔnande, eolwelo kande la otombwamelo ande. (1 Timote 3:16) Nde akashikikɛ Diolelo diande dia l’olongo, akɛdia olongo lam’akandatshanya Satana l’ɛdiɛngɛ ande, ndo akolola ɔtɛmwɛlɔ wa mɛtɛ lanɛ la nkɛtɛ. (Enyelo 12:7-12) Nde amboshila sala paradiso ka lo nyuma ndo ekɔ lo tshɔkɔla anto ande lo fudia lofulo lawɔ. (Isaya 35:1-10; 60:22) Ɛlɔ kɛnɛ, anto ande wekɔ lo sala esambishelo ka komelo la ntondo ka fɔnu ka woke mumɛ. (Enyelo 14:6, 7) Eelo, tekɔ l’akambo efula wa kanaka la wɔ yimba.
16 Naka sho tetemalaka mbidja yimba lo etsha w’anya wa Nzambi lo dihole dia mbidjaka tokanyi taso tshɛ lo akambo wayatshutshuya onto dia sala, kete tayolembetɛ ɔnɛ nkudu kakamba la Jehowa hahekɔ ndoko dikambo. Koko, etsha ɛsɔ hakome paka lo diangɔ di’amɛna efula diakandatonge diakokaso mɛna l’olongo ndo lanɛ la nkɛtɛ. (Jobo 37:14; Esambu 19:1; 104:24) L’atei w’etsha ande wa mamba mbele ndo akambo wasalande dia tshungola anto ande oma le atunyi wâsɔkisha, oko wɛnamadiɔ lo akambo wakakomɛ wodja ande wakandasɔnɛ lo nshi ya ntondo.—Etumbelu 14:31; 15:6.
Woho Wakokaso Mbeya Mboka ka Sho Kɛndakɛnda
17 Davidi akalɔmbɛ dia kondja ekimanyielo ɔnɛ kele aha ashi wa lɔsɛnɔ lande moma to: “Dimi latusimbulaka anya ami utsha le ye. [Anima, NW] ami atukukumbulaka, uku kete ya wumu mbahumba ashi. [Jehowa] li, umbukeli esadi, lumu lami lambuheko. Tumbisheki elundji, dimi tukuyala uku waku wambuhulo utsha l’Udimu a Pengandu.” (Osambu 143:6, 7) Davidi, otshi wa pɛkato, akeyaka ɔnɛ Nzambi hohɛ lɔsɛnɔ lande woho welɔ. (Osambu 31:7) Lo tena dimɔtshi, ndo sho lawɔ mbeyaka ndjɛ̂na di’oko lonyuma laso lambokitakita. Koko akambo hawolanyi lo yoho yakokaso shisha elongamelo. Jehowa, ɔnɛ lôka alɔmbɛlɔ aso, mbeyaka tɔkɔlɔnganya esadi esadi lo tokeketsha lo tshimbo ya dikumanyi dioludi la ngandji, y’asawo watomba lo Tshoto y’Etangelo, kana lo tshimbo y’alako wa lo nsanganya wɛnama di’oko wakalɔngɔswama mɛtɛ lo dikambo diaso.—Isaya 32:1, 2.
18 Wɛkamu aso le Jehowa totshutshuyaka dia sho mbɔsɛngasɛnga ɔnɛ: “Umbukia ngandji kaye ka mamba . . . ne dia le ye katumekamaka. Unimbitshiya mbuka ka dimi kendakenda.” (Osambu 143:8) Onde nde kokimanyiya Kadiyɛso Makris, ɔnɛ lakasɛnaka lo dihole dianganyi etale lo disɛnga dimɔtshi dia lo wodja wa Grèce? Lâsɔ onde nde ayokɛ̂ndja ɛkɔndjɔ kana kosha sɔnyi naka wɛ mbidja osalelo wa lolango lande lo dihole dia ntondo lo lɔsɛnɔ layɛ? Diabolo nde l’anto ande wayotodjɛ wekamu kana wayotoshimba mɛtɛ di’aha sho sala olimu wa sambisha Diolelo dia Nzambi. Oyadi tekɔ lo kamba lo wedja wetawɔwɔ lotshungɔ l’ɔtɛmwɛlɔ wa mɛtɛ kana lo wedja wahalange Lɛɛta ɔtɛmwɛlɔ wa mɛtɛ, alɔmbɛlɔ aso wasalema lo kâmɛ mbɔtɔnɛka la dɔmbɛlɔ nɛ diakasale Davidi: “We [Jehowa], unshimbeli uma le atunyi. Le ye keli eshamelu kami.” (Osambu 143:9) Tayewɔ mpokoso ka lo nyuma naka sho mbidjasɛ lo dihole dia woshamu diaki Ɔnɛ Lele Lâdiko dia Tshɛ.—Osambu 91:1.
19 Eshikikelo kaso lo dikambo dia kɛnɛ kahomba monga lo dihole dia ntondo kekɔ l’etshina ka nge. (Romo 12:1, 2) Lâsɔ, shika tomamba la ntondo ka kɛnɛ tshɛ kasala andja ɔnɛ dia kɔkɛkɛtshiya kɛnɛ kakanawɔ ɔnɛ kekɔ ohomba efula lo ndjela tokanyi t’anto. Tetemala mɛnya lo akambo tshɛ wa lo lɔsɛnɔ layɛ ɔnɛ wɛ mbeyaka ɔnɛ osalelo wa lolango la Nzambi mbahomba monga lo dihole dia ntondo lo lɔsɛnɔ layɛ.—Mateu 6:10; 7:21.
20 Avɛsa divwa wa ntondo wa l’Osambu 143 mbikaka epole ɔsɛkɛ lo diokanelo di’oshika diaki l’asa Davidi nde la Jehowa. Lam’akawodiya atunyi ande pandju l’olongo, nde komengenga dia sɛngasɛnga Nzambi dia nde mbɔlɔmbɔla. Nde akakɛnɛnɛ otema ande, ndo akayange ekimanyielo dia nde mbeya mboka k’ɔlɔlɔ ka nde kɛndakɛnda. Ɛlɔ kɛnɛ, ngasɔ mbele ndo atshikadi w’akitami wele la nkɛtɛ vɔ l’asekawɔ. Vɔ mbɔsaka diokanelo diasawɔ la Jehowa oko ɛngɔ k’ohomba efula lam’awɔsɛngasɛngawɔ dia nde mbalɔmbɔla. Kânga mbâhɛnyahɛnya Diabolo nde l’andja ɔnɛ, vɔ tetemalaka mbidja osalelo wa lolango la Nzambi lo dihole dia ntondo lo nsɛnɔ yawɔ.
21 Miliyɔ y’anto weka Bible vɔ l’Ɛmɛnyi wa Jehowa pombaka mbeya ɔnɛ sala lolango la Nzambi mbele dikambo diahomba monga lo dihole dia ntondo. Sho kokaka mbakimanyiya dia vɔ shihodia dikambo sɔ wonya wekaso la wɔ tshapita 13 ya dibuku dielɛwɔ Ewo Katɔla Otsha lo Lɔsɛnɔ la Pondjo, tshapita shɔ tɔtɔmiyaka awui wahombaso ndjela dia kitanyiya Dui.b Mɛtɛ, vɔ pombaka mɛna ɔnɛ tekɔ lo mbasha ɛnyɛlɔ lo akambo wawaetshaso. L’ɔkɔngɔ wa tshanda mɔtshi tsho, ndo vɔ lawɔ wayoyeya mboka kahombawɔ kɛndakɛnda. Etena kayɛnaka ɔm’ɔmɔ a l’atei wa miliyɔ y’anto asɔ kɛnɛ kahomba ndeka ohomba lo nsɛnɔ yawɔ, efula wayosokoyama dia ndjâkimɔ le Nzambi ko nongola batismu. L’ɔkɔngɔ w’akambo asɔ, etshumanelo kokaka mbakimanyiya dia vɔ tetemala kɛndakɛnda lo mboka ka lɔsɛnɔ.
22 Anto efula mbetawɔka esadi eto ɔnɛ lolango la Nzambi mbahomba monga dui dioleki tshɛ ohomba lo nsɛnɔ yawɔ. Ko ngande walakanya Jehowa ekambi ande yema yema dia vɔ sala lolango lande na? Ɛlɔlɔ akɔna wakondjawɔ oma lo dikambo sɔ na? Wembola ɛsɔ mbayotɔsɛdingola lo sawo diayela, tayɔsɛdingola ndo Osambu 143:10, divɛsa diele etshina ka sawo diakɔ.
[Footnotes]
a Dibuku diakatombe lo 1992 oma le Watchtower Bible and Tract Society of New York, Inc.
b Dibuku diakatondjama lo 1995 oma le Watchtower Bible and Tract Society of New York, Inc.
[Study Questions]
1. Nkumekanga Sɔlɔmɔna akayokomɛka lo mbuta dui diakɔna lo dikambo di’eyango w’anto la akambo wasalawɔ?
2. Dimbola diakɔna di’ohomba efula diahomba anto woka Nzambi wɔma ndjaoka, ndo dimbola diakɔ sɔ munyiyaka wembola akɔna wɔtɔnɛ ladiɔ?
3. Le Akristo, mbidja akambo w’ohomba lo dihole dia ntondo kɛdikɛdi na?
4. Ngande wɔtɔnɛ Filipi 1:9, 10 la dui dia mbidja akambo w’ohomba lo dihole dia ntondo?
5. Lam’ɛnyawɔ ɛnyɛlɔ kakawatshikɛ Akristo, ngande wɛnya Afundelo kɛnɛ kaki lo dihole dia ntondo lo lɔsɛnɔ la Yeso?
6. Ngande wakokaso kondja etombelo akɔ wâmɛ wakakondja Yeso lo mbidja lolango la Nzambi lo dihole dia ntondo?
7, 8. Ehemba akɔna wakakomɛ Yeso, ndo wetshelo akɔna wakokaso kondja oma lo dikambo sɔ?
9. (a) Kânga mbaki Davidi otshi wa pɛkato, kakɔna kakɛnamaka lo ɛtɛkɛta ande la etsha ande na? (b) Bonde kahatahombe mpekɔ dia ntsha kɛnɛ kele ɔlɔlɔ na?
10. Lande na kaki Davidi la tena di’ekiyanu na?
11. Tena diakɔna di’ekiyanu diakomɛ ekambi wa Nzambi wa nshi nyɛ?
12. Ngande wakeye Nkumekanga Davidi woho wa ndɔshana la wâle waki la ntondo kande ndo l’ehemba wakokomɛka?
13. Etena keso l’ehemba, ngande wayotokimanyiyama dia mbikikɛ naka sho kanyiya bɛnyɛlɔ di’ekambi wa Nzambi wa kɔlamelo wa lo nshi yakete ndo wa nshi nyɛ?
14. (a) Naa ɛnyɛlɔ kɛmɔtshi kɛnya woho wakakimanyiya Nzambi onto ɔmɔtshi lakahomɔ dikambo diakoka fɔna l’akambo wɛnaso? (b) Wetshelo akɔna wakondjayɛ oma l’ɛnyɛlɔ kɛsɔ na?
15. Naa etsha ɛmɔtshi wa Jehowa wahombaso kanaka la wɔ yimba?
16. Wekɔ lo tokeketsha dia sho mbidjaka yimba lo dikambo diakɔna, ndo ayotolembetɛ naka sho salaka ɔsɔku?
17. Davidi akɔsaka Jehowa oko onto la ngande, ndo woho akɔna wakoka dikambo sɔ tokeketsha?
18, 19. (a) Kakɔna kahombaso sɛngasɛngaka Jehowa l’etete ndo l’otema ɔtɔi? (b) Kakɔna kakokaso ndjâshikikɛ?
20. (a) Wetshelo akɔna wambotokondja lo dikambo dia Davidi l’Osambu 143:1-9? (b) Woho akɔna wakɛnɛmɔla Akristo yimba ya Davidi ɛlɔ kɛnɛ?
21. Lande na kele ekɔ ohomba sho mbisha ɛnyɛlɔ k’ɔlɔlɔ naka sho nangaka ndakanya anto akina kɛnɛ kahombawɔ mbidja lo dihole dia ntondo lo nsɛnɔ yawɔ?
22. Wembola akɔna wayotɔsɛdingola lo sawo diayela?
[Caption]
[Footnotes]
[Caption]
[Questions]
[Caption on page 4]
[Caption on page 4]
Akɔsama oma lo Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s
[Caption on page 4]
[Caption on page 4]
Akambo wakasalaka Davidi wakɛnyaka ɔnɛ nde akayaɛkɛka le Jehowa
[Caption on page 7]
[Question box on page 7]
Ngande Wayoyokadimola?
◻ Ngande wakokaso kamba la Filipi 1:9, 10 dia mbidja akambo woleki ohomba lo dihole dia ntondo?
◻ Ngande wakɛnya Yeso kɛnɛ kaki lo dihole dia ntondo lo lɔsɛnɔ lande?
◻ Wetshelo akɔna wakokaso kondja oma l’etsha wa Davidi lam’akinde l’ehemba?
◻ Woho akɔna watokimanyiya Osambu 143:1-9 ɛlɔ kɛnɛ?
◻ Kakɔna kahomba monga lo dihole dia ntondo lo nsɛnɔ yaso?