“One leli tshitshe” aya “kinunu”
“One leli tshitshe ayuyala kinunu, ona one luleki tshitshe wudja a wulu.”—ISAYA 60:22.
1, 2. (a) Bonde kele wodjima wambokomba nkɛtɛ nshi nyɛ? (b) Ngande wakayahɛtaka osase wa Jehowa yema yema le ekambi ande?
“HYUTSHIHUTSHI ayukumba kete, la udjima a tshududu asi wedja. Keli [Jehowa] ayuyala ladiku diaye, la lutumbu landi layukohetela.” (Isaya 60:2) Ɛtɛkɛta ɛsɔ mɛtɛ kɔndɔlaka awui weta lanɛ laa nkɛtɛ tatɛ oma l’ɔnɔnyi wa 1919. Ɛtɛmwɛlɔ wa Lokristokristo kombetawɔ djembetelo yɛnya ɔnɛ Yeso Kristo, ‘osase w’andja,’ aya nkumekanga. (Joani 8:12; Mateu 24:3) L’ɔtɛ wa ‘nkɛlɛ ka mamba’ koka Satana, owandji ‘w’emboledi w’andja wa wodjima ɔnɛ,’ ntambe ka 20 ketshi kɛnɛ kakayala etena kakaleke akambo wa ngala ndo awui wa tshɛ kɔlɔ ntshama lo lɔsɛnɔ l’anto laa nkɛtɛ. (Enyelo 12:12; Efeso 6:12) Anto efula wekɔ lo wodjima wa lo nyuma.
2 Koko, osase wekɔ lo pɛta nshi nyɛ. Jehowa ‘ekɔ lo pɛtɛ’ ekambi ande, atshikadi w’akitami w’esɔ, wanɛ wele akɛndji wa laa nkɛtɛ wa “womoto” l’ose olongo. (Isaya 60:1, NW) Akristo asɔ wekɔ lo kɛnɛmɔla lotombo la Nzambi ndo wekɔ lo ‘pɛtsha osase awɔ la ntondo k’anto,’ djekoleko tatɛ oma lam’akawatshungɔ oma lo lɔhɔmbɔ la Babilɔna l’ɔnɔnyi wa 1919. (Mateu 5:16) Oma l’ɔnɔnyi wa 1919 polo 1931, osase wa Diolelo wakatamanya pɛta lam’akanya Akristo asɔ edinganya tshɛ wakatshikala wa tokanyi t’oma lo Babilɔna. Lofulo lawɔ lakadɛ lo nunu akumi nɛ dia Jehowa akakotsha daka diande di’ɔnɛ: “Mete, dimi layusanganya atshikadi wa Isariyele. Dimi layâmotsha kame uku ekoko weli l’ukutu, uku limba la dungalunga lu dihuli diawo di’elelu. Vo wayutsha lundju la wuki lu dikambu di’ului w’antu.” (Mika 2:12) L’ɔnɔnyi wa 1931, lotombo la Jehowa le ekambi ande lakaleke mɛnama lam’akawetawɔ lokombo l’Ɛmɛnyi wa Jehowa.—Isaya 43:10, 12.
3. Ngande wakadiayɛnamaka hwe ɔnɛ osase wa Jehowa pombaka pɛtɛla ndo anto akina aha paka akitami w’esɔ ato?
3 Onde Jehowa pɛtɛlaka paka atshikadi wa lo “limba la tshitshe l’ekoko” ato? (Luka 12:32) Bu. Tshoto y’Etangelo ya Ngɔndɔ ka Divwa 1, 1931 (l’Angɛlɛ) yakatɛkɛta dia olui okina. Yɔ yakalembetshiya Ezekiyele 9:1-11 dimɛna dimɛna ko yakɛnya ɔnɛ pami kokime ɔlɔndɔ w’ashi a mukanda katawɔ l’avɛsa asɔ nembetshiyaka atshikadi w’akitami w’esɔ. Waa na wadjama djembetelo lo mfumu oma le ‘pami’ kɛsɔ na? Ele “ekoko ekina,” wanɛ wele l’elongamelo ka sɛna pondjo pondjo lo nkɛtɛ kayokadimɔ paradiso. (Joani 10:16; Osambu 37:29) L’ɔnɔnyi wa 1935, wakayoshihodia ɔnɛ olui ɔsɔ w’“ekoko ekina” mbele “ului a wuki w’antu . . . [w’]uma lu wedja tshe” wakɛnyi Joani lo ɛnɛlɔ. (Enyelo 7:9-14) Oma l’ɔnɔnyi wa 1935 polo ndo ɛlɔ kɛnɛ, otshumanyelo w’olui a woke w’anto asɔ mbamboleka mbidjama yimba.
4. Waa na wele “khumi ya dikanga” la “wedja” watawɔ l’Isaya 60:3?
4 Prɔfɛsiya k’Isaya tɛkɛtaka di’olimu ɔsɔ w’otshumanyelo lam’atatɔ ɔnɛ: “Wedja wayuya dia ndjuyanga usasi aye, la khumi ya dikanga wayusamanya uya lu ngaingai k’esenyelo kaye la pindju.” (Isaya 60:3) Waa na wele “khumi ya dikanga” yatawɔ lanɛ na? Yɔ yele atshikadi wa l’atei w’anto 144 000, wanɛ wele, kâmɛ la Yeso Kristo, wekɔ ekitɔ wa Diolelo dia l’olongo ndo wekɔ lo nɔmbɔla olimu w’esambishelo. (Romo 8:17; Enyelo 12:17; 14:1) Ɛlɔ kɛnɛ, “wedja,” mbut’ate wanɛ wele l’elongamelo ka sɛna laa nkɛtɛ waya le Jehowa dia nde ndjowaetsha ndo welɛ akina dia vɔ ndjolakanyema le nde, waya efula ka mamba ndeka ndo nunu dingana di’atshikadi w’akitami w’esɔ.—Isaya 2:3.
Ekambi wa Jehowa wele l’ohetoheto
5. (a) Awui akɔna wɛnya ɔnɛ ohetoheto w’ekambi wa Jehowa kokitakita? (b) L’ɔnɔnyi wa 1999, ehamelo kakaleke monga lo wedja akɔna? (Enda lo kiombokombo ya lo lɛkɛ 27-30.)
5 Ɛmɛnyi wa Jehowa wa nshi nyɛ mɛtɛ wakɛnya ohetoheto awɔ l’edja ka ntambe ka 20 yetshi! Ndo kânga mbakatafulanɛka ekakatanu wa wolo, ohetoheto awɔ kokitakita lam’akayasukanaka ɔnɔnyi wa 2000. Vɔ wakadjaka timba tawɔ tshɛ lo didjango dia Yeso di’ɔnɛ: “Nyete wedja tshe ambeki.” (Mateu 28:19, 20) L’ɔnɔnyi w’olimu wetshi wa ntambe ka 20, lofulo l’apandjudi wa lokumu l’ɔlɔlɔ wakamba olimu lakakome 5 912 492. Vɔ waketsha lofulo la mamba la wenya 1 144 566 849 lo tasanyɛka asekawɔ anto akambo wa Nzambi ndo kɛnɛ kasangoyande ntsha. Vɔ wakakalola mbala 420 047 796 dia tênda anto wayasha ndo wakeke Bible l’anto 4 433 884 lawakawɔ ofele. Ɔsɔ mɛtɛ ekɔ etombelo wa mamba w’oma l’olimu wakakambema l’ohetoheto!
6. Yɛdikɔ yakɔna y’oyoyo yakawɔsɛ ambatshi mboka, ndo etombelo akɔna wakayala oma lo yɛdikɔ shɔ?
6 Lo Ngɔndɔ ka Ntondo k’ɔnɔnyi wetshi, anangɛso wa l’Olui Walɔmbɔla wakewoya otshikitanu wa lofulo la wenya lalɔmbama le ambatshi mboka. Efula wakakambe la diaaso sɔ dia mbɔtɔ l’ɔnɔngɔ w’ambatshi mboka wa pondjo kana wa tshanda. Oko ɛnyɛlɔ, lo ngɔndɔ nyɛi ya ntondo ya l’ɔnɔnyi wa 1999, Bɛtɛlɛ ka lo wodja wa Pays-Bas akalongola lofulo l’adɛmandɛ w’ambatshi mboka wa pondjo loleki ndo lɔnɛ la l’etena kakɔ kâmɛ k’ɔnɔnyi wakete mbala nyɛi. Bɛtɛlɛ ka lo wodja wa Ghana kekɔ lo tewoya ɔnɛ: “Tatɛ oma lam’akatamɛ ndjela lofulo la wenya l’oyoyo lalɔmbama le ambatshi mboka, lofulo l’ambatshi mboka wa pondjo lekɔ lo tadɛ paka mbudɛ tsho.” L’ɔnɔnyi w’olimu wa 1999, lofulo l’ambatshi mboka la l’andja w’otondo lakakome 738 343—ɔsɔ mɛtɛ ekɔ djembetelo ya mamba ‘y’ohetoheto wele laso l’elimu w’ɔlɔlɔ.’—Tito 2:14.
7. Ngande wakatshɔkɔla Jehowa olimu wakamba ekambi ande l’ohetoheto?
7 Onde Jehowa akatshɔkɔla olimu ɔsɔ wakakambema l’ohetoheto? Eelo. Nde akate l’onyɔ w’Isaya ate: “Edia ashu aye, endi l’utshimba. Vo tshe wambomota kame, wuyayi uya le ye. An’aye w’apami wayuya uma l’etali, la an’aye w’amantu wayembama lu tukundu.” (Isaya 60:4) ‘Ana w’apami’ la ‘ana wa wamato’ wakatshumanyema, mbut’ate akitami w’esɔ, wekɔ lo kambɛ Nzambi olimu l’ohetoheto. Ndo nto, nshi nyɛ ɛkɔkɔ ekina waki Yeso wekɔ lo tshumanyema suke l’‘ana w’apami’ ndo ‘wa wamato’ waki Jehowa w’akitami w’esɔ lo wedja 234 ndo l’asɛnga wa lo ndjale ya weke.
‘Olimu tshɛ w’ɔlɔlɔ’
8. ‘Elimu akɔna w’ɛlɔlɔ’ wasala Ɛmɛnyi wa Jehowa?
8 Akristo wekɔ l’ɔkɛndɛ wa sambisha lokumu l’ɔlɔlɔ la Diolelo ndo kimanyiya anto wele la mposa dia vɔ monga ambeki. Koko, vɔ ‘wakalɔngɔswama dia monga l’akoka wahombama dia ntsha olimu tshɛ w’ɔlɔlɔ.’ (2 Timote 3:17) Ɔnkɔnɛ, vɔ kokɛkokɛka nkumbo yawɔ la ngandji, nongolaka angɛndangɛnda dimɛna ndo mendaka ase hemɔ. (1 Timote 5:8; Heberu 13:16) Ndo nto, anto wayakimɔ vamɛ la lolango lawɔ wekɔ lo kamba elimu wele oko mbika Mbalasa ya Diolelo—olimu wele ndo vɔ lawɔ tshondo y’esambishelo le anto. Lo wodja wa Togo, l’ɔkɔngɔ wa vɔ mbika mbalasa kɛmɔtshi, ewandji w’ɔtɛmwɛlɔ ɔmɔtshi wa karismɛ wakalange mbeya lande na kele Ɛmɛnyi wa Jehowa mbikaka mvudu yawɔ vamɛ koko ase ɔtɛmwɛlɔ awɔ wakahombe paka futa anto falanga dia mbasalɛ olimu ɔsɔ! Alapɔlɔ wa lo wodja wa Togo tewoyaka ɔnɛ wokelo wa Mbalasa ya Diolelo y’amɛna aki l’etombelo w’ɛlɔlɔ efula lo etenyi ka ngelo kakayakama ndo anto amɔtshi wakasale tshɛ dia ndowɛ mvudu kana mbika mvudu l’ahole wakasukana la lɛnɛ akahombaka mbalasa mbikama.
9. Ɛmɛnyi wa Jehowa akawasale lam’akatombe mpokoso ya weke?
9 Tena dimɔtshi, yoho kina y’olimu w’ɔlɔlɔ ndjɛnamaka ohomba. Ɔnɔnyi w’olimu wetshi ɔnɛ, mpokoso y’oma lo diangɔ diakatongama yakakomɛ wedja efula, ndo mbala efula Ɛmɛnyi wa Jehowa mbakongaka anto wa ntondo dia kimanyiya anto akɔ. Ɛnyɛlɔ oko lo wodja wa Honduras, ngembe kɛmɔtshi ka wolo kelɛwɔ ɔnɛ Mitch kakahandjola etenyi ka woke ka wodja ɔsɔ vwa. Aha la tshimbatshimba, biro walɔmbɔla olimu aso lo wodja ɔsɔ akatonge atshunda amɔtshi wa wanyandja dia nɔngaka diangɔ diahombama dia kimanyiya wanɛ wohomwe mpokoso. Ɛmɛnyi wa Jehowa wa la Honduras ndo efula wa lo wedja ekina wakakimɔ ahɔndɔ, mbo ya ndɛ, ekanga, ndo diangɔ dikina di’ohomba. Ase Kɔmite ya Wokelo wa Mvudu wakakambe l’akoka awɔ dia nɔngɔsɔla mvudu yakalana. Kombeta ndoko edja, anangɛso wanɛ wakahomɔ mpokoso wakakondja ekimanyielo dia vɔ kalola l’elimu awɔ wa lushi la lushi. Lo wodja wa Équateur, Ɛmɛnyi wa Jehowa wakayokimanyiya anangɛwɔ lam’akaye elola ka mamba ko nanya mvudu mɔtshi. L’ɔkɔngɔ wa nde menda ɔnkɔnɛ wakakambaka anangɛso olimu dimɛna dimɛna, owandji ɔmɔtshi wa lɛɛta akate ate: “Otondoyala lakɔshi olui w’anto anɛ l’olimu, tshike lambosala akambo wa mamba! Anto wele oko nyu nganɛ pombaka monga l’ahole tshɛ wa l’andja.” Elimu w’ɛlɔlɔ wa ngasɔ mbishaka Jehowa Nzambi lokumu ndo mɛnyaka ɔnɛ ‘omamemelo wakiso le Nzambi wekɔ ohomba l’akambo tshɛ.’—1 Timote 4:8.
Wekɔ ‘lo nmdjaye wayafumbɔ oko wange’
10. Kânga mbatakitakita lofulo l’akitami w’esɔ, lande na kasambishama lokombo la Jehowa lo yɛdikɔ yoleki nganɛ akalwasambishamaka ntondo?
10 Kakianɛ, Jehowa ekɔ lo mumbola ate: “Wana aku wayayi esadi uku wangi, wayafumbo uku bing[a] uya lu kefu kawo na? Ne dia asenga watulungamelaka le mi, mashua wa la Tarashishi wayuya ntundu, dia mbela an’aye uma l’etali, . . . Asi wedja wayuhika peli diawo ntu, la khumi ya dikanga yawo yayukukambela ulimu.” (Isaya 60:8-10) Wanɛ waketawɔ ‘osase’ wa Jehowa ntondo ele ‘anande,’ mbut’ate Akristo w’akitami w’esɔ. L’ɔkɔngɔ awɔ mbakayoya “asi wedja,” lemba la woke l’anto wakambɛ anangɛwɔ w’akitami w’esɔ olimu ndo watayele ɛnyɔlɔ kawɔ lo sambishaka lokumu l’ɔlɔlɔ. Ɔnkɔnɛ, kânga mbatakitakita lofulo l’akitami w’esɔ, lokombo la Jehowa lekɔ lo sambishama lo nkɛtɛ k’otondo lo yɛdikɔ yoleki ndo nshi yakete.
11. (a) Kakɔna katatetemala salema tsho ndo etombelo akɔna wakonge l’ɔnɔnyi wa 1999? (b) Lo wedja akɔna wakaleke anto batizama efula l’ɔnɔnyi wa 1999? (Enda lo kiombokombo ya lo lɛkɛ 27-30.)
11 Etombelo wamboyala ele miliyɔ y’anto wekɔ lo pongomɔ ‘wate kana tokudumba oya lo tokefu tawɔ,’ ndo wekɔ lo kondja eshamelo l’atei w’etshumanelo k’Akristo. Ɔnɔnyi tshɛ, anto nunu nkama wekɔ lo ndja, ndo mboka kekɔ hwe di’akina nto nyomoya. Isaya ekɔ lo mbuta ate: “Asuku aye wayutshikalaka hwe nshi tshe. Vo hawudihamaka la yanyi kuyanga l’utshu, dia mbotshiya . . . ekundji wa wedja.” (Isaya 60:11) Ɔnɔnyi wetshi, anto 323439 wakabatizama dia mɛnya woho wakawayâkimɔ le Jehowa, koko nde atadihe nkuke polo ndo ɛlɔ. Ase lemba la woke, wanɛ wele ‘diangɔ di’amɛna dia wedja,’ wekɔ lo pongomɔ tsho. (Hangai 2:7) Ndoko onto lalanga tshika wodjima lashimbawɔ di’aha nde mbɔtɔ. (Joani 12:46) Sho kombolaka di’anto asɔ tshɛ tetemala mbɔsa osase la nɛmɔ di’efula!
Hawoke wɔma kânga lam’alɔshamawɔ
12. Wanɛ walanga wodjima ngande wahembawɔ nyima osase?
12 Wanɛ walanga wodjima hawolange osase wa Jehowa. (Joani 3:19) Amɔtshi monaka ndo woho wa nyima osase ɔsɔ. Ɔsɔ bu dikambo dia diambo nɛ dia kânga Yeso, ‘osase wa mɛtɛ wahɛtɛ onto tshɛ,’ akasɔkama, akalɔshama ndo akayodiakema oma le ase wodja ande. (Joani 1:9) L’edja tshɛ ka ntambe 20 ketshi, Ɛmɛnyi wa Jehowa ndo vɔ lawɔ wakasɔkama, wakadjama lo nkanu, wakashimbama, ndo wakadiakema nɛ dia wakakɛnɛmɔlaka osase wa Jehowa la kɔlamelo tshɛ. L’ɛnɔnyi ɛnɛ weke ka mbeta, atunyi wakatatɛ pandjola awui wa kashi lo tita nsango lo lokombo la wanɛ wangamula osase wa Nzambi. Amɔtshi nangaka mbetawoya anto ɔnɛ Ɛmɛnyi wa Jehowa wekɔ anto wa kɔlɔ efula ndo pombaka shimbama. Onde atunyi asɔ wakadje otshumba?
13. Etombelo akɔna wayala oma lo woho walembetshiyaso akambo wa mɛtɛ wendana l’olimu aso la yewo tshɛ lo tita nsango?
13 Eete na. Lɛn’ɛnawɔ ɔnɛ kokaka, Ɛmɛnyi wa Jehowa ntshɔka ndo lo tita nsango dia tolembetshiya akambo wele mɛtɛ. Omalɔkɔ, lokombo la Jehowa lakadianganyema efula lo tojurunalɛ, l’aradiyo ndo lo waa televiziɔ. Dui sɔ diakayala l’etombelo w’ɛlɔlɔ l’olimu w’esambishelo. Ɛnyɛlɔ oko lo wodja wa Danemark, emisiɔ ɔmɔtshi wa televiziɔ wakayasha lo sawo diaki l’ɔtɛ ɔnɛ: “Ɔkɔkɔ Watakitakita Mbetawɔ k’Ase Danemark.” Wakakɔnya Ɛmɛnyi wa Jehowa kâmɛ l’ase ɛtɛmwɛlɔ ekina. L’ɔkɔngɔ diko, osekaseka ɔmɔtshi wakayele emisiɔ ɔsɔ akayota ate: “Wanɛ wele la nyuma ka Nzambi wakɛnamaki lo sɛkɛ.” Osekaseka ɔsɔ akayotatɛ mbeka Bible.
14. Andɔshi wayokiyana efula nɛ dia wayanga tshutshuyama la wolo dia mɛna dui diakɔna?
14 Ɛmɛnyi wa Jehowa mbeyaka ɔnɛ anto efula wayowalɔsha l’andja ɔnɛ. (Joani 17:14) Koko, prɔfɛsiya k’Isaya kɛnɛ mbakeketshaka: “Ana a waku wakakusuyaka, wayuyakitshakitsha la ntundu kaye, la waku wakakuhetshaka, wayukhusama la ntundu kaye. Vo wayuketaka vati: Usumba wa [Jehowa], Siona ya l’Ekila l’Isariyele.” (Isaya 60:14) Andɔshi wayokiyana efula nɛ dia kem’edja nto kete vɔ wambosokoyama la wolo dia mɛna ɔnɛ Nzambi mɛtɛ mbakawalɔshaka. Akɔna akoka mbidja otshumba lo ta dia ngasɔ na?
15. Ɛmɛnyi wa Jehowa ngande ‘wewɔ lo ndɛ diangɔ dia wedja,’ ndo ngande wɛnama dui sɔ l’olimu awɔ wa ndakanyaka anto ndo wa mbewoya lokumu l’ɔlɔlɔ?
15 Jehowa ekɔ lo ndaka nto ate: “Dimi layukete engo ka nemo pundju, . . . We ayulela wedja diango, ayulela ndu khumi ya dikanga. Okone we ayeya wati: Dimi keli [Jehowa] Ushimbedi aye.” (Isaya 60:15, 16) Eelo mɛtɛ, Jehowa mbele Oshimbedi w’ekambi ande. Naka vɔ ndjaɛkɛ le nde, kete vɔ wayotshikala “pundju.” Ndo vɔ ‘wayɔlɛ diangɔ dia wedja,’ mbut’ate wayokambaka la diangɔ dimɔtshi diatanema dia ntɔla ɔtɛmwɛlɔ wa pudipudi otsha la ntondo. Oko ɛnyɛlɔ, okambelo wa dimɛna wa la waa ɔrdinatɛrɛ ndo la mashinyi wewoyanawɔ nsango tokimanyiyaka dia Tshoto y’Etangelo tombaka mbala ɔtɔi l’ɛtɛkɛta 121 ndo Réveillez-vous ! l’ɛtɛkɛta 62. Prɔgramɛ kɛmɔtshi k’ɔrdinatɛrɛ kakasalema dia kadimolaka Traduction du monde nouveau l’ɛtɛkɛta w’eyoyo ndo ekadimwelo ka ngasɔ toshaka ɔngɛnɔngɛnɔ efula. Lam’akatombe ekadimwelo k’Afundelo w’Akristo wa lo Grɛkɛ l’ɔtɛkɛta wa croate l’ɔnɔnyi wa 1999, nunu di’anto wakakɛdja asɔyi l’ɔngɛnɔngɛnɔ. Ɔnangɛso ɔmɔtshi laya osombe akate ate: “Aya edja ka mamba kamomokonga Bible kɛnɛ. Kakianɛ, aya dimi a nkana mvɔ lo wɔladi!” Traduction du monde nouveau, oyadi otondo kana ɛtshi, yambotomba ndekana miliyɔ 100 l’ɛtɛkɛta 34.
Ɛlɛmbɛ wa lɔkɛwɔ la dimɛna efula
16, 17. (a) Kânga mbediɔ wolo, lande na kele ekɔ ohomba ndjelaka ɛlɛmbɛ wa Jehowa wa lâdiko na? (b) Ɛnyɛlɔ kakɔna kɛnya ɔnɛ ɛlɔngɔlɔngɔ l’esekaseka kokaka mbewɔ mindo y’andja ɔnɛ?
16 Yeso akate ate: “Untu tshe latutshaka kolo, atuhetshaka yanyi.” (Joani 3:20) Koko, wanɛ watshikala l’osase nangaka ɛlɛmbɛ wa Jehowa w’amɛna efula. Jehowa akate ɔnkɔnɛ l’onyɔ w’Isaya: “Antu ane wayuyala antu w’ololo atu.” (Isaya 60:21a) Kokaka ndjâla wolo di’onto mongaka nshi tshɛ la lɔkɛwɔ la dimɛna efula l’andja ɔnɛ wambolola tɔ l’akambo wa mindo wa dieyanelo, la wovi, la mposa k’okundji, ndo la lotamanya. Ɛnyɛlɔ oko lo wedja ɛmɔtshi, ekundji talekaka mɛnama ndo fulanɛ esadi esadi ndo bu wolo di’onto ndjotakɔ mboka ko ndjoyasha paka lo tawesaka ɔngɔnyi. Koko, Paulo akatewola ate: “Wane wakomiya ndjala engonyi, wayoko lu uhimba la lu djunga ndu lu saki ya dinginya yatutshelaka antu kolo, yayuditsha antu lu elanyelu la eshishwelu.” (1 Timote 6:9) Ekɔ kandji efula naka onto amboyatambiya tshavu lo munda okanda ko mbetawɔ shisha akambo woleki ohomba wele oko sanganaka l’asekande Akristo, tombaka l’olimu w’ekila, mongaka la lɔkɛwɔ l’ɔlɔlɔ ndo kotsha ɛkɛndɛ wa lo nkumbo!
17 Ekɔ wolo, djekoleko le ɛlɔngɔlɔngɔ l’esekaseka, dia ndjelaka nshi tshɛ ɛlɛmbɛ wa lɔkɛwɔ la dimɛna efula, dikambo asekawɔ efula wamboyasha lo ɔnwɛlɔ wa didjoyadjoya ndo l’akambo wa mindo. Lo wodja wa Suriname, dikɛnda dimɔtshi dia pami akaye le yana mɔtshi ya yimato y’ɛnɔnyi 14 ko ndjowotɛ dia vɔ mbeyana. Yana yakɔ ya yimato kombetawɔ, nde akôlembetshiya ɔnɛ Bible halange akambo wa ngasɔ le wanɛ wahatatshukana. Ana akina wa wamato wa la kalasa wakawɔ̂lɛ ndo wakahembe mbotshutshuya dia nde mbetawɔ, vɔ la nde vate: womoto tshɛ nangaka mbishama la dikɛnda dia pami sɔ. Kânga mbakawawotɛ ngasɔ, yana ya yimato shɔ akatshikala nge. L’ɔkɔngɔ wa mingu mɔtshi, dikɛnda dia pami sɔ akatosala ɛgzamɛ la lopitadi ko wakatowonda la hemɔ ka SIDA ndo nde akayotata woho w’anyanya. Yana ya yimato shɔ aki l’ɔngɛnɔngɛnɔ efula l’ɔtɛ wakandakitanyiya didjango dia Jehowa diata ɔnɛ: ‘Nyolawɔ monanyi.’ (Etsha 15:28, 29) Ɛmɛnyi wa Jehowa mbokaka ɔlɔ wa mamba l’ɔtɛ w’ɛlɔngɔlɔngɔ ndo esekaseka wa l’atei awɔ walanga tshikala nge dia ntsha kɛnɛ kele ɔlɔlɔ. Mbetawɔ kawɔ ndo k’ambutshi awɔ ‘nɛngaka’, kana tombolaka, lokombo la Jehowa Nzambi.—Isaya 60:21b.
Jehowa ambotofudia
18. (a) Naa akambo wa weke wasalɛ Jehowa ekambi ande? (b) Kakɔna kɛnya ɔnɛ ehamelo kayotetemala, ndo elongamelo kakɔna ka dimɛna efula kele la wanɛ watshikala l’osase?
18 Eelo mɛtɛ, Jehowa pɛtshɛka ekambi ande osase, mbatshɔkɔlaka, mbalɔmbɔlaka ndo mbakeketshaka. L’edja tshɛ ka ntambe ka 20 ketshi, vɔ wakɛnyi ekotshamelo k’ɛtɛkɛta w’Isaya wata ɔnɛ: “One leli tshitshe ayuyala kinunu, ona one luleki tshitshe wudja a wulu. Dimi, [Jehowa] layusamanya dikambu ne l’etena kadio.” (Isaya 60:22) Oma lo djui ya tshitshɛ yakiwɔ l’ɔnɔnyi wa 1919, “one leli tshitshe” ambolekana ndo “kinunu.” Koko, ehamelo ka ngasɔ atakomɛ! Ɔnɔnyi wetshi, anto 14088751 wakɔtɔ lo losanganya la Eohwelo ka Nyɔi ka Yeso. Efula ka l’atei awɔ bu etondo w’Ɛmɛnyi wa Jehowa. Tekɔ l’ɔngɛnɔngɛnɔ nɛ dia vɔ wakɔtɔ lo losanganya lɔsɔ l’ohomba la eohwelo, ndo sho mbakɔkɔmiyaka dia vɔ ntshɔ tsho otsha l’osase. Jehowa ekɔ lo tetemala pɛtshɛ ekambi ande osase wa mamba. Lokuke l’ɔlɔngɔswamelo wakinde lekekɔ hwe. Lâsɔ, onto tshɛ ɔ̂sɛ tɛdikɔ dia tshikala l’osase wa Jehowa. Ande ɛtshɔkɔ wakondjaso oma lo dui sɔ le! Ande ɔngɛnɔngɛnɔ wayonga laso lo nshi yayaye lam’ayotombolaka ditongami tshɛ Jehowa ko ngɛnangɛnaka l’osase wa lotombo lande le!—Enyelo 5:13, 14.
Wɛ kokaka nembetshiya?
• Waa na wakɛnɛmɔla lotombo la Jehowa lo nshi nyɛ y’ekomelo?
• Kakɔna kɛnya ɔnɛ ohetoheto w’ekambi wa Jehowa hawokitakita?
• Naa elimu ɛmɔtshi w’ɔlɔlɔ wasala Ɛmɛnyi wa Jehowa?
• Kânga mbalɔshamaso efula, eshikikelo kakɔna kele laso?
[Tablo ka lo lɛkɛ 27-30]
ALAPƆLƆ W’OLIMU W’ƐMƐNYI WA JEHOWA WA L’ANDJA W’OTONDO L’ƆNƆNYI 1999
(Enda okanda)
[Esato wa lo lɛkɛ 25]
Anto wekɔ lo pongomɔ tsho oya l’ɔlɔngɔswamelo wa Jehowa
[Osato wa lo lɛkɛ 32]
Tekɔ l’ɔngɛnɔngɛnɔ nɛ dia Jehowa ambotshika lokuke hwe dia wanɛ walanga osase mbɔtɔ