Diɛsɛ le wanɛ wakɛndakɛnda l’osase
“Nyuyi, tokendekende lu usasi wa [Jehowa].”—ISAYA 2:5.
1, 2. (a) Ohomba akɔna wele la osase na? (b) Lande na kele ɔhɛmwɛlɔ w’ɔnɛ wodjima wayokomba nkɛtɛ wekɔ ohomba efula na?
JEHOWA mbele Kiɔkɔ y’osase. Bible mbêlɛka ɔnɛ ‘Ɔnɛ latokimɔka wonya dia mbisha anto osase la yanyi, ndo ɔnɛ lakashikikɛ ngɔndɔ la tɔɔtɔ dia mbisha anto osase l’otsho.’ (Jeremiya 31:35; Osambu 8:3) Nde mbele Otungi wa wonya, mbut’ate nkuka kɛnɛ katondja ndja ya wolo efula, yele yema mɔtshi tsho mbakoma lanɛ la nkɛtɛ oko esase kana oko edungu dia sukɛ diangɔ diele la lɔsɛnɔ lâdiko dia nkɛtɛ nyɛ. Otondonga aha esase wa wonya, tshike sho bu la lɔsɛnɔ. Nkɛtɛ otonga okama wele ndoko ɛngɔ kele la lɔsɛnɔ.
2 Aha la mbohɛ dikambo sɔ, sho kokaka shihodia ohomba wa kɛnɛ kakakɔndɔla omvutshi Isaya. Nde akate ate: “Enda, hyutshihutshi ayukumba kete, la udjima a tshududu asi wedja.” (Isaya 60:2) Mbokɛmaka dia wodjima watawɔ lanɛ kema wodjima wa mɛtɛ mɛtɛ. Isaya konanga mbuta ɔnɛ nshi mɔtshi wonya, ngɔndɔ, la tɔɔtɔ wayotshika mbisha esase. (Esambu 89:36, 37; 136:7-9) Koko, nde akatɛkɛta dia wodjima wa lo nyuma. Aha la tamu, wodjima wa lo nyuma nembetshiyaka nyɔi. Sho hatokoke tshikala la lɔsɛnɔ naka vɔ todima osase wa lo nyuma l’etena k’otale, oko wahatakoke ndjala la lɔsɛnɔ naka osase wɛnaso ɔnɛ bu.—Luka 1:79.
3. Lo ndjela ɛtɛkɛta waki Isaya, kakɔna kahomba Akristo sala?
3 Lo ndjela dikambo sɔ, ekɔ ohomba efula dia mbeya ɔnɛ kânga mbakakotshama ɛtɛkɛta waki Isaya le Juda y’edjedja, vɔ wekɔ lo kotshama lo yoho y’efula ɛlɔ kɛnɛ. Eelo, l’etena kaso kɛnɛ, andja ɔnɛ wekɔ lo kunga lo wodjima wa lo nyuma. Lo woho wa dikambo dia wâle ngasɔ, osase wa lo nyuma wekɔ ohomba efula. Diɔ diakɔ diahomba Akristo kitanyiya dako diaki Yeso diata ɔnɛ: “Okone usasi anyu ahete la ntundu k’antu.” (Mateu 5:16) Akristo wa kɔlamelo kokaka ngamulɛ akanga wa memakana wele lo wodjima osase, lo mbasha diaaso dia vɔ ndjokondja lɔsɛnɔ.—Joani 8:12.
Etena ka wodjima wa tshududu l’Isariyɛlɛ
4. Etena kakɔna kakakotshama ntondo ɛtɛkɛta wa prɔfɛsiya waki Isaya, ndo awui akɔna waketaka lo nshi yande?
4 Ɛtɛkɛta waki Isaya wendana la wodjima wambokomba nkɛtɛ k’otondo wakakotshama ntondo lam’akalanyema Juda ndo lam’akatɔlama anto wa lɛkɔ otsha lo lɔhɔmbɔ la Babilɔna. Koko, kânga la ntondo ka dikambo sɔ, lo nshi y’Isaya ndamɛ, efula k’anto wa lo wodja ɔsɔ wakakungaka lo wodjima wa lo nyuma, dikambo sɔ mbakôtshutshuya dia nde kɔkɔmiya anyande wa lo wodja ate: ‘Nyu anto wa lo luudu la Jakɔba le, nyoye, tɔkɛndɛkɛndɛ l’osase waki Jehowa.’—Isaya 2:5; 5:20.
5, 6. Awui akɔna wakayokonyaka dia wodjima monga lo nshi y’Isaya?
5 Isaya akataka awui ande wa prɔfɛsiya la Juda “lu nshi ya Uziya, Jotama, Ahaza la Hezekiya, khumi ya dikanga ya Juda.” (Isaya 1:1) Ɔsɔ aki etena k’osukusuku efula nɛ dia efukutanu wakalole l’akambo wa pɔlitikɛ, ase ɔtɛmwɛlɔ waki ase dungi pende, tominadi takalole la kɔta mishiko ndo ase wola wakasoyamaka efula. Kânga lo nshi yakolɛka nkumi ya dikanga ya kɔlamelo, ɛnyɛlɔ oko Jɔtama, ɛtɛ w’akona efula wakalole la elambwelo wakawahikɛ tozambizambi ta kashi. L’ɛlɔmbwɛlɔ ka nkumi ya dikanga yaki komonga la kɔlamelo mbakaleke akambo fukutana tshɛ. Ɛnyɛlɔ, Ahaza, Nkumekanga ka kɔlɔ akakumi polo ndo lo nambola anande le jambizambi yakawelɛka Mɔlɛka. Ɔsɔ mɛtɛ aki etena ka wodjima wa tshududu!—2 Khumi ya Dikanga 15:32-34; 16:2-4.
6 Kɛnɛ kaketaka lo wedja efula aki nto kɔlɔ efula. Mɔaba, Edɔmɛ, la Filistiya wakemala l’elelo wa wodja wa Juda l’oyango wa mbɔlɔsha. Diolelo di’Isariyɛlɛ dia lo nɔrdɛ diakayokomaka otunyi wa woke wa Juda kânga mbakawotɔka. Oma lo lɛkɛ la nɔrdɛ, Suriya akafukutanyaka wɔladi wa Juda. Kɛnɛ kakaleke tshɛ wâle ele, Asuriya diolelo di’esehe efula, akayangaka woho wa nanula bɛtshi dia nkɛtɛ diakidiɔ. L’etena kakataka Isaya awui ande wa prɔfɛsiya asɔ, Asuriya akalɛndja Isariyɛlɛ w’otondo ndo kɔkɔ ate kwɛ tshike ndo Juda mbakalanyema. L’etena kɛmɔtshi, Asuriya akalɛndja esomba tshɛ wa wolo wa la Juda, onyake Jerusalɛma.—Isaya 1:7, 8; 36:1.
7. Mboka kakɔna kakasɔnɛ Isariyɛlɛ la Juda, ndo Jehowa akandasale?
7 Wodja waki Nzambi wakadje la nde sheke wakadiɛnɛ la mpokoso shɔ nɛ dia Isariyɛlɛ la Juda wakashisha kɔlamelo otsha le nde. L’ɛnyɛlɔ ka wanɛ wakawatɛkɛta dikambo diawɔ lo dibuku dia Tukedi, vɔ ‘wakatshike mboka k’akambo w’ɔlɔlɔ ko wakakɛndakɛnda lo mboka ya wodjima.’ (Tukedi 2:13) Koko, kânga mbakoke Jehowa wodja ande nkɛlɛ, nde kombakalɛ lo pondjo. Diakɔ diakandatome Isaya nde l’amvutshi akina dia vɔ mbisha ose wodja tshɛ lakatetemalaka nyanga dia kambɛ Jehowa la kɔlamelo osase wa lo nyuma. Osase ɔsɔ wakawasha Nzambi oma lo tshimbo y’amvutshi asɔ waki mɛtɛ ohomba efula. Vɔ waki osase washa lɔsɛnɔ!
Tena dia wodjima dia lo nshi yaso nyɛ
8, 9. Akambo akɔna wambokonya andja ɔnɛ lo wodjima ɛlɔ kɛnɛ?
8 Akambo waketaka lo nshi y’Isaya fɔnaka efula la wanɛ wɛnaso nshi nyɛ. Lo nshi yaso nyɛ, mandji y’anto wamboka Jehowa nde la Yeso Kristo, Nkumekanga kamondahenya l’okudi ɔkɔngɔ. (Osambu 2:2, 3) Ewandji w’ɛtɛmwɛlɔ wa lo Lokristokristo wekɔ lo kesa ɛkɔkɔ wakiwɔ. Weho w’ewandji ɛsɔ wekɔ lo funa dia Nzambi mbakambɛwɔ, koko lo mbuta mɛtɛ, efula ka l’atei awɔ wekɔ lo kambɛ tozambizambi ta l’andja ɔnɛ, ɛnyɛlɔ oko: Ngandji k’otamanya ka wodja, ngandji ka lomombo, ndo anto wa lokumu, mbidja ndo wetshelo w’apanganu wetshawɔ.
9 Lo dihole la dihole, ɛtɛmwɛlɔ wa lo Lokristokristo wakayatambiya l’ata wamanawɔ waoho w’anto oshiki ndo wasalema akambo akina wa wɔnɔnyi. Ndo nto, lo dihole dia vɔ mbetsha anto lɔkɛwɔ l’ɔlɔlɔ letawɔ Bible, ɛtɛmwɛlɔ efula wekɔ lo ndiha washo ndo lo sukɛ awui wa mindo ɛnyɛlɔ oko monanyi la dieyanelo dia lam’asa pami la pami. Lo tona ɛlɛmbɛ wa lo Bible, anto wa lo Lokristokristo waya oko wanɛ wakatɛkɛta omembi w’esambo dikambo diawɔ ate: “Antu ako haweyi, hawumani fundu. Vo watokendakendaka lu udjima.” (Osambu 82:5) Lo mɛtɛ, l’ɛnyɛlɔ ka wodja wa Juda wa lo nshi y’edjedja, Lokristokristo lekɔ lo wodjima wa tshududu.—Enyelo 8:12.
10. Ngande wahɛta osase lo wodjima ɛlɔ kɛnɛ, ndo ngande wakondja akanga wa memakana wahɔ oma lɔkɔ?
10 L’atei wa wodjima wa woho ɔsɔ, Jehowa ekɔ lo ngamulɛ akanga wa memakana osase. Dia ngamula osase ɔsɔ, nde ekɔ lo kamba l’ekambi ande w’akitami w’esɔ wa lanɛ la nkɛtɛ, mbut’ate ‘ɔhɔmbɔ wa kɔlamelo ndo wa kɛsɔ,’ ndo vɔ mɛtɛ wekɔ lo ‘ngamula osase awɔ l’atei w’andja ɔnɛ.’ (Mateu 24:45; Filipi 2:15) Olui w’ɔhɔmbɔ ɔsɔ, wakimanyiyama oma le miliyɔ y’‘ɛkɔkɔ ekina,’ wekɔ lo mpɛtsha osase wa lo nyuma woye oma lo Bible, Ɔtɛkɛta waki Nzambi. (Joani 10:16) L’andja ɔnɛ wakunga lo wodjima, osase ɔsɔ mbishaka akanga wa memakana elongamelo, ndo mbâkimanyiyaka dia vɔ monga la diɔtɔnganelo di’ɔlɔlɔ lam’asawɔ la Nzambi, ndo dia vɔ mbewɔ tolonga ta lo nyuma. Vɔ mɛtɛ wekɔ ɛngɔ k’oshinga wolo kasha lɔsɛnɔ!
‘Layotombola lokombo layɛ’
11. Awui akɔna wakewoya Jehowa lo nshi y’Isaya?
11 Lo nshi ya wodjima yakasɛnaka Isaya ndo lo nshi yakaleke wodjima yakonge l’ɔkɔngɔ w’ase Babilɔna tɔla wodja waki Jehowa lo lɔhɔmbɔ, woho akɔna w’ɛlɔmbwɛlɔ kakasha Jehowa na? Lâdiko wa nde mbisha ɛlɔmbwɛlɔ l’akambo wendana la lɔkɛwɔ l’ɔlɔlɔ, nde akɛnya hwe la ntondo woho wayondokotsha asangwelo ande wendana l’ekambi wakinde. Tênde ɛnyɛlɔ, prɔfɛsiya ya diambo yele l’Isaya tshapita 25 polo 27. Ɛtɛkɛta wa lo totshapita tɔnɛ mɛnyaka woho wakakandola Jehowa akambo l’etena kɛsɔ ndo woho wayondokandola akambo ɛlɔ kɛnɛ.
12. Ɛtɛkɛta akɔna wakatondja Isaya l’otema ɔtɔi?
12 Ntondotondo, Isaya mbutaka ɔnɛ: “[Jehowa] li, we keli [Nzambi k]ami. Dimi layukutumbula, layandula lukumbu laye.” Ɔsɔ ekɔ mɛtɛ ɛtɛkɛta wa lotombo woye oma k’ɛs’otema! Ko kakɔna kakatshutshuya omvutshi Isaya dia nde sala dɔmbɛlɔ dia ngasɔ na? Ɔkɔkɔ woleki tanemaka l’etenyi ka divɛsa kotshikadi, lɛnɛ adiaso ɔnɛ: “Ne dia we [Jehowa] akatshi akambu wa mamba. We akashidiya alaka wakayalaki la kolamelu la mete.”—Isaya 25:1.
13. (a) Ewo kakɔna kakakeketsha lowando laki Isaya otsha le Jehowa? (b) Ngande wakokaso kondja wetshelo oma l’ɛnyɛlɔ kaki Isaya?
13 Lo nshi y’Isaya, Jehowa akasale akambo efula wa diambo lo wahɔ w’Isariyɛlɛ, ndo akambo akɔ wakafundama lofundama. Lo mɛtɛ, Isaya akayaekesanyiya l’efundelo ɛsɔ. Ɛnyɛlɔ, nde akeyaka dia Jehowa akatondja ekambi ande oma lo lɔhɔmbɔ l’Edjibito ndo akâkokɛ oma lo nkɛlɛ k’alembe waki Farawɔ lo Ndjale ka Beela. Nde akeyaka dia Jehowa akalɔmbɔla ekambi ande l’oswe wa shɛnga ndo akawaɔtshiya lo Nkɛtɛ ya Daka. (Osambu 136:1, 10-26) Ɛkɔndɔ wa ngasɔ mɛnyaka dia Jehowa Nzambi ekɔ kanga kɔlamelo ndo sho kokaka mbɛkɛ etema aso le nde. ‘Alaka’ ande, mbut’ate kɛnɛ tshɛ kakandasangoya, kekɔ lo kotshama. Ewo kɛsɔ k’oshika kaki Nzambi kakasha Isaya wolo wa nde tetemala la kɛndakɛnda l’osase. Lo dikambo sɔ, nde ekɔ ɛnyɛlɔ k’ɔlɔlɔ le so. Naka sho mbeka Ɔtɛkɛta waki Nzambi la yambalo tshɛ ndo kamba la wɔ lo nsɛnɔ yaso, kete sho lawɔ tayotshikala l’osase.—Osambu 119:105; 2 Koreto 4:6.
Osomba ɔmɔtshi wambolanyema
14. Kakɔna kakatama lo kɛnɛ kendana l’osomba ɔmɔtshi, ndo osomba akɔna ɔsɔ ondo na?
14 Sho tanaka ɛnyɛlɔ kɛmɔtshi ka alako waki Nzambi lo Isaya 25:2, lɛnɛ adiaso ɔnɛ: “We ambete usumba tuta dia ave, ndu ngelu ka wulu elanyelu. Luudu la diulelu l’asi wedja lambuhandjo, lo haluhikama ntu.” Naa osomba ɔsɔ na? Ondo Isaya akatɛkɛtaka l’ɛtɛkɛta wa prɔfɛsiya dikambo dia Babilɔna. Ekɔ mɛtɛ dia akakome etena kɛmɔtshi kele Babilɔna akayokomaka tuta di’ave to.
15. Naa ‘osomba wa woke’ wele lo nshi yaso nyɛ, ndo kakɔna kayokomɛ osomba akɔ?
15 Onde osomba wakatɛkɛta Isaya ɔsɔ fɔnaka l’osomba ɔmɔtshi ɛlɔ kɛnɛ? Eelo. Dibuku di’Enyelo tɛkɛtaka di’‘osomba wa woke wele la lowandji lâdiko wa nkumi ya dikanga ya la nkɛtɛ.’ (Enyelo 17:18) Osomba wa woke ɔsɔ ko ‘Babilɔna ka woke,’ tshunda di’ɛtɛmwɛlɔ wa kashi wa l’andja w’otondo. (Enyelo 17:5) Ɛlɔ kɛnɛ, etenyi koleki woke l’atei wa Babilɔna ka Woke ko Lokristokristo lɔnɛ lele ɛlɔmbɛdi wa lɔkɔ mbaleka mbidja wekamu l’olimu w’esambishelo ka Diolelo wakamba ekambi wa Jehowa. (Mateu 24:14) Koko, l’ɛnyɛlɔ ka Babilɔna k’edjedja, kem’edja nto, Babilɔna ka Woke kayolanyema pondjo pondjo.
16, 17. Atunyi waki Jehowa ngande wakawotombola lo nshi yakete ndo wotombolawɔ nshi nyɛ?
16 Naa dikambo dikina diakate Isaya lo dikambo di’‘osomba wa wolo’ ɔsɔ na? Lam’akandalɔmbaka Jehowa, Isaya akate ate: “Okone wudja wa wulu wayukutumbula, la esumba wa wedja wa ngala wayukuka woma.” (Isaya 25:3) Ngande wakakoke osomba ɔsɔ woludi la lohetsho mbut’ate “usumba wa wedja wa ngala,” tombola Jehowa na? Tohɔ kɛnɛ kakakomɛ Nɛbukadinɛza, nkumekanga ka Babilɔna kakaleke wolo tshɛ. L’ɔkɔngɔ wa dikambo dia kɔlɔ efula diakokomɛ lo lɔsɛnɔ lande diakɛnyaka wɔdu wakinde diakotshutshuya dia kana yimba, nde akatshutshuyama la wolo dia mbetawɔ woke woke waki Jehowa ndo nkudu Kande. (Danyele 4:34, 35) Lam’akamba Jehowa la nkudu kande, kânga atunyi ande tshutshuyamaka la wolo dia mbetawɔ etsha ande wa nkudu kânga mbahawetawɔ la lolango lawɔ.
17 Onde Babilɔna ka Woke kakatshutshuyama dia mbetawɔ etsha wa nkudu waki Jehowa? Eelo. Lam’akalɔmaka ta dia ntondo di’andja w’otondo, ekambi waki Jehowa w’akitami w’esɔ wakasambishaka l’atei w’ɛhɛnyɔhɛnyɔ. L’ɔnɔnyi wa 1918, vɔ wakatɔlama lo lɔhɔmbɔ la lo nyuma etena kakadjama ɛnɔmbɔdi wa Société Watch Tower lo lokanu. Olimu w’esambishelo wakayongaka oko wambemala. Koko, l’ɔnɔnyi wa 1919, Jehowa akatshungola oma lo lɔhɔmbɔ ndo akawasha wolo oma l’ekimanyielo ka nyuma kande, kakakimanyiya dia vɔ kotsha ɔkɛndɛ awɔ wa sambisha lokumu l’ɔlɔlɔ lo nkɛtɛ k’otondo. (Mako 13:10) Akambo asɔ tshɛ wakatatami lo dibuku di’Enyelo, lo menda kânga kɛnɛ kakakomɛ atunyi awɔ. Vɔ ‘wakandama la wɔma w’efula ndo wakayotombola Nzambi ka l’olongo.’ (Enyelo 11:3, 7, 11-13) Aha vɔ tshɛ mbakakadimola etema, koko vɔ wakatshutshuyama la wolo dia mbetawɔ etsha wa nkudu waki Jehowa lo diaaso sɔ, oko wakataditshi Isaya.
“Eshamelu k’usi wula.”
18, 19. (a) Bonde kambohekɔ atunyi w’ekambi waki Jehowa ndanya kɔlamelo yawɔ? (b) Ngande ‘wayoshila nkembo y’akanga wa ngala’?
18 Lo kotola kakianɛ yambalo yande otsha lo yoho yasalɛ Jehowa wanɛ wakɛndakɛnda l’osase akambo la ngandji, Isaya ambotɛ Jehowa ate: “We aki eshamelu k’usi wula, eshamelu k’uhumbi la pa kandi, ehandelu uma lu ngimbi, la dedi uma lu luhaladi. Luwi l’akanga a ngala leli uku ngimbi l’eheli ka lukumbu la ngelu. Uku luhaladi lu kete ya wumu. We atukitshakitshaka lundju l’asi wedja wa ngala, uku atututshaka dedi dia dingi luhaladi; osoku mbatuyolembohayaka akanga a ngala.”—Isaya 25:4, 5.
19 Tatɛ oma l’ɔnɔnyi wa 1919, akanga wa ngala wakasale tshɛ dia ndanya kɔlamelo y’atɛmɔdi wa mɛtɛ, koko vɔ wakakite tatala. Lande na na? Nɛ dia Jehowa mbele longele ndo eshamelo k’ekambi ande. Nde mbishaka dɛdi dia tshitshi dia tokokɛ oma lo laladi l’ɛhɛnyɔhɛnyɔ ndo nde ekɔ oko ehele ka wolo katokombɛ oma lo mpɛpɛ y’avula mbut’ate oma lo wekamu w’oma le atunyi. Sho wanɛ wakɛndakɛnda l’osase waki Nzambi tekɔ lo kongɛ l’eshikikelo tshɛ etena ‘kayɔlɛmbɔhala akanga wa ngala.’ Eelo, tekɔ lo kongɛ l’asolo walomɔlomɔ etena kayolanyema atunyi waki Jehowa.
20, 21. Dambo diakɔna diambokatɛ Jehowa, ndo dambo sɔ diayonga la diangɔ diakɔna l’andja w’oyoyo?
20 Jehowa salɛka ekambi ande akambo efula, koko aha mbashimbɛ tsho. Oko wende Shɛwɔ ka ngandji, nde mbakokɛka. L’ɔkɔngɔ wa nde tshungola ekambi ande oma lo Babilɔna ka Woke lo 1919, nde akâkitshɛ dambo di’edjelo k’otshumba la ntondo kawɔ, mbut’ate, mbo ya ndɛ ya lo nyuma y’efula. Dikambo sɔ diakatama lo Isaya 25:6, lɛnɛ adiaso ɔnɛ: “[Jehowa] Kanga lulimbilimbi ayolongos[ɔlɛ] antu tshe dambu di’ololo, dambu dia wanu w’ololo, dambu dieli la uhiho, dambu dia wanu wambolongoswama ololo.” Tekɔ mɛtɛ la diɛsɛ dia monga lo dambo sɔ! (Mateu 4:4) ‘Mɛsa wa Jehowa’ wambololanɛ mɛtɛ la mbo ya ndɛ y’ɛlɔlɔ. (1 Koreto 10:21) Oma lo tshimbo y’‘ɔhɔmbɔ wa kɔlamelo ndo wa kɛsɔ,’ tekɔ lo nongola kɛnɛ tshɛ keso l’ohomba lo nyuma.
21 Koko aha lâsɔ ato mbokome dambo diambotɔlɔngɔsɔlɛ Nzambi. Dambo dia lo nyuma dieso lo ngɛnangɛna ladiɔ ɛlɔ kɛnɛ diekɔ lo tohola nganɛ wayonga mbo ya ndɛ ya l’emunyi tshavutshavu l’andja w’oyoyo wambotolaka Nzambi. L’ɔkɔngɔ diko, ‘dambo dia mbo y’eshika ndo y’esɔ’ diayendana ndo la mbo ya ndɛ ya l’emunyi yayonga tshavutshavu. Ndoko onto layonga la ndjala oyadi ka mbo ya ndɛ ya l’emunyi kana ya lo nyuma. Ande ekeketshelo le anangɛso wa ngandji wanɛ wasowa la ‘ndjala ya kasha’ yakatatami yele etenyi ka ‘djembetelo’ ya wôngelo wa Yeso lee! (Mateu 24:3, 7) Vɔ mɛtɛ kondjaka ekeketshelo l’ɛtɛkɛta ɛnɛ waki omembi w’esambo. Nde akate ate: ‘Diangɔ dia ndɛ diayonga tshavutshavu la nkɛtɛ, ndo l’ɛtɛ w’akona.’—Osambu 72:16.
22, 23. (a) Naa ‘ɛtshi ka dihɔndɔ’ kana ‘okombɔ,’ wayonyɛma ndo yoho yakɔna? (b) Ngande wayonyɛma ‘sɔnyi kakashama ekambi waki Jehowa’?
22 Nyɛsɔ tohokame kakianɛ daka dimɔtshi dia dimɛna efula. Lo mbɔsa pɛkato la nyɔi ko mbaɛdika la ɛtshi ka ‘dihɔndɔ,’ kana ‘okombɔ,’ Isaya mbutaka ɔnɛ: “L’ukungu one, [Jehowa] ayulanya ukumbo watukumbaka antu tshe, ee, [dihɔndɔ] [di]atukumbaka wedja tshe.” (Isaya 25:7) Ohokanyiya yema! Pɛkato la nyɔi, yambɛnya anto pâ watekana oko okombɔ ɔmɔtshi w’etitadi hatonga nto. Mɛtɛ, tekɔ lo kongɛ l’asolo walomɔlomɔ lushi lɔnɛ layɔngɛnangɛna anto wele l’okitanyiya ndo la kɔlamelo lo yoho y’efula la ɛlɔlɔ w’oma l’olambo wa tshungo waki Yeso!—Enyelo 21:3, 4.
23 Lo kɛnɛ kendana l’etena kɛsɔ ka lotombo, omvutshi ɔsɔ toshikikɛka ɔnɛ: “[Nzambi] [ay]unya nyoi pundju. Ndi ayukitula asoi tshe oma lu ashu awo, ndi ayunya wudja andi uma lu sonyi tshe ka la kete; ne dia osoku mbata [Jehowa].” (Isaya 25:8) Ndoko onto layovɔ oma l’ɔkɔkɔ ɔmɔtshi kana ndela nɛ dia nde ambovusha lakinde ɔmɔtshi la ngandji. Ɔsɔ ayonga mɛtɛ otshikitanu wa mamba! Lâdiko dia lâsɔ, ndoko dihole ɔtɔi lanɛ la nkɛtɛ diayoshama Nzambi nde la ekambi ande sɔnyi nto kana diayowota akambo wa kashi lo lokombo lawɔ oko wambowodiɛnɛ edja efula l’akambo wa ngasɔ. Bonde kahatosalema akambo asɔ nto na? Nɛ dia Jehowa ayonya kiɔkɔ y’akambo asɔ—she kashi, Satana Diabolo, kâmɛ ndo ana wakinde tshɛ.—Joani 8:44.
24. Wanɛ wakɛndakɛnda l’osase asalawɔ la ntondo k’etsha wa diambo wasala Jehowa lo dikambo diawɔ?
24 Lo sɛdingola etsha ɛsɔ wa nkudu waki Jehowa, wanɛ wakɛndakɛnda l’osase wayotshutshuyama dia mbuta ɔnɛ: “Enda, one eli [Nzambi k]asu. Shu takukungela, dia ndi ntushimbela. On’eli [Jehowa], lakatakungelaka. Tongenengene, tuleki ngenangena lu panda kandi.” (Isaya 25:9) Kem’edja, anto w’ɔlɔlɔ wayonga mɛtɛ l’ɛkɔkɔ wa ngɛnangɛna. Wodjima wayokombɔ lo pondjo, ndo akanga wa kɔlamelo wayɔkɛndakɛndaka l’osase waki Jehowa pondjo pondjo. Onde ekɔ elongamelo kɛmɔtshi koleki kɛsɔ? Ndoko!
Onde wɛ kokaka nembetshiya?
• Bonde kahombaso kɛndakɛnda l’osase ɛlɔ kɛnɛ?
• Bonde kakatombola Isaya lokombo la Jehowa?
• Lande na kahakokaki atunyi w’ekambi waki Nzambi ndanya kɔlamelo yawɔ pondjo?
• Ɛtshɔkɔ akɔna wakongɛ wanɛ wakɛndakɛnda l’osase?
[Osato wa lo lɛkɛ 21]
Ase Juda wakalambolaka anawɔ le Mɔlɛka
[Esato wa lo lɛkɛ 23]
Ewo k’etsha wa diambo waki Jehowa akatshutshuya Isaya dia tombola lokombo lande
[Osato wa lo lɛkɛ 24]
Anto w’ɔlɔlɔ wayɔkaka l’osase waki Jehowa pondjo pondjo