Lotombo la Jehowa mpɛtaka le wodja ande
“[Jehowa] ayuyala usasi aye pundju.”—ISAYA 60:20.
1. Ngande watshɔkɔla Jehowa ekambi ande wa kɔlamelo?
“NE DIA [Jehowa] atongenengenelaka wudja andi. Ndi ayolenga akanga a memakana la panda.” (Osambu 149:4) Ngasɔ mbakate omembi w’esambo wa lo nshi y’edjedja ndo ɔkɔndɔ w’anto shikikɛka mɛtɛ k’ɛtɛkɛta ande ɛsɔ. Etena konga ekambi waki Jehowa la kɔlamelo, nde mbâsukɛka, mbângɔnyaka ndo mbâkokɛka. Lo nshi y’edjedja, nde akasale dia vɔ mbidja atunyi awɔ otshumba. Nshi nyɛ, nde ekɔ lo tetemala la mbâkeketsha lo nyuma ndo mbâshikikɛ dia wayokondja panda oma l’ekimanyielo k’olambo waki Yeso. (Romo 5:9) Nde salaka ɔsɔku nɛ dia vɔ ngɛnangɛnamaka lo washo ande.
2. Kânga mbalɔshamawɔ, eshikikelo kakɔna kele l’ekambi waki Nzambi?
2 Mɛtɛ, l’andja ɔnɛ wambokombama la wodjima, wanɛ ‘wamamema Nzambi’ ndɔshamaka. (2 Timote 3:12) Koko, Jehowa ekɔ lo mɛna kɛnɛ kasala atunyi asɔ ndo ekɔ lo mbaewola ate: “Wudja la diulelu wahakukambela ulimu, wayulanyema, ee, wudja ako wayushila ushiki.” (Isaya 60:12) Ɛlɔ kɛnɛ, ɔlɔshamelo mɛnamaka lo weho efula. Lo wedja ɛmɔtshi, atunyi pembaka dia sekɛ kana shimba Akristo wa mɛtɛ dia vɔ tɛmɔla Jehowa. Lo wedja ekina, atunyi komaka polo ndo lo munanda atɛmɔdi wa Jehowa l’alemba ndo tshumba diangɔ diawɔ. Koko, tatohɛke dia Jehowa amboshilaka la shikikɛ kɛnɛ kayokomɛ wanɛ wahalange dia lolango lande kotshama. Atunyi wayokita tatala. Wanɛ walɔsha Siɔna, mbut’ate ana wele ekitɔ ande lanɛ la nkɛtɛ, hawotokoka tondoya. Kema eshikikelo kɛsɔ k’oma le Jehowa, Nzambi kaso ka woke tokeketshaka?
Ɛtshɔkɔ woleki wɛnɛ wakawalongamɛka
3. Bɛnyɛlɔ diakɔna dioshawɔ dia nembetshiya olangala ndo ofulanelo w’atɛmɔdi waki Jehowa?
3 Ekɔ mɛtɛ dia l’etena k’ekomelo ka dikongɛ di’akambo nɛ, Jehowa ambɔtshɔkɔla ekambi ande lo yoho yoleki kɛnɛ kakawalongamɛka. Lo yoho ya lânde, nde akayalɛngaka dihole diande di’ɔtɛmwɛlɔ yema yema kamɛ ndo wanɛ wele lɔkɔ wɛmba lokombo lande. Lo ndjela prɔfɛsiya k’Isaya, nde mbutɛka Siɔna ate: “Lutumbu la Lebanona layuya le ye: Esasi, eduwula, esingi, dia nenga dihuli diami di’otemwelo. Dimi layutumbula dihuli diatumukitshaka ekulu.” (Isaya 60:13) Akona wokombami l’okonda wele l’esongo w’elangala ndjaka nd’ɔlɔ menda. Diakɔ diele sunganaka di’esongo w’elangala monga didjidji kana bɛnyɛlɔ dialembetshiya olangala ndo ofulanelo w’atɛmɔdi waki Jehowa.—Isaya 41:19; 55:13.
4. Kakɔna kalembetshiya ‘dihole di’ɔtɛmwɛlɔ’ ndo ‘dihole diatokitshaka Jehowa ekolo,’ ndo ngande walɛngama ahole asɔ?
4 Kakɔna kalembetshiya ‘dihole di’ɔtɛmwɛlɔ’ ndo ‘dihole diatokitshaka Jehowa ekolo’ diatɛkɛtawɔ l’Isaya 60:13 na? Ɛtɛkɛta ɛsɔ mendanaka l’asɛkɛ wa tɛmpɛlɔ ka woke ka lo nyuma kaki Jehowa, mbut’ate ɔlɔngɔswɛlɔ wakimanyiya onto dia ndjasukanya otsha le nde dia mbɔtɛmɔla lo tshimbo ya Yeso Kristo. (Heberu 8:1-5; 9:2-10, 23) Jehowa akewoya sangwelo diakinde dia tombola tɛmpɛlɔ ka lo nyuma kɛsɔ lo mbela anto w’oma lo wedja tshɛ lɔkɔ woho wa ndjɔtɛmɔla lo dihole sɔ. (Hangai 2:7) L’etatelo, Isaya ndamɛ akɛnyi nyemba y’anto y’oma lo wedja tshɛ wahungumɔ oya l’okongo w’ɔtɛmwɛlɔ waki Jehowa wele lâdiko di’ekongo ekina. (Isaya 2:1-4) Nkama y’ɛnɔnyi l’ɔkɔngɔ wa lâsɔ, ɔpɔstɔlɔ Joani akɛnyi l’ɛnɛlɔ “ului a wuki w’antu waheyama mbala, uma lu wedja tshe, ndu uma lu wauhu tshe ndu uma lu weuhu w’antu tshe, ndu w’eteketa tshe.” Anto asɔ wakemala “la ntundu ka kiti ka diulelu ka [Nzambi] . . . , [wôkambɛ] olimu [w’ekila] ndu la yanyi ndu l’utshu lu etemwelo kandi.” (Enyelo 7:9, 15) Oko wakotshama prɔfɛsiya shɔ lo nshi yaso, shamɛ tekɔ lo mɛna la washo aso woho walɛngama luudu laki Jehowa.
5. Otshikitanu akɔna wa woke w’otsha lo kɛnɛ koleki dimɛna wakonge l’ana waki Siɔna?
5 Akambo asɔ tshɛ wakonge otshikitanu wa woke w’otsha lo kɛnɛ koleki dimɛna le Siɔna! Jehowa mbutaka ate: “Kuyanga we akatunama kana akahetshama edja ndu nduku untu lakakindula l’atei aye, dimi layukete engo ka nemo pundju, ongenongeno wa lolonga la lolonga.” (Isaya 60:15) Oya l’ekomelo ka ta dia ntondo di’andja w’otondo, “Isariyele wa [Nzambi]” akonge mɛtɛ l’etena ka shɔkɔ. (Ngalatiya 6:16) Nde akahombe ndjaoka dia nde ‘aya okalema wa tshɛ’ nɛ dia anande wa la nkɛtɛ koshihodia dimɛna lolango laki Nzambi lo dikambo diawɔ. Oma lâsɔ, l’ɔnɔnyi 1919, Jehowa akasha ekambi ande w’akitami w’esɔ wolo nto ndo tatɛ oma l’etena kɛsɔ, nde akâtshɔkɔla l’ɔngɔnyu wa lo nyuma wa diambo efula. Ndo nto, kema daka dia lo divɛsa nɛ mbishaka ekeketshelo? Jehowa ayɔsa Siɔna oko “engo ka nemo.” Eelo, ana wa Siɔna ndo Jehowa ndamɛ wayonga l’ofunu lo dikambo dia Siɔna. Siɔna ayonga “ongenongeno,” mbut’ate kiɔkɔ y’ɔngɛnɔngɛnɔ w’efula. Ɔngɛnɔngɛnɔ ɔsɔ hawotonga paka wa lo tshanda mɔtshi tsho. Ɛtshɔkɔ wa Siɔna ɛsɔ le ekitɔ w’anande wa la nkɛtɛ wayonga “wa lolonga la lolonga.” Vɔ hawokomɛki pondjo.
6. Ngande wakamba Akristo wa mɛtɛ la diango di’oma lo wedja?
6 Tohokame kakianɛ daka dikina diaki Nzambi. Jehowa ambotɛ Siɔna ate: “We ayulela wedja diango, ayulela ndu khumi ya dikanga. Okone we ayeya wati: Dimi keli [Jehowa], Ushimbedi aye, Utshungudi aye, Kanga Wulu a Jakoba.” (Isaya 60:16) Ngande wahomba Siɔna ndɛ ‘diangɔ dia wedja’ ndo ndɛ diangɔ dia “khumi ya dikanga” na? Ekɔ lo woho ɔnɛ wele Akristo w’akitami w’esɔ ndo “ekoko ekina” w’asekawɔ wekɔ lo kamba la diangɔ dia nɛmɔ di’oma le wedja dia tɔla ɔtɛmwɛlɔ wa pudipudi otsha la ntondo. (Joani 10:16) Weshasha wa falanga wakimɔma la lolango kimanyiyaka dia kamba olimu wa woke w’esambishelo ndo wa wetshelo wa l’andja w’otondo. Okambelo wa la lomba wa l’awui wa tshulatshula wa nshi nyɛ kimanyiyaka dia funda waa Bible ndo ekanda walembetshiya Bible lo nkama y’ɛtɛkɛta. Ɛlɔ kɛnɛ, anto efula wokoka mbeya akambo wa mɛtɛ w’oma lo Bible oleki nshi y’edjedja tshɛ ya l’ɔkɔndɔ w’anto. Anto wa lo wedja efula wekɔ lo mbeka dia Jehowa, ɔnɛ lakatshungola ekambi ande w’akitami w’esɔ oma lo lɔhɔmbɔ la lo nyuma ekɔ mɛtɛ Otshungodi.
Ohamelo lo kɛnɛ kendana l’ɔlɔngɔswamelo
7. Ohamelo akɔna wa diambo wakonge l’ana waki Siɔna?
7 Jehowa akalɛngɛ ekambi ande lo yoho kina nto. Nde akâtshɔkɔla lo mbasha ohamelo lo kɛnɛ kendana l’ɔlɔngɔswamelo. Sho mbadiaka l’Isaya 60:17 ɔnɛ: “Dimi layukela paunyi lu dihuli di’ohotela, fesa lu dihuli dia luwulu, ohotela lu dihuli di’utamba, ndu luwulu lu dihuli di’ave. Dimi layete elombodi aye ki, la ambuledi aye antu w’ololo.” Mbela paunyi lo dihole di’ɔhɔtɛla kɛdikɛdi nɔngɔsɔla akambo, ndo woho akɔ wamɛ mbele ndo lo kɛnɛ kendana la diangɔ dikina dioshilami. Lo ndjela dikambo sɔ, Isariyɛlɛ waki Nzambi wakatetemala la pama otsha la ntondo lo kɛnɛ kendana l’ɔlɔngɔswamelo lo nshi y’ekomelo nyɛ. Tɔsɛdingole bɛnyɛlɔ dimɔtshi.
8-10. Lembetshiya elowanyelo ɛmɔtshi wendana l’ɔlɔngɔswamelo wakasalema tatɛ l’ɔnɔnyi 1919.
8 La ntondo k’ɔnɔnyi 1919, tshumanelo di’ekambi waki Nzambi diakalɔmbɔmaka oma le dikumanyi la wa diakrɛ wele vɔ tshɛ wakasɔnamaka oma lo vɔtɛ yakasalaka ase etshumanelo. Tatɛ oma l’ɔnɔnyi ɔsɔ, ‘ɔhɔmbɔ wa kɔlamelo ndo wa kɛsɔ’ akasɔnaka ɔnɔmbɔdi w’olimu l’etshumanelo tshɛ dia nɔmbɔlaka elimu wendana l’esambishelo. (Mateu 24:45-47) Koko, lo tshumanelo efula, ɔlɔngɔswɛlɔ ɔsɔ kɔkɛndakɛndaka dimɛna nɛ dia dikumanyi dimɔtshi diakawasɔnaka lo sala vɔtɛ kosukɛka olimu w’esambishelo dimɛna. Diakɔ diele, l’ɔnɔnyi 1932, wakayoshimbaka tshumanelo di’aha salaka vɔtɛ dia sɔna dikumanyi la waa diakrɛ. Lo dihole dia vɔ sala vɔtɛ ya sɔna dikumanyi tshɛ, vɔ wakahombe sala vɔtɛ ya sɔna apami wa kamba lo kɔmite k’olimu kâmɛ l’ɔnɔmbɔdi w’olimu. Ɔsɔ aki oko onto ladja “paunyi lu dihuli di’ohotela.” Ɔsɔ aki mɛtɛ olowanyelo wa woke!
9 L’ɔnɔnyi 1938, tshumanelo dia l’andja w’otondo wakɔshi yɛdikɔ ya mbetawɔ ɔlɔngɔswɛlɔ ɔmɔtshi wa dimɛna efula wakaleke mbɔtɔnɛ l’Afundelo. Ɔlɔmbwɛlɔ w’etshumanelo waki l’anya w’omendji walɔmbɔla ndo w’ekambi ekina wele vɔ tshɛ wakasɔnamaka oma le ɔhɔmbɔ wa kɔlamelo ndo wa kɛsɔ. Vɔtɛ kosalemaka nto! Ɔnkɔnɛ, anto wakasɔnamaka l’etshumanelo lo ndjela teokrasi. Ɔsɔ aki oko onto ladja “luwulu” lo dihole “di’ave” kana “paunyi” lo dihole “di’ohotela.”
10 Tatɛ oma l’etena kɛsɔ, ohamelo wekɔ lo tatetemala. Ɛnyɛlɔ, l’ɔnɔnyi 1972, akɛnama dia tshumanelo diakalɔmbɔmaka oma le olui wa dikumanyi diakasɔnama diakakambaka kâmɛ lo ndjela teokrasi diele ndoko ekumanyi kaki la lowandji lâdiko di’asekande akina. Dikambo sɔ diakaleke mbɔtɔnɛ la yoho yakalɔmbɔmaka tshumanelo di’Akristo dia lo ntambe ka ntondo. Ndo nto, l’ɔkɔngɔ w’ɛnɔnyi suke l’ehende, ɔlɔngɔswɛlɔ okina wakasalema. Otshikitanu ɔmɔtshi wakasalema lo kɛnɛ kendana l’ɔlɔmbwɛlɔ w’atshunda amɔtshi waki Société weyama laka lɛɛta woho wa mbisha Olui-Walɔmbɔla diaaso dia nyomoleka ndjasha efula lo wahɔ wa lo nyuma w’ekambi waki Nzambi lo dihole dia mbekolaka yimba l’akambo wa lushi la lushi wendana l’aseka lɛɛta.
11. Akɔna aki lo kiɔkɔ y’etshikitanu wendana l’ɔlɔngɔswamelo ndo etombelo akɔna wakela etshikitanu ɛsɔ?
11 Akɔna ele lo kiɔkɔ y’etshikitanu ɛsɔ watasalema yema yema na? Ndoko onto okina lâdiko wa Jehowa Nzambi. Ndamɛ mbakate ate: ‘Dimi layela paunyi.’ Ndo ndamɛ mbatetemala la mbuta ate: ‘Dimi layetɛ ɛlɔmbɔdi ayɛ ki ndo emboledi ayɛ anto w’ɔlɔlɔ.’ Eelo, Jehowa mbele l’ɔkɛndɛ wa nama ekambi ande. Ohamelo wendana l’ɔlɔngɔswamelo wakatama ɔsɔ ekɔ yoho kina yalɛngande ekambi ande. Ndo etombelo wa dikambo sɔ ele Ɛmɛnyi wa Jehowa wambɔtshɔkwama lo weho efula. Sho mbadiaka l’Isaya 60:18 ɔnɛ: “Hawuka wata akambu wa ngala lu wudja, kuyanga ohenyohenyo l’elanyelu lu kete yaye. We ayeta peli diaye wati: Panda, la asuku aye wati: Diandu.” Ande amɛna wele ɛtɛkɛta ɛsɔ! Ko ngande wakawakotshama?
12. Ngande wamboyokoma Akristo wa mɛtɛ dia monga la wɔladi w’efula?
12 Akristo wa mɛtɛ mendɛka tshɛ le Jehowa dia kondja wetshelo l’ɛlɔmbwɛlɔ ndo etombelo wa dikambo sɔ wakatama oma le Isaya ate: “Ana aye tshe wayetshama le [Jehowa], ku vo wayuyala la ki k’utamanya.” (Isaya 54:13) Lâdiko wa lâsɔ, nyuma kaki Jehowa kekɔ lo kamba olimu le ekambi ande ndo olowa ɔmɔtshi watɔsha nyuma kɛsɔ ko wɔladi. (Ngalatiya 5:22, 23) Yimba ya wɔladi yele l’ekambi wa Jehowa mbaetɛka eshamelo l’andja ɔnɛ woludi l’akambo wa ngala. Wɔladi wele lawɔ woye oma lo ngandji kele l’Akristo wa mɛtɛ lam’asawɔ mɛnyaka dia tambotatɛ ndɛta woho wa lɔsɛnɔ layonga laso l’andja w’oyoyo. (Joani 15:17; Kolosai 3:14) Mɛtɛ sho tshɛ ngɛnangɛnaka efula dia monga la wɔladi ɔsɔ ndo mbidjaka lonya dia keketsha wɔladi akɔ nɛ dia vɔ mbishaka Nzambi kaso lotombo la kɛnɛmɔ ndo wekɔ mɛtɛ dikambo di’ohomba efula lo paradiso kaso ka lo nyuma!—Isaya 11:9.
Osase wa Jehowa wayotetemala la mpɛta
13. Lande na kakokaso monga l’eshikikelo ɔnɛ osase wa Jehowa hawototshika pondjo dia mpɛtɛ ekambi ande?
13 Onde osase wa Jehowa wayotetemala la mpɛtɛ ekambi ande? Eelo! Sho mbadiaka l’Isaya 60:19, 20 ɔnɛ: “We huyala la uhumba wa unya nkohetela la yanyi, kuyanga ekashiyelu ka ngondo, ne dia [Jehowa] ayuyala usasi aye pundju, [Nzambi k]aye ayuyala lutumbu laye. Unya aye hawudjaki, ndu ngondo kaye hashishoki, ne dia [Jehowa] ayuyala usasi aye pundju. Ku nshi yaye ya delu yayushila.” Lam’akashile “delu” dia wanɛ waki lo lɔhɔmbɔ la lo nyuma l’ɔnɔnyi 1919, osase wa Jehowa wakatatɛ mbâhɛtɛ. L’ɔkɔngɔ w’ɛnɔnyi ndekana 80, vɔ wakatetemala la mbetawɔma le Jehowa ndo osase ande wekɔ lo tetemala la mpɛta. Vɔ hawotodimala. Lo kɛnɛ kendana l’ekambi ande, Nzambi kaso ‘hodja’ oko watodjaka wonya kana ‘shishɔ’ oko watoshishɔka ngɔndɔ. Koko, nde ayotetemala la mpɛtshɛ ekambi ande osase pondjo pondjo. Ɔsɔ ekɔ mɛtɛ eshikikelo ka diambo le so, sho wanɛ wasɛna lo nshi y’ekomelo k’andja ɔnɛ wele lo wodjima!
14, 15. (a) Lo woho akɔna ‘wamboyindjama’ ekambi waki Nzambi tshɛ? (b) Lo ndjela Isaya 60:21, ekotshamelo kakɔna k’ohomba kakongɛ ɛkɔkɔ ekina?
14 Tohokame kakianɛ daka dikina diaki Jehowa lo dikambo di’ekitɔ wa Siɔna weke lanɛ la nkɛtɛ, mbut’ate Isariyɛlɛ waki Nzambi. Isaya 60:21 mbutaka ɔnɛ: “Antu aye wayuyala antu w’ololo atu. Vo wayukita kete pundju. Vo weli lukuno lakamune, ndu ulimu w’anya ami, dia dimi ntumbwama.” L’ɔnɔnyi 1919, etena kakatatɛ Akristo w’akitami w’esɔ nyomokamba olimu nto, vɔ waki olui w’anto wotshikitanyi l’anto akina. L’andja ɔnɛ wamboyakimɔ lo kɔlɔ, vɔ “wambuyindjama” oma lo mbetawɔ ka nge kele lawɔ l’olambo wa tshungo waki Yeso Kristo. (Romo 3:24; 5:1) Oma lâsɔ, oko wakasale ase Isariyɛlɛ l’ɔkɔngɔ wa vɔ tshungɔ oma lo fumbe la Babilɔna, vɔ wakakite “kete,” mbut’ate nkɛtɛ ya lo nyuma, kana woho w’olimu wakawahombe kondja paradiso ka lo nyuma. (Isaya 66:8) Dimɛna dia paradiso ka nkɛtɛ shɔ hadiolanaki pondjo nɛ dia otshikitanyi l’Isariyɛlɛ wa lo nshi y’edjedja, wodja w’otondo w’Isariyɛlɛ waki Nzambi lo tshɛ kawɔ hawotoshisha kɔlamelo yawɔ. Mbetawɔ kawɔ, etete, ndo ohetoheto awɔ hatotshika pondjo dia mbisha lokombo la Nzambi nɛmɔ.
15 Anto tshɛ wa lo wodja wa lo nyuma ɔsɔ wambɔtɔ lo sheke y’oyoyo. Vɔ tshɛ wekɔ l’ɛlɛmbɛ waki Jehowa wofundami l’etema awɔ, ndo Jehowa akâkimwɛ pɛkato yawɔ lo tshimbo y’olambo wa tshungo waki Yeso. (Jeremiya 31:31-34) Nde mbayindjaka oko “ana” ndo mbaɔsaka oko wekɔ anto wa kokele. (Romo 8:15, 16, 30) Ɛkɔkɔ ekina w’asekawɔ vɔ lawɔ wakadimanyiyama pɛkato yawɔ oma lo tshimbo y’olambo waki Yeso ndo l’ɛnyɛlɔ kaki Abarahama, vɔ wakayindjama dia monga angɛnyi waki Nzambi oma lo mbetawɔ. Vɔ “wakotsha ahondo awo, wakawaedia la dikila dia Ona-Okoko.” Ndo ɛkɔkɔ ekina w’asekawɔ asɔ wekɔ lo kongɛ ɔtshɔkɔ okina wa woke efula. L’ɔkɔngɔ wa vɔ panda oma lo “pa ka wuki” kana l’ɔkɔngɔ wa vɔ mbolwama, vɔ wayɛna ekotshamelo k’ɛtɛkɛta wele l’Isaya 60:21 la washo awɔ nganɛ etena kayokoma nkɛtɛ k’otondo paradiso. (Enyelo 7:14; Romo 4:1-3) L’etena kɛsɔ “akanga a memakana wayukita kete, ndu wayongenangena la etshoko efula wa ki.”—Osambu 37:11, 29.
Ohamelo wekɔ lo tatetemala
16. Naa daka dia diambo diakasha Jehowa ndo ngande wakadiakotshama?
16 Lo divɛsa di’ekomelo di’Isaya 60, sho mbadiaka daka diaki Jehowa di’ekomelo dia lo tshapita nyɛ. Nde ambotɛ Siɔna ate: “One leli tshitshe ayuyala kinunu, ona one luleki tshitshe wudja a wulu. Dimi, [Jehowa], layusamanya dikambu ne l’etena kadio.” (Isaya 60:22) Lo nshi yaso nyɛ, Jehowa ambokotsha daka diande. Etena kakatatɛ Akristo w’akitami w’esɔ nyomokamba olimu nto l’ɔnɔnyi wa 1919, vɔ waki lofulo la tshitshɛ loto, mbut’ate “one leli tshitshe.” Koko, lofulo lawɔ lakayadɛka etena kakayakotshamaka ase Isariyɛlɛ wa lo nyuma akina. Ndo oma lâsɔ, ɛkɔkɔ ekina wakatatɛ pongumɔ oya le wɔ lo yɛdikɔ yele ndoko lushi lakonge lofulo la ngasɔ ntondo. Wɔladi wele l’ekambi waki Nzambi wakakotola anto efula w’etema ɛlɔlɔ polo lo yɛdikɔ ya “one luleki tshitshe” koma “wudja a wulu.” Ɛlɔ kɛnɛ, “wudja” ɔsɔ wokengami l’Isariyɛlɛ waki Nzambi vɔ l’anto ndekana miliyɔ shamalo w’“asi wedja” wakayakimɔ, waya la lofulo loleki ndo etondo wa wedja efula wa l’andja ɔnɛ. (Isaya 60:10) Anto tshɛ wa lo wodja ɔsɔ wekɔ lo ngamula osase waki Jehowa ndo dikambo sɔ mbâkonyaka anto wangɛnangɛnama lo washo ande.
17. Ngande wambokokimanyiya ɔsɛdingwelo w’Isaya tshapita 60?
17 Eelo, ɔsɛdingwelo w’akambo w’ohomba efula wele l’Isaya tshapita 60 keketshaka mbetawɔ efula. Ekɔ ekeketshelo dia mɛna dia Jehowa akeyaka edja efula la ntondo ɔnɛ ekambi ande wayɔtɔlama lo lɔhɔmbɔ la lo nyuma ndo oma lâsɔ vɔ wayotshungɔ oma lɔkɔ. Sho mambaka efula lam’eyaso ɔnɛ edja efula la ntondo Jehowa akɛnyi ohamelo wa woke wa lofulo l’atɛmɔdi wa mɛtɛ wa lo nshi yaso nyɛ. Lâdiko wa lâsɔ, ekɔ mɛtɛ ekeketshelo efula lam’ohɔso dia Jehowa hatotokalɛ! Eshikikelo k’ɔnɛ nkuke y’“usumba” yayotshikalaka hwe dia nongolaka “wane wakasonama lu lumu la pundju” ekɔ mɛtɛ eshikikelo koludi la ngandji! (Etsha 13:48) Jehowa ayotetemala la mpɛtshɛ ekambi ande osase. Siɔna ayotetemala la monga kiɔkɔ y’ɔngɛnɔngɛnɔ nɛ dia ana ande wekɔ lo taleke ngamula osase. (Mateu 5:16) Lo mɛtɛ, tamboleka keketsha yɛdikɔ yaso ya ndeka kakatana l’Isariyɛlɛ waki Nzambi ndo ya ngɛnangɛna diɛsɛ diaso dia ngamula osase waki Jehowa!
Onde wɛ kokaka nembetshiya?
• Eshikikelo kakɔna kele laso lo kɛnɛ kendana l’ɔlɔshamelo?
• Ngande walɛ ana wa Siɔna ‘mbo y’ase wedja’?
• Lo weho akɔna wakadje Jehowa ‘paunyi lo dihole di’otamba’?
• Naa waonga ahende waki ekambi wa Jehowa wɛnyishawɔ l’Isaya 60:17, 21?
• Ngande wakakome “one luleki tshitshe” “wudja a wulu”?
[Kiombo/Esato wa lo lɛkɛ 28]
LA PROPHÉTIE D’ISAÏE—Lumière pour tous les humains
Akambo wa l’asawo anɛ wakɔmbwama lo dako dimɔtshi dia lo Losanganya la Distrikɛ 2001-2002 laki l’ɔtɛ a dui ɔnɛ: “Embetsha w’Ɔtɛkɛta wa Nzambi.” L’ekomelo ka dako diakɔ, l’ahole efula, ɔtɛkɛtshi akewoya otombelo w’okanda w’oyoyo wele l’ɔtɛ a dui ɔnɛ: La prophétie d’Isaïe, lumière pour tous les humains, Vɔlimɛ ya Hende. Ɔnɔnyi wetshi, La prophétie d’Isaïe, lumière pour tous les humains, Vɔlimɛ ya Ntondo yakatombe. Otombelo w’okanda w’oyoyo ɔnɛ ambotokimanyiya kakianɛ dia monga l’olembetshiyelo w’oyoyo wa suke la divɛsa tshɛ dia lo dibuku di’Isaya. Tɔvɔlimɛ tɔnɛ tekɔ dihomɔ di’eshika diatokimanyiya dia nyomoleka shihodia ndo mandola dibuku dia prɔfɛsiya k’Isaya diakeketsha mbetawɔ.
[Esato wa lo lɛkɛ 25]
La ntondo k’ɔlɔshamelo wa wolo efula, ‘Jehowa nɛngaka ekambi ande lo mbasha panda’
[Esato wa lo lɛkɛ 26]
Ekambi waki Nzambi kambaka la diangɔ dia nɛmɔ di’ase wedja dia tɔla ɔtɛmwɛlɔ wa pudipudi otsha la ntondo
[Osato wa lo lɛkɛ 27]
Jehowa akatshɔkɔla ekambi ande l’ohamelo wa l’awui wendana l’ɔlɔngɔswamelo ndo la wɔladi