Jehowa nɛngaka ekambi ande l’osase
‘Womoto, onele, ohandjole osase, nɛ dia osase ayɛ wamboya ndo lotombo la Jehowa lambokohotwela.’—ISAYA 60:1.
1, 2. (a) Kakɔna kambokomba anto? (b) Ele lo kiɔkɔ ya wodjima wambokomba anto?
“ANDE ohomba wele laso wa monga l’onto ɔmɔtshi lele la woho wa lɔkɛwɔ ndo wa lomba laki l’Isaya kana laki la Paulo lee!” Ɔsɔ aki ɛtɛkɛta wa lonyangu waki Harry Truman, Prezida k’États-Unis ka l’ɛnɔnyi wa 1940. Lande na kakandate ɛtɛkɛta ɛsɔ na? Nɛ dia nde akɛnyi ohomba wa monga l’ɛnɔmbɔdi wele la lɔkɛwɔ l’ɔlɔlɔ l’etena kakandasɛnaka. L’etena kɛsɔ ko anto oma la ndekana etena kakaleke wodjima ka lo ntambe ka 20, mbut’ate ta dia hende di’andja w’otondo. Koko, kânga mbakashile ta sɔ, andja komonga la wɔladi. Wodjima wakatetemala la monga. Lo mɛtɛ, ɛnɔnyi 57 l’ɔkɔngɔ w’ekomelo ka ta sɔ, andja wekekɔ paka lo wodjima. Otondonga Prezida Truman ekekɔ la lɔsɛnɔ polo ndo nshi nyɛ, tshike mɛtɛ nde ototetemala la mɛna ohomba wa monga l’ɛnɔmbɔdi wele la lɔkɛwɔ l’ɔlɔlɔ lele oko lɔnɛ laki l’Isaya kana l’ɔpɔstɔlɔ Paulo.
2 Oyadi Prezida Truman akadieyaka kana bu, ɔpɔstɔlɔ Paulo akatɛkɛta dikambo dia wodjima wokombi anto ndo akawaewola dikambo sɔ l’efundelo ande. Ɛnyɛlɔ, nde akewola asekande ambetawudi ate: “Shu hatolo ta la emunyi la dikila, keli tambolo la waulelu la akambu wa wulu, la embuledi wa la kete wa udjima one, la elui w’edienge wa lu ahuli wa l’ulungu.” (Efeso 6:12, sho mbɛnganyisha alɛta ango.) Paulo akɛnya oma l’ɛtɛkɛta ɛsɔ dia nde akeyaka aha paka dikambo dia wodjima wa lo nyuma wokumbi andja ɔnɛ koko nde akeyaka ndo kiɔkɔ ya wodjima akɔ, mbut’ate ɛdiɛngɛ wele la nkudu welamɛ ɔnɛ “embuledi wa la kete.” Lam’ele ɛdiɛngɛ wele la nkudu mbele lo kiɔkɔ ya wodjima wokumbi andja ɔnɛ, kakɔna kakoka anto sala dia kombola wodjima ɔsɔ?
3. Kânga mbele anto lo wodjima, kakɔna kakate Isaya lo dikambo di’akanga wa kɔlamelo?
3 Woho akɔ wamɛ mbele Isaya lawɔ akatɛkɛta dikambo dia wodjima wɛnya anto pâ. (Isaya 8:22; 59:9) Diakɔ diele, lo mbuta akambo wendana la nshi yaso nyɛ, nde akate l’ekimanyielo ka nyuma k’ekila dia, oyadi lo tena dia wodjima sɔ, Jehowa ayodihola washo wa wanɛ walanga osase. Eelo, kânga mbahatasɛnɛ sho l’otondo wa Paulo nde l’Isaya ɛlɔ kɛnɛ, sho tekɔ l’efundelo awɔ wakasambiyama oma lo wolo wa nyuma k’ekila wahomba tɔlɔmbɔla. Dia mɛna wahɔ wele la dikambo sɔ le wanɛ walanga Jehowa, nyɛsɔ tɔsɛdingole ɛtɛkɛta wa prɔfɛsiya waki Isaya watanema lo tshapita 60 ya dibuku diande.
Womoto la lo prɔfɛsiya ambohandjola osase
4, 5. (a) Kakɔna kambotɛ Jehowa womoto dia sala ndo daka diakɔna diamondowosha? (b) Naa awui wasalanganya asolo watanema l’Isaya tshapita 60?
4 Ɛtɛkɛta w’etatelo wa l’Isaya 60 mendanaka la womoto lele lo pâ k’efula, mbut’ate lele lo wodjima ndo lambokita balakata la nkɛtɛ. Koko, osase wambokombola wodjima ɔsɔ la shashimoya ndo Jehowa ambowotɛ la dui dia wolo ate: ‘Womoto, onele, ohandjole osase, nɛ dia osase ayɛ wamboya ndo lotombo la Jehowa lambokohotwela.’ (Isaya 60:1) Etena kambokoka ka womoto ɔsɔ memala ndo ngamula osase waki Nzambi, mbut’ate lotombo lande. Lande na? Sho mɛnaka okadimwelo lo divɛsa diayela diata ate: “Enda, hyutshihutshi ayukumba kete, la udjima a tshududu asi wedja, keli [Jehowa] ayuyala ladiku diaye la lutumbu landi layukohetela.” (Isaya 60:2) Etena kambetawɔ womoto kɛnɛ kowote Jehowa, nde amonga l’eshikikelo ka kondja etombelo wa diambo. Jehowa ambota ate: “Wedja wayuya dia ndjuyanga usasi aye, la khumi ya dikanga wayusamanya uya lu ngaingai k’esenyelo kaye.”—Isaya 60:3.
5 Ɛtɛkɛta wasalanganya asolo wele l’avɛsa asato anɛ wekɔ ɛtɛkɛta wa mbɔtwɛlɔ ndo vɔ mɛnyaka lo tshena pe awui akina wele l’Isaya tshapita 60. Tshapita nyɛ mɛnyaka akambo wakahombe komɛ womoto la lo prɔfɛsiya ɔsɔ ndo nembetshiyaka woho wakokaso mbidjasɛ l’osase waki Jehowa kânga mbele wodjima wambokomba anto. Ko lâsɔ, tolembetelo ta l’avɛsa asato w’etatelo asɔ ɛnyatɔ na?
6. Ele womoto la l’Isaya tshapita 60, ndo waa na wele ekitɔ ande lanɛ la nkɛtɛ?
6 Womoto latɛkɛtawɔ l’Isaya 60:1-3 ko Siɔna, mbut’ate ɔlɔngɔswɛlɔ waki Jehowa wa l’olongo wele la ditongami dia lo nyuma. Ɛlɔ kɛnɛ, Siɔna ekɔ l’ekitɔ ande lanɛ la nkɛtɛ, mbut’ate atshikadi w’“Isariyele wa [Nzambi],” wakenga etshumanelo ka l’andja w’otondo k’Akristo w’akitami w’esɔ wele l’elongamelo ka tolɛ kâmɛ la Kristo l’olongo. (Ngalatiya 6:16) Wodja wa lo nyuma ɔsɔ kengama l’anto 144 000 ndo ekotshamelo ka nshi nyɛ k’Isaya tshapita 60 mendanaka la wanɛ wa l’atei awɔ weke la lɔsɛnɔ lanɛ la nkɛtɛ lo “nshi y’ekumelu.” (2 Timote 3:1) Koko, prɔfɛsiya kɛsɔ kekɔ nto l’awui efula wa mbuta lo kɛnɛ kendana l’angɛnyi waki Akristo w’akitami w’esɔ wakenga “ului a wuki” w’“ekoko ekina.”—Enyelo 7:9; Joani 10:16.
7. Ngande waki Siɔna l’ɔnɔnyi 1918 ndo ngande wakatama dikambo sɔ?
7 Onde aki etena kɛmɔtshi kaki “Isariyele wa [Nzambi]” lo wodjima l’ɛnyɛlɔ ka womoto la lo prɔfɛsiya? Eelo, dikambo sɔ diakasalema ambeta ɛnɔnyi ndekana 80. Lo nshi yakalɔmaka ta dia ntondo di’andja w’otondo, Akristo w’akitami w’esɔ wakasale la wolo di’olimu w’esambishelo tetemala. Koko, l’ɔnɔnyi 1918 wakakomɛ ta, olimu w’esambishelo wakakongɛma dimɛna wakayemala suke la tshɛ. Joseph Rutherford lakalɔmbɔlaka olimu w’esambishelo wa l’andja w’otondo ndo Akristo akina waki l’ɛkɛndɛ wa weke wakafundamɛ lokanu l’ɛnɔnyi efula l’ɔtɛ w’akambo wa lomamatanya. Lo dibuku di’Enyelo, Akristo w’akitami w’esɔ waki lanɛ la nkɛtɛ l’etena kɛsɔ wakelamɛ l’ɛtɛkɛta wa prɔfɛsiya ɔnɛ edo wokalemi “l’osese w’usumba a wuki, wetawo [lo nyuma] vati: Sodoma la Edjibitu.” (Enyelo 11:8) Ɔsɔ mɛtɛ aki etena ka wodjima le Siɔna lakahɛnama lanɛ la nkɛtɛ oma le nde l’anande w’akitami w’esɔ!
8. Naa otshikitanu wa woke wakasalema l’ɔnɔnyi 1919 ndo etombelo akɔna wakonge?
8 Koko, otshikitanu wa diambo wakayosalemaka l’ɔnɔnyi 1919. Jehowa akayɔhɛtshɛka Siɔna osase! Wanɛ wakatshikala la lɔsɛnɔ l’atei w’Isariyɛlɛ waki Nzambi wakɔshi yɛdikɔ ya tatɛ ngamula osase waki Nzambi la dihonga tshɛ lo nyomotetemala nto l’esambishelo ka lokumu l’ɔlɔlɔ. (Mateu 5:14-16) Diɛsɛ oma l’ohetoheto wakayonga l’Akristo asɔ nto mbakayokotɔmaka anto akina oya l’osase waki Jehowa. Ntondotondo, anto w’eyoyo asɔ waki akitami w’esɔ wakakotshama lo lofulo l’Isariyɛlɛ waki Nzambi. L’Isaya 60:3, vɔ mbelamɛka ɔnɛ nkumi ya dikanga nɛ dia vɔ mbahomba monga ekitɔ kâmɛ la Kristo lo Diolelo diaki Nzambi dia l’olongo. (Enyelo 20:6) L’ɔkɔngɔ wa lâsɔ, lemba la woke l’ɛkɔkɔ ekina wakatatɛ kotɔma oya l’osase waki Jehowa. Vɔ mbele “wedja” watɛkɛtawɔ lo prɔfɛsiya kɛnɛ.
Ana waki womoto wambokalola oya la ngelo!
9, 10. (a) Naa dikambo di’ɔngɛnɔngɛnɔ efula diambɛna womoto ndo diɔ diaki didjidji diakɔna? (b) Dikambo diakɔna diakatshutshuya Siɔna dia ngɛnangɛna?
9 Kakianɛ, Jehowa ambotatɛ kotsha akambo akina efula lâdiko w’akambo wele l’Isaya 60:1-3. Nde ambodjangɛ womoto ɔsɔ dui dikina. Tohokame kɛnɛ kawotɛnde: “Edia ashu aye, endi l’utshimba.” Womoto ambokitanyiya dui sɔ ko ambɛna dikambo di’ɔngɛnɔngɛnɔ efula! Anande woyakawola oya la ngelo. Divɛsa sɔ diambotetemala la mbuta ɔnɛ: “Vo tshe wambomota kame, wuyayi uya le ye. An’aye w’apami wayuya uma l’etali, la an’aye w’amantu wayembama lu tukundu.” (Isaya 60:4) Esambishelo ka Diolelo ka l’andja w’otondo kakatatɛ l’ɔnɔnyi 1919 akakotola nunu di’anto w’eyoyo oya l’olimu waki Jehowa. Anto asɔ nto wakakome ana “w’apami” ndo wa “w’amantu” wa Siɔna, mbut’ate akitami w’esɔ wa l’Isariyɛlɛ waki Nzambi. Ɔsɔku, mbakalɛngɛ Jehowa Siɔna lo kotola anto w’ekomelo wa l’olui wa 144 000 oya l’osase.
10 Onde wɛ kokaka kanyiya ɔngɛnɔngɛnɔ wakonge la Siɔna lo monga kamɛ l’anande? Koko, Jehowa ambotɛ Siɔna akambo akina wahomba mbosha ɔngɛnɔngɛnɔ. Sho mbadiaka ɔnɛ: “Lam’ayuyena dikambu ne, we ayongenangena. Utema aye ayulimbolimbo l’ongenongeno. Ne dia engonyi wa lu ashi a waki wayukadimo le ye, la ekundji a wedja wayuya le ye.” (Isaya 60:5) Lo ndjela ɛtɛkɛta wa prɔfɛsiya ɛsɔ, tatɛ oma l’ɛnɔnyi 1930, nyemba y’Akristo wele l’elongamelo ka nsɛna lanɛ la nkɛtɛ wakahungumɔ oya lo Siɔna. Vɔ wakatombe oma “lu ashi a waki,” mbut’ate oma l’atei w’olui w’anto wanganyi etale la Nzambi ndo vɔ nembetshiyaka ekundji wa wedja. Vɔ mbele “diango di’ushinga a wulu dia wedja tshe.” (Hangai 2:7; Isaya 57:20) Tolembete nto dia, “diango di’ushinga a wulu dia wedja tshe” sɔ hawokambɛ Jehowa onto l’onto lo yoho yalangande. Koko, vɔ lawɔ nɛngaka nto Siɔna lo ndja dia ndjɔtɛmɔla kamɛ l’anangɛwɔ w’akitami w’esɔ dia vɔ koma “ului otoi” kâmɛ lawɔ l’ɛse k’ɛlɔmbwɛlɔ ka “ulami otoi.”—Joani 10:16.
Amundji w’okanda ndo anami w’ɛkɔkɔ wamboya la Siɔna
11, 12. Lembetshiya elui w’anto wɛnama dia wekɔ lo tatshu otsha la Siɔna.
11 Etombole w’oma l’otshumanyelo wakatama ɔsɔ mbatonga ohamelo w’efula wa lofulo la wanɛ watombola Jehowa. Dikambo sɔ diakatama l’ɛtɛkɛta wa lo prɔfɛsiya wayela. Ohokanyiya dia wɛ la womoto la lo prɔfɛsiya ɔsɔ mbemadi l’Okongo wa Siɔna. Wɛ ambenda otsha lo lɛkɛ la ɛstɛ, kakɔna kɛnayɛ? “We ayukumbama l’ului wa kamelo, kamelo y’esekaseka y’uma la Midiyana, la y’uma la Efa. Yo tshe yayuya uma la Sheba yayembe paunyi la malashi w’ushinga a wulu, yayatumbula [Jehowa].” (Isaya 60:6) Nyemba y’amundji w’okanda wamonda lɔkɛndɔ la kamɛlɔ yawɔ oya la Jerusalɛma. Kamɛlɔ yekɔ watekana elola kambolodja nkɛtɛ! Amundji w’okanda wekɔ lo ndjɛmbɛ weshasha wa nɛmɔ, “paunyi la malashi w’ushinga a wulu.” Ndo amundji w’okanda asɔ wamboya oya l’osase waki Nzambi dia ndjôtombola lo sɛkɛ, mbut’ate ‘dia ndjewoya lotombo laki Jehowa.’
12 Aha paka amundji w’okanda ato mbayaye. Anami w’ɛkɔkɔ vɔ lawɔ wekɔ lo pongumɔ oya la Siɔna. Prɔfɛsiya tetemalaka mbuta ɔnɛ: “Nyimba tshe ya dungalunga ya la Kedara yayomotshama le ye. Ndu waumi w’ekoko wa la Nebayota wayuyala l’ulimu aye.” (Isaya 60:7a) Ndo nkumbo y’anami w’ɛkɔkɔ mbaya oya l’osomba w’ekila dia ndjolambola Jehowa nyama yoleki elangala y’oma lo dongalonga diawɔ. Vɔ ndjakimɔka ndo vamɛ dia kambɛ Siɔna! Ngande walongola Jehowa angɛndangɛnda asɔ na? Nzambi ndamɛ kadimolaka ate: “Vo wayumbela l’[elambwelo] kami, ku dimi layuwaetawo l’ongenongeno. [“Layɔlɛnga,” NW] luudu leli too la lutumbu lami.” (Isaya 60:7b) Jehowa ambetawɔ elambo ndo olimu wokambɛ angɛndangɛna asɔ l’ɔngɛnɔngɛnɔ tshɛ. Otanemelo awɔ lo tɛmpɛlɔ kande kilɛngaka.
13, 14. Kakɔna kɛnama dia kekɔ lo ndjaye oma lo lɛkɛ l’owɛstɛ?
13 Kakianɛ ohokadimola ɔtɛ ayɛ kele enda otsha lo lɛkɛ l’owɛstɛ. Kakɔna kɛnayɛ? Oma l’etale, ekɔ ɛngɔ kɛmɔtshi kele oko dinge dia wɛma kɛnama lâdiko di’ashi a woke. Jehowa amboka wombola wele lo yimba yɛ ate: “Wana aku wayayi esadi uku wangi, wayafumbo uku bing[a] uya lu kefu kawo na?” (Isaya 60:8) Jehowa ndamɛ ambokadimola dimbola diande hita ate: “Asenga watulungamelaka le mi, mashuwa wa la Tarashishi wayuya ntundu, dia mbela an’aye uma l’etali, kame la fesa la paunyi yawo, lu lukumbu la [Jehowa, Nzambi k]aye, ee, le l’Ekila l’Isariyele, ne dia ndi [“ambokɔlɛnga,” NW].”—Isaya 60:9.
14 Onde wɛ koka ndjaɔsa oko onto lɛna dikambo sɔ? Oma l’etale, lo lɛkɛ l’owɛstɛ, dinge dia wɛma sɔ diambosukana ndo kakianɛ diɛnama oko elui w’awadi. Diɔ diekɔ lo mɛnama oko lemba la tofudu mbayafumbɔ lâdiko di’asuku w’ashi. Koko, lam’ayawaleke sukana, wɛ ɛna dia vɔ waya oko masuwa wayaye la lowango l’efula. Eelo, masuwa efula wekɔ lo tatshu otsha la Jɛrusalɛma ko wɔfɔnaka ndo l’elui wa fudu ya benga. Oma l’abongo wa tale, elui wa masuwa wekɔ lo mɛmba atɛmɔdi oya la Jerusalɛma dia ndjɔtɛmɔla Jehowa.
Ɔlɔngɔswamelo wa Jehowa wambohama
15. (a) Ohamelo akɔna wakatatshi ɛtɛkɛta wa l’Isaya 60:4-9? (b) Yimba yakɔna yele l’Akristo wa mɛtɛ?
15 Divɛsa dia 4 polo dia 9 ekɔ lo nembetshiya lo yoho ya dimɛna efula prɔfɛsiya kendana l’ohamelo wa l’andja w’otondo wakonge tatɛ oma l’ɔnɔnyi 1919! Lande na katshɔkɔla Jehowa Siɔna l’ohamelo wa ngasɔ na? Nɛ dia tatɛ oma l’ɔnɔnyi 1919, Isariyɛlɛ waki Nzambi akahandjola osase wa Jehowa l’okitanyiya ndo l’etete tshɛ. Onde wɛ akalembete lâsɔ dia lo ndjela divɛsa 7 eyoyo waya ɛsɔ ‘ndjaka oya l’elambwelo [kaki Nzambi]’? Elambwelo ekɔ dihole dialambɔma elambo, ɔnkɔnɛ etenyi ka prɔfɛsiya kɛsɔ toholaka dia olimu waki Jehowa nɔmbaka dia ndjalambola. Ɔpɔstɔlɔ Paulo akafunde ate: “Anyasu, dimi lambunyosengasenga . . . nti: Nyulambuli alimba anyu uku ulambu wa lumu, la w’ekila, la wa ngenyangenya [Nzambi]. Wuhu oso mbukukinyu ntsha.” (Romo 12:1) Lo ndjela ɛtɛkɛta ɛsɔ waki Paulo, Akristo wa mɛtɛ hawokomɛ paka lo mbɔtɔka tsho lo nsanganya mbala ɔtɔi lo lomingu ko pe. Koko, vɔ kimɔka wenya, welo, ndo diangɔ diawɔ dia ntɔla ɔtɛmwɛlɔ wa pudipudi otsha la ntondo. Kema woho waya atɛmɔdi wamboyakimɔ asɔ lo luudu laki Jehowa lilɛngaka? Prɔfɛsiya k’Isaya kakate dia ɔsɔku mbediɔ. Ndo sho koka monga l’eshikikelo ɔnɛ atɛmɔdi wele l’ohetoheto asɔ ngɛnyangɛnyaka ndo washo waki Jehowa.
16. Waa na wakasha lonya l’olimu wa wokelo wa lo nshi y’edjedja ndo waa na wasala dikambo sɔ nshi nyɛ?
16 Eyoyo waya nangaka kamba olimu. Prɔfɛsiya kɛsɔ tetemalaka la mbuta ɔnɛ: “Asi wedja wayuhika peli diawo ntu.” (Isaya 60:10) Lo ekotshamelo ka ntondo k’ɛtɛkɛta ɛsɔ lo nshi yakakalola wanɛ waki lo fumbe oma la Babilɔna, nkumi ya dikanga ndo anto akina w’oma lo wedja wakakimanyiya mɛtɛ dia nyomohika tɛmpɛlɔ ndo osomba wa Jɛrusalɛma nto. (Ezera 3:7; Nehemiya 3:26) Lo ekotshamelo ka nshi nyɛ, olui wa woke wekɔ lo kimanyiya atshikadi w’akitami w’esɔ lo wokelo w’ɔtɛmwɛlɔ wa mɛtɛ. Vɔ wekɔ lo keketsha tshumanelo di’Akristo ndo “peli” di’osomba, mbut’ate ɔlɔngɔswamelo waki Jehowa. Ndo vɔ mbishaka nto lonya lo wokelo wa mɛtɛ mɛtɛ, mbut’ate wokelo wa Mbalasa ya Diolelo la ya Nsanganya ya Weke, ndo lo wokelo wa mvudu ya Bɛtɛlɛ. Lo weho ɛsɔ tshɛ, vɔ sukɛka anangɛwɔ w’akitami w’esɔ dia kotsha ehomba w’ɔlɔngɔswamelo waki Jehowa watahame!
17. Naa yoho mɔtshi yalɛnga Jehowa ekambi ande?
17 Ande ekeketshelo kele l’ɛtɛkɛta w’ekomelo wa l’Isaya 60:10 lee! Jehowa mbutaka ate: “Ne dia dimi laki la kele mbakamakusuya, keli uma lu ngandji kami kakukami, mbamumukuka ketshi.” Eelo, l’ɔnɔnyi 1918 ndo 1919, Jehowa akasha ekambi ande dilanya. Koko, ɔsɔ ekɔ dikambo diambetaka. Etena kɛnɛ, Jehowa ekɔ lo mɛnya kɛtshi kokande ekambi ande w’akitami vɔ la asekawɔ ɛkɔkɔ ekina. Djembetelo yɛnya mɛtɛ ka dikambo sɔ ele ohamelo wa diambo wamondowasha, mbut’ate nde ‘ambâlɛnga,’ oko wakandasale dikambo sɔ lo nshi yakete.
18, 19. (a) Naa daka diasha Jehowa eyoyo waya l’ɔlɔngɔswamelo ande? (b) Kakɔna kayotɛna l’avɛsa wambotshikala l’Isaya tshapita 60?
18 Ɔnɔnyi tshɛ, nkama ya nunu y’“asi wedja” wekɔ lo ndja oya l’ɔlɔngɔswamelo waki Jehowa ndo anto efula weke la diaaso dia mbayela. Jehowa mbutɛka Siɔna ate: “Asuku aye wayutshikalaka hwe nshi tshe. Vo hawudihamaka la yanyi kuyanga l’utshu, dia mbotshiya khumi ya dikanga ya wedja la atshindedi awo lam’ayuwukelaka ekundji wa wedja awo.” (Isaya 60:11) Atunyi amɔtshi pembaka dia ndiha “asuku” asɔ, koko sho mbeyaka dia vɔ hawokoke mbâdiha. Jehowa ndamɛ mbakate dia lo woho ɔmɔtshi kana okina asoko wayotshikalaka hwe. Ohamelo wayotetemala.
19 Ekɔ nto weho ekina watshɔkɔla Jehowa ekambi ande ndo wâlɛngande lo nshi nyɛ y’ekomelo. Avɛsa wotshikadi wa l’Isaya 60 wekɔ l’ɛtɛkɛta wa prɔfɛsiya wɛnya weho akɔ ekina ɛsɔ.
Onde wɛ koka nembetshiya?
• Ele “womoto” laki Nzambi, ndo ele ekitɔ ande lanɛ la nkɛtɛ?
• Etena kakɔna kakakite ana waki Siɔna balakata la nkɛtɛ ndo etena kakɔna la ngande ‘wakawonɛ’?
• Lo kamba l’ɛtɛkɛta wotshikitanyi wa didjidji, kakɔna kakate Jehowa lo dikambo di’ohamelo wa nshi nyɛ w’apandjudi wa Diolelo?
• Lo weho akɔna wakahɛtshɛ Jehowa ekambi ande osase?
[Osato wa lo lɛkɛ 20]
Wambotɛ “womoto” laki Jehowa dia monɛ
[Osato wa lo lɛkɛ 22]
Masuwa wayaye mɛnamaka oko benga oma l’etale