Totayangi Jehowa la ntondo ka lushi la nkɛlɛ kande
‘Nyoyange Jehowa . . . Nyoyange losembwe, nyoyange ndjakitshakitsha. Ondo nyu mbeyaka ndjoka lo lushi la nkɛlɛ ka Jehowa.’—ZEFANIYA 2:3.
1. Ngande waki lonyuma l’anto wa la Juda lam’akatatɛ Zɛfaniya olimu ande w’omvutshi?
ZƐFANIYA akatatɛ olimu ande w’omvutshi l’etena ka pâ efula ka l’ɔkɔndɔ w’ase Juda. Lonyuma la wodja ɔsɔ lakalana tshɛ. Lo dihole dia vɔ ndjaɛkɛ le Jehowa Nzambi, wodja ɔsɔ wakayangaka alako le ɛlɔmbɛdi w’apanganu ndo le wetshi wa tɔɔtɔ. Ɔtɛmwɛlɔ wa Bala, la nsɛlɛmɔnyi yawɔ ya mbisha nkɛtɛ ɛtɛtɔ, wakakokanɛ lo wodja w’otondo. Ewandji wa wodja, mbut’ate, ɛlɔhɛ la toshushi wakahɛnyahɛnyaka anto wakiwɔ l’ɔkɛndɛ wa kokɛ. (Zefaniya 1:9; 3:3) Diɔ diakɔ diakɔshi Jehowa yɛdikɔ ya ‘sembola lonya lande’ dia ndanya Juda la Jerusalɛma!—Zefaniya 1:4
2. Elongamelo kakɔna kaki la ekambi waki Nzambi wa kɔlamelo wa la Juda?
2 Koko, kânga mbakalana akambo lo wodja ɔsɔ, yema y’elongamelo yakikɔ. Josiya, ɔnaki Amɔna, akahema l’okudi l’etena kɛsɔ. Kânga mbakinde dikɛnda, Josiya akalangaka Jehowa l’otema ɔtɔi. Naka nkumekanga kɛsɔ k’oyoyo mbolola ɔtɛmwɛlɔ wa pudipudi lo wodja wa Juda, kete tɔtɔi t’anto takakambɛka Nzambi ka mɛtɛ la kɔlamelo wakahombe keketshama mɛtɛ! Ondo akina wotoyotshutshuyama dia ndjela ɛnyɛlɔ kawɔ ko ndo vɔ lawɔ ndjoshimbamɛ lo lushi la nkɛlɛ kaki Jehowa.
Kɛnɛ kalɔmbama dia shimbamɛ
3, 4. Naa akambo asato walɔmbama di’onto ndjoshimbamɛ lo ‘lushi la nkɛlɛ ka Jehowa’?
3 Onde mɛtɛ anto amɔtshi wakakoke shimbamɛ lo lushi la nkɛlɛ kaki Jehowa? Eelo, naka vɔ kotsha akambo asato walɔmbama lo Zefaniya 2:2, 3. Lam’atatadia avɛsa anɛ, tokotole yambalo yaso l’awui asɔ walɔmbama. Zɛfaniya akafunde ate: “Ntundu nyu nyatatshanyema uku fufudi yatufumbofumboka; ntundu ududu wa [Jehowa] watayi le nyu; ntundu ka lushi la [Jehowa] latayi le nyu. Nyuyangi [Jehowa], nyu akanga a memakana tshe wa la kete, nyu wane watulamaka adjangu andi. Nyuyangi [“losembwe,” NW], nyuyangi [“okitshakitsha,” NW]. Undu, nyu mbeyaka mpanda lu lushi la kele ka [Jehowa].”
4 Ɔnkɔnɛ, di’onto shimbamɛ, nde akahombaka (1) nyanga Jehowa, (2) nyanga losembwe, ndo (3) nyanga okitshakitsha. Akambo asɔ pombaka monga ohomba efula le so ɛlɔ kɛnɛ. Lande na na? Nɛ dia oko wakendana Jehowa Nzambi nde la wodja wa Juda la Jerusalɛma lo ntambe k’esambele la ntondo ka tena diaso nɛ, mbayangande la mendana la wedja wa lo Lokristokristo, kâmɛ ndo anto tshɛ wa kɔlɔ lo ‘fɔnu ka woke’ kaya suke la ndja. (Mateu 24:21) Onto tshɛ lalanga ndjoshimbamɛ l’etena kɛsɔ pombaka mbɔsa yɛdikɔ y’ɔlɔlɔ oma ko kakianɛ. Woho akɔna na? Lo nyanga Jehowa, lo nyangaka losembwe, ndo lo nyangaka okitshakitsha la ntondo ka ndjoyanga okanga a kɔngɔlɔ wanyu amboshila!
5. ‘Nyanga Jehowa’ alembetshiyande ɛlɔ kɛnɛ?
5 Wɛ kokaka mbuta wate: ‘Ka dimi lekɔ Ɔmɛnyi wa Jehowa wamboshilaka ndjâkimɔ le Nzambi ndo wambobatizamaka. Onde dimi takotsha akambo asɔ?’ Lo mɛtɛ, aha ndjâkimɔ tsho le Jehowa, mbele komelo ka shimu. Isariyɛlɛ aki wodja wakayakimɔ le Nzambi, koko lo nshi ya Zɛfaniya, ase Juda konɛnyaka dɔkɔlɔkɔ diawɔ. Diɔ diakɔ diakayolanyemaka wodja ɔsɔ. ‘Nyanga Jehowa’ ɛlɔ kɛnɛ, kɛdikɛdi monga la diɔtɔnganelo di’ɔlɔlɔ la nde ndo nama diɔtɔnganelo diakɔ, lo monga l’atei w’ɔlɔngɔswamelo ande wa lanɛ la nkɛtɛ. Dikambo sɔ nembetshiyaka nto mbeka dia mbeya woho wɛna Jehowa akambo ndo ndjâkiyanya dia mbeya tokanyi tande. Sho nyangaka Jehowa lo mbeka Ɔtɛkɛta ande la yambalo tshɛ, lo kanaka la wɔ yimba, ndo lo kamba l’alako wa lɔkɔ lo lɔsɛnɔ laso. Lam’alɔmbaso ɛlɔmbwɛlɔ ka Jehowa l’etete ndo wayelaso ɛlɔmbwɛlɔ ka nyuma kande k’ekila mbaleka keketala diɔtɔnganelo diasaso la nde, ndo mbalekaso keketshama dia mbôkambɛ ‘l’otema aso tshɛ, l’anima aso tshɛ, ndo la wolo aso tshɛ.’—Euhwelu k’Elembe 6:5; Ngalatiya 5:22-25; Filipi 4:6, 7; Enyelo 4:11.
6. Ngande ‘wayangaso losembwe,’ ndo bonde kele dikambo sɔ kokaka salema kânga l’andja wasɛnaso ɔnɛ?
6 Dikambo dia hende dialɔmbama diofundami lo Zefaniya 2:3 ele: ‘nyanga losembwe.’ Efula ka l’atei aso wakatshe etshikitanu wa weke lo nsɛnɔ yawɔ dia kotsha kɛnɛ kalɔmbama dia batizama koko, sho pombaka tetemala kitanyiya ɛlɛmbɛ wa Jehowa wosembwe wendana la lɔkɛwɔ l’ɔlɔlɔ lo lɔsɛnɔ laso l’otondo. Lo dikambo sɔ, amɔtshi wakatatɛ dimɛna, koko l’ɔkɔngɔ diko wakayoyadjaka mindo l’akambo wa l’andja ɔnɛ. Ekɔ mɛtɛ dia, nyanga losembwe hatongaka nshi tshɛ dikambo dia wɔdu nɛ dia, sho ningama l’anto wɔsa di’awui wa mindo wa dieyanelo, kashi la awui akina wa kɔlɔ ɔnɛ kema kɔlɔ. Koko, lo monga la nsaki ka wolo ka ngɛnyangɛnya Jehowa, sho koka shika ekolo la ntondo ka nsaki yatotshutshuya dia ngɛnyangɛnya anto wa l’andja ɔnɛ lo ndjatshuha l’awui wa l’andja ɔnɛ. Tohɔ dia Nzambi akayoka Juda ɔkɔngɔ nɛ dia vɔ wakayolanga mbokoya wedja wakasukana la wɔ waki kombokaka Nzambi wɔma. Lo dihole dia mbokoya ase andja ɔnɛ, nyɛsɔ ‘tokoya Nzambi,’ lo ndɔta ‘lonto l’oyoyo lakatongama lo ndjela lolango laki Nzambi, lo losembwe ndo lo kɔlamelo ya mɛtɛ.’—Efeso 4:24; 5:1.
7. Woho akɔna ‘wayangaso okitshakitsha’?
7 Dikambo dia sato dioshilami lo Zefaniya 2:3 ele ɔnɛ, naka sho nangaka ndjoshimbamɛ lo lushi la nkɛlɛ ka Jehowa, sho pombaka ‘nyanga okitshakitsha.’ Lushi tshɛ sho pomanaka l’apami, wamato, ndo ɛlɔngɔlɔngɔ l’esekaseka wele la weho w’akoka tshɛ, onyake okitshakitsha. Le wɔ, monga la memakana ekɔ tshondo y’ɛkɔmɔ. Vɔ mbɔsaka okitanyiya oko wɔdu ɔmɔtshi wa woke. Vɔ wekɔ la dihikahika, la lokaki ndo l’etema wa lonyu. Kɛnɛ kɔsawɔ oko ‘lotshungɔ’ lawɔ kana nango yawɔ mbatshawɔ oyadi etombelo akɔna wakoka monga la dikambo sɔ. Ayonga dikambo dia kandji efula naka sho monga la waonga wa ngasɔ! Etena ka ‘nyanga okitshakitsha’ tɔ kɛnɛ. Woho akɔna na? Lo kitanyiya awui waki Nzambi, lo mbetawɔ l’okitshakitsha tshɛ engwelo kakinde ndo lo sala lolango lande.
Lande na katawɔ ɔnɛ “Undu” nyu mbeyaka shimbamɛ?
8. Kakɔna kalembetshiya okambelo wa la tshɛkɛta “undu” lo Zefaniya 2:3?
8 Tolembete dia Zefaniya 2:3 mbutaka ɔnɛ: “Undu nyu mbeyaka mpanda lu lushi la kele ka [Jehowa].” Lande na kakawakambe la tshɛkɛta “undu” lam’atɛkɛtawɔ di’‘akanga w’okitshakitsha wa lanɛ la nkɛtɛ’ na? Nɛ dia, akanga w’okitshakitsha asɔ wakatakula wanya w’ohomba, koko takawahombe ndjaɛkɛ otamanya le wɔ vamɛ. L’etena kɛsɔ ko watakome l’ekomelo ka nsɛnɔ yawɔ y’anto wele la kɔlamelo. Amɔtshi l’atei awɔ wakakokaka ndjɔkɔ lo pɛkato. Ɔsɔku mbediɔ ndo le so. Yeso akate ate: ‘Ɔnɛ latetemala polo l’ekomelo mbayoshimbamela.’ (Mateu 24:13) Eelo, dia sho shimbamɛ lo lushi la nkɛlɛ ka Jehowa, sho la dia tetemala ntsha kɛnɛ kele ɔlɔlɔ lo washo ande. Onde yɛdikɔ shɔ mamboyɔsa la wolo tshɛ?
9. Naa ataku w’ohomba wakatakula Josiya, Nkumekanga ka dikɛnda?
9 Mɛnamaka dia ɛtɛkɛta waki Zɛfaniya, akatshutshuya Nkumekanga Josiya dia ‘nyanga Jehowa.’ Afundelo mbutaka ɔnɛ: “L’eleku k’enanei ka diulelu diandi, laso ku ndi eki dikenda, ndi [Josiya] akatatela nyanga [Nzambi k]a tshendi Davidi.” (2 Ekondo 34:3) Ndo nto, Josiya akatetemala ‘nyanga losembwe,’ nɛ dia sho mbadiaka ɔnɛ: “Ku l’eleku ka dikumi la ahendi ka diulelu diandi, [lâsɔ ko Josiya aya oko l’ɛnɔnyi 20] ndi akatatela mbedia Juda la Jerusalema uma lu alunga, uma lu dikishi, uma lu difanelu dia losela la difanelu dia lolelola. Vo wakalanya diakelu dia Wa Bala la ntundu kandi.” (2 Ekondo 34:3, 4) Josiya ‘akayange okitshakitsha,’ ndo akatshe akambo la ndjakitshakitsha dia ngɛnyangɛnya Jehowa lo minya ɔtɛmwɛlɔ wa dikishi la ditshelo dikina di’ɛtɛmwɛlɔ wa kashi oma lo wodja. Akanga wa ndjakitshakitsha akina wakangɛnangɛna mɛtɛ etena kɛsɔ!
10. Kakɔna kakatombe la Juda lo 607 N.T.D., ko waa na wakashimbamɛ?
10 Ase Juda efula wakayokalolɛka Jehowa lo nshi yakolɛka Josiya. Koko, l’ɔkɔngɔ wa nyɔi ka nkumekanga, efula wakayokawolaka l’akambo wakawatshaka ntondo, lo ditshelo diahetawɔ Nzambi kânga yema. Ɔnkɔnɛ, oko wakadite Jehowa, ase Babilɔna wakɔtwɛ ase Juda ndo wakalanya Jerusalɛma, ndo kapitalɛ kayɔ l’ɔnɔnyi wa 607 N.T.D. Koko, aha ase Juda tshɛ mbakadiakema. Omvutshi Jeremiya, Ɛbɛdɛ-mɛlɛkɛ ose Etiyɔpiya, apami la wamato wa lo luudu la Jɔnadaba, ndo anto akina wakashimbamɛ lo ‘lushi la nkɛlɛ ka Jehowa.’—Jeremiya 35:18, 19; 39:11, 12, 15-18.
Atunyi waki Nzambi pombaka mbɔsa wetshelo!
11. Lande na kende kema dikambo dia wɔdu tshikala la kɔlamelo le Nzambi ɛlɔ kɛnɛ, ndo kakɔna kahomba atunyi waki Nzambi mbidja lomba?
11 Etena kɛnɛ keso lo kongɛ lushi la nkɛlɛ ka Jehowa le andja ɔnɛ wa kɔlɔ, sho ‘pomanaka l’ehemba wa weho efula.’ (Jakoba 1:2) Lo wedja efula wata dia vɔ mbɔsaka lotshungɔ l’ɛtɛmwɛlɔ la nɛmɔ, ewandji w’ɛtɛmwɛlɔ wakasɛngiya ewandji wa lɛɛta lo kolonganyaka akambo l’oyango wa pɛnyahɛnya ekambi waki Nzambi woho w’anyanya. Wanɛ wele la nkɛwɔ ya kɔlɔ wakamamatanyiyɛ ekambi wa Jehowa awui wa kashi, lo mbaɔsa oko ‘ɔtɛmwɛlɔ wa wâle.’ Nzambi ekɔ lo mɛna kɛnɛ katshawɔ, ndo nde hatowatshika aha la mbasha dilanya. Atunyi waki Nzambi asɔ pombaka kana yimba ɔlɔlɔ la kɛnɛ kakakomɛ atunyi amɔtshi waki Nzambi wa lo nshi y’edjedja, ɛnyɛlɔ, Filistiya. Prɔfɛsiya mbutaka ɔnɛ: “Ngaza ayutshikala hwe, Ashikelona ayuyala tongo tu, Ashidode wayutshanyema wunya l’atei w’ote, Ekerona ayuhikwama.” Esomba w’ase Filistiya ɛnɛ: Ngaza, Ashikɛlɔna, la Ashidɔdɛ wakahombe pandjwama tshɛ vwa.—Zefaniya 2:4-7.
12. Kakɔna kakakomɛ Filistiya, Mɔaba, ndo Amɔna?
12 Prɔfɛsiya kɛsɔ tetemalaka mbuta ɔnɛ: “Dimi lakuki tengo y’asi Moaba, la dionyo di’asi Amona diakawonyolaka wudja ami, ndu uku akawayasemaka dia ndosha kete yawo.” (Zefaniya 2:8) Lo mɛtɛ, Edjibito la Etiyɔpiya wakasoyama efula oma le ase Babilɔna. Ko ngande waki elombwelo kaki Nzambi le Mɔaba la Amɔna, wedja wakaye oma le Lɔta ɔnaki ɔnango Abarahama na? Jehowa akate ate: “Moaba ayuyala uku Sodoma, la asi Amona uku Ngomora.” Otshikitanyi la watshɛwɔ mbut’ate ana ahende wa wamato waki Lɔta, wanɛ wakahandɔ oma l’elanyelo ka Sɔdɔmɔ la Ngɔmɔra—Mɔaba la Amɔna wedja wakayafunaka, hawotohandɔ oma lo elombwelo ka wolo kaki Nzambi. (Zefaniya 2:9-12; Etatelu 19:16, 23-26, 36-38) Lende ele Filistiya l’esomba atɔ ɛlɔ kɛnɛ? Ko lende aya Mɔaba la Amɔna wedja wakayafunaka? Nyu koyangaka wedja ɛsɔ kânga l’ewa, hanyowaɛnaki nto pondjo.
13. Kakɔna kakashola wa arkeɔlɔgɛ l’osomba wa Niniva?
13 Lo nshi ya Zɛfaniya, lowandji la Diolelo di’ase Asuriya lakahemɛ andja w’otondo. Austen Layard ombeki ɔmɔtshi w’emindo wa lo nshi y’edjedja ekɔ lo kɔndɔla ɔnkɔnɛ lo kɛnɛ kendana l’etenyi kɛmɔtshi ka luudu la nkumekanga, kakandashola la Niniva, kapitalɛ k’Asuriya ate: “Lokala . . . lakakahanyema lo tenyi tenyi diele l’atshuku anɛi wɛdimi ndo wakasange alɛmbɔlɛmbɔ la waa nyama lo tenyi diakɔ. Esato ɛmɔtshi wakasalema l’ewanga, ndo omamu w’etenyi l’etenyi akalɛngama dimɛna dia mamba l’eshidi ndo ebolonga wakawasalaka la paonyi. Lokala ndo pele dia lo toshambrɛ diakashingɔma ondo la fɛsa ndo la paunyi ya lɔlɛlɔla; ndo etshudi w’abaya wakakambe l’esongo wa wolo nyanga, l’atei awɔ mbaki ndo esongo w’esasi.” Koko, oko wakadiatama lo prɔfɛsiya ka Zefaniya, Asuriya akahombe ndanyema kamɛ ndo Niniva osomba atɔ ‘wakahombe koma shɛnga tsho.’—Zefaniya 2:13.
14. Ngande wakakotshama prɔfɛsiya ka Zɛfaniya lo kɛnɛ kendana la Niniva?
14 Paka ɛnɔnyi 15 eto l’ɔkɔngɔ wa Zɛfaniya mbuta ɛtɛkɛta ɛsɔ, mbakayolanyema Niniva, osomba ɔsɔ wa wolo, ndo luudu la nkumekanga lakalanyema tshɛ vwa. Eelo, osomba wakayafunaka ɔsɔ, akayokomaka ditshu to. Woke woke w’elanyelo kɛsɔ wakatatami l’ɛtɛkɛta ɛnɛ wahahanya asolo: ‘Kumbaka la biko wayolala l’ɛtɛ wa dikɔhɔ diawɔ. Dui diayotetemala la memba lo didishi. Edjaselo kawɔ kayolanyema.’ (Zefaniya 2:14, 15) Mvudu ya weke ndo y’amɛna ya la Niniva yakayokoma edjaselo ka waa kumbaka la biko. Mindjo y’amindji w’okanda hayoyokɛ nto lo toshinga, kâmɛ ndo mindjo y’asɔlayi la nkembo y’ɛlɔmbɛdi. Toshinga tɔsɔ takadjaka anto mindjo ntondo taya tshɛ kii yɔ, paka kana kembo ya tofudu kana londjo la lɔpɛpɛ loto mbakoka mbokɛma. Yoho shɔ mbayolanyema atunyi tshɛ waki Nzambi!
15. Wetshelo akɔna wakokaso kondja oma lo kɛnɛ kakakomɛ Filistiya, Mɔaba, Amɔna, ndo Asuriya?
15 Wetshelo akɔna wakondjaso lo sɛdingola kɛnɛ kakakomɛ Mɔaba, Amɔna, Filistiya, l’Asuriya na? Wetshelo akɔ v’ɔnɛ: Oko weso ekambi waki Jehowa tatokake atunyi aso wɔma. Nzambi mɛnaka kɛnɛ kasala wanɛ walɔsha ekambi wakinde. Lo nshi yakete, Jehowa akɔsɛ atunyi ande yɛdikɔ ya wolo, popo ndo nshi yaso nyɛ, Jehowa ayela dombwelo diande lo nkɛtɛ k’otondo. Koko anto amɔtshi wayohandɔ—‘lemba la woke l’anto wotumbi oma lo wedja tshɛ.’ (Enyelo 7:9) Wɛ kokaka monga l’atei awɔ, naka wɛ tetemala la nyanga Jehowa, nyanga losembwe ndo nyanga okitshakitsha.—Zefaniya 2:3.
Mananu le atshi wa kɔlɔ wahayatshumoya!
16. Kakɔna kakate prɔfɛsiya ka Zɛfaniya lo dikambo di’ewandji wa la Juda ndo ewandji w’ɛtɛmwɛlɔ, ndo lande na kele ɛtɛkɛta ɛsɔ mbɔtɔnɛka dimɛna la Lokristokristo?
16 Prɔfɛsiya kaki Zɛfaniya kambendana nto la Juda ndo la Jerusalɛma. Zefaniya 3:1, 2 mbutaka ɔnɛ: “Mananu kayayi le usumba w’uhedia, ndu wambusana! Le usumba uku watusuyanyaka! Vo kunkitanyia diui, kumbetawo wetshelu, kombekama le [Jehowa], kunsukana le [Nzambi k]awo.” Ekɔ kandji efula woho wakatone ekambi waki Jehowa mbidja yimba lo ɔhɛmwɛlɔ ndo wakiwɔ kombetawɔ wongwelo wakawawasha! Lo mɛtɛ, aki kandji efula nɛ dia ewandji, ɛlɔhɛ, la toshushi kombokaka anto kɛtshi. Zɛfaniya akakɔndɔla lɔkɛwɔ la sɔnyi laki l’ewandji w’ɛtɛmwɛlɔ lo mbuta ɔnɛ: “Amvutshi awo weli antu watusadisadi ndu antu wa lukesu. Elombedi awo wakasuwula etemwelo, wakalanya elembe.” (Zefaniya 3:3, 4) Ɛtɛkɛta ɛsɔ mbɔtɔnɛka tshɛ la kɛnɛ kasala amvutshi ndo ɛlɔmbɛdi wa lo Lokristokristo ɛlɔ kɛnɛ! La diɔnyɔ tshɛ, vɔ wakanya lokombo laki Nzambi oma lo dikadimwelo diawɔ dia Bible ndo wekɔ lo mbetsha awui wa kashi lo kɛnɛ kendana la lonto laki Onto ɔnɛ latawɔ ɔnɛ nde mbatɛmɔlawɔ.
17. Oyadi anto tohokamɛ kana bu, bonde kahombaso tetemala mbewoya lokumu l’ɔlɔlɔ?
17 La dilɛmiyɛlɔ tshɛ, Jehowa akewola wodja ande w’edjedja dikambo di’elanyelo kakinde suke la mbela. Nde akatome ekambi ande amvutshi, mbut’ate, Zɛfaniya nde la Jeremiya, dia vɔ mbutɛ anto dia kadimola etema. Eelo, “[Jehowa] . . . hutsha kolo. Pindju tshe, ndi atelaka sambu kandi k’ololo, ndi hatuhekoka la kesekese.” Akatshe anto la ntondo k’ɔhɛmwɛlɔ ɔsɔ? Zɛfaniya mbutaka ɔnɛ: “Keli untu a kolo hateyaka sonyi.” (Zefaniya 3:5) Ɔhɛmwɛlɔ wa ngasɔ mbashama ndo ɛlɔ kɛnɛ. Naka wɛ ekɔ opandjudi wa lokumu l’ɔlɔlɔ, kete ndo wɛ mbakamba olimu ɔsɔ wa mbewola anto. Ɔnkɔnɛ, tetemala la mbewoya lokumu l’ɔlɔlɔ lɔsɔ aha la mpekɔ. Oyadi anto kohokamɛ kana kema, Nzambi ngɛnangɛnaka olimu ayɛ edja tshɛ katetemalayɛ mbôkamba la kɔlamelo tshɛ; ndo ndoko sɔnyi kahombayɛ mboka etena kakambayɛ olimu waki Nzambi l’ohetoheto tshɛ.
18. Ngande wayokotshama Zefaniya 3:6?
18 Elombwelo kaki Nzambi hatokomɛ tsho lo elanyelo ka Lokristokristo. Jehowa ayela elanyelo kande le wedja tshɛ wa la nkɛtɛ. Nde ekɔ lo mbuta ate: “Dimi lakashili wedja ushiki, tangelu diawo diakalanyema. Dimi lakalanya esese awo, wuhu waheyi untu mbeta leko. Esumba awo wakalanyema.” (Zefaniya 3:6) Sho kokaka mbɛkɛ etema aso l’ɛtɛkɛta ɛsɔ waki Jehowa watande lo kɛnɛ kendana l’elanyelo, watekana oko tɔ kamboshila la salema. Kakɔna kakakomɛ esomba wa Mɔaba, Amɔna, la Filistiya na? Kakɔna kakakomɛ Niniva, kapitalɛ k’Asuriya na? Elanyelo k’esomba ɛsɔ kokaka mbisha wedja wa nshi nyɛ wetshelo. Nzambi hasɔkama pondjo.
Tetemala la nyanga Jehowa
19. Naa wembola watotshutshuya dia kana lomba wahombaso ndjaoka?
19 Lo nshi ya Zɛfaniya, nkɛlɛ kaki Nzambi kakaye le wanɛ waki la mposa k’efula ka ‘mbetɛ etsha awɔ tshɛ kɔlɔ.’ (Zefaniya 3:7) Kɛsɔ mbayosalema ndo lo nshi yaso nyɛ. Onde wɛ mbetawɔka dia lushi la nkɛlɛ ka Jehowa laya suke? Onde wɛ ekɔ lo tetemala ‘nyanga Jehowa’ lo mbadiaka Ɔtɛkɛta ande mbala la mbala, mbut’ate, lushi la lushi? Onde wɛ mɛtɛ ‘nyangaka losembwe’ lo monga la lɔkɛwɔ la pudipudi lɔtɔnganɛ l’ɛlɛmbɛ waki Nzambi? Onde wɛ ekɔ lo ‘nyanga okitshakitsha’ lo monga la memakana ndo l’okitanyiya otsha le Nzambi ndo otsha lo tɛdikɔ takandɔshi dia mbisha anto panda?
20. Wembola akɔna wayotɔsɛdingola lo sawo dia komelo l’ɔnɔngɔ w’asawo asato anɛ watɛkɛta dia prɔfɛsiya ka Zɛfaniya?
20 Naka la kɔlamelo tshɛ sho tetemala la nyanga Jehowa, losembwe, ndo okitshakitsha, kete sho kokaka nongamɛ nongola ɛtshɔkɔ efula tatɛ oma ko kakianɛ, eelo, kânga lo ‘nshi nyɛ y’ekomelo’ yahembama mbetawɔ kaso. (2 Timote 3:1-5; Tukedi 10:22) Lâsɔ sho kokaka ndjambola ɔnɛ, ‘lo toho takɔna teso lo tombola Jehowa oko weso ekambi ande wa nshi nyɛ, ndo ɛtshɔkɔ akɔna wa lo nshi yayaye watama lo prɔfɛsiya ka Zɛfaniya lo dikambo dia wanɛ wayoshimbamɛ lo lushi la nkɛlɛ ka Jehowa laya kasuke na?
Ngande wayoyokadimola?
• Anto ngande ‘wayangawɔ Jehowa’?
• ‘Nyanga losembwe’ kɛdikɛdi na?
• Ngande wakokaso ‘nyanga okitshakitsha’?
• Bonde kahombaso tetemala la nyanga Jehowa, losembwe, ndo okitshakitsha?
[Osato wa lo lɛkɛ 10]
Onde wɛ ekɔ lo nyanga Jehowa lo mbeka Bible ndo lo nɔmbaka l’etete?
[Osato wa lo lɛkɛ 13]
Lam’ele vɔ wekɔ lo tetemala la nyanga Jehowa, lemba la woke wayohandɔ lo lushi la nkɛlɛ kande