Tokoya ɛnyɛlɔ k’amvutshi—Zɛfaniya
1. Lo etena kakɔna kakakambaka Zɛfaniya oko omvutshi, ndo ngande wende ɛnyɛlɔ ka dimɛna le so ɛlɔ kɛnɛ?
1 L’atei atei wa ntambe k’esambele N.T.D., ase Juda wakatatɛ ntɛmɔla Baala lo sɛkɛ. Laasɔ ko Amɔna nkumekanga ka kɔlɔ eke kandjakema ndo nkumekanga Josiya laki eke ɔlɔngɔlɔngɔ ɔlɔmbɔla. (2 Ek. 33:21–34:1) L’etena kɛsɔ, Jehowa akatome Zɛfaniya dia tewoya losango la elombwelo Kande. Kaanga mbele ondo Zɛfaniya aki ose nkumbo k’owandji wa la Juda, nde komboka wɔma dia mbewoya ewandji wa la Juda losango la dianyelo dia Jehowa. (Zef. 1:1; 3:1-4) Woho akɔ waamɛ mbele, sho pombaka nsala la wolo dia mbokoya dihonga diaki la Zɛfaniya ndo hatohombe mbetawɔ dia diwotɔ monga la shɛngiya ya kɔlɔ lo ɔtɛmwɛlɔ watɛmɔlaso Jehowa. (Mat. 10:34-37) Losango lakɔna lakewoya Zɛfaniya, ndo dui sɔ diakonge l’etombelo akɔna?
2. Ahombaso nsala dia ndjoshimbamɛ lo lushi la kɛlɛ ka Jehowa?
2 Toyange Jehowa: Paka Jehowa ndamɛ mbakoka nshimbɛ anto lo lushi la kɛlɛ kande. Diakɔ diele, Zɛfaniya akakeketsha ase Juda dia nyanga Jehowa, nyanga losembwe, ndo nyanga memakana kam’eke etena. (Zef. 2:2, 3) Ngasɔ mbediɔ lo nshi yaso nyɛ. L’ɛnyɛlɔ ka Zɛfaniya, tekɔ lo nkeketsha anto akina dia nyanga Jehowa, koko sho lawɔ pombaka mboyanga ndo ndjashikikɛ diaha “nkadimo uma le Jehowa” pondjo. (Zef. 1:6) Sho nyangaka Jehowa lo mbekaka Ɔtɛkɛta ande la yaambalo tshɛ ndo lo nɔmbaka ɛlɔmbwɛlɔ kande. Sho nyangaka losembwe lo monga la lɔkɛwɔ la pudipudi. Sho nyangaka memakana lo monga l’okitshakitsha ndo lo monga suke dia ndjela ɛlɔmbwɛlɔ ka l’okongamelo wa Jehowa.
3. Lande na kahombaso mɛna akambo la sso di’ɔlɔlɔ l’olimu w’esambishelo?
3 Etombelo w’amɛna: Losango l’elombwelo lakewoya Zɛfaniya, lakonge l’etombelo w’amɛna le ase Juda amɔtshi, koko lɔ lakaleke munanda ɔlɔngɔlɔngɔ Josiya lakatatɛ nyanga Jehowa etena kakinde eke dikɛnda. L’ɔkɔngɔ diko, Josiya akɔshi yɛdikɔ ya minya dikishi tshɛ lo wodja. (2 Ek. 34:2-5) Ɛlɔ kɛnɛ, kaanga mbele ntɔngɔ ya Diolelo mɔtshi kɔka l’omamu wa mboka, lo nkɛtɛ y’ave kana l’atɛndɛ, mɔtshi kɔka lo nkɛtɛ y’amɛna ndo tɔka elowa. (Mat. 13:18-23) Tekɔ l’eshikikelo dia Jehowa ayotetemala ntshɔkɔla welo wadjaso dia ntetemala ndjasha l’odianganyelo wa ntɔngɔ ya Diolelo.—Osam. 126:6.
4. Lande na kahombaso ‘ntetemala nkongɛ Jehowa’?
4 Ase Juda amɔtshi wakafɔnyaka dia Jehowa helaki elanyelo pondjo. Koko, Jehowa akashikikɛ anto tshɛ dia lushi lande la woke laya suke. (Zef. 1:12, 14) Paka wanɛ wayanga eshamelo le Jehowa mbahomba nshimbamɛ. (Zef. 3:12, 17) Lam’ele tekɔ ‘lo ntetemala nkongɛ Jehowa,’ nyɛsɔ tonge l’ɔngɛnɔngɛnɔ lo nkamba kaamɛ l’asekaso atɛmɔdi wa Nzambi kaso ka woke.—Zef. 3:8, 9.