Ambola w’oma le ambadi

Ele “womoto” lɔtɛkɛtami lo Isaya 60:1 ndo woho akɔna ‘wonɛɛnde’ ndo ‘wangamulande osase’?

Sho mbadiaka l’Isaya 60:1 ɔnɛ: “Onɛɛ, wɛ womoto, ngamula osase, nɛ dia osase ayɛ wamboya. Lotombo la Jehowa lambokɔhɛtɛ.” Dihole diokambiwɔ la nde mɛnyaka dia “womoto” aki Siɔna kana Jɛrusalɛma, kapitalɛ ka Juda l’etena kɛsɔ.a (Isa. 60:14; 62:​1, 2) Jɛrusalɛma nembetshiyaka wodja w’otondo w’Isariyɛlɛ. Ɛtɛkɛta w’Isaya monyiyaka ambola ahende anɛ: Dia ntondo, etena kakɔna ndo ngande ‘wakonɛɛ’ Jɛrusalɛma ndo ‘wakayangamula osase’ wa didjidji? Dia hende, onde ɛtɛkɛta w’Isaya wekɔ lo kotshama l’etena kaso kɛnɛ?

Etena kakɔna ndo ngande ‘wakonɛɛ’ Jɛrusalɛma ndo wakayangamula osase wa didjidji? Jɛrusalɛma la tɛmpɛlɔ kayɔ kakatshikala tɔngɔ to etena kaki ase Juda lo lɔhɔmbɔ la Babilɔna l’edja k’ɛnɔnyi 70. Koko l’ɔkɔngɔ w’ase Mediya la Pɛrɛsiya nɛndja ase Babilɔna, ase Isariyɛlɛ w’oma lo waolelo tshɛ w’ase Babilɔna wakatshungɔ ndo wakakalola lo ngelo yawɔ ndo wakakawoya ɔtɛmwɛlɔ wa mɛtɛ. (Ɛzr. 1:​1-4) L’etatelo k’ɔnɔnyi wa 537 N.T.D., atshikadi wa kɔlamelo w’oma lo waoho 12 akɔ tshɛ wakasale dui sɔ. (Isa. 60:4) Vɔ wakatatɛ nambola Jehowa elambo, nsala waa fɛtɛ ndo nyomoka tɛmpɛlɔ. (Ɛzr. 3:​1-4, 7-11; 6:​16-22) Mbala kekina nto, lotombo la Jehowa lakatatɛ ngamula la Jɛrusalɛma, mbuta ate le ekambi wa Nzambi wakakaloyama. Lo wedi awɔ, vɔ waki osase le wedja waki lo wodjima.

Koko, etenyi kɛmɔtshi ka prɔfɛsiya y’Isaya yendana l’okalwelo yakakotshama la Jɛrusalɛma y’edjedja. Ase Isariyɛlɛ lo tshɛ kawɔ kotetemala nkitanyiya Nzambi. (Nɛh. 13:27; Mal. 1:​6-8; 2:​13, 14; Mat. 15:​7-9) L’ɔkɔngɔ diko, vɔ wakayotonaka Mɛsiya, Yeso Kristo. (Mat. 27:​1, 2) Lo 70 T.D., Jɛrusalɛma la tɛmpɛlɔ kayɔ kakayolanyemaka mbala ka hende.

Jehowa akatewoyisha la ntondo dia dikambo sɔ. (Dan. 9:​24-27) Mbokɛmaka hwe dia komonga lo sangwelo diande dia Jɛrusalɛma ya mɛtɛ mɛtɛ nkotsha tshɛ lo tshɛ prɔfɛsiya yendana l’okalwelo ya lo Isaya tshapita 60.

Onde ɛtɛkɛta w’Isaya wekɔ lo kotshama l’etena kaso kɛnɛ? Eelo, koko wekɔ lo kotshama le womoto okina la didjidji, mbuta ate “Jɛrusalɛma ya la diko.” Ɔpɔstɔlɔ Pɔɔlɔ akafunde lo dikambo diayɔ ate: “Yɔ mbele nyangɛso.” (Ngal. 4:26) Jɛrusalɛma ya la diko yekɔ etenyi ka l’olongo k’okongamelo wa Nzambi wokengami la ditongami dia lo nyuma dia kɔlamelo. Anayɔ, mbidja ndo Yeso l’Akristo w’akitami wa lo nyuma 144000 wekɔ l’elongamelo katɔsɛna l’olongo oko Pɔɔlɔ. Akitami w’Akristo mbakenga “wodja w’ekila,” mbuta ate “Isariyɛlɛ wa Nzambi.”—1 Pe. 2:9; Ngal. 6:16.

Ngande ‘wakonɛɛ’ Jɛrusalɛma ndo ‘wakayangamula osase’? Yɔ yakasale dui sɔ oma lo tshimbo y’anayɔ w’akitami wa la nkɛtɛ. Ɛdika woho wɔtɔnɛ kɛnɛ kakawasale la prɔfɛsiya kele l’Isaya tshapita 60.

Akristo w’akitami wakahombe ‘monɛɛ’ nɛ dia vɔ wakɔtɔ lo wodjima wa didjidji etena kakahandjɔnɛ apɔstazi l’ɔkɔngɔ wa nyɔi k’apɔstɔlɔ lo ntambe ka hende T.D. (Mat. 13:​37-43) Laasɔ, vɔ wakayongaka lo lɔhɔmbɔ la Babilɔna ka Woke kele tshunda di’ɛtɛmwɛlɔ wa kashi wa l’andja. Akitami wakatshikala lo lɔhɔmbɔ polo lo “etena k’ekomelo ka dikongɛ di’akambo” kakatatɛ l’ɔnɔnyi wa 1914. (Mat. 13:​39, 40) Yema tshitshɛ oma laasɔ, lo 1919, vɔ wakayotshungɔka ndo wakatatɛ ngamula aha la ntshimbatshimba, osase wa lo nyuma lo ndjasha l’olimu w’esambishelo.b L’edja k’ɛnɔnyi, anto w’oma lo wedja tshɛ wakaye l’osase ɔsɔ, mbidja ndo atshikadi wa l’Isariyɛlɛ wa Nzambi, mbuta ate “nkumi ya dikanga” yɔtɛkɛtami lo Isaya 60:3.—Ɛny. 5:​9, 10.

Lo nshi yayaye, Akristo w’akitami wayongamula osase wa Nzambi lo yoho yoleki woke. Lo woho akɔna? Etena kayowoshidiya lowango lawɔ la lanɛ la nkɛtɛ, vɔ wayokoma etenyi ka “Jɛrusalɛma y’Oyoyo,” kana wadi Kristo lokengami la nkumi ya dikanga ndo ɛlɔmbɛdi 144000.—Ɛny. 14:1; 21:​1, 2, 24; 22:​3-5.

Jɛrusalɛma y’Oyoyo yayonga l’ɔkɛndɛ w’ohomba efula l’okotshamelo wa prɔfɛsiya ya lo Isaya 60:1. (Ɛdika Isaya 60:​1, 3, 5, 11, 19, 20 la Ɛnyɛlɔ 21:​2, 9-11, 22-26.) Paka oko waki Jɛrusalɛma ya la nkɛtɛ dihole diakadjasɛka nkumi ya dikanga ya l’Isariyɛlɛ w’edjedja, mbele ndo Jɛrusalɛma y’Oyoyo ndo Kristo, ayonga lowandji layokenga dikongɛ di’akambo di’oyoyo. Lo woho akɔna ‘wayaholɔ Jɛrusalɛma y’Oyoyo oma l’olongo, oma le Nzambi’? Ele lo nsala akambo wele la shɛngiya la nkɛtɛ. Anto woka Nzambi wɔma, woye oma lo wedja tshɛ “wayɔkɛndakɛndaka l’ekimanyielo k’osase.” Vɔ wayotshungɔ oma lo pɛkato la nyɔi. (Ɛny. 21:​3, 4, 24) Etombelo wayonga ele ‘ɔlɔngɔswamelo w’akambo tshɛ,’ oko wakatatshi Isaya l’amvutshi akina. (Ets. 3:21) Ɔlɔngɔswɛlɔ wa woke ɔsɔ wakatatɛ etena kakakome Kristo Nkumekanga ndo wayokomɛ l’ekomelo k’Ɛlɔmbwɛlɔ kande k’Ɛnɔnyi Kinunu.