Etawɔ dia Ɔtɛkɛta wa Nzambi ngamula mboka kayɛ
“Diui diaye dieko . . . usasi lu mbuka kami.”—OSAMBU 119:105.
1, 2. Lo sala awui akɔna wakoka ɔtɛkɛta wa Jehowa ngamula mboka kaso?
ƆTƐKƐTA wa Jehowa wayongamula mboka kaso naka sho mbetawɔ dia dikambo sɔ salema. Dia sho kondja wahɔ oma lo osase wa ngasɔ wa lo nyuma, sho pombaka monga ambeki wa etete wa Ɔtɛkɛta wa Nzambi wakafundama ndo kitanyiya alako wa lɔkɔ. Paka lo sala dikambo sɔ mbakokaso monga la tokanyi tele oko t’omembi w’osambo lakate ate: “Diui diaye dieko tala l’ekulu ami, ndu usasi lu mbuka kami.”—Osambu 119:105.
2 Nyɛsɔke tɔsɛdingole kakianɛ Osambu 119:89-176. Awui w’ohomba efula tanemaka lo avɛsa asɔ wokongɛmi lo strɔfɛ 11. Vɔ kokaka tokimanyiya dia sho tshikala lo mboka k’otsha lo lɔsɛnɔ la pondjo.—Mateu 7:13, 14.
Lande na kahombaso nanga Ɔtɛkɛta wa Nzambi efula?
3. Ngande wɛnya Osambu 119:89, 90 dia sho kokaka ndjaɛkɛ lo ɔtɛkɛta wa Nzambi?
3 Nanga ɔtɛkɛta wa Jehowa efula kimanyiyaka onto dia monga nge lo nyuma. (Osambu 119:89-96) Omembi w’osambo akembe ate: “[Jehowa] li, pundju, pundju, diui diaye diatutshikalaka l’ulungu, . . . we kakatungi kete, ku yo yatushikikalaka pundju.” (Osambu 119:89, 90) Oma lo ɔtɛkɛta wa Nzambi, mbuta ate “adjangu wa l’ulungu” ngɔndɔ, wonya la tɔɔtɔ kɛndakɛndaka lo etshimbedi awɔ aha la dindja ndo nkɛtɛ kamboshikikɛmaka pondjo pondjo. (Jobo 38:31-33; Osambu 104:5) Sho kokaka ndjaɛkɛ lo ɔtɛkɛta tshɛ watomba oma l’onyɔ wa Jehowa nɛ dia kɛnɛ kata Nzambi ‘kayosalema’ dia kotsha sangwelo diande.—Isaya 55:8-11.
4. Ngande wakimanyiya ngandji k’efula ka ɔtɛkɛta wa Nzambi ekambi ande wasowa?
4 Omembi w’osambo ‘otovɔ lo asui ande otondoyala nde konangaka ɛlɛmbɛ wa Nzambi efula.’ (Osambu 119:92) Nde kosoyamaka oma le angɛndangɛnda; koko oma le ase Isariyɛlɛ wakohetshaka wakadiakaka ɛlɛmbɛ. (Akambu w’asi Lewi 19:17) Koko kɛsɔ kombɔlɛndja nɛ dia nde akalangaka ɔtɛkɛta wa Nzambi wakôsukɛka. La Kɔrɛtɔ, ɔpɔstɔlɔ Paulo aki “lu akambu a wulu le anyasu akanga a kashi” wakayangaka mbomamatanyiyɛ akambo. (2 Koreto 11:5, 12-14, 26) Koko, Paulo akatshikala nge lo nyuma nɛ dia nde akangɛnangɛnaka ɔtɛkɛta wa Nzambi efula. Lam’ele sho nangaka Ɔtɛkɛta wa Jehowa wakafundama efula ndo kitanyiyaka kɛnɛ katawɔ, sho mbokaka anangɛso ngandji. (1 Joani 3:15) Kânga lohetsho lele la ase andja oya le so hatohiya ndoko wetshelo ɔtɔi waki Nzambi. Sho tetemalaka sala lolango lande lo kâmɛ ka la ngandji kele lama wasaso la anangɛso etena kakongɛso dia kambɛ Jehowa la ɔngɛnɔngɛnɔ pondjo pondjo.—Osambu 119:93.
5. Ngande wakayange nkumekanga Asa Jehowa?
5 Dia mɛnya ndjakimɔ kaso le Jehowa, sho pombaka nɔmba ɔnɛ: “Laye kemi; unshimbeli, ne dia dimi latuyelaka adjangu aye.” (Osambu 119:94) Nkumekanga Asa akayangaka Nzambi ndo akanya apɔstazi oma la Juda. Lo losanganya la woke la lo ɔnɔnyi wa 15 wa diolelo dia Asa (963 N.T.D.), ase Juda “wakadji sheki dia nyanga [Jehowa].” Nzambi ‘aketawɔ dia vɔ mbotana’ ndo “akawasha[ka] mumuya lu beke tshe.” (2 Ekondo 15:10-15) Ɛnyɛlɔ kɛsɔ pombaka tshutshuya wanɛ wakamɔ oma lo etshumanelo ka Akristo dia vɔ nyomoyanga Nzambi. Nde ayɔtshɔkɔla ndo ayokokɛ wanɛ wambotatɛ nto sangana la ekambi ande.
6. Awui akɔna wayotokokɛ oma lo wâle wa lo nyuma?
6 Ɔtɛkɛta wa Jehowa toshaka lomba lakoka tokokɛ oma lo wâle wa lo nyuma. (Osambu 119:97-104) Wadjango wa Jehowa toshaka lomba efula oleki atunyi aso. Mbidja yimba lo waohwelo ande toshaka shɛnɔdi, ndo ‘kitanyiya wadjango ande tokimanyiyaka dia nyomoleka mana akambo fundo oleki esombe.’ (Osambu 119:98-100) Naka awui wa Jehowa wekɔ ‘mpɛ lo enyɔ aso oleki osanga a ndjwe,’ kete tayohetsha ndo tayotona “mbuka tshe ya kolo.” (Osambu 119:103, 104) Dikambo sɔ diayotokokɛ oma lo wâle wa lo nyuma lam’ahomanaso la akanga w’etako, wa todjawudi ndo anto wa kɔlɔ wa lo nshi nyɛ y’ekomelo.—2 Timote 3:1-5.
Tala lo ekolo aso
7, 8. Dia kitanyiya kɛnɛ kofundami lo Osambu 119:105, kakɔna kahombaso sala?
7 Ɔtɛkɛta wa Nzambi wekɔ kiɔkɔ y’oshika ya osase wa lo nyuma. (Osambu 119:105-112) Oyadi tekɔ Akristo w’akitami w’esɔ kana anangɛwɔ wa lo olui wa “ekoko ekina,” sho mbutaka shate: “Diui diaye dieko tala l’ekulu [aso], ndu usasi lu mbuka [yaso].” (Joani 10:16; Osambu 119:105) Ɔtɛkɛta wa Nzambi wekɔ oko tala diangamula mboka yaso, diaha sho takana kana kɔ lo nyuma. (Tukedi 6:23) Sho pombaka mbetawɔ dia ɔtɛkɛta wa Jehowa monga osase lo ekolo wa ɔmɔmɔ la l’atei aso.
8 Sho pombaka tshikala nge oko ofundji w’Osambu 119. Nde akayashikikɛ diaha takɔ wadjango wa Nzambi. Nde akate ate: “Dimi lakatshibi, ndu layushikike etshibelu kami nti: Layulamaka [wadjango wa Jehowa wa losembwe].” (Osambu 119:106) Tatɔnyɔlake pondjo ohomba wa wekelo wa Bible wa mbala la mbala ndo wɔtwɛlɔ wa lo nsanganya ya Akristo.
9, 10. Ngande weyaso dia anto wamboyakimɔka le Jehowa kokaka ‘takɔ oma lo wadjango ande,’ ko ngande wakokaso tona dikambo sɔ?
9 Omembi w’osambo ‘kotakɔ wadjango wa Nzambi,’ koko dikambo sɔ kokaka komɛ onto lamboyakimɔka le Jehowa. (Osambu 119:110) Nkumekanga Sɔlɔmɔna akatakɔ mboka kânga mbakinde onto ɔmɔtshi la lo wodja wakayakimɔ le Jehowa ndo kânga mbele nde akasalaka akambo lo woho wɔtɔnganɛ la lomba lakawosha Nzambi l’etatelo ka lowandji lande. ‘Kânga nde, wamato w’ase wedja wakôkonya lo sala pɛkato’ lo mbɔsɛngiya dia tɛmɔla tozambizambi ta nkashi.—Nehemiya 13:26; 1 Khumi ya Dikanga 11:1-6.
10 “Umambi,” mbuta ate Satana, mambaka tolonga efula. (Osambu 91:3) Ɛnyɛlɔ, onto ɔmɔtshi lakatɛmɔlaka Nzambi ntondo mbeyaka pemba dia totshutshuya dia sho takɔ mboka k’osase wa lo nyuma ko mbɔtɔ lo wodjima wa apɔstazi. L’atei wa Akristo wa la Tuyatira mbaki ndo “umuntu uku Jezebele,” ondo olui wa wamato waketshaka akina dia vɔ tɛmɔla dikishi ndo sala loseka. Yeso kombetawɔka kɔlɔ ya ngasɔ, ndo sho hatohombe ndjietawɔ. (Enyelo 2:18-22; Jude 3, 4) Nyɛsɔ tɔlɔmbɛ Jehowa ekimanyielo kande diaha sho takɔ oma lo wadjango ande koko dia sho tshikala lo osase wa Nzambi.—Osambu 119:111, 112.
Ɔtɛkɛta wa Nzambi tosukɛka
11. Lo ndjela Osambu 119:119, ngande wɔsa Nzambi atshi wa kɔlɔ?
11 Naka hatotakwe oma lo ɛlɛmbɛ ande, kete Nzambi ayotosukɛ. (Osambu 119:113-120) Sho hatetawɔ “akanga wa dungi pendi,” oko wahetawɔ Yeso wanɛ wayata ɔnɛ Akristo mbewɔ koko wekɔ djungudungu. (Osambu 119:113; Enyelo 3:16) Lam’ele tekɔ lo kambɛ Jehowa la otema aso tshɛ, nde ekɔ ‘eshamelo kaso’ ndo ayotosukɛ. Nde ‘atɔnyɔlaka wanɛ watonganelaka oma lo ɛlɛmbɛ ande’ ko kawola lo awui wa lokeso ndo wa kashi. (Osambu 119:114, 117, 118; Tukedi 3:32) Nde mbɔsaka anto wa kɔlɔ asɔ oko “lufulu” mbuta ate mindo yanyawɔ oma lo diangɔ di’ohomba diele oko mbɔkɔ ya akɛsɔ kana paunyi. (Osambu 119:119; Tukedi 17:3) Nyɛsɔ tolangake waohwelo wa Nzambi nshi tshɛ, nɛ dia hatolange mɛtɛ sangana kâmɛ la anto wa kɔlɔ lo lufulu la elanyelo!
12. Lande na kele wɔma wa Jehowa ohomba?
12 Omembi w’osambo akate ate: “Dimba diami diatudidimaka, ne dia woma aye.” (Osambu 119:120) Wɔma wa la dilɛmiɛlɔ wokaso Nzambi, wɛnama oma lo woho watonaso kɛnɛ kahandetawɔ, ekɔ ohomba naka sho nangaka nde tosukɛka oko weso ekambi ande. Wɔma wɔsɔhanyemi la dilɛmiɛlɔ wa Jehowa akatshutshuya Jɔbɔ dia nsɛna la losembwe. (Jobo 1:1; 23:15) Wɔma wa Nzambi kokaka tokimanyiya dia tetemala monga la yoho ya lɔsɛnɔ yetawɔma le Nzambi oyadi kɛnɛ tshɛ kahombaso mbikikɛ. Koko, dia monga la ekikelo paka tetemala nɔmba la mbetawɔ.—Jakoba 5:15.
Tɔlɔmbɛ la mbetawɔ
13-15. a) Lande na kakokaso monga la mbetawɔ ɔnɛ alɔmbɛlɔ aso wayokadimwama? b) Kakɔna kakoka tomba naka hatoyeya kɛnɛ ka mbuta lo dɔmbɛlɔ? c) Ɛnya woho wakoka Osambu 119:121-128 mbɔtɔnɛ la ‘akumu’ wakumaso lo dɔmbɛlɔ.
13 Sho kokaka nɔmba la mbetawɔ ɔnɛ Nzambi ayosala akambo lo ɔlɔlɔ aso. (Osambu 119:121-128) Oko omembi w’osambo, tekɔ la eshikikelo dia alɔmbɛlɔ aso wayokadimɔma. Lande na? Nɛ dia sho nangaka wadjango wa Nzambi “ndeka paunyi, ee, uleki paunyi ka lutshula.” Ndo nto, ‘sho mbɔsaka dia tɛdikɔ tshɛ taki Nzambi tendana la akambo tshɛ tekɔ osembɔki.’—Osambu 119:127, 128.
14 Jehowa mbokaka alɔmbɛlɔ aso nɛ dia sho mbɔlɔmbaka la mbetawɔ ndo nto nɛ dia sho kitanyiyaka tɛdikɔ tande la ɔlɔlɔ tshɛ. (Osambu 65:2) Ko ayotosala naka tena dimɔtshi taya la ekakatanu wa wolo efula ko hatoyeya ndo kɛnɛ ka mbuta lo dɔmbɛlɔ? Lo etena kɛsɔ “nyuma [tɔamɛ] atutoteketelaka la emumu waheyama mvuta.” (Romo 8:26, 27) Lo tena dia ngasɔ, Nzambi mbetawɔka ɛtɛkɛta watanema lo Ɔtɛkɛta ande oko alɔmbɛlɔ wɛnya ehomba aso.
15 Afundelo wekɔ la alɔmbɛlɔ efula ndo tokanyi takokaka mbɔtɔnɛ la ‘akumu’ aso. Ɛnyɛlɔ, tɔsɛdingole Osambu 119:121-128. Yoho yɔtɛkɛtami akambo lânɛ mbeyaka mbɔtɔnɛ la ekakatanu wele laso. Ɛnyɛlɔ, naka tekɔ lo mboka wɔma dia kesama, kete sho kokaka nɔmba ekimanyielo ka Nzambi lo yoho yakasale omembi w’osambo. (Osambu 119 Divɛsa 121-123) Tɔshi dia tekɔ lo nanga mbɔsa yɛdikɔ ya wolo efula. Lâsɔ, sho mbeyaka nɔmba dia nyuma ka Jehowa tokimanyiya dia sho mbohɔ ndo kamba la waohwelo ande. (Osambu 119 Divɛsa 124, 125) Kânga ‘mbahetshaso mboka tshɛ ka kɔlɔ’ sho mbeyaka monga la ohomba wa nɔmba Nzambi dia nde tokimanyiya diaha sho kɔ etena kahembamaso dia mɔnyɔla ɛlɛmbɛ ande. (Osambu 119 Divɛsa 126-128) Naka sho mbadiaka Bible lushi la lushi, kete woho wa avɛsa wa ngasɔ washa ekimanyielo mbeyaka toyɛ lo wɔɔngɔ etena kasɛngasɛngaso Jehowa.
Waohwelo wa Jehowa tokimanyiyaka
16, 17. a) Lande na keso la ohomba wa waohwelo wa Nzambi, ndo ngande wahombaso mbaɔsa? b) Ngande wakoka akina tɔsa, ko kakɔna kele ohomba mɛtɛ?
16 Dia Nzambi mboka alɔmbɛlɔ aso ndo dia nde tetawɔ, sho pombaka kitanyiya waohwelo wa Nzambi. (Osambu 119:129-136) Lam’ele tekɔ anto wohɛ akambo, tekɔ la ohomba wa waohwelo wa Jehowa wa diambo watohola wetshelo ndo wadjango ande. Lo mɛtɛ, sho ngɛnangɛnaka osase wa lo nyuma wakondjaso oma lo eokelo tshɛ k’oyoyo ka ɔtɛkɛta wa Nzambi. (Osambu 119:129, 130) Tekɔ nto la lowando nɛ dia Jehowa ‘ekɔ lo tɔhɛtshɛ elundji kande’ lo wahɔ aso, kânga mbele ‘asɔi watɔkɛlaka oma lo washo aso’ nɛ dia akina wekɔ lo mɔnyɔla ɛlɛmbɛ ande.—Osambu 119:135, 136; Walelu 6:25.
17 Tekɔ la eshikikelo dia tayetawɔmaka le Nzambi naka tayɔlɛmiyaka waohwelo ande wa losembwe. (Osambu 119:137-144) Oko weso ekambi wa Jehowa, sho mbetawɔka dia ekɔ ɔlɔlɔ nde kotola yambalo yaso lo waohwelo ande wa losembwe ndo mbakitsha la ntondo kaso oko wadjango wahombaso kitanyiya. (Osambu 119:138) Lam’ele omembi w’osambo akakitanyiyaka wadjango wa Nzambi, lande na kakandate ate: “Untu k’untu kemi, ndu omonywami”? (Osambu 119:141) Mɛnamaka dia nde akatɛkɛtaka dia woho wakawɔsaka atunyi ande. Naka sho nama losembwe laso tshɛ lo tshɛ, kete anto akina mbeyaka tɔ̂nyɔla. Koko, kɛnɛ kele mɛtɛ ohomba ele Jehowa ekɔ lo tenda la sso di’ɔlɔlɔ nɛ dia tekɔ lo sɛna lo yoho yɔtɔnɛ la waohwelo ande wa losembwe.
Ekokelo ndo wɔladi
18, 19. Ɛlɔlɔ akɔna wakondjaso oma lo woho wakitanyiyaso waohwelo wa Nzambi?
18 Kitanyiya waohwelo wa Nzambi tosukanyaka la nde. (Osambu 119:145-152) Lam’ele sho mbidjaka yimba lo waohwelo wa Jehowa, sho mbeyaka dia sho kokaka mbɔlɔmba la etema aso tshɛ ndo nongamɛ dia nde tohokamɛ. Sho kokaka memɔ la “kesekese” ndo mbɔlɔmba ekimanyielo. Ande etena k’ɔlɔlɔ ka nɔmba lee! (Osambu 119:145-147) Nzambi ekɔ nto suke la so nɛ dia sho tonaka lɔkɛwɔ la kɔlɔ ndo mbɔsaka ɔtɛkɛta ande oko mɛtɛ, oko wakasale Yeso. (Osambu 119:150, 151; Joani 17:17) Diɔtɔnganelo diasaso la Jehowa tosukɛka lo andja ɔnɛ wa ofukutanu ndo diɔ diayotosukɛ lo ta diande dia woke dia Aramangɛdɔna.—Enyelo 7:9, 14; 16:13-16.
19 Sho mongaka la ekokelo ka mɛtɛ nɛ dia sho nɛmiyaka ɔtɛkɛta wa Nzambi efula. (Osambu 119:153-160) Otshikitanyi la anto wa kɔlɔ, sho ‘hatotɛtɔlaka oma lo waohwelo wa Jehowa.’ Sho nangaka wadjango wa Nzambi ndo ngandji kande ka lɔsɛngɔ tokokɛka. (Osambu 119:157-159) Waohwelo wa Jehowa keketshaka timba taso dia sho mbohɔka kɛnɛ katɔlɔmbande lo akambo amɔtshi wa shikaa. Lo wedi okina, wadjango wa Nzambi wekɔ ɛlɔmbwɛlɔ, ndo sho mbohɔka esadi eto lotshungɔ lele la Otungi aso dia tɔlɔmbɔla. Lam’ele sho mbeyaka dia ‘otondo wa ɔtɛkɛta wa Nzambi wekɔ mɛtɛ’ ndo ɔnɛ hatokoke nɔmbɔla ekolo aso shoamɛ, sho mbetawɔka ɛlɔmbwɛlɔ ka Nzambi la ɔngɛnɔngɛnɔ.—Osambu 119:160; Jeremiya 10:23.
20. Lande na keso la “ki ka mamba”?
20 Ngandji kokaso ɛlɛmbɛ wa Jehowa, telaka wɔladi w’efula. (Osambu 119:161-168) Ɛhɛnyɔhɛnyɔ hawokoke toshishɛ “ki ka [Nzambi]” kaheyama mbɛdika. (Filipi 4:6, 7) Sho mbɔsaka dombwelo diaki Jehowa dia losembwe la nɛmɔ efula, diakɔ diôtombolaso mbala ko mbala l’ɔtɛ adiɔ, mbuta ate “tena esambeli lu lushi.” (Osambu 119:161-164) Omembi w’osambo akate ate: “Ki ka mamba katuyalaka le wane watulangaka elembe aye. Nduku lukulu l’engeno latuyalaka le wo.” (Osambu 119:165) Naka onto l’onto nanga ndo nama ɛlɛmbɛ wa Jehowa, kete hatototakana lo nyuma oma lo kɛnɛ kosadi onto okina kana l’ɔtɛ wa dikambo dimɔtshi.
21. Bɛnyɛlɔ diakɔna dia lo Afundelo diɛnya dia hatohombe takana naka ekakatanu wambotomba lo etshumanelo?
21 Anto efula wɔtɛkɛtshiwɔ dikambo diawɔ lo Bible kotshikɛ ndoko dui ɔtɔi dihole dia monga otakanya wa pondjo le wɔ. Ɛnyɛlɔ, Ngayo Okristo wa pami kôtakana koko ‘akakɛndakɛnda lo mɛtɛ’ kânga mbaki Diɔtɛrɛfɛ la dionga dia kɔlɔ. (3 Joani 1-3, 9, 10) Paulo akakeketsha wamato wa Akristo Ewadiya nde la Sutukɛ ‘dia vɔ ndjala la yimba yâmɛ le Nkumadiɔndjɔ,’ ondo nɛ dia ekakatanu wakatombe lam’asawɔ. Mɛnamaka di’oko vɔ wakakimanyiyama dia kandola okakatanu awɔ ndo vɔ wakatetemala kambɛ Jehowa la kɔlamelo. (Filipi 4:2, 3) Diakɔ diele hatohombe takana naka ekakatanu ɛmɔtshi wambotomba lo etshumanelo. Nyɛsɔ toyasha dia ndjela wadjango wa Jehowa, tohɔ dia ‘mboka yaso tshɛ yekɔ la ntondo kande.’ (Osambu 119:168; Tukedi 15:3) Lâsɔ ndoko ɛngɔ kayotanganya lo pondjo la “ki ka mamba.”
22. a) Naka sho kitanyiya Nzambi, diɛsɛ diakɔna diakokaso monga ladiɔ? b) Ngande wahombaso mbɔsa anto amɔtshi wakatombe oma lo etshumanelo ka Akristo?
22 Naka sho kitanyiyaka Jehowa nshi tshɛ, kete tayonga la diɛsɛ dia mbotombolaka. (Osambu 119:169-176) Hatonge tsho la ekokelo ka lo nyuma lo sɛna lo yoho yɔtɔnɛ la ɛlɛmbɛ wa Nzambi, koko ‘ɛlɔmɔ aso tetemalaka tombola Jehowa.’ (Osambu 119:169-171, 174) Ɔsɔ kele diɛsɛ dioleki woke diakokaso monga adiɔ lo nshi nyɛ ya ekomelo. Omembi w’osambo akalangaka tetemala nsɛna ndo tombolaka Jehowa, koko lo toho tɔmɔtshi tele Bible hakɔndɔla nde ‘akanganɛ oko ɔkɔkɔ wakashishɔ.’ (Osambu 119:175, 176) Mbeyaka monga ko anto amɔtshi wakatombe oma lo etshumanelo ka Akristo wâkalange Nzambi ndo wâkalange mbotombola. Nyɛsɔ tosale kɛnɛ tshɛ kakokaso sala dia mbakimanyiya dia vɔ kondja ekokelo ka lo nyuma ndo monga la ɔngɛnɔngɛnɔ waya oma lo tombolaka Jehowa kâmɛ la ekambi ande.—Heberu 13:15; 1 Petero 5:6, 7.
Osase wa pondjo lo mboka kaso
23, 24. Ɛlɔlɔ akɔna wamboyokondja oma lo Osambu 119?
23 Osambu 119 kokaka tokondjiyɛ wahɔ lo toho efula. Ɛnyɛlɔ, vɔ kokaka tokimanyiya dia sho nyomoleka ndjaɛkɛ le Nzambi, nɛ dia vɔ mɛnyaka dia ɔngɛnɔngɛnɔ wa mɛtɛ ndjaka oma lo ‘kɛndakɛnda lo ɛlɛmbɛ wa Jehowa.’ (Osambu 119:1) Omembi w’osambo toholaka dia ‘otondo wa ɔtɛkɛta wa Nzambi wekɔ mɛtɛ.’ (Osambu 119:160) Kɛsɔ mɛtɛ pombaka fudia lowando laso lo Ɔtɛkɛta w’otondo waki Nzambi wakafundama. Naka sho kana yimba lo Osambu 119, kete dikambo sɔ diayototshutshuya dia mbekaka Afundelo la etete. Omembi w’osambo akasɛngasɛngaka Nzambi mbala ko mbala ate: “Umbetshaki elembe aye!” (Osambu 119:12, 68, 135) Nde akɔsɛngasɛnga nto ate: ‘Ombetsha ɔlɔlɔ, ekanelo k’ɔlɔlɔ ndo ewo, nɛ dia dimi latongaka la mbetawɔ lo wadjango ayɛ.’ (Osambu 119:66) Sho pombaka nɔmba lo yoho yakɔ yâmɛ.
24 Wetshelo wa Nzambi tokimanyiyaka dia monga la diɔtɔnganelo dia ma ma la Jehowa. Omembi w’osambo akayaelɛka ndamɛ mbala la mbala ate okambi wa Nzambi. Omalɔkɔ, nde akalɔmbɛ Jehowa la ɛtɛkɛta wananda otema ate: “Laye kemi.” (Osambu 119:17, 65, 94, 122, 125; Romo 14:8) Ande diɛsɛ diele laso dia kambɛ ndo tombola Jehowa oko Ɔmɛnyi ande ɔmɔtshi lee! (Osambu 119:7) Onde wɛ ekɔ lo kambɛ Nzambi la ɔngɛnɔngɛnɔ oko osambisha wa Diolelo? Naka ɔsɔku, kete yashikikɛ dia Jehowa ayotetemala kosukɛ ndo kɔtshɔkɔla lo olimu ɔnɛ w’ohomba naka wɛ ndjaɛkɛka nshi tshɛ lo ɔtɛkɛta ande ndo mbetawɔ dia vɔ ngamula mboka kayɛ.
Ngande wayoyokadimola?
• Lande na kahombaso nanga ɔtɛkɛta wa Nzambi efula?
• Ngande watosukɛ ɔtɛkɛta wa Nzambi?
• Lo weho akɔna wakimanyiyamaso oma lo waohwelo wa Jehowa?
• Lande na kele ekambi wa Jehowa lo ekokelo ndo lo wɔladi?
[Osato wa lo lɛkɛ 9]
Ɔtɛkɛta wa Nzambi wekɔ kiɔkɔ ya osase wa lo nyuma
[Osato wa lo lɛkɛ 10]
Naka sho nanga waohwelo wa Jehowa, kete nde hatɔsaki pondjo oko “lufulu”
[Esato wa lo lɛkɛ 11]
Naka sho mbadiaka Bible lushi la lushi, kete sho kokaka mbohɔ avɛsa washa ekimanyielo etena kalɔmbaso