Tɔkɛndɛkɛndɛ la Nzambi, ko tayona kɛnɛ kele ɔlɔlɔ
“Vo wakune lopepe, wayuna punganendji.”—HOSEA 8:7.
1. Ngande wakokaso kɛndakɛnda la Jehowa?
LƆKƐNDƆ la lo ɛtshi ka nkɛtɛ ka wâle koka monga dimɛna, naka ɔnɔmbɔdi wa manamana mbatakɔlɔmbɔla. Ayonga dui dia lomba kɛndakɛnda kâmɛ la ɔnɔmbɔdi ɔsɔ lo dihole dia shoamɛ minda lɔkɛndɔ lɔsɔ. Lo toho tɔmɔtshi, kɛsɔ mɛnyaka dia sho lawɔ tekɔ lo tande lɔkɛndɔ lɔmɔtshi. Lo yoho ya didjidji, Jehowa ekɔ lo tɔlɔmbɔla l’oswe wa shɛnga wa woke efula, mbuta ate lo andja wa kɔlɔ wa nshi nyɛ. Ekɔ dui dia lomba sho kɛndakɛnda la nde lo dihole dia sho nyanga dia nɔmbɔla wanya aso hita. Ngande wakokaso kɛndakɛnda la Nzambi? Ele lo ndjela ɛlɔmbwɛlɔ kashande lo Ɔtɛkɛta ande.
2. Kakɔna kayotɔkɛtshanya lo sawo nɛ?
2 Sawo diakete diakalembetshiya kɛnyɔ ya didjidji yatanema lo Hosea tshapita 1 polo 5. Oko wakatadiɛnyi, kɛnyɔ shɔ yekɔ la wetshelo wakoka tokimanyiya dia kɛndakɛnda la Nzambi. Kakianɛ, nyɛsɔ tɔkɛtshanya akambo amɔtshi w’ohomba wele lo Hosea tshapita 6 polo 9. Ayonga dimɛna sho tatɛ sɛdingola totshapita tɔnɛi tɔsɔ lo tshena pe.
Ɔsɛdingwelo wa lo tshena pe
3. Kɔndɔla lo tshena pe awui watanema lo Hosea tshapita 6 polo 9.
3 Jehowa akatome Hɔsea dia tosambisha ntondotondo diolelo dia Isariyɛlɛ dia lo nɔrdɛ dia waoho dikumi. Wodja ɔsɔ wakeyamaka nto lo lokombo la Efarayima, dioho diawɔ diakaleke woke, wakoke Jehowa ɔkɔngɔ. Hoshea tshapita 6 polo 9 mɛnyaka di’anto komonga la kɔlamelo nɛ dia vɔ wakɔnyɔla sheke yakawadje la Jehowa ndo wakasalaka awui wa kɔlɔ. (Hosea 6:7) Vɔ wakayaɛkɛ lo toseke takawadje la andja ɔnɛ lo dihole dia kalolɛ Jehowa. Lam’ele vɔ wakatetemala monɛ kɛnɛ kele kɔlɔ, vɔ wakahombe ndjona kɛnɛ kele kɔlɔ, mbuta ate elanyelo kawɔ kaki suke! Koko prɔfɛsiya kaki Hɔsea kekɔ nto la losango lɔmɔtshi langɛnyangɛnya otema. Anto wakakondja eshikikelo dia vɔ wakakokaka mbokama kɛtshi oma le Jehowa naka vɔ mbokalolɛ ndo mɛnya ɔnɛ wamboyatshumoya l’otema ɔtɔi.
4. Wetshelo akɔna w’ohomba w’oma lo prɔfɛsiya ka Hɔsea wayotɔsɛdingola?
4 Oma lo totshapita tɔnɛi ta prɔfɛsiya ka Hɔsea tɔnɛ, sho koka kondja ɛlɔmbwɛlɔ kekina kayotokimanyia dia kɛndakɛnda la Nzambi. Nyɛsɔ tɔsɛdingole wetshelo ɛnɛi w’ohomba wele lo totshapita tɔsɔ: 1) Ndjatshumoya ka mɛtɛ mɛnyamaka oma lo etsha, koko aha lo ɛtɛkɛta eto; 2) elambo eto hawɔngɛnyangɛnya Nzambi; 3) Jehowa mongaka la lonyangu etena kawoka atɛmɔdi ande ɔkɔngɔ, ndo 4) dia mina kɛnɛ kele ɔlɔlɔ, sho pombaka monɛ kɛnɛ kele ɔlɔlɔ.
Woho wɛnya onto ndjatshumoya ka mɛtɛ
5. Ɛnya dui dioleki ohomba lo kɛnɛ kotami lo Hosea 6:1-3.
5 Prɔfɛsiya ka Hɔsea tetshaka akambo efula lo kɛnɛ kendana la ndjatshumoya ndo kɛtshi. Lo Hosea 6:1-3, sho mbadiaka ɔnɛ: “Nyeso tukaluli le [Jehowa]. Ne dia ndi kakatatshatsha, ndi ayutokonoya; ndi kakatuhumuya, ndi ayomba puta yasu. L’okongo a nshi hyendi, ndi ayutokonoya. Ndi ayutunyiya lushi la satu, ku shu tayuyala la lumu la ntundu kandi. Tulimbiteli [Jehowa], tutetemali nyanga mbulimbitela. Eyelu kandi keko shikaa uku ehutwelu ka unya. Ndi ayuya le su uku mvula, uku mvula y’adihelu yatutungaka elula lu kete.”
6-8. Kakɔna kaki kɔlɔ lo ndjatshumoya k’Isariyɛlɛ?
6 Akatɛkɛta awui wofundami lo avɛsa anɛ na? Nomb’ewo mɔtshi mbutaka dia ase Isariyɛlɛ waki komonga la kɔlamelo mbakatɛkɛta awui asɔ ndo vɔ mbutaka dia anto asɔ wakɛnyaka di’oko wekɔ lo ndjatshumoya ndo wakataka ɔnɛ Nzambi ayowaoka kɛtshi. Koko, nomb’ewo nkina mbutaka ɔnɛ ɔprɔfɛta Hɔsea mbakatɛkɛtaka awui asɔ dia sɛngasɛnga anto dia vɔ kalolɛ Jehowa. Oyadi ase Isariyɛlɛ kana Hɔsea mbakate awui asɔ, dimbola dioleki ohomba diɔ nɛ: Onde anto waki lo diolelo dia Isariyɛlɛ dia waoho dikumi lo tshɛ kawɔ wakakalolɛ Jehowa lo mɛnya ndjatshumoya ka mɛtɛ? Ndooko. Jehowa akate oma lo tshimbo ya Hɔsea ɔnɛ: “Kayumukutshela we Efarayima? Juda li, kayumukutshela na? Ololo anyu weli uku dingi dia pindju, uku lopopo latumoka esadi.” (Hosea 6:4) Kɛsɔ akɛnyaka mɛtɛ eongelo ka kɔlɔ ka lo nyuma kaki la ekambi waki Nzambi! Lɔsɛngɔ kana ngandji ka kɔlamelo komonga nto, oko watoshishɔka dinge dia pindju esadi eto kam’awalɛ yanyi. Kânga mbakɛnyaka anto asɔ dia wekɔ lo ndjatshumoya, Jehowa komonga ndoko la ɔkɔkɔ w’oshika wa mbaoka kɛtshi. Kɔlɔ kakɔna kakawasale na?
7 Ndjatshumoya ka Isariyɛlɛ kondja oma k’ɛse otema. Hosea 7:14 mbutaka lo kɛnɛ kendana la woho wakatone Jehowa ekambi ande ɔnɛ: “Vo hawutundelelaka l’utema otoi, keli watukiyanaka lu mbetu yawo.” Hosea 7 Divɛsa 16 kotshaka ɔnɛ: ‘Ndo vɔ wakakalola aha oya le ɛngɔ kɛmɔtshi ka lâdiko,’ mbuta ate “aha oya lo yoho y’ɔtɛmwɛlɔ ya lâdiko.” (Nɔtɛ ka l’ɛse ka dikatshi, NW) Anto kombetawɔ dia kalola lo ɔtɛmwɛlɔ waki Jehowa wa lotombo, mbuta ate sala etshikitanu wakahombamaka dia vɔ nɔngɔsɔla diɔtɔnganelo diaki lam’asawɔ la Jehowa. Lo mɛtɛ, vɔ konanga kɛndakɛnda la Nzambi!
8 Ase Isariyɛlɛ wakasale kɔlɔ kekina lo kɛnɛ kendana la ndjatshumoya kawɔ. Wodja ɔsɔ wakatetemala sala pɛkato, mbuta ate pɛkato ya weho la weho, yele oko lokeso, odiakanelo, wovi, ɔtɛmwɛlɔ wa dikishi, ndo wodjelo wa toseke ta kɔlɔ la wedja ekina. Lo Hosea 7:4, vɔ mbɛdikaka anto la “tshuka,” kana kuka ka dja, ondo l’ɔtɛ wa nsaki ya kɔlɔ yakahɛtahɛtaka l’etema awɔ. Lo menda eongelo ka lo nyuma ka kɔlɔ ka ngasɔ, onde vɔ wakakoke mbokama kɛtshi? Ndoko yema! Hɔsea akatɛ atɔmbɔki asɔ dia Jehowa “ayuho uhedia awo” ndo ɔnɛ nde “ayâsuya ne dia kolo yawo.” (Hosea 9:9) Takawahombe mbokama kɛtshi!
9. Kakɔna katetsha ɛtɛkɛta wa Hɔsea lo kɛnɛ kendana la ndjatshumoya ndo la kɛtshi?
9 Oko wambotadia ɛtɛkɛta wa Hɔsea kakɔna kamboteka lo kɛnɛ kendana la ndjatshumoya ndo la kɛtshi? Ɛnyɛlɔ kasha ɔhɛmwɛlɔ k’ase Isariyɛlɛ waki komonga la kɔlamelo tetshaka ɔnɛ, dia mbokama kɛtshi oma le Jehowa, sho pombaka ndjatshumoya oma k’ɛse otema. Ngande wɛnya onto ndjatshumoya ka ngasɔ na? Jehowa hakesama oma lo ɛtɛkɛta kana asɔyi w’anyanya. Ndjatshumoya ka mɛtɛ mɛnamaka oma l’etsha. Dia mbokama kɛtshi, otshi wa pɛkato pombaka tshika lɔkɛwɔ lande la kɔlɔ ko nsɛna lo yoho yɔtɔnɛ la ɛlɛmbɛ wa lâdiko wendana l’ɔtɛmwɛlɔ waki Jehowa wambodiyama.
Elambo eto hawɔngɛnyangɛnya Jehowa
10, 11. Oko wɛnyamidiɔ lo dikambo dia Isariyɛlɛ, lande na kele elambo eto hawɔngɛnyangɛnya Jehowa?
10 Tɔsɛdingole kakianɛ wetshelo wa hende wakoka tokimanyiya dia kɛndakɛnda la Jehowa. Wetshelo akɔ ko elambo eto hawɔngɛnyangɛnya Nzambi. Hosea 6:6 mbutaka ɔnɛ: “[Lɔsɛngɔ] mbalangami [dimi Jehowa], aha elambu, la ewu ka [Nzambi] ndeka elambu wa lutshumba.” Tolembete dia Jehowa ngɛnangɛnaka lɔsɛngɔ kana ngandji ka kɔlamelo, mbuta ate dionga dimɔtshi dia otema ndo ewo kendana la nde. Koko wɛ mbeyaka ndjambola ɔnɛ: ‘Lande na kata divɛsa sɔ ɔnɛ Jehowa hangɛnangɛna “elambu” ndo “elambu wa lutshumba” na? Kema elambo ɛsɔ wakalɔmbamaka lo Ɛlɛmbɛ wa Mɔsɛ?’
11 Ɛlɛmbɛ wakalɔmbaka elambo la weshasha, koko anto wakasɛnaka lo nshi ya Hɔsea waki la dionga dimɔtshi dia kɔlɔ efula. Mɛnamaka dia ase Isariyɛlɛ wakakimɔka elambo ɛsɔ l’oyango wa mɛnya tsho dia vɔ mamemaka Nzambi. Koko, l’etena kakɔ kâmɛ, vɔ wakasalaka pɛkato. Oma lo pɛkato yakawasalaka, vɔ wakɛnya dia etema awɔ komonga la ngandji ka kɔlamelo. Vɔ wakɛnya nto dia vɔ wakatone ewo ka Nzambi, nɛ dia vɔ kɔsɛnaka lo yoho yɔtɔnɛ la ewo kakɔ. Naka anto komonga la eongelo k’ɔlɔlɔ k’otema ndo la yoho ya lɔsɛnɔ ya dimɛna, onde elambo awɔ waki mɛtɛ ohomba? Elambo awɔ kɔngɛnyangɛnyaka Jehowa Nzambi.
12. Hosea 6:6 ekɔ la ɔhɛmwɛlɔ akɔna le anto wasɛna ɛlɔ kɛnɛ?
12 Ɛtɛkɛta waki Hɔsea wekɔ la ɔhɛmwɛlɔ ɔmɔtshi le anto efula watshɔ lo ɛtɛmwɛlɔ ɛlɔ kɛnɛ. Vɔ mbishaka Nzambi weshasha lo ndjakimɔ lo sala elimu wendana la ɔtɛmwɛlɔ. Koko, ɔtɛmwɛlɔ awɔ wekɔ paka la yema ya shɛngiya tshitshɛ kana bu kânga la shɛngiya lo lɔkɛwɔ lawɔ la lushi la lushi. Onde anto asɔ wekɔ mɛtɛ lo ngɛnyangɛnya Nzambi, naka etema awɔ hâtshutshuya dia kondja ewo k’oshika kaki Nzambi ndo kamba la tɔ lo mbewɔ ditshelo dia kɔlɔ? Onto atɔfɔnyake dia elimu wa l’ɔtɛmwɛlɔ eto ngɛnyangɛnyaka Nzambi. Jehowa hangɛnangɛna anto wayanga mbetawɔma le nde lo mbɔtɛmɔla paka l’ɛlɔmɔ lo dihole dia mbɔtɔnganyiya nsɛnɔ yawɔ l’Ɔtɛkɛta ande.—2 Timote 3:5.
13. Weho akɔna w’elambo walambolaso, ndo kakɔna kahombawɔ mbohɔka lo kɛnɛ kendana la nɛmɔ di’elambo ɛsɔ?
13 Oko weso Akristo wa mɛtɛ, sho mbohɔka dia elambo eto hawɔngɛnyangɛnya Nzambi. Ekɔ mɛtɛ dia nshi nyɛ hatoyolambola Nzambi elambo wa nyama. Koko, sho ‘nambolaka Nzambi olambo wa lotombo, mbuta ate elowa wa ɛlɔmɔ aso wewoya lokombo lande lo sɛkɛ.’ (Heberu 13:15) Ekɔ ohomba diaha sho koma oko ase Isariyɛlɛ w’atshi wa pɛkato wakasɛnaka lo nshi ya Hɔsea, lo fɔnya ɔnɛ tayokoka kondja edimanyelo ka pɛkato yasalaso lo nambolaka Nzambi elambo wa ngasɔ wa lo nyuma. Tɔ̂shi ɛnyɛlɔ ka osekaseka ɔmɔtshi wakasalaka awui wa mindo wa dieyanelo lo woshɛshɛ. Nde akayetawɔka l’ɔkɔngɔ diko ate: “Lakaleke ndjasha l’olimu w’esambishelo, lo fɔnya dia kɛsɔ ayokomba pɛkato kami lo yoho mɔtshi.” Kɛsɔ mbakasalaka ase Isariyɛlɛ wakatakɔ mboka. Koko dia elambo aso wa lotombo mbetawɔma le Jehowa, pombaka vɔ nambɔma la otema wa pudipudi ndo sho monga la lɔkɛwɔ la dimɛna.
Jehowa nyangaka etena kawoka atɛmɔdi ande ɔkɔngɔ
14. Prɔfɛsiya ka Hɔsea atɛnyatɔ lo kɛnɛ kendana la nsaki yaki Nzambi?
14 Wetshelo wa sato wakondjaso oma lo Hosea tshapita 6 polo 9 mendanaka la woho wayaoka Jehowa etena kawoka atɛmɔdi ande ɔkɔngɔ. Nzambi tɛtɛka solo ndo ekɔ la kɛtshi. Nde ngɛnangɛnaka ndo mbokaka wanɛ wayatshumoya oma lo kɔlɔ yawɔ kɛtshi. Koko, etena kahayatshumoya ekambi ande, nde mbɔsaka tɛdikɔ ta wolo efula. Lam’ele Nzambi ndjakiyanyaka efula di’ɔlɔlɔ aso, nde ngɛnangɛnaka etena kakɛndakɛndaso la kɔlamelo tshɛ kâmɛ la nde. Osambu 149:4 mbutaka ɔnɛ: “[Jehowa] atongenangenaka wudja andi.” Ko ngande wayaoka Jehowa etena kashisha ekambi ande kɔlamelo na?
15. Lo ndjela Hosea 6:7, awui akɔna wakasalaka ase Isariyɛlɛ amɔtshi?
15 Jehowa akate lo dikambo di’ase Isariyɛlɛ waki komonga la kɔlamelo ate: ‘Oko onto lakɔsama oma lo nkɛtɛ, vɔ wakalanya sheke yami. Etena kɛsɔ mbakawasalɛ awui la lokeso.’ (Hosea 6:7) Tshɛkɛta ya lo Hɛbɛru yakakadimɔma ɔnɛ ‘sala awui la lokeso’ nembetshiyaka nto ɔnɛ “monga la okadi, (sala akambo) aha la kɔlamelo.” Vɔ kamba la tshɛkɛta yâmɛ ya lo Hɛbɛru shɔ lo Malaki 2:10-16, dia tɛkɛta dikambo dia dionga diaha la kɔlamelo diaki l’ase Isariyɛlɛ otsha le elonganyi awɔ. Lo kɛnɛ kendana la woho wokambiwɔ la tshɛkɛta shɔ lo Hosea 6:7, dibuku dimɔtshi mbutaka dia yɔ yekɔ “tshɛkɛta ya didjidji yendana la diwala yɛnya waonga waki onto lo diɔtɔnganelo sɔ . . . Ɔsɔ ekɔ dikambo diendana la onto ndamɛ diele ngandji amboshishɔ.”
16, 17. a) Kakɔna kakasale Isariyɛlɛ lo kɛnɛ kendana la sheke yakadje Nzambi la wodja ɔsɔ? b) Kakɔna kahombaso mbohɔka lo kɛnɛ kendana la ditshelo diaso?
16 Jehowa akɔsaka Isariyɛlɛ oko wadɛnde la lo didjidji l’ɔtɛ wa sheke yakandadje la wodja ɔsɔ. Ɔnkɔnɛ, etena kakɔnyɔla ekambi ande sheke yakawadje, aki oko vɔ wakasale monanyi. Nzambi aki oko omi la kɔlamelo, koko ekambi ande wakɔsɛkɛ!
17 Kayotota lo dikambo diaso na? Nzambi todjaka yimba oyadi tekɔ lo kɛndakɛnda la nde kana bu. Sho pombaka mbohɔka dia ‘Nzambi ekɔ ngandji’ ndo ɔnɛ ditshelo diaso mongaka la shɛngiya le nde. (1 Joani 4:16) Naka sho monga la lɔkɛwɔ la kɔlɔ, kete tayosha Jehowa pâ l’asolo ndo tayowonyangiya. Mbohɔka dikambo sɔ mbeyaka monga ekokelo ka wolo kayotoshimba diaha sho nkɔ l’ohemba.
Woho wakokaso mina kɛnɛ kele ɔlɔlɔ
18, 19. Tɔndɔ diakɔna diatanaso lo Hosea 8:7, ndo ngande wakakotshama tɔndɔ sɔ le ase Isariyɛlɛ?
18 Tɔsɛdingole wetshelo wa nɛi w’oma lo prɔfɛsiya kaki Hɔsea, mbuta ate woho wakokaso mina kɛnɛ kele ɔlɔlɔ. Lo dikambo di’ase Isariyɛlɛ ndo di’akambo w’anyanya waha la kɔlamelo wakawasale, Hɔsea akafunde ate: “Vo wakune lopepe, wayuna punganendji.” (Hosea 8:7) Lanɛ sho tanaka tɔndɔ dimɔtshi diahatahombe mbohɛ, tɔndɔ diakɔ ko: Diɔtɔnganelo diele lam’asa kɛnɛ kasalaso ɛlɔ kɛnɛ la kɛnɛ kayoyotokomɛ l’ɔkɔngɔ. Ngande wakakotshama tɔndɔ sɔ le ase Isariyɛlɛ waki komonga la kɔlamelo na?
19 Lo ntsha pɛkato, ase Isariyɛlɛ asɔ wakonɛka kɛnɛ kaki kɔlɔ. Onde vɔ wakakoke tetemala sala akambo asɔ aha la mina etombelo wa kɔlɔ? Takawahombe pandɔ elombwelo. Hosea 8:13 mbutaka ɔnɛ: “Kakiane dimi, [Jehowa], lambuho dia kolo kawo. Dimi [Jehowa] layâsuya ne dia kolo yawo.” Ndo lo Hosea 9:17, sho mbadiaka ɔnɛ: “[Nzambi k]ami ayuwakadja ne dia vo kumbûkela. Vo wayuyala tekeko l’atei a wedja.” Jehowa akahombe mbikoya la ase Isariyɛlɛ l’ɔtɛ wa pɛkato yawɔ. Lam’ele vɔ wakonɛ kɛnɛ kaki kɔlɔ, vɔ wakahombe mina kɔlɔ. Elombwelo kaki Nzambi otsha le wɔ kakonge lo 740 N.T.D., etena kakalɛndja Asuriya diolelo di’Isariyɛlɛ dia waoho dikumi ndo tɔla anto wakadjasɛka lɔkɔ lo lɔhɔmbɔ.
20. Akambo wakakomɛ ase Isariyɛlɛ tetshaka dui diakɔna?
20 Kɛnɛ kakakomɛ ase Isariyɛlɛ asɔ tetshaka dui dimɔtshi dia mɛtɛ diɛnya ɔnɛ: Tayona kɛnɛ konɛso. Ɔtɛkɛta wa Nzambi tɔhɛmɔlaka ɔnɛ: “Tuyadimbiyaki, [Nzambi] hasokama; untu tshe ayuna diango diakandune.” (Ngalatiya 6:7) Ɔnkɔnɛ, naka sho monɛ kɛnɛ kele kɔlɔ, kete tayona kɛnɛ kele kɔlɔ. Ɛnyɛlɔ, wanɛ wayakimɔ lo awui wa mindo wayona etombelo wa kɔlɔ efula. Etombelo wa kɔlɔ wayokomɛ otshi wa kɔlɔ wahayatshumoya.
21. Ngande wakokaso mina kɛnɛ kele ɔlɔlɔ?
21 Ko lâsɔ ngande wakokaso mina kɛnɛ kele ɔlɔlɔ? Sho koka kadimola dimbola sɔ l’ekimanyielo k’ɛnyɛlɔ kɛmɔtshi ka wɔdu. Naka okambi wa dikambɔ nangaka mina eponga, onde nde ayohomba monɛ asami? Ndooko! Nde pombaka monɛ kɛnɛ kalangande ndjona. Woho akɔ wâmɛ mbele, naka talanga ndjona kɛnɛ kele ɔlɔlɔ, sho pombaka monɛ kɛnɛ kele ɔlɔlɔ. Onde wɛ nangaka tetemala la mina kɛnɛ kele ɔlɔlɔ, mbuta ate lɔsɛnɔ l’ɔngɛnɔngɛnɔ oma ko kakianɛ la elongamelo ka lɔsɛnɔ la pondjo lo andja w’oyoyo waki Nzambi? Naka ɔsɔku, kete wɛ pombaka tetemala monɛ kɛnɛ kele ɔlɔlɔ lo kɛndakɛnda la Nzambi ndo lo nsɛna lo yoho yɔtɔnɛ la ɛlɛmbɛ ande wa losembwe.
22. Wetshelo akɔna wambotokondja oma lo Hosea tshapita 6 polo 9?
22 Oma lo Hosea tshapita 6 polo 9, tambokondja wetshelo ɛnɛi wakoka tokimanyiya dia kɛndakɛnda la Nzambi: 1) Ndjatshumoya ka mɛtɛ mɛnamaka oma l’etsha; 2) elambo eto hawɔngɛnyangɛnya Nzambi; 3) Jehowa nyangaka etena kawoka atɛmɔdi ande ɔkɔngɔ; ndo 4) dia mina kɛnɛ kele ɔlɔlɔ, sho pombaka monɛ kɛnɛ kele ɔlɔlɔ. Ngande wakoka totshapita totanu t’ekomelo ta dibuku dia lo Bible nɛ tokimanyiya dia kɛndakɛnda la Nzambi na?
Ngande wayoyokadimola?
• Ngande wɛnama ndjatshumoya ka mɛtɛ?
• Lande na kele elambo eto hawɔngɛnyangɛnya Shɛso lele l’olongo?
• Ngande wayaoka Nzambi etena kɔsɛka ekambi ande?
• Kakɔna kahombaso monɛ naka sho nangaka mina kɛnɛ kele ɔlɔlɔ?
[Osato wa lo lɛkɛ 15]
Lande na kakatone Jehowa elambo wa wodja ande?
[Osato wa lo lɛkɛ 16]
Dia mina kɛnɛ kele ɔlɔlɔ, sho la dia monɛ kɛnɛ kele ɔlɔlɔ