Tokoya ɛnyɛlɔ k’amvutshi—Hɔsɛa
1. Dimbola diakɔna diele ondo wɛ amboyaokaka?
1 ‘Awui akɔna wakokami ndjahombia lo dikambo dia Jehowa?’ Ondo wɛ amboyaokaka dimbola sɔ etena kakayakanaka yimba lo ɔlɔlɔ ande waheyama mbɛdika ndo lo nkɛtshi kakokande. (Esam. 103:2-4; 116:12) Hɔsɛa akakitanyiya kɛnɛ kakawodjangɛ Jehowa la lolango lande, kaanga mbele dui sɔ diakɔlɔmbaka dia ndjahombia awui efula. Ngande wakokaso mbokoya Hɔsɛa?
2. Ngande wakokaso mbokoya ɛnyɛlɔ ka dimɛna ka etete kaki Hɔsɛa l’esambishelo?
2 Nde akasambishaka oyadi lo tena dia paa: Losango laki Hɔsɛa lakendanaka ntondotondo la waoho dikumi wa lo diolelo di’Isariyɛlɛ lɛnɛ aki ɔtɛmwɛlɔ wa mɛtɛ suke la nshishɔ. Nkumekanga Jɛrɔbɔama II akasalaka awui wa kɔlɔ efula lo washo wa Jehowa ndo akayokokanya ɔtɛmwɛlɔ wa yana ya ngɔmbɛ wakatatɛ oma le nkumekanga Jɛrɔbɔama I. (2 Khum. 14:23, 24) Nkumi ya dikanga yakahɔna oma laasɔ, yakatetemala ndanya lonyuma la waoho dikumi wa diolelo diakɔ polo l’elanyelo kadiɔ lo 740 N.T.D. Koko, kaanga mbakakokanɛ ɔtɛmwɛlɔ wa kashi, Hɔsɛa akatetemala nkamba olimu ande w’omvutshi la kɔlamelo tshɛ l’edja k’ɛnɔnyi 59. L’ɛnyɛlɔ kande, onde ndo sho tamboyashikikɛ dia sambishaka ɔnɔnyi l’ɔnɔnyi oyadi tambohomana la wendjudi kana l’ɔlɔshamelo?—2 Tim. 4:2.
3. Ngande wɛnya ɔkɔndɔ wa lɔsɛnɔ la Hɔsɛa kɛtshi ka Jehowa?
3 Nde akaleke mbidja yimba lo kɛtshi ka Jehowa: Jehowa akatɛ Hɔsɛa dia nde ntshuka “umuntu kanga luseka.” (Hos. 1:2) Kaanga mbakote Hɔsɛa nde la Ngɔmɛrɛ ka wadɛnde ɔna pami, mɛnamaka dia wadɛnde akayotaka ana ahende lo loseka. Woho wakadimanyiya Hɔsɛa wadɛnde la lolango lande mɛnyaka kɛtshi k’efula kakokaka Jehowa ase Isariyɛlɛ wakɔtɔmbɔkwɛ etena kakawayatshumoya. (Hos. 3:1; Rɔmɔ 9:22-26) Onde sho mbetawɔka dia ndjahombia awui amɔtshi wakokaso nsala l’oyango wa mbeyanya kɛtshi ka Jehowa le weho w’anto tshɛ?—1 Kɔr. 9:19-23.
4. Akambo akɔna wakokaso ndjahombia lo dikambo dia Jehowa?
4 Ekambi ɛmɔtshi wa Jehowa wakatshike elimu wafutamawɔ falanga efula l’oyango wa ndeka ndjasha l’olimu w’esambishelo. Akina tshikalaka enyemba kana hawote ana dia ntɔla wahɔ wa Diolelo otsha la ntondo. Lo nkana yimba la ɔkɔndɔ wa lɔsɛnɔ laki Hɔsɛa, ondo wɛ koka mbuta ɔnɛ ‘hakoke pondjo nsala kɛnɛ kakandasale.’ Koko, naka sho ntetemala mfudia lowando laso lo ɔlɔlɔ waheyama mbɛdika waki Jehowa ndo ndjaɛkɛ le nyuma kande k’ekila katokeketsha, kete nde koka nkamba la so lo toho tahatalongamɛ oko wakandakambe la Hɔsɛa.—Mat. 19:26; Flpɛ. 2:13.