Tatotshikɛke Diabolo dihole

“Tanyohomuyake Diabolo lokolo l’ɔlɔ.”​—EFESO 4:27, Byington.

1. Lande na kayambola anto efula dia kana mɛtɛ Diabolo ekɔ?

AYA ɛnɔnyi nkama wele anto efula mbɔsaka Diabolo oko etongami kɛmɔtshi kele la nseke ndo la sabɔ, kɔlɔtshi ahɔndɔ wa beela ndo kakamba la lɔsɔmɔ l’otale dia mbidjaka anto wa kɔlɔ lo dja y’ifɛrnɔ. Tokanyi tɔsɔ hatoye oma lo Bible. Koko, aha la tâmu, tɔ tambokonya miliyɔ y’anto dia ndjambola kana mɛtɛ Diabolo ekɔ kana dia fɔnya ɔnɛ tshɛkɛta shɔ mendanaka paka la kɔlɔ.

2. Awui akɔna watosholɛ Afundelo lo dikambo dia Diabolo?

² Bible mbishaka tolembetelo tɛnama la washo ndo ta shikaa tɛnya ɔnɛ Diabolo ekɔ. Yeso Kristo akawɛnyi lo andja wa lo nyuma l’olongo ndo akatɛkɛta la nde etena kakinde lanɛ la nkɛtɛ. (Jobo 1:6; Mateu 4:4-11) Kânga mbele Afundelo hawɛnya lokombo l’oma lo etatelo laki etongami ka lo nyuma kɛsɔ, vɔ mbêlɛka Diabolo (tshɛkɛta y’oma lo Grɛkɛ yalembetshiya ‘omamanyishi’) nɛ dia nde akamamatanyiya Nzambi akambo. Nde mbelamɛka nto ɔnɛ: Satana (kitshimudi ɔnɛ “Otunyi”), nɛ dia nde akalɔshana la Jehowa. Satana Diabolo mbelamɛka ɔnɛ “ului w’edjedja,” ondo nɛ dia nde akakambe la olui dia kesa Eva. (Enyelo 12:9; 1 Timote 2:14) Nde mbeyamaka nto oko ‘kanga kɔlɔ.’​—Mateu 6:13.a

3. Naa dimbola diayotɔsɛdingola?

³ Oko weso ekambi waki Jehowa, hatokombola fɔna kânga yema la Satana, otunyi wa wolo waki Nzambi ɔtɔi ka mɛtɛ. Ɔnkɔnɛ, sho pombaka ndjela dako diaki Paulo diata ɔnɛ: “Tanyohomuyake Diabolo lokolo l’ɔlɔ.” (Efeso 4:27, Byington) Ko naa totshelo tɔmɔtshi taki Satana tahatahombe mbokoya?

Tatokoyake omamanyishi wa woke

4. ‘Kanga kɔlɔ’ akamamatanyɛ Nzambi awui akɔna?

⁴ Diabolo kokaka mbelamɛ ɔnɛ ‘kanga kɔlɔ,’ nɛ dia nde ekɔ omamanyishi. Omamatanya ekɔ dui dia kashi, dui dia kɔlɔ ndo dia lokolonganya diatama lo lokombo l’onto ɔmɔtshi. Nzambi akadjangɛ Adama ate: “Tolekaki elua w’uma l’utamba wa ewu k’akambu w’ololo ndu k’akambu wa kolo, ne dia lushi layuyole, we ayuvo.” (Etatelu 2:17) Eva akeyaka didjango sɔ, koko lo tshimbo y’olui, Diabolo akawotɛ ate: “Yaa! Nyu hanyuvo mete. Paka ne dia [Nzambi] mbeyaka ati: Lushi layunyole, ashu anyu wayudiho, ku nyayuyala uku dimi [Nzambi], nyayeya akambu w’ololo ndu akambu wa kolo.” (Etatelu 3:4, 5) Ɔsɔ aki omamatanya wa kɔlɔ otsha le Jehowa Nzambi!

5. Lande na kele akakokaka mɛtɛ dia vɔ mbikoya la Diyɔtɛrɛfɛ l’ɔtɛ wa emamatanya ande?

⁵ Ase Isariyɛlɛ wakalongola didjango diata ɔnɛ: ‘Tetetake l’atei a wodja anyu dia mamatanyɛ anto akambo.’ (Akambu w’Asi Lewi 19:16) Ɔpɔstɔlɔ Joani akate lo dikambo dia omamanyishi ɔmɔtshi laki lo nshi yande ate: “Dimi lakafundela ekelizia akambu efula, keli Diyoterefe, latulangaka ndjala ladiku diawo, hetawo aui ami. Okone, naka dimi lambuya, layunyûhula akambu watundutshaka, ndu aui wa kolo watundoteketaka le mi.” (3 Joani 9, 10) Diyɔtɛrɛfɛ akamamatanyiya Joani akambo ndo akakokaka vɔ mbikoya la nde. Okristo akɔna wele la kɔlamelo wakombola monga oko Diyɔtɛrɛfɛ ndo mbokoya Satana, omamanyishi wa woke?

6, 7. Lande na kahombaso mbewɔ dia mamatanyiyɛ onto dikambo?

⁶ Mbala efula anto mamatanyɛka ekambi wa Jehowa awui efula ndo mbasɔngwɛka awui wa kashi. “Elombedi a waki la afundji wakemala, wakôsongwela [Yeso] wulu.” (Luka 23:10) Ɔlɔmbɛdi wa lâdiko Ananiya ndo anto akina wakasɔngwɛ Paulo awui wa kashi. (Etsha 24:1-8) Bible tɛkɛtaka dikambo dia Satana oko “osongwedi wa anyasu . . . , one latâsongwelaka la ntundu ka [Nzambi] ndu la yanyi ndu l’utshu.” (Enyelo 12:10) Anto wasɔngwɛwɔ asɔ ko, Akristo w’akitami wele lanɛ la nkɛtɛ lo nshi y’ekomelo nyɛ.

⁷ Ndoko Okristo wahomba mamatanyiyɛ onto okina kana mbɔsɔngwɛ awui wa kashi. Koko, dikambo sɔ mbeyaka salema naka tayɔsɔngwɛ onto awui aha la sho mbeya awui tshɛ woho wewɔ. Lo Ɛlɛmbɛ wa Mɔsɛ, ɔmɛnyi lakataka awui wa kashi akakokaka ndjakema. (Etumbelu 20:16; Euhwelu k’Elembe 19:15-19) Lâdiko dia lâsɔ, lo akambo wele wɔnɔnyi le Jehowa kele ndo “omenyi a kashi, latutaka akambu wa kashi.” (Tukedi 6:16-19) Ɔnkɔnɛ, lo mɛtɛ sho nangaka mbewɔ dia mbokoya omamanyishi ndo ɔsɔngwɛdi wa lokolokolo.

Tatɔkɛndakɛndake lo wanya wa ondjakanyi wa ntondo

8. Lo yoho yakɔna yakonge Diabolo ‘oma l’etatelo ondjakanyi’?

⁸ Diabolo ekɔ ondjakanyi. Yeso akate ate: “Uma l’etatelu ndi aki undjakanyi.” (Joani 8:44) Tshelo ya ntondo yaki Satana aki ya minganyiya Adama la Eva oma le Nzambi, ndo tshelo shɔ mbakokonya ondjakanyi. Nde akela nyɔi le atshukanyi wa ntondo ndo le tokanula tawɔ. (Romo 5:12) Tolembete dia paka onto mbakoka sala dikambo sɔ, koko aha kɔlɔ kɛmɔtshi.

9. Oko wɛnyamidiɔ lo 1 Joani 3:15, ngande wakokaso koma andjakanyi?

⁹ Ɔlɛmbɛ ɔmɔtshi l’atei w’Ɛlɛmbɛ Dikumi wakawasha ase Isariyɛlɛ mbutaka ɔnɛ: “Tudiakaki.” (Euhwelu k’Elembe 5:17) Ɔpɔstɔlɔ Petero akafundɛ Akristo ate: “Keli omotshi l’atei anyu tasuyamaki uku [ondjakanyi].” (1 Petero 4:15) Omalɔkɔ oko weso ekambi wa Jehowa, hatokombola dia ndjaka onto. Tayonga l’onongo la ntondo ka Nzambi naka sho mpetsha osekaso Okristo ndo mbokombolɛ nyɔi. Ɔpɔstɔlɔ Joani akafunde ate: “Untu tshe latuhetshaka unyandi, eko undjakanyi. Nyu mbeyaka nyati: Nduku undjakanyi leli la lumu la pundju l’utema andi.” (1 Joani 3:15) Wakadjangɛ ase Isariyɛlɛ ɔnɛ: “Tuhetshaki onanyo l’utema aye.” (Akambu w’Asi Lewi 19:17) Nyɛsɔ tokandolake aha la tshimbatshimba dui tshɛ diatomba lam’asaso l’asekaso ambetawudi, diaha Satana ondjakanyi ndjolanya kâmɛ kaso k’Okristo.​—Luka 17:3, 4.

Toshike tanga la ntondo ka owandji wa kashi

10, 11. Kakɔna kahombaso ntsha dia sho shika tanga la ntondo ka Satana, Owandji wa kashi?

¹⁰ Diabolo ekɔ kanga kashi. Yeso akate ate: “Lam’atandi kashi, ndi atutaka akambu weli l’utema andi ndame. Ne dia kanga kashi kendi, ndu shi kashi.” (Joani 8:44) Satana akatɛ Eva awui wa kashi, koko Yeso akaye la nkɛtɛ dia ndjosambisha akambo wa mɛtɛ. (Joani 18:37) Naka sho nangaka shika tanga la ntondo ka Diabolo oko weso ambeki wa Kristo, kete sho hatohombe mbuta kashi kana kesa. Sho pombaka mbutaka “akambu wa mete.” (Zekariya 8:16; Efeso 4:25) ‘Jehowa Nzambi ka mɛtɛ’ tshɔkɔlaka paka Ɛmɛnyi ande wata mɛtɛ. Otshi wa kɔlɔ hakoke monga onyimpala ande.​—Esambu 31:5; 50:16; Isaya 43:10.

¹¹ Naka sho ngɛnangɛna diɛsɛ diele laso dia tshungɔ oma lo kashi yaki Satana, kete tayɔsa Lokristo oko “mbuka k’akambu wa mete.” (2 Petero 2:2; Joani 8:32) Wetshelo tshɛ w’Akristo mbakenga “mete ka lukumu l’ololo.” (Ngalatiya 2:5, 14) Panda kaso nemanɛka la woho ‘wakɛndakɛndaso lo akambo wa mɛtɛ,’ mbuta ate woho wâkitanyiyaso ndo washikaso ekolo la ntondo ka “shi kashi.”​—3 Joani 3, 4, 8.

Toshike tanga la ntondo ka ɔpɔsta woleki tshɛ

12, 13. Ngande wahombaso mbɔsa waa apɔsta?

¹² Etongami ka lo nyuma kakayelamɛka ɔnɛ Diabolo akikɔ ntondo lo akambo wa mɛtɛ. Koko Yeso akate ate: “Ndi hatemalaka lu mete, ne dia mete kema l’utema andi.” (Joani 8:44) Ɔpɔsta woleki woke ɔsɔ akatetemala ndɔshana la ‘Nzambi ka akambo wa mɛtɛ.’ Akristo amɔtshi wa lo ntambe ka ntondo wakatale lo ‘djonga yaki Diabolo,’ ondo wakandama le nde nɛ dia wakanganyiyama ndo wakângana oma lo akambo wa mɛtɛ. Ɔnkɔnɛ, Paulo akakeketsha Timɔtɛ ka wonyande okambi dia mbowaetsha la memakana woho wa vɔ kɔnɔ lo nyuma ndo ndjatondja oma lo djonga yaki Satana. (2 Timote 2:23-26) Omalɔkɔ, ekɔ dimɛna efula dia shikikala lo akambo wa mɛtɛ ndo aha minganyiyama oma lo tokanyi taki waa apɔsta.

¹³ Nɛ dia wakahokamɛ Diabolo ndo vɔ kotona kashi kande, atshukanyi wa ntondo wakonge waa apɔsta. Ɔnkɔnɛ, onde sho pombaka mpokamɛ waa apɔsta lo mbadia ekanda awɔ, kana lo mbɔtɔ lo dihole diawɔ lo Ɛtɛrnɛtɛ? Naka sho nangaka Nzambi ndo akambo wa mɛtɛ, kete hatotosala dui sɔ. Hatohombe mbetawɔ dia waa apɔsta mbɔtɔ lo mvudu yaso koyanga mbowasha mɔyɔ, nɛ dia ditshelo dia ngasɔ diayotokonya dia sho ‘monga kâmɛ lawɔ lo ditshelo diawɔ.’ (2 Joani 9-11) Tatokesamake pondjo oma le Diabolo lo sɛka “mboka k’akambo wa mɛtɛ” ka Akristo ko ndjela embetsha wa kashi wayanga dia ‘mbɔtshiya tokanyi ta kɔlɔ’ ndo wayatshutshuya dia “totakoya mboka oma lo ɛtɛkɛta w’ɛsɛlɔ.”​—2 Petero 2:1-3, Byington.

14, 15. Ɔhɛmwɛlɔ akɔna wakasha Paulo dikumanyi di’oma la Ɛfɛsɔ kâmɛ ndo Timɔtɛ ka wonyande okambi?

¹⁴ Paulo akatɛ dikumanyi dia Akristo diaki oma la Ɛfɛsɔ ate: “Nyuyalami ololo, ndu nyulami limba tshe ololo, wako wakanyukitsha nyuma k’[ekila] alami, dia nyu ndesha ekelizia wa Khumadiondjo, wakandasumbi la dikila diandi. Dimi mbeyaka nti: Lam’ayumutsho, ndjaundu ya pangu yayoto l’atei anyu, yayumana limba tshe. Antu wayunela uma l’atei anyu nyame, wayutela antu akambu waha mete, dia nkutula ambeki l’okongo awo.” (Etsha 20:28-30) L’edjedja ka wonya, waa apɔsta asɔ wayotomba ndo “wayutela antu akambu waha mete.”

¹⁵ Oya lo 65 tena diaso (T.D.), ɔpɔstɔlɔ akakeketsha Timɔtɛ dia ‘manyamanya ɔtɛkɛta w’akambo wa mɛtɛ dimɛna.’ Paulo akafunde ate: “Keli utuni aui w’oteketateketa, ne dia antu ane wayuhama lu akambu wa dionyo. Aui awo wayufula uku puta ka lokengo. Humenaya la Fileto weko l’atei awo. Vo wakanganela uma lu mbuka k’akambu wa mete. Watutaka vati: Eulwelu k’antu uma lu nyoi kambetaka, ndu wambunyukula mbetawo k’antu amotshi.” Omalasɔ mbakatatɛ apɔstazi! Paulo akakotsha ate: ‘Kele ehikamelo ka Nzambi kamboshikikala wolo.’​—2 Timote 2:15-19.

16. Oyadi l’atei wa lokeso la ɔpɔsta woleki tshɛ, lande na katshikalaso la kɔlamelo otsha le Nzambi ndo otsha lo Ɔtɛkɛta ande?

¹⁶ Mbala efula, Satana kambaka la waa apɔsta lo welo wadjande dia ndanya ɔtɛmwɛlɔ wa mɛtɛ, koko nde hatondoya. Oya lo ɔnɔnyi 1868, Charles Taze Russell akatatɛ ɔsɛdingwelo wa la yambalo y’efula wa wetshelo w’ɛtɛmwɛlɔ wa lo Lokristokristo waketawɔmaka edja efula ndo nde akashola toho ta kɔlɔ takalembetshiyamaka awui wa lo Bible. Russell kâmɛ la yema nkina y’anto wakayangaka akambo wa mɛtɛ wakasale kalasa k’ambeki wa Bible la Pittsburgh, Pennsylvania lo wodja wa États-Unis. Aya suke la ɛnɔnyi 140 wambeta oma lâsɔ, ekambi waki Jehowa wambohama lo ewo ndo lo ngandji ka Nzambi ndo ka Ɔtɛkɛta ande. Oyadi l’atei wa lokeso la ɔpɔsta woleki tshɛ, shɛnɔdi ya lo nyuma yaki ɔhɔmbɔ wa kɔlamelo ndo wa kɛsɔ yekɔ lo kimanyiya Akristo wa mɛtɛ dia tshikala la kɔlamelo otsha le Jehowa ndo otsha lo Ɔtɛkɛta ande.​—Mateu 24:45.

Tatetawɔke pondjo dia omboledi w’andja ɔnɛ tâhemɛ

17-19. Andja akɔna wele lo wolo waki Diabolo, ndo lande na kahatahombe nanga andja akɔ?

¹⁷ Yoho kina yayanga Satana dia totadja lo djonga, ele lo tɔsɛngiya dia sho nanga andja ɔnɛ, mbuta ate tshunda di’anto wanganyi la Nzambi. Yeso akelɛ Diabolo ɔnɛ “umbuledi a kete nye” ndo akate ate: “Ndi kema la ema l’utema ami.” (Joani 14:30) Ndo sho lawɔ aha Satana tahemɛ! Sho mbeyaka dia “wa la kete tshe weko lu wulu wa kanga kolo.” (1 Joani 5:19) Diakɔ diele, Diabolo akalange mbisha Yeso “waulelu tshe wa l’andja,” naka Yeso sala tshelo tshɔi y’ɔtɛmwɛlɔ waa apɔsta, yakatone ɔna Nzambi la eshikikelo ndo la wolo tshɛ. (Mateu 4:8-10) Andja walɔmbwama oma le Satana mpetshaka ambeki waki Kristo. (Joani 15:18-21) Diakɔ diele aha la tâmu, ɔpɔstɔlɔ Joani akatewola diaha sho nanga andja ɔnɛ!

¹⁸ Joani akafunde ate: “Tanyulangaki akambu wa la kete kuyanga diango dia la kete. Naka untu alanga akambu wa la kete, ku ngandji ka Shesu kema l’utema andi. Ne dia akambu wa la kete, saki ka dimba, ndu saki ka ashu, ndu utaku a lumu, vo waha uma le Shesu, keli weko uma la kete. Akambu wa la kete la saki yawo wayushila. Keli one latutshaka lulangu la [Nzambi], atuyalaka pundju.” (1 Joani 2:15-17) Hatohombe nanga andja, nɛ dia yoho yawɔ ya lɔsɛnɔ ekɔ ya demba dia pɛkato ndo yɔ mangana etale la atɔndɔ wa Jehowa Nzambi.

¹⁹ Kayotota naka ngandji k’andja ɔnɛ kekɔ l’etema aso? Lâsɔ kete tɔlɔmbɛ ekimanyielo kaki Nzambi dia sho nɛndja ngandji kɛsɔ ndo nsaki yatɔ ya demba. (Ngalatiya 5:16-21) Lo mɛtɛ, tayosala la wolo tshɛ ‘diaha mbɔtɔ vadi y’oma l’andja ɔnɛ,’ naka sho mbohɔka dia “elui w’edienge,” mbele ‘emboledi w’andja ɔnɛ’ wahɛnama wa tshunda dia kɔlɔ di’anto.​—Jakoba 1:27; Efeso 6:11, 12; 2 Koreto 4:4.

20. Lande na kakokadiɔ mbutama ɔnɛ sho “kema wa la kete”?

²⁰ Yeso akate lo kɛnɛ kendana la ambeki ande ate: “Vo kema wa la kete, uku wemi kema la la kete.” (Joani 17:16) Akristo w’akitami ndo asekawɔ wakayakimɔ ndjâtshutshuyaka dia monga pudipudi lo lɔkɛwɔ ndo lo nyuma, lo kakitɔna la andja ɔnɛ. (Joani 15:19; 17:14; Jakoba 4:4) Andja ɔnɛ wa kɔlɔ tohetshaka nɛ dia sho ndjakakitolaka la wɔ ndo tekɔ ‘lo sambisha akambo wosembwe.’ (2 Petero 2:5) Lo mɛtɛ, tekɔ lo nsɛna l’atei wa tshunda di’anto, wele akanga wa monanyi, wa loseka, apɔtwanyi, atɛmɔdi wa dikishi, wevi, akanga a kashi ndo ambidjɔki a wanu. (1 Koreto 5:9-11; 6:9-11; Enyelo 21:8) Koko sho hatɔhɛngɛ lɔpɛpɛ la “nyuma ka la kete,” nɛ dia sho hatɔsɛngiyama oma lo wolo atɔ wa ntsha pɛkato.​—1 Koreto 2:12.

Tatotshikɛke Diabolo dihole

21, 22. Ngande wakokaso kitanyiya dako dia Paulo diofundami lo Efeso 4:26, 27?

²¹ Lo dihole dia sho sɛngiyama la ‘yimba y’andja ɔnɛ,’ tekɔ lo nɔmbwama la nyuma ka Nzambi, katɔsha waonga wele oko ngandji ndo ndjâkimɛ le so. (Ngalatiya 5:22, 23) Waonga asɔ tokimanyiyaka dia shika ekolo lo ta dialɔsha Diabolo mbetawɔ kaso. Nde kombolaka dia sho ‘ntsha paka kɔlɔ,’ koko nyuma ka Nzambi tokimanyiyaka dia sho ‘tshika kɛlɛ ndo sɛka yɛnyi.’ (Osambu 37:8) Lo mɛtɛ, sho mbeyaka mboka kɛlɛ lo tena dimɔtshi, koko Paulo tolakaka ate: “Nyuki kele, ku tanyutshaki kolo. Unya tadjelaki kele kanyu. Tanyushaki uhimbanyi dihuli.”​—Efeso 4:26, 27.

²² Kɛlɛ kaso kokaka ndjokoma pɛkato naka tambotshikala latɔ pondjo. Naka sho tshikala la kɛlɛ kɛsɔ lo yimba, kete tayohumuya Diabolo lokolo l’ɔlɔ dia nde mbidja diatɔnelo lo etshumanelo kana totshutshuya dia sho ntsha ditshelo dia kɔlɔ. Omalɔkɔ, sho pombaka kandola esadi eto ekakatanu wasaso la anto akina lo yoho yetawɔma le Nzambi. (Akambu w’Asi Lewi 19:17, 18; Mateu 5:23, 24; 18:15, 16) Ɔnkɔnɛ, nyɛsɔ tɔlɔmbwame la nyuma ka Nzambi, lo monga la ndjâkimɛ ndo tatetawɔke pondjo dia kânga kɛlɛ ka dimɛna ndjotokonya lo sala awui wa kɔlɔ efula kana lo monga la lohetsho.

23. Ambola akɔna wayotɔsɛdingola lo sawo diayela?

²³ Tambɔsɛdingola totshelo tɔmɔtshi taki Diabolo tahatahombe mbokoya. Koko, ambadi amɔtshi mbeyaka ndjambola ɔnɛ: Onde sho pombaka mboka Satana wɔma? Lande na katandayangɛ Akristo ɛhɛnyɔhɛnyɔ? Ndo ngande wakokaso mbewɔ diaha mundama oma le Diabolo?

[Nɔte ka l’ɛse ka dikatshi]

Ayoyokadimola?

• Lande na kahatahombe mamatanyiyɛ onto okina akambo?

• Lo ndjela 1 Joani 3:15, ngande wakokaso mbewɔ diaha monga ondjakanyi?

• Ngande wahombaso mbɔsa waa apɔsta, ndo lande na?

• Lande na kahatahombe nanga andja ɔnɛ?

[Osato wa lo lɛkɛ 5]

Hatotetawɔ pondjo dia Diabolo ndanya kâmɛ kaso k’Okristo

[Esato wa lo lɛkɛ 7]

Lande na katokeketsha Joani diaha sho nanga andja?