Jehowa mbetshaka alami dikambo dia ɛkɔkɔ ande
“Jehowa atoshaka onto lomba; oma l’onyɔ ande mbatotombaka ewo la shɛnɔdi.”—TUKEDI 2:6, NW.
1, 2. Lande na kakotsha anangɛso ɛkɛndɛ watatetemala pama wa l’etshumanelo?
ƆNANGƐSO Nick, lambokamba oko ekumanyi ɛnɔnyi esambele akate ate: “Laki l’ɔngɛnɔngɛnɔ heyama lam’akamasɔnama oko ekumanyi. Dimi lakɔshi diɛsɛ sɔ oko diaaso dia dimi ndeka kambɛ Jehowa. Lakoke dia dimi pombaka kaloya Jehowa losaka l’ɔtɛ wa kɛnɛ tshɛ kamondosalɛ. Lakalange nto kimanyiya ase etshumanelo kaso lo yoho yoleki, mbakimanyiya woho wakakimanyiya dikumanyi dikina.” Koko, kânga mbaki ɔnangɛso Nick l’ɔngɛnɔngɛnɔ, nde aki nto la yema y’okiyanu. Nde akatetemala mbuta ate: “Lam’ele etena kakamasɔnama oko ekumanyi laki latakotsha kânga ɛnɔnyi 30, lakayakiyanyaka nte hatonga la shɛnɔdi ndo la lomba, mbuta ate akoka wahombama dia nɔmbɔla etshumanelo dimɛna.”
2 Apami wasɔnama oma le Jehowa dia nama ɛkɔkɔ ande, wekɔ la toshadiya ta monga l’ɔngɛnɔngɛnɔ. Ɔpɔstɔlɔ Paulo akohola dikumanyi dia l’Ɛfɛsɔ shadiya mɔtshi etena kakandashile ɛtɛkɛta wakate Yeso. Nde akate ate: “Mbisha, ambuleka nungula otshoko.” (Etsha 20:35) Kamba oko okambi wakimanyiya kana oko ekumanyi mbishaka apami wambobatizama waaso akina wa ndjasha dia kambɛ Jehowa ndo etshumanelo. Ɛnyɛlɔ, ekambi wakimanyiya kimanyiyaka dikumanyi. Vɔ salaka nto elimu ekina w’ohomba efula ndo wɔsa wenya. Ngandji ka Nzambi ndo ka wonyawɔ onto mbatshutshuya anangɛso asɔ dia kamba elimu w’ohomba.—Mako 12:30, 31.
3. Lande na ondo kengenga anto amɔtshi dia kotsha kɛnɛ kalɔmbama dia kondja waɛsɛ l’etshumanelo?
3 Ko kayotota dikambo dia Okristo wa pami wambobatizama wakoka mengenga dia kotsha kɛnɛ kalɔmbama dia kondja diɛsɛ dia kamba oko okambi wakimanyiya ndo l’ɔkɔngɔ ndjokamba oko ekumanyi l’ɔtɛ w’ɔnɛ nde bu la akoka? L’ɛnyɛlɔ kaki ɔnangɛso Nick, nde mbeyaka ndjakiyanya ɔnɛ nde bu la akoka wahombama dia monga olami w’oshika. Onde wɛ ekɔ ɔnangɛso lambobatizama lele l’ɔnɔngɔ w’anto wele la kanyi shɔ? Mbokɛmaka lande na kakoka onto monga l’ekiyanu wa ngasɔ. Jehowa ayoyokoya la alami lo kɛnɛ kasalɛwɔ ɛkɔkɔ. Yeso akate ate: “Untu tshe lambuwusha diango kambi, wayôlomba efula. La untu tshe layuwukimiya diango kambi, wayôlomba diango diuleki efula.”—Luka 12:48.
4. Ngande wakimanyiya Jehowa wanɛ wasɔnande dia nama ɛkɔkɔ ande?
4 Onde Jehowa nongamɛka dia wanɛ wasɔnama oko ekambi kana oko dikumanyi mɛmba ɛkɛndɛ awɔ vamɛ aha l’ekimanyielo? Ndooko. Nde mbakimanyiyaka woho wa vɔ mɛmba ndo kotsha ɛkɛndɛ awɔ dimɛna. Oko wakatadiɛnyi lo sawo diakete, Jehowa mbashaka nyuma kande k’ekila, kele elowa atɔ mbakimanyiyaka dia kokɛ ɛkɔkɔ la ngandji. (Etsha 20:28; Ngalatiya 5:22, 23) Ndo nto, Jehowa mbashaka lomba, ewo, ndo shɛnɔdi. (Tukedi 2:6) Ngande wasalande dikambo sɔ? Nyɛsɔ tɔsɛdingole toho tosato tetsha Jehowa wanɛ wasɔnande dia nama ɛkɔkɔ ande.
Vɔ mbetshamaka oma le alami wambohokɔ akambo
5. Lande na kaki Petero la Joani alami w’eshika?
5 Etena kakasambe Petero nde la Joani la ntondo ka ase Sheke, toshushi taki la lomba la l’andja ɔnɛ ta lo tominadi tɔsɔ wakɔshi Petero la Joani oko “haweyi mukanda, antu k’antu.” Koko, vɔ wakɛnyi dia vɔ mbeyaka mbadia ndo funda kânga mbakiwɔ kɔmbɔtɔ kalasa y’ambewi w’ɛlɛmbɛ yakawetshaka Afundelo. Kânga mbakidiɔ ɔsɔku, Petero ndo Joani kâmɛ ndo ambeki akina waki embetsha w’eshika, wakakimanyiyaka anto wakâhokamɛka dia vɔ koma ambetawudi. Ngande wakakome anto k’anto asɔ embetsha wa tomanamana? L’ɔkɔngɔ wa vɔ mpokamɛ Petero la Joani, ase tominadi “wakawaeyi vati: Waki la Jesu.” (Etsha 4:1-4, 13) Vɔ wakalongola nyuma k’ekila. (Etsha 1:8) Akɛnama nto hwe kânga le toshushi taki kombeyaka awui wa lo nyuma tɔsɔ dia Yeso aketsha apami asɔ. Lam’akinde la wɔ la nkɛtɛ, Yeso aketsha apɔstɔlɔ aha tsho woho wa tshumanya anto wele oko ɛkɔkɔ, koko ndo woho wa mbalama etena kayawɔ ase etshumanelo.—Mateu 11:29; 20:24-28; 1 Petero 5:4.
6. Ɛnyɛlɔ kakɔna ka mbetsha anto akina kakasha Yeso la Paulo?
6 L’ɔkɔngɔ wa Yeso mbolɔ, nde akatetemala mbetsha wanɛ wakandasɔnɛ oko alami. (Enyelo 1:1; 2:1–3:22) Ɛnyɛlɔ, ndamɛ akasɔnɛ Paulo ndo akadje yimba dia nde mbetshama dimɛna. (Etsha 22:6-10) Paulo akɔshi la nɛmɔ wetshelo wakandalongola ndo nde lawɔ aketsha dikumanyi dikina kɛnɛ kakandêke. (Etsha 20:17-35) Ɛnyɛlɔ nde akɔshi wenya efula ndo akadje welo dia mbetsha Timɔtɛ woho wa nde monga “usi ulimu laha la dikambu dia mbutshama sonyi” l’olimu wa Nzambi. (2 Timote 2:15) Lɔngɛnyi la dimɛna efula lakikɔ lam’asande l’apami asɔ. Paulo akafunde lo dikambo dia Timɔtɛ ate: ‘Oko ɔna la she, nde akakambe kâmɛ la mi dia dianganya lokumu l’ɔlɔlɔ.’ (Filipi 2:22) Paulo konyanga dia Timɔtɛ kana onto okina monga ombeki ande. Koko, nde akakeketsha asekande ambetawudi dia vɔ ‘mbowokoya woho wakandokoya Kristo.’—1 Koreto 11:1.
7, 8. a) Dui diakɔna diakete diɛnya etombelo w’amɛna waya etena kôkoya dikumanyi Yeso la Paulo? b) Etena kakɔna kahomba dikumanyi tatɛ mbetsha wanɛ wakoka ndjokamba oko ekambi kana oko dikumanyi?
7 L’ɛnyɛlɔ ka Yeso la Paulo, alami wambohokɔ akambo mbɔsaka yɛdikɔ ya mbetsha anangɛwɔ wambobatizama, ndo vɔ lawɔ kondjaka etombelo w’amɛna. Tɔshi ɛnyɛlɔ ka ɔnangɛso Chad lakodiama lo nkumbo kakâtɔna l’awui w’ɔtɛmwɛlɔ ndo lele atete edja nde malasɔnama oko ekumanyi. Nde akate ate: “L’edja k’ɛnɔnyi efula, dikumanyi diambohokɔ akambo wakakimanyiya dia dimi pama lo nyuma. Lam’ele papa komonga ombetawudi, dikumanyi sɔ wakayasha lo yoho ya lânde le mi ndo wakakome oko ambutshi ami wa lo nyuma. Vɔ wakambetsha woho wa sambisha, ndo l’ɔkɔngɔ lo yoho ya lânde ekumanyi kɛmɔtshi akambetsha woho wa kotshaka ɛkɛndɛ ami wa l’etshumanelo.”
8 Oko wadiɛnya ɛnyɛlɔ ka ɔnangɛso Chad, alami wele la shɛnɔdi tatɛka mbetsha wanɛ wakoka ndjokamba oko ekambi wakimanyiya ndo oko dikumanyi edja efula la ntondo ka vɔ pama dia ndjokoka mɛmba ɛkɛndɛ ɛsɔ. Bonde kele dikambo sɔ ohomba? Nɛ dia Bible nɔmbaka dia ekambi ndo dikumanyi kotsha ɛlɛmbɛ wa lâdiko wendana la lɔkɛwɔ ndo monga la lonyuma la dimɛna la ntondo ka vɔ sɔnama dia mɛmba ɛkɛndɛ ɛsɔ. Vɔ pombaka ‘pembama ntondo.’—1 Timote 3:1-10.
9. Ɔkɛndɛ akɔna wele la alami wambohokɔ akambo, ndo lande na?
9 Naka anangɛso wambobatizama pombaka mbidjama l’ohemba, kete ekɔ ohomba vɔ mbetshama la ntondo. Ɛnyɛlɔ: Naka ombetsha mbisha ombeki egzamɛ wa wolo wa akambo wakinde kombetsha, onde ombeki ayokotsha? Lo mbuta mɛtɛ, nde hatokotsha. Lâsɔ, mbokɛmaka dia wetshelo ekɔ ohomba. Koko, embetsha w’eshika mbetshaka ambeki aha tsho dia vɔ kotsha lo egzamɛ, koko dia vɔ kamba la diewo diakondjawɔ. Woho akɔ wâmɛ mbele, dikumanyi diele l’etete kimanyiyaka anangɛso dia vɔ monga la waonga walɔmbama le onto lasɔnama lo mbasha wetshelo wa shikaa. Vɔ salaka dikambo sɔ aha tsho dia kimanyiya anangɛso asɔ dia vɔ sɔnama, koko ndo dia mbakimanyiya dia vɔ monga la akoka wa nama olui w’ɛkɔkɔ dimɛna. (2 Timote 2:2) Lo wedi awɔ, anangɛso wambobatizama pombaka sala la wolo dia kotsha kɛnɛ kalɔmbama dia kamba oko okambi wakimanyiya kana oko ekumanyi. (Tito 1:5-9) Koko, lo mbetawɔ mbetsha wanɛ wakombola dia monga la ɛkɛndɛ l’etshumanelo, alami wambohokɔ akambo koka mbakimanyiya dia vɔ pama esadi esadi.
10, 11. Ngande wakoka alami mbetsha anto akina dia vɔ kondja waɛsɛ akina?
10 Ko, lo yoho yakɔna shikaa yakoka alami wambohokɔ akambo mbetsha anto akina dia vɔ kotsha ɛkɛndɛ awɔ wa l’etshumanelo? Ntondontondo, dikumanyi pombaka ndjasha le anangɛso wa l’etshumanelo, mbuta ate sambishaka la wɔ mbala la mbala ndo mbakimanyiya dia vɔ pamia dikoka diawɔ dia nembetshiya ‘ɔtɛkɛta w’akambo wa mɛtɛ dimɛna.’ (2 Timote 2:15) Alami wambotshunda mɛnyaka anangɛso asɔ ɛngɛnɔngɛnɔ waya oma lo kambɛ anto akina ndo ɔlɔ woka alami lo woho wayadjɛwɔ ndo wakotshawɔ eyango wa lo nyuma. La ngandji tshɛ, vɔ mbishaka nto alako wa shikaa lo woho wakoka ɔnangɛso ɔmɔtshi ndjalowanya dia koma ‘ɛnyɛlɔ le ɛkɔkɔ.’—1 Petero 5:3, 5.
11 Etena kasɔnama ɔnangɛso oko okambi wakimanyiya, alami wambohokɔ akambo tetemalaka la mbowetsha. Ɔnangɛso Bruce, lambokamba oko ekumanyi suke la ɛnɔnyi 50 akate ate: “Dimi nangaka mbidjasɛ l’ɔnangɛso leke kasɔnama oko okambi ndo vusola la nde alako wambotondja olui w’ɔhɔmbɔ wa kɔlamelo ndo wa kɛsɔ wendana l’ɔkɛndɛ ande. Sho mbadiaka nto atɔndɔ wendana shikaa la ɔkɛndɛ ande, oma lâsɔ ko dimi kamba kâmɛ la nde edja ndo nde ambomanyamanya ɛkɛndɛ ande.” Etena katahokɔ okambi akambo, nde koka nto nongola wetshelo lo kɛnɛ kendana la olamelo w’ɛkɔkɔ. Ɔnangɛso Bruce tetemalaka mbuta ate: “Etena katshɔmi la okambi wakimanyiya lo wembwelo w’ɛkɔkɔ, dimi mbokimanyiyaka dia nde sɔna avɛsa amɔtshi wa shikaa wayokeketsha onto kana nkumbo kotshweso tembola. Mbeka woho wa kamba l’Afundelo lo yoho yananda otema w’onto ekɔ ohomba naka okambi alanga koma olami wa dimɛna.”—Heberu 4:12; 5:14.
12. Ngande wakoka alami wambohokɔ akambo mbetsha dikumanyi dieke kasɔnama?
12 Alami weke kasɔnama kondjaka nto wahɔ oma lo wetshelo ekina. Ɔnangɛso Nick, lakatatɛkɛtshi dikambo diande la diko akate ate: “Wetshelo wakamakondja oma le dikumanyi dihende diaya epalanga waki ohomba efula lo yoho ya lânde. Mbala la mbala anangɛso asɔ wakeyaka woho wakahombe awui amɔtshi kandɔma. Mbala tshɛ, vɔ wakampokamɛka dimɛna ndo wakadjaka yimba lo kɛnɛ kakamataka, oyadi kânga vɔ kokietawɔka. Dimi lakakondja wetshelo efula oma le wɔ lo menda okitshakitsha ndo dilɛmiɛlɔ diaki lawɔ otsha le anangɛso la akadiyɛso wa l’etshumanelo. Dikumanyi sɔ wakakɔkɔmiya ohomba wa kamba dimɛna la Bible dia kandola ekakatanu kana dia keketsha onto.”
Wekɔ lo mbetshama oma l’Ɔtɛkɛta wa Nzambi
13. a) Kakɔna kahombama dia ɔnangɛso monga olami w’oshika? b) Lande na kakate Yeso ate: “Wetshelu ami aha wami”?
13 Bible, Ɔtɛkɛta wa Nzambi ekɔ la ɛlɛmbɛ, atɔndɔ ndo bɛnyɛlɔ diele olami ladiɔ ohomba dia nde ‘ndowana ndo monga la akoka wa ntsha elimu tshɛ w’ɔlɔlɔ.’ (2 Timote 3:16, 17) Ɔnangɛso ɔmɔtshi mbeyaka monga la diewo dia mukanda efula, koko paka ewo kande ka Afundelo ndo woho wakambande la ewo kakɔ mbayowokimanyiya dia nde monga olami w’oshika. Tɔ̂shi ɛnyɛlɔ kaki Yeso. Nde mbaki onto laki la ewo koleki tshɛ, onto laki la shɛnɔdi yoleki tshɛ, ndo olami wa lo nyuma woleki tshɛ lomba lo nkɛtɛ k’otondo; koko, kânga nde kondjaɛkɛ lo lomba lande hita etena kakandetshaka ɛkɔkɔ waki Jehowa. Nde akate ate: “Wetshelu ami aha wami, keli wa one lakantumi.” Lande na kakatombola Yeso She lele l’olongo? Nde akalembetshiya ate: “One latuyataka, atuyangaka lutumbu landi.”—Joani 7:16, 18.
14. Ngande wewɔ alami dia ndjayangɛ lotombo?
14 Alami wele la kɔlamelo hawoyayangɛ lotombo. Alako ndo ekeketshelo kashawɔ ndjaka aha oma lo lomba lawɔ, koko oma lo Ɔtɛkɛta wa Nzambi. Vɔ shihodiaka dia olimu wa olami ele dia kimanyiya ɔkɔkɔ dia nde monga la “yimba ya Kristu,” koko aha ya dikumanyi. (1 Koreto 2:14-16) Ɛnyɛlɔ, kakɔna kayotota naka ekumanyi kakimanyiya atshukanyi amɔtshi dia kandola ekakatanu wa lo diwala owalaka lo ndjela kɛnɛ kakokomɛ lo dihole dia alako ande tomba oma lo atɔndɔ wa lo Bible ndo l’ekanda wambotondja ‘ɔhɔmbɔ wa kɔlamelo ndo wa kɛsɔ’? (Mateu 24:45) Woho wende ataleke mpokɔ akambo ndo mbekelo ya lo ngelo mbeyaka monga la shɛngiya ya wolo lo dako diande. Ekɔ mɛtɛ dia aha mbekelo tshɛ mbele kɔlɔ ndo mbeyaka monga ko ekumanyi kɛmɔtshi ambɛna akambo efula lo lɔsɛnɔ. Koko, ɛkɔkɔ wayokondja wahɔ efula naka alami mbakeketsha dia mpokamɛ dui dia Yeso ndo ɛtɛkɛta wa Jehowa lo dihole dia tokanyi ta anto kana mbekelo ya lo ngelo kawɔ.—Osambu 12:6; Tukedi 3:5, 6.
Wekɔ lo mbetshama oma le ‘ɔhɔmbɔ wa kɔlamelo ndo wa kɛsɔ’
15. Olimu akɔna wakasha Yeso ‘ɔhɔmbɔ wa kɔlamelo ndo wa kɛsɔ,’ ndo naa ɔkɔkɔ ɔmɔtshi wambokimanyiya olui w’ɔhɔmbɔ ɔsɔ dia tondoya olimu akɔ?
15 Alami wele oko ɔpɔstɔlɔ Petero, Joani, ndo Paulo waki vɔ tshɛ lo olui wakelɛ Yeso ɔnɛ ‘ɔhɔmbɔ wa kɔlamelo ndo wa kɛsɔ.’ Olui w’ɔhɔmbɔ ɔsɔ kengama la anango waki Yeso wa akitami wele la nkɛtɛ, wanɛ wele la elongamelo ka tolɛ kâmɛ la Kristo l’olongo. (Enyelo 5:9, 10) Lo nshi nyɛ y’ekomelo ya dikongɛ di’akambo nɛ, lofulo la anango Yeso weke lanɛ la nkɛtɛ lekɔ lo tatetemala kitakita. Koko, olimu w’esambishelo ka lokumu l’ɔlɔlɔ la Diolelo wakasha Yeso ambeki ande, wahomba salema la ntondo ka ekomelo ndja wekɔ lo salema kakianɛ l’andja w’otondo lo yoho yewɔ watasalemaka. Oyadi woke woke w’olimu ɔsɔ, olui w’ɔhɔmbɔ wambotondoya olimu akɔ lo yoho ya dimɛna efula! Lande na? Lo yɛdikɔ mɔtshi, ele nɛ dia vɔ waketsha “ekoko ekina” dia mbakimanyiya lo olimu wa sambisha ndo wa mbetsha. (Joani 10:16; Mateu 24:14; 25:40) Ɛlɔ kɛnɛ, etenyi ka woke ka olimu ɔsɔ kekɔ lo salema oma le ɛkɔkɔ ekina ɛsɔ wele la kɔlamelo.
16. Ngande wetsha olui w’ɔhɔmbɔ apami wasɔnama?
16 Ngande washa olui w’ɔhɔmbɔ wetshelo ɔsɔ? Lo ntambe ka ntondo, enyimpala wa olui w’ɔhɔmbɔ ɔsɔ waki la lotshungɔ la mbetsha ndo sɔna emendji lo tshumanelo, emendji wakahombe lo wedi awɔ mbetsha ɛkɔkɔ l’etshumanelo. (1 Koreto 4:17) Ngasɔ mbediɔ ndo ɛlɔ kɛnɛ. Olui-walɔmbɔla, mbuta ate djui ya dikumanyi dia akitami wele enyimpala wa olui w’ɔhɔmbɔ mbishaka atomami awɔ lotshungɔ la mbetsha ndo sɔna ekambi ndo dikumanyi lo tshumanelo nunu akumi dia l’andja w’otondo. Ndo nto, Olui-walɔmbɔla nɔngɔsɔlaka kalasa dikambo dia anangɛso wele lo kɔmite ya filialɛ, emendji weteta, dikumanyi ndo ekambi dia vɔ kokɛ ɛkɔkɔ lo yoho yoleki dimɛna. Alako akina tomamaka lo mikanda, tondjamaka lo asawo wa lo Tshoto y’Etangelo ndo l’ekanda ekina, ɛnyɛlɔ oko dibuku Tamboyakongɛ dia sala lolango la Jehowa.a
17. a) Ngande wɛnya Yeso dia nde ndjaɛkɛka le olui w’ɔhɔmbɔ? b) Ngande wakoka alami wa lo nyuma mɛnya dia vɔ ndjaɛkɛka le olui w’ɔhɔmbɔ?
17 Yeso ndjaɛkɛka efula le olui w’ɔhɔmbɔ woho ɔnɛ wele nde akokitsha “ladiku dia diango diandi tshe,” mbuta ate ladiko dia wahɔ ande tshɛ wa lo nyuma wele la nkɛtɛ. (Mateu 24:47) Alami wasɔnama mɛnyaka dia vɔ lawɔ ndjaɛkɛka le olui w’ɔhɔmbɔ lo kamba la alako walongolawɔ oma le Olui-walɔmbɔla. Eelo, etena ketsha alami anto akina, etena ketshamawɔ oma l’Ɔtɛkɛta wa Nzambi ndo kakambawɔ la wetshelo walongolawɔ oma le olui w’ɔhɔmbɔ, vɔ salaka dia lemba l’ɛkɔkɔ monga kâmɛ. Tekɔ mɛtɛ la lowando lo woho wetsha Jehowa apami wayasha tshɛ dia kokɛ Okristo tshɛ l’etshumanelo!
[Nɔte ka l’ɛse ka dikatshi]
a Akatondjama oma le Ɛmɛnyi wa Jehowa.
Ngande wayoyokadimola?
• Ngande wetsha alami wa lo nyuma wambotshunda anto akina?
• Lande na kele alami hawetsha lo ndjela tokanyi tawɔ?
• Ngande ndo lande na kɛnya alami ndjaɛkɛ kawɔ le olui w’ɔhɔmbɔ?
[Esato wa lo lɛkɛ 25]
Dikumanyi di’Akristo mbetshaka apami w’akɛnda wa l’etshumanelo
[Esato wa lo lɛkɛ 26]
‘Ɔhɔmbɔ wa kɔlamelo ndo wa kɛsɔ’ mbishaka dikumanyi wetshelo w’efula