Tokambake la lushi tshɛ lekeso la lɔsɛnɔ dia ntombola Nzambi

OMEMBI w’esambo Davidi akalɔmbɛ Jehowa ɔnɛ: “Umbukia ngandji kaye ka mamba k’olomo. . . . Unimbitshiya mbuka ka dimi nkendakenda.” (Osam. 143:8) Etena kemɔyɛ la pindju ndo kokayɛ Jehowa losaka dia lushi l’oyoyo lekeyɛ la lɔsɛnɔ, onde l’ɛnyɛlɔ ka Davidi wɛ nɔmbaka Jehowa dia nde kɔlɔmbɔla lo tɛdikɔ tayoyɔsa ndo dia wɛ nsala awui woleki amɛna? Aha la tâmu, wɛ salaka dikambo sɔ.

Oko weso ekambi waki Jehowa wakayakimɔ le nde, ‘oyadi tayɔlɛ, kana tayɔnɔ kana dikambo tshɛ diayotosala,’ sho salaka la wolo dia ‘nsala akambo tshɛ dia lotombo la Nzambi.’ (1 Kor. 10:31) Sho mbeyaka dia lɔsɛnɔ laso la lushi la lushi mbeyaka ntombola kana mbisha Jehowa sɔnyi. Sho mbohɔka nto di’Ɔtɛkɛta wa Nzambi mbutaka dia Satana ekɔ lo nsɔngwɛ “utshu la yanyi” anango Kristo mbidja ndo ekambi waki Nzambi wele la nkɛtɛ tshɛ. (Eny. 12:10) Diakɔ diambotoyashikikɛ dia mbisha okadimwelo l’awui wa kashi wata Satana ndo ngɛnyangɛnya otema waki Jehowa ndo dia kambɛka Shɛso kele l’olongo olimu w’ekila “la yanyi ndu l’utshu.”—Eny. 7:15; Tuk. 27:11.

Nyɛsɔ tɔsɛdingole lo tshena pe awui ahende w’ohomba wakokaso kambaka la wɔ lushi tshɛ lekeso la lɔsɛnɔ dia ntombola Nzambi. Dui dia ntondo, awui wahombaso mbetsha lo dihole dia ntondo ndo dui dia hende, mɛnya dia sho ndjakiyanyaka dikambo di’anto akina.

Tɔsɛnake lo yoho yɔtɔnɛ la ndjakimɔ kaso

Lo ndjakimɔ le Jehowa, sho takɛnya nsaki ka l’otema ɔtɔi ka mbokambɛ. Takalake nto Jehowa dia tayɔkɛndakɛndaka lo mboka yande “lushi la lushi,” mbuta ate pondjo pondjo. (Osam. 61:5, 8) Ko ngande wakokaso nsɛna lo yoho yɔtɔnɛ la daka sɔ? Ngande wɛnyaso ngandji k’oma k’ɛse otema kokaso Jehowa lushi tshɛ?

Ɔtɛkɛta wa Nzambi mɛnyaka hwe ɛkɛndɛ wele la so walongamɛ Jehowa dia sho mbakotsha. (Euh. 10:12, 13) Efula ka l’atei awɔ wekɔ lo kiombo yele lo lɛkɛ 22 yele l’ɔtɛ a dui ɔnɛ: “Ɛkɛndɛ wakatosha Nzambi.” Nzambi mbakatosha ɛkɛndɛ ɛsɔ tshɛ, lâsɔ vɔ wekɔ ohomba efula. Ngande wakokaso mɛnya ɔkɛndɛ wahomba mbeta lo dihole dia ntondo etena kalɔmba ɛkɛndɛ ehende kana ndekana yambalo yaso etena kâmɛ?

Sho mbidjaka olimu aso w’ekila lo dihole dia ntondo nɛ dia olimu ɔsɔ mendanaka la wekelo wa Bible, dɔmbɛlɔ, nsanganya y’Akristo ndo olimu w’esambishelo. (Mat. 6:33; Joa. 4:34; 1 Pet. 2:9) Koko, hatosale awui wa lo nyuma lushi l’otondo. Olimu wa l’emunyi, kalasa ndo ɛkɛndɛ ekina wa la ngelo pombaka mbidjama l’ekongelo kaso. Kânga mbediɔ ngasɔ, sho salaka la wolo diaha olimu wa l’emunyi ndo awui akina wele oko vɔ mfukutanya olimu aso w’ekila ɛnyɛlɔ oko, wɔtwɛlɔ wa lo nsanganya y’Akristo. Ɛnyɛlɔ, etena kakongɛso dia mɛngɔla, sho pombaka ndjashikikɛ dia hatotetsha wembwelo w’omendji w’otshimbedi, losanganya la lânde la lushi ɔtɔi, losanganya l’otshimbedi kana losanganya la distrikɛ. Tena dimɔtshi, sho mbeyaka monga l’akoka wa nkotsha ɛkɛndɛ efula mbala ɔtɔi. Ɛnyɛlɔ, sho kokaka nkongɛ dia tɔmba kana tosola Mbalasa ka Diolelo oko nkumbo kana sho nsambisha asekaso wa la kalasa kana wa l’olimu wonya wa diomuyelo. Lo mɛtɛ, etena tshɛ kahombaso nsɔna dikambo dimɔtshi lo lɔsɛnɔ laso diele oko oyangelo w’olimu, ɔsɔnwɛlɔ wa kalasa kana w’angɛnyi sho nangaka dia awui wetshaso lo dihole dia ntondo lo lɔsɛnɔ, mbuta ate ɔtɛmwɛlɔ wa Jehowa Shɛso ka ngandji monga la shɛngiya l’ɔsɔnwɛlɔ aso.—Und. 12:13.

Tɛnya dia sho ndjakiyanyaka dikambo di’anto akina

Jehowa nangaka dia sho ndjakiyanya dikambo di’anto akina ndo mbasalɛka kɛnɛ kele ɔlɔlɔ. Satana lo wedi ande tshutshuyaka anto lo lokaki. Andja ande ndola l’anto ‘wayalanga’ ndo ‘walanga ɛngɛnɔngɛnɔ’ kâmɛ ndo wanɛ ‘wonɛ lo demba.’ (2 Tim. 3:1-5; Ngal. 6:8) Anto efula hawoleke mbidja yimba lo shɛngiya yele la kɛnɛ kasalɛwɔ anto akina. “Etsha wa dimba” menamaka ahole tshɛ.—Ngal. 5:19-21.

Ande otshikitanu wele lam’asa anto wa l’andja ɔnɛ la wanɛ watshutshuyama oma le nyuma k’ekila kaki Jehowa ndo wakɛnɛmɔla ngandji, kɛtshi ndo ɔlɔlɔ lo woho wasalɛwɔ anto akina akambo lee! (Ngal. 5:22) Ɔtɛkɛta wa Nzambi totɛka dia sho ndeka ndjasha l’ehomba w’anto akina lo dihole dia waso hita. Ɔnkɔnɛ, sho salaka akambo wɛnya dia sho ndjashaka l’otema ɔtɔi le anto akina kânga mbasalaso la wolo dia mbewɔ ndjatambiya l’awui awɔ hita. (1 Kor. 10:24, 33; Fil. 2:3, 4; 1 Pet. 4:15) Sho ndekaka ndjakiyanya dikambo di’asekaso ambetawudi. Koko, sho ndjaketembolaka nto dia nkimanyiya anto wele kema ambetawudi. (Ngal. 6:10) Onde wɛ kokaka nyangaka waaso wa mɛnya lɔsɛngɔ layɛ otsha le anto amɔtshi wayohomana la yɛ nshi nyɛ?—Enda kiombo yele lo lɛkɛ 23 yele l’ɔtɛ a dui ɔnɛ: “Toyakiyanya dikambo diawɔ.”

Ndjakiyanya dikambo di’anto akina hakomɛ tsho lo etena kɛmɔtshi kana lo dui dimɔtshi dia lânde. (Ngal. 6:2; Ef. 5:2; 1 Tes. 4:9, 10) Koko, nshi tshɛ sho salaka la wolo dia mbeya awui wahomana l’anto akina ndo ndjala suke dia mbakimanyiya kânga mbele nsala dui sɔ mbeyaka monga wolo le so. Sho nangaka ndjala la lokaho la kɛnɛ kele la so, mbuta ate wenya, diangɔ dia l’emunyi, diewo ndo lomba laso. Jehowa toshikikɛka dia naka sho mbishaka anto akina, kete ndo nde lawɔ ayotosha.—Tuk. 11:25; Luka 6:38.

Toyashake l’olimu w’ekila “l’utshu ndu la yanyi”

Onde sho kokaka mɛtɛ nkambɛ Jehowa olimu w’ekila “l’utshu ndu la yanyi”? Eelo, lo ndjashaka mbala la mbala ndo l’etete lo toho tshɛ tendana l’ɔtɛmwɛlɔ aso. (Etsha 20:31) Sho kokaka ndodia nsɛnɔ yaso l’olimu aso w’ekila lo mbadiaka ndo lo kanaka yimba l’Ɔtɛkɛta wa Nzambi lushi tshɛ, lo nɔmbaka l’etete, lo ndjaketembolaka dia mbɔtɔka nsanganya tshɛ ndo lo kambaka la diaaso tshɛ dia nsambisha anto akina.—Osam. 1:2; Luka 2:37; Etsha 4:20; 1 Tes. 3:10; 5:17.

Onde sho ndjashaka lo toho tɔsɔ t’olimu w’ekila waki Jehowa? Naka ɔsɔku, kete nsaki kele la so ka mbɔngɛnyangɛnya ndo mbisha okadimwelo lo tɔfwɛfwɛ taki Satana kayɛnama l’awui tshɛ wa lo lɔsɛnɔ laso la lushi la lushi. Sho ndjaketembolaka dia mbisha Jehowa lotombo lo kɛnɛ tshɛ kasalaso ndo l’oseka dikambo tshɛ diahomana la so. Sho tshikaka di’atɔndɔ ande nɔmbɔla ɛtɛkɛta, lɔkɛwɔ ndo tɛdikɔ tɔsaso. Sho mɛnyaka lowando laso lo woho watokokɛnde la ngandji ndo woho watosukɛnde lo ndjaɛkɛ tshɛ le Nde ndo lo nkamba la wolo watoshande l’olimu ande. Ndo sho ngɛnangɛnaka alako ndo ohokwelo ande etena kahatalɛmiya ɛlɛmbɛ ande l’ɔtɛ weso anto wele bu kokele.—Osam. 32:5; 119:97; Tuk. 3:25, 26; Kol. 3:17; Heb. 6:11, 12.

Nyɛsɔ totetemale tombolaka Nzambi nshi tshɛ. Lo nsala ngasɔ, tayokondja ekeketshelo lo anima aso ndo Shɛso ka ngandji ayotokokɛka pondjo pondjo.—Mat. 11:29; Eny. 7:16, 17.

[Kiombo/Esato wa lo lɛkɛ 22]

Ɛkɛndɛ wakatosha Nzambi

• Tɔlɔmbake mbala la mbala.—Romo 12:12.

• Tadiake ndo tekake Bible ndo tokambake la awui wekaso oma lɔkɔ.—Osam. 1:2; 1 Tim. 4:15.

• Tɔtɛmɔlake Jehowa l’etshumanelo.—Osam. 35:18; Heb. 10:24, 25.

• Tokotshake ehomba wa lo demba, wa lo nyuma ndo lo yimba w’ase nkumbo yaso.—1 Tim. 5:8.

• Tosambishake lokumu l’ɔlɔlɔ la Diolelo ndo tetɛke anto ambeki.—Mat. 24:14; 28:19, 20.

• Tosalake kɛnɛ kahombama dia ndjakokɛ lo demba, lo nyuma ndo lo tokanyi lo sutshasutshaka yema demba.—Mako 6:31; 2 Kor. 7:1; 1 Tim. 4:8, 16.

• Tokotshake ɛkɛndɛ aso wa l’etshumanelo.—Etsha 20:28; 1 Tim. 3:1.

• Tɔlɔngɔsɔlake mvudu yaso ndo Mbalasa yaso ya Diolelo.—1 Kor. 10:32.

[Kiombo/Osato wa lo lɛkɛ 23]

Toyakiyanya dikambo diawɔ

• Ɔnangɛso kana kadiyɛso kɛmɔtshi kaya osombe.—Lew. 19:32.

• Onto ɔmɔtshi lele la hemɔ kana lambɔkɔmɔ.—Tuk. 14:21.

• Ose etshumanelo ɔmɔtshi lele l’ohomba w’ekimanyielo ka wanyandja kakokaso mbosha.—Romo 12:13.

• Ose nkumbo kaso ka suke suke.—1 Tim. 5:4, 8.

• Osekaso ombetawudi lambovusha olonganyi ande.—1 Tim. 5:9.

• Ekumanyi kɛmɔtshi kakamba la wolo l’etshumanelo.—1 Tes. 5:12, 13; 1 Tim. 5:17.