Yasukanya la Nzambi
“Diulelu diaye [di]ayuyala wulu pundju”
L’ƆKƆNDƆ w’ana w’anto, emboledi efula wakanyema oma lo lowandji. Amɔtshi wakanyema lo tshimbo ya vɔtɛ ndo akina wakanyema la wolo. Ko kayotota dikambo dia Yeso Kristo, Nkumekanga ka lo Diolelo diaki Nzambi dia l’olongo? Onde ekɔ dui dimɔtshi diakoka mboshimba dia nde mbolɛ oko Nkumekanga kakasɔnama oma le Nzambi? Sho tanaka okadimwelo l’ɛtɛkɛta wakatɛ Jehowa nkumekanga Davidi ka l’Isariyɛlɛ w’edjedja wofundami lo 2 Samuele tshapita 7.
Lo avɛsa wa mbɔtwɛlɔ, wekɔ lo tɛnya dia Davidi aki la lonyangu lo woho waki ɔshɛtɛ waki Nzambi lo luudu la dipɛma l’anyanya etena kele nde nkumekanga akadjasɛka lo mbalasa ka dimɛna.a Davidi akɛnya nsaki kaki la nde ka mbikɛ Jehowa luudu lasungana kana tɛmpɛlɔ. (Divɛsa 2) Jehowa akatɛ Davidi lo tshimbo y’ɔprɔfɛta Natana ɔnɛ aha nde mbayowokɛ luudu lɔsɔ, koko ɔnande ɔmɔtshi la pami.—Divɛsa 4, 5, 12, 13.
Jehowa akanandema lo menda nsaki k’oma k’ɛse otema kaki la Davidi. Dia mfuta omamemelo waki la Davidi ndo lo ndjela prɔfɛsiya, Nzambi akadje sheke nde la Davidi ɔnɛ nde ayɔsɔna onto ɔmɔtshi la lo dioho diande dia nkumekanga dia nde mbolɛ pondjo pondjo. Natana akatɛ Davidi daka dia lânde nɛ: “Khumbu kaye la diulelu diaye wayuyala wulu pundju la ntundu kami. Kiti kaye ka diulelu kayushikikala pundju.” (Divɛsa 16) Onto akɔna ele Okitɔ wa pondjo wa sheke shɔ, mbuta ate Ɔnɛ layolɛ pondjo pondjo?—Osambu 89:20, 29, 34-36.
Yeso y’ose Nazarɛta aki kanula ya Davidi. Etena kakandewoyaka eotwelo ka Yeso, ondjelo ɔmɔtshi akate ate: “Khumadiondjo [Nzambi] ayuwusha kiti ka diulelu ka Davidi tshendi. Ndi ayulela khumbu ka Jakoba pundju.” (Luka 1:32, 33) Ɔnkɔnɛ, sheke yakadje Jehowa nde la Davidi yakayokotshamaka le Yeso Kristo. Oma lɔkɔ, Owandji ɔsɔ kɔsɔnama oma le anto, koko lo ndjela daka dia lânde diaki Nzambi diawosha lotshungɔ la nde mbolɛ pondjo pondjo. Tatohɛke dia alaka waki Nzambi kotshamaka nshi tshɛ.—Isaya 55:10, 11.
Sho kondjaka wetshelo ehende w’ohomba efula lo 2 Samuele tshapita 7. Ntondotondo, tonge l’eshikikelo dia ndoko dui ndo ndoko onto lakoka nshimba Yeso Kristo dia nde mbolɛ. Ɔnkɔnɛ, tonge l’eshikikelo ɔnɛ nde ayokotsha sangwelo dia ɛlɔmbwɛlɔ kande, mbuta ate dia lolango laki Nzambi salema la nkɛtɛ oko wasalemalɔ l’olongo.—Mateu 6:9, 10.
Dui dia hende, ɔkɔndɔ ɔnɛ tetshaka wetshelo wananda otema wendana la Jehowa. Tatohɛke dia Jehowa akɛnyi ndo akɔshi la nɛmɔ tokanyi taki l’otema waki Davidi. Mbeya dia Jehowa mandolaka woho wamamemaso ɔtɛmwɛlɔ ande tokeketshaka. Tena dimɔtshi, akambo wele oko hemɔ kana lotshundu mbeyaka toshimba dia nsala awui wakombolaso nsala l’olimu wakambɛso Nzambi. Naka ngasɔ mbediɔ, kete nyɛsɔ tokondja ekeketshelo lo mbeya dia Jehowa mɛnaka kânga tokanyi tele l’etema w’anto wele la nsaki ka mamema ɔtɛmwɛlɔ ande.
[Nɔtɛ ka l’ɛse ka dikatshi]
a Ɔshɛtɛ wa sheke waki ɔshɛtɛ w’ekila wakasalema l’ɛlɔmbwɛlɔ ka Jehowa lo ndjela ekongelo kakandawasha. Vɔ waki didjidji dia wôngelo wa Jehowa lo Isariyɛlɛ w’edjedja.—Etumbelu 25:22.