Tonge l’ohetoheto dikambo dia ɔtɛmwɛlɔ wa mɛtɛ
“Diango dia dinela dieko efula, keli ekambi mbeli tshitshe.”—MAT. 9:37.
1. Nsala akambo la wanyandja kɛdikɛdi na?
NAKA wɛ ekɔ la ɔkɔnyi la ngelo ko hemɔ kamboheka polo lo nde hayɔtɛkɛta, ahombayɛ nsala l’etena kɛsɔ? Shi wɛ pombaka nsala akambo la wanyandja dia ntshɔ la nde la lopitadi? Naka owandji ɔmɔtshi wa woke akakotɛ dia wɛ ndjɛnana la nde lo wonya ɔmɔtshi shikaa ko mɛnamaka dia wonya akɔ wayanga mbeta. Kakɔna kayoyosala? Shi wɛ ayosamanya diaha nkoma l’ɔkɔngɔ? Eelo, etena kele onto la dikambo dimɔtshi dia wanyandja ko wonya wotete nde mbokaka yɛnyi, tshimbaka wɔɔngɔ ndo salaka akambo esadi esadi lo ndjela kɛnɛ tshɛ kakokande nsala. Ɔsɔ mbelɛwɔ nsala akambo la wanyandja.
2. Naa olimu wahomba Akristo wa mɛtɛ nkamba la wanyandja tshɛ ɛlɔ kɛnɛ?
2 Le Akristo wa mɛtɛ, ɛlɔ kɛnɛ olimu wa nsambisha lokumu l’ɔlɔlɔ la Diolelo ndo wa mbetɛ anto wa lo wedja tshɛ ambeki mbele olimu wahomba salema la wanyandja tshɛ. (Mat. 24:14; 28:19, 20) Ombeki Mako akashile ɛtɛkɛta waki Yeso etena kakandafunde ɔnɛ olimu ɔsɔ pombaka salema “ntundu,” mbuta ate la ntondo ka ekomelo ndja. (Mako 13:10) Ngasɔ mbahombadiɔ mɛtɛ monga. Yeso akate ate: “Diango dia dinela dieko efula, keli ekambi mbeli tshitshe.” Diangɔ diambɛla pombaka minama aha la ntshimbatshimba diaha diɔ mpɔnda.—Mat. 9:37.
3. Kakɔna kasala anto efula lo kɛnɛ kendana l’olimu w’esambishelo wahomba kambema la wanyandja?
3 Lam’ele olimu w’esambishelo wekɔ ohomba le so, sho pombaka mbetsha wenya aso efula lɔkɔ, ndjasha la wolo aso tshɛ ndo nsala kɛnɛ tshɛ kakokaso nsala dia mbokotsha. Diɛsɛ ko kɛsɔ mbasala anangɛso la akadiyɛso efula. Amɔtshi wakasale etshikitanu lo nsɛnɔ yawɔ dia nkamba olimu wa lo tena tshɛ oko ambatshi mboka, waa misiɔnɛrɛ kana nkamba lo Bɛtɛlɛ kɛmɔtshi. Vɔ mɛtɛ wekɔ l’akambo efula wa nsala lo nsɛnɔ yawɔ. Ondo vɔ wakayahombia diangɔ efula ndo wekɔ lo mpomana l’ekakatanu efula. Koko Jehowa ekɔ lo mbatshɔkɔla efula. Tekɔ la lowando efula le wɔ. (Adia Luka 18:28-30.) Akina, kânga mbewɔ bu l’akoka wa nkamba olimu wa lo tena tshɛ, wekɔ lo mbetsha wenya efula l’olimu washimbɛ nsɛnɔ ɔsɔ ndo wekɔ lo nkimanyiya an’awɔ dia vɔ ndjoshimbamɛ.—Euh. 6:6, 7.
4. Lande na kakoka anto amɔtshi nkoma ko hawoyosala akambo la wanyandja?
4 Oko wakatadiɛnyi, nsala dikambo la wanyandja nkakatana la yɛdikɔ ya wenya ɛmɔtshi shikaa wele l’ekomelo. Tekɔ la tolembetelo efula oyadi t’oma l’Afundelo kana l’ɔkɔndɔ w’ana w’anto tɛnya dia tekɔ lo nsɛna lo nshi y’ekomelo. (Mat. 24:3, 33; 2 Tim. 3:1-5) Koko ndoko onto leya wonya shikaa wayoya ekomelo. Etena kakandatɛkɛtaka awui wendana la “djimbitelu” yayɛnya “ekumelu k’etena kene,” Yeso akate l’eshikikelo tshɛ ate: “Nduku untu leya lushi lako kana unya ako, kuyanga andjelo wa l’ulungu, kuyanga Ona, paka Papa ndame.” (Mat. 24:36) Oko wediɔ ngasɔ, anto efula mbeyaka mɛna dia ekɔ wolo ntetemala nsala akambo la wanyandja l’edja k’ɛnɔnyi efula, djekoleko naka aya edja kambowosala dikambo sɔ. (Tuk. 13:12) Onde wɛ lawɔ ndjaokaka ngasɔ lo tena dimɔtshi? Kakɔna kakoka tokimanyiya dia sho ntetemala nsala akambo la wanyandja l’olimu walanga Jehowa Nzambi la Yeso Kristo dia sho nsala ɛlɔ kɛnɛ?
Tɔsɛdingole kɛnɛ kakasale Yeso lele Ɛnyɛlɔ kaso
5. Lo toho takɔna takɛnya Yeso dia nde akakambe olimu w’esambishelo la wanyandja tshɛ?
5 Lo anto tshɛ wakasale akambo la wanyandja l’olimu waki Nzambi, Yeso Kristo mbele mɛtɛ ɛnyɛlɔ koleki tshɛ. Dui dimɔtshi diakôtshutshuya dia nde nsala akambo la wanyandja ele woho wakinde l’akambo efula wa nsala l’edja k’ɛnɔnyi esato l’etenyi eto. Koko, Yeso akasale akambo efula lo kɛnɛ kendana l’ɔtɛmwɛlɔ wa mɛtɛ wele ndoko onto okina lambosala polo ndo ɛlɔ kɛnɛ. Nde akeyanya lokombo ndo sangwelo dia She, akasambisha lokumu l’ɔlɔlɔ la Diolelo, akɛnya lo sɛkɛ wetshelo wa kashi waketshaka ewandji w’ɛtɛmwɛlɔ ndo akasukɛ lowandji laki Jehowa polo ndo lo nyɔi. Nde akadje welo tshɛ dia nkindjakindja wodja w’otondo lo mbetsha, nkimanyiya ndo nkɔnɔla anto. (Mat. 9:35) Ndoko onto lambosala akambo efula woho wakasale Yeso lo tshanda ya tshitshɛ ya ngasɔ. Yeso akakambe olimu la wolo tshɛ lo yɛdikɔ yele ndoko onto lambosala oko nde.—Joa. 18:37.
6. Lo na akaleke ndjasha Yeso?
6 Kakɔna kakatshutshuya Yeso dia nde nkamba olimu w’esambishelo aha la nɛmba? Oma lo prɔfɛsiya ka Danyɛlɛ, Yeso akeyaka ɛnɔnyi engana wakandahombe nkamba olimu ande lo ndjela alamanaka waki Jehowa. (Dan. 9:27) Ɔnkɔnɛ oko wakataditshi, olimu ande wa la nkɛtɛ wakahombe nkomɛ l’ɔkɔngɔ wa “etenyi otoi ka hendi ka lubingu,” mbuta ate l’ɔkɔngɔ w’ɛnɔnyi esato l’etenyi. Yema tshitshɛ l’ɔkɔngɔ wa nde mbɔtɔ la lotombo la Jerusalɛma l’eleko kamɔnga akatshi ka lo 33 T.D., Yeso akate ate: “Unya ambukuka dia On’a untu ntumbwama.” (Joa. 12:23) Kânga mbakandeyaka dia nyɔi kande kaki suke, nde kondeka mbidja yimba lo dikambo sɔ ndo diɔ komonga ɔkɔkɔ wa ntondo wakôtshutshuyaka dia nde nkamba olimu ande la wolo tshɛ. Koko, nde akakambe la diaaso tshɛ dia nsala lolango la She ndo dia mɛnya asekande anto ngandji kakandawaokaka. Ngandji kɛsɔ kakôtshutshuya dia nde nsɔna ambeki ande ndo mbaetsha, ko oma lâsɔ mbatoma l’olimu w’esambishelo. Nde akasale dikambo sɔ dia mbakimanyiya dia vɔ ndjeya nkamba olimu wakandatatɛ ndo ndjosala olimu akɔ lo yɛdikɔ yoleki nyɛ yakandasale.—Adia Joani 14:12.
7, 8. Kakɔna kakashihodia ambeki waki Yeso etena kakawɛnyi Yeso ɛ̂dia tɛmpɛlɔ, ndo lande na kakasale Yeso dui sɔ?
7 Dui dimɔtshi diakasalema lo lɔsɛnɔ laki Yeso mɛnyaka dimɛna ohetoheto waki la nde. Akikɔ l’etatelo k’olimu ande w’esambishelo, lo nshi y’Elekanelo ka lo 30 T.D. Etena kakaye Yeso nde la ambeki ande la Jerusalɛma, vɔ wakɛnyi “wane wakasundjaka ngombe la ekoko la fudu ya binga, ndu amengudi wa falanga wudjashi lu etemwelo.” Kakɔna kakasale Yeso ndo dui sɔ akadiɛnya ambeki ande?—Adia Joani 2:13-17.
8 Kɛnɛ kakasale ndo kakate Yeso lo diaaso sɔ akohola ambeki ande ɛtɛkɛta wa prɔfɛsiya wele l’osambo ɔmɔtshi wa Davidi wata ɔnɛ: ‘Ohetoheto dikambo dia luudu layɛ kambɔndɛ.’ (Osam. 69:9) Lande na? Nɛ dia kɛnɛ kakasale Yeso kakawodje lo wâle wa mamba. Ewandji wa tɛmpɛlɔ, mbuta ate ɛlɔmbɛdi, afundji ndo anto akina mbakasukɛka awui w’okanda wa kɔlɔ wakasalemaka lo tɛmpɛlɔ. Lo tondja tshelo ya kɔlɔ shɔ sɛkɛ ndo lo ndjishimba, Yeso akayaetɛ otunyi w’ewandji w’ɛtɛmwɛlɔ wa lo nshi shɔ. Oko wakadishihodia ambeki ande, ‘ohetoheto dikambo dia luudu la Nzambi,’ mbuta ate ohetoheto waki la nde dikambo di’ɔtɛmwɛlɔ wa mɛtɛ wakɛnama hwe. Ko ohetoheto kɛdikɛdi na? Onde vɔ ntshikitana la nsala akambo la wanyandja?
Nsala akambo la wanyandja mbɔtɔnɛka la ohetoheto
9. Ngande wakokayɛ nembetshiya tshɛkɛta ohetoheto?
9 Lo ndjela diksiɔnɛrɛ dimɔtshi, “ohetoheto” kɛdikɛdi “nomɔlomɔ ndo ndjasha l’osalosalo tshɛ dia nsala dikambo dimɔtshi” ndo diɔ mɛnyaka dia ohetoheto mbɔtɔnɛka la wangasanu, waasaso, etete ndo ɔhɛtɔhɛtɔ. Lo mɛtɛ, tɔtɛkɛta tɔsɔ tshɛ koka nembetshiya woho wakakambe Yeso olimu ande. Ɔnkɔnɛ, ekadimwelo kɛmɔtshi ka Bible (Today’s English Version) kadimolaka divɛsa sɔ ɔnɛ: “Nzambi le, ndjasha kami lo luudu layɛ kekɔ lo nombalomba oko dja.” Dui dia diambo ko, lo ɛtɛkɛta ɛmɔtshi wa la Mputu, tshɛkɛta “ohetoheto” kengama la tenyi pende dialembetshiya “otema dja” wate kana oko dja yekɔ lo mpɛta l’otema. Diakɔ diele aha la tâmu, ambeki wakohɔ ɛtɛkɛta waki Davidi etena kakawɛnyi kɛnɛ kakasale Yeso lo tɛmpɛlɔ. Ko kakɔna kakahɛtsha dja l’otema wa Yeso, mbuta ate kakôtshutshuya dia nde nsala akambo lo yoho shɔ?
10. Lo ndjela Bible, naa kitshimudi yele la tshɛkɛta “ohetoheto”?
10 Tshɛkɛta “ohetoheto” yele l’osambo wa Davidi mbɔsama oma lo tshɛkɛta ya lo Hɛbɛru yakadimɔma mbala efula ɔnɛ “kandjema” lo avɛsa akina wa lo Bible. Lo ahole amɔtshi, Traduction du monde nouveau kadimolaka tshɛkɛta shɔ ɔnɛ “kahika dia mbomamema paka ndamɛ oto.” (Adia Etumbelu 20:5; 34:14; Jashua 24:19.) Diksiɔnɛrɛ dimɔtshi dialembetshiya awui wa lo Bible mbutaka lo dikambo dia etelo kɛsɔ ɔnɛ: “Vɔ kambaka la tɔ mbala efula lo diwala. . . . Oko wele wadi kana omi la lotshungɔ la mboka olonganyi ande kandjema, Nzambi ekɔ la lotshungɔ la mpika dia anto ande mbomamemaka paka ndamɛ ndo nde mamɛka lotshungɔ lɔsɔ.” Ɔnkɔnɛ lo ndjela Bible, ohetoheto kema tsho wangasanu kana osalosalo dia nsala dui dimɔtshi, oko watongaka anto wasukɛ ekipɛ kɛmɔtshi ka ponde. Ohetoheto waki la Davidi aki kandjema ka dimɛna, mbuta ate nde kombetawɔ dia ɛngɔ kɛmɔtshi sɛmanɛ kana ndanya lokombo l’ɔlɔlɔ laki Nzambi ndo nde aki la nsaki ka wolo ka likokɛ.
11. Kakɔna kakatshutshuya Yeso dia nde ndjasha l’olimu ande l’ohetoheto tshɛ?
11 Ambeki waki Yeso waki la shadiya lo mbɔtɔnganyiya ɛtɛkɛta waki Davidi la kɛnɛ kakawɛnyi Yeso asala lo tɛmpɛlɔ. Yeso kondjasha l’olimu ande tsho l’ɔtɛ wakandeyaka dia olimu akɔ wayokomɛ, koko nɛ dia nde aki l’ohetoheto, mbuta ate aki la kandjema dikambo dia lokombo la She ndo dia ɔtɛmwɛlɔ wa pudipudi. Etena kakandɛnyi sɔnyi kakashama lokombo laki Nzambi, nde aki mɛtɛ l’ɔkɔkɔ wa monga l’ohetoheto kana kandjema ndo nde akɔshi yɛdikɔ dia nɔngɔsɔla dikambo sɔ. Etena kakɛnaka Yeso anto k’anto wasɔkishama ndo wahɛnyahɛnyama oma le ewandji w’ɛtɛmwɛlɔ, ohetoheto ande wakôtshutshuya dia mbakimanyiya ndo dia ntondja lɔkɛwɔ la kɔlɔ laki l’ewandji w’ɛtɛmwɛlɔ ɛsɔ sɛkɛ.—Mat. 9:36; 23:2, 4, 27, 28, 33.
Tonge l’ohetoheto dikambo dia ɔtɛmwɛlɔ wa mɛtɛ
12, 13. Kakɔna kasala ewandji w’ɛtɛmwɛlɔ wa lo Lokristokristo ɛlɔ kɛnɛ lo kɛnɛ kendana la a) Lokombo laki Nzambi? b) Diolelo diaki Nzambi?
12 Waonga ndo kɛnɛ kasala anto wayata dia wekɔ lo ntɛmɔla Nzambi ɛlɔ kɛnɛ fɔnaka kana ndeka ndo kɛnɛ kaketaka lo nshi ya Yeso. Ɛnyɛlɔ, tohɔ dia dikambo dia ntondo diaketsha Yeso ambeki ande dia vɔ nɔmbaka lo kɛnɛ kendana la lokombo laki Nzambi ele ɔnɛ: “Lukumbu laye la[kid]iami.” (Mat. 6:9) Onde sho mɛnaka ewandji w’ɛtɛmwɛlɔ, djekoleko wa lo Lokristokristo wetsha anto dia vɔ mbeya lokombo la Nzambi ndo likidia kana lisha nɛmɔ? Lo dihole dia nsala ngasɔ, vɔ mɔnyɔlaka Nzambi la wetshelo wa kashi wele oko Losato l’osanto, anima w’onto havu ndo ifɛrnɔ. Lo nsala ngasɔ, vɔ konyaka anto dia mbɔsa Nzambi oko onto l’ehekesa, l’otema wolo ndo l’okonda. Vɔ wekɔ lo tɛngamisha Nzambi oma lo awui wa kɔlɔ wasalawɔ ndo oma lo lɔkɛwɔ lawɔ la dungi pende. (Adia Romo 2:21-24.) Ndo nto, vɔ wekɔ lo nsala kɛnɛ tshɛ kakokawɔ nsala dia mbishɛ lokombo laki Nzambi ndo wambolinyaka oma lo dikadimwelo diawɔ dia Bible. Lo nsala ngasɔ, vɔ wekɔ lo nshimba anto diaha vɔ ndjasukanya la Nzambi ndo monga la diɔtɔnganelo la nde.—Jak. 4:7, 8.
13 Yeso aketsha ambeki ande nto dia vɔ nɔmbaka lo dikambo dia Diolelo diaki Nzambi ɔnɛ: “Diulelu diaye diayi. Lulangu laye latshami la kete uku atshamalo l’ulungu.” (Mat. 6:10) Kânga mbakalolɛ ewandji w’ɛtɛmwɛlɔ wa lo Lokristokristo dɔmbɛlɔ sɔ mbala la mbala, vɔ wekɔ lo ntshutshuya anto awɔ dia nsukɛ awui wa pɔlitikɛ ndo atshunda w’anto. Ndo nto, vɔ mɔnyɔlaka wanɛ wasala la wolo dia nsambisha Diolelo sɔ. Oma lɔkɔ, anto efula wayata dia Akristo mbewɔ hawoyɔtɛkɛta dia Diolelo diaki Nzambi ndo waya bu la mbetawɔ lɔkɔ.
14. Lo woho akɔna wambokitshakitsha ewandji w’ɛtɛmwɛlɔ wa lo Lokristokristo nɛmɔ diele la Ɔtɛkɛta wa Nzambi?
14 Lo dɔmbɛlɔ diakasale Yeso otsha le Nzambi, nde akate hwe ate: “Diui diaye dieko mete.” (Joa. 17:17) La ntondo ka nde kalola l’olongo, Yeso akɛnya dia nde ayɔsɔna ‘ɔhɔmbɔ wa kɔlamelo ndo wa kɛsɔ’ dia mbishaka anto ande mbo ya ndɛ ya lo nyuma. (Mat. 24:45) Kânga mbafunawɔ dia wekɔ lo mbetsha Ɔtɛkɛta wa Nzambi, onde ewandji wa lo Lokristokristo wekɔ lo nsala olimu wakâtshikɛ Owandji la kɔlamelo tshɛ? Kema. Vɔ mbutaka dia awui wa lo Bible wekɔ toshimu. Lo dihole dia mbisha ɛkɔkɔ awɔ mbo ya ndɛ ya lo nyuma yasha esambelo ndo yângamulɛ osase, ewandji w’ɛtɛmwɛlɔ wekɔ lo ngɛnyangɛnya atui w’anto awɔ la filozofi y’ana w’anto. Ndo nto, vɔ wambosuwola ɛlɛmbɛ waki Nzambi wendana la lɔkɛwɔ dia mbaɔtɔnganyiya la kɛnɛ kelɛwɔ ɔnɛ lɔkɛwɔ la nshi nyɛ.—2 Tim. 4:3, 4.
15. Ngande wayaokaso lo menda kɛnɛ tshɛ kasala ewandji w’ɛtɛmwɛlɔ lo lokombo la Nzambi?
15 L’ɔtɛ wa kɛnɛ tshɛ kambosalema kafɔnya anto ɔnɛ lo lokombo la Nzambi kele lo Bible, anto efula wele l’etema w’ɛlɔlɔ waya la lonyangu kana wamboshisha mbetawɔ kawɔ tshɛ le Nzambi ndo lo Bible. Vɔ waya wa mfɔ nyama adjande yaki Satana la dikongɛ diande di’akambo dia kɔlɔ. Etena kɛnayɛ ndo kokayɛ akambo asɔ wasalema lushi la lushi, ngande wayaokayɛ? Oko weso ekambi waki Jehowa, etena kɛnaso lokombo laki Nzambi lɔnyɔma kana lashama sɔnyi, onde sho tshutshuyamaka dia nsala kɛnɛ tshɛ kakokaso nsala dia nɔngɔsɔla dikambo sɔ? Etena kɛnaso anto wele l’etema w’ɔlɔlɔ wakesama ndo wahɛnyahɛnyama, onde sho tshutshuyamaka dia nsamba anima wasoyama? Etena kakɛnyi Yeso anto wa lo nshi yande ‘wahɛnyahɛnyama ndo kondjala la okimanyedi oko ɛkɔkɔ waha la olami,’ nde kokomɛ tsho lo mbaoka kɛtshi. Nde “akatatela mbaetsha akambu efula.” (Mat. 9:36; Mako 6:34) Tekɔ la ɛkɔkɔ w’eshika wa monga la ohetoheto dikambo dia ɔtɛmwɛlɔ wa mɛtɛ oko wakasale Yeso.
16, 17. a) Kakɔna kahomba totshutshuya dia sho ndjaketembola l’olimu w’esambishelo? b) Kakɔna kayotɔsɛdingola lo sawo diayela?
16 Etena kongaso l’ohetoheto l’olimu w’esambishelo, ɛtɛkɛta wa ɔpɔstɔlɔ Paulo wele lo 1 Timote 2:3, 4 mongaka la kitshimudi ya lânde (Adia.) Sho kambaka olimu w’esambishelo l’etete aha tsho l’ɔtɛ weyaso dia tekɔ lo nsɛna lo nshi y’ekomelo, koko ndo l’ɔtɛ weyaso dia lolango laki Nzambi ele dia anto monga la ewo k’akambo wa mɛtɛ dia vɔ lawɔ mbeya mbɔtɛmɔla, mbokambɛ ndo nkondja ɛtshɔkɔ. Sho tshutshuyamaka dia ndjaketembola l’olimu w’esambishelo aha tsho l’ɔtɛ w’ɔnɛ ekomelo kaya suke, koko ndo l’ɔtɛ walangaso ntombola lokombo laki Nzambi ndo nkimanyiya anto dia vɔ mbeya lolango lande. Tekɔ l’ohetoheto dikambo di’ɔtɛmwɛlɔ wa mɛtɛ.—1 Tim. 4:16.
17 Oko weso ekambi waki Jehowa, tekɔ la ewo k’akambo wa mɛtɛ wendana la sangwelo diaki Nzambi dikambo di’anto ndo dia nkɛtɛ. Tekɔ l’akoka wa nkimanyiya anto dia vɔ ntana ɔngɛnɔngɛnɔ ndo elongamelo ka mɛtɛ kendana la nshi yayaye. Sho kokaka mbaɛnya woho wakokawɔ ndjoshimbamɛ etena kayolanyema dikongɛ di’akambo diaki Satana. (2 Tes. 1:7-9) Lo dihole dia sho nkɔmɔ l’ɔtɛ wɛnama di’oko lushi laki Jehowa lekɔ lo ntshimbatshimba, sho pombaka monga l’ɔngɛnɔngɛnɔ lo woho wekeso l’etena ka monga l’ohetoheto dikambo di’ɔtɛmwɛlɔ wa mɛtɛ. (Mika 7:7; Hab. 2:3) Ngande wakokaso monga l’ohetoheto wa ngasɔ? Tayɔsɛdingola dikambo sɔ lo sawo diayela.
Onde wɛ kokaka nembetshiya?
• Kakɔna kakakimanyiya Yeso dia nde ndjasha l’olimu w’esambishelo aha la mpekɔ?
• Lo ndjela Bible, naa kitshimudi yele la tshɛkɛta “ohetoheto”?
• Kakɔna kɛnaso ɛlɔ kɛnɛ kahomba totshutshuya dia monga l’ohetoheto dikambo di’ɔtɛmwɛlɔ wa mɛtɛ?
[Osato wa lo lɛkɛ 8]
Yeso akayasha tshɛ lo nsala lolango laki Nzambi ndo lo mɛnya ngandji kakandokaka asekande anto
[Osato wa lo lɛkɛ 10]
Tekɔ l’ɛkɔkɔ w’eshika wa monga l’ohetoheto dikambo di’ɔtɛmwɛlɔ wa mɛtɛ