Tewɔ tolonga taki Satana
‘Nyoyatondja oma lo djonga ya Diabolo.’—2 TIM. 2:26.
NGANDE WAYOYOKADIMOLA?
Ɔsɛdingwelo akɔna wahombaso nsala naka tekɔ la mbekelo ka mɔnyɔlaka anto akina?
Lo ndjela ɛnyɛlɔ kaki Pilato nde la Petero, wetshelo akɔna wakondjaso lo kɛnɛ kendana la mboka anto wɔma kana sɛngiyama?
Ngande wakokaso mbewɔ ndjaɛndja onongo amboleka?
1, 2. Naa tolonga taki Satana tayangaso nsɛdingola lo sawo nɛ?
SATANA ekɔ lo nsala la wolo dia munda ekambi wa Jehowa lo tolonga tande. Nde bu paka l’oyango wa todiaka oko watodakaka mengenga nyama kondjinde. Koko oyango ande woleki woke ele wa tokonya dia sho nsala kɛnɛ kalangande.—Adia 2 Timote 2:24-26.
2 Dia mengenga munda nyama, nde mambaka weho wa tolonga totshikitanyi. Nde mbeyaka mamba djonga yɛnama lo onemba wa nyama. Kana nde koka mbishɛ djonga l’oyango wa nyama ntala la shashimuya. Satana ekɔ lo nkamba la toho ta tolonga ta ngasɔ dia munda ekambi waki Nzambi. Naka sho nangaka mbewɔ diaha mundama lo tolonga tɔsɔ, kete sho pombaka nkitanyiya ɛhɛmwɛlɔ watɛnya woho wele tolonga taki Satana ndo ndjakokɛ. Lo sawo nɛ, tayɛna woho wakokaso ndjakokɛ oma lo tolonga tosato taleka Satana nkamba la tɔ dia tonda. Tolonga takɔ ko 1) ɛtɛkɛta w’otondjatondja, 2) wɔma ndo tɔsɛngiya t’oma le anto akina, ndo 3) ndjaɛndja onongo amboleka. Lo sawo diayela, tayɔsɛdingola tolonga tokina tohende taki Satana.
ƐTƐKƐTA W’OTONDJATONDJA
3, 4. Kakɔna kakoka ntomba naka sho ntondja ɛtɛkɛta w’otondjatondja? Sha ɛnyɛlɔ.
3 Dia nkusola nyama oma l’ahole wɔlamayɔ, mengenga mɔtshi mbidjaka dja lo lohanga lɔmɔtshi l’oyango wa munda nyama etena kayayalawɔ. Lo yoho mɔtshi, Diabolo ekɔ oko onto ladja dja l’etshumanelo. Dia nkotsha oyango ɔsɔ, nde salaka di’ase etshumanelo mimɔ oma lo dihole dia wɔladi sɔ. Ngande wakokaso ndjokoma lo nkamba kâmɛ la nde ndo mundama lo djonga yande shɔ aha la sho mbeya?
4 Ombeki Jakɔba akɛdika lolemi la shase ya dja. (Adia Jakoba 3:6-8.) Naka hatolami lolemi laso, kete lo yoho mɔtshi sho mbeyaka ndjodja dja l’etshumanelo. Ngande wakoka dui sɔ salema? Dia nshihodia dui sɔ dimɛna, nyɛsɔ tɔshi ɛnyɛlɔ kɛnɛ: Wambosha diewoyelo lo losanganya ɔnɛ kadiyɛso kapanda aya ombatshi mboka wa pondjo. L’ɔkɔngɔ wa losanganya, apandjudi ahende wambotatɛ nsawola lo kɛnɛ kendana la diewoyelo sɔ. Ɔmɔtshi ambɛnya dia nde ekɔ l’ɔngɛnɔngɛnɔ l’ɔtɛ w’ehamelo wambosala kadiyɛso kɛsɔ. Okina ambotatɛ mbidja tâmu lo ɛkɔkɔ wotshutshuyisha kadiyɛso dia nde monga ombatshi mboka ndo ambɛnya dia nde ekɔ lo nyanga tsho dia monga la lokumu l’etshumanelo. Lo apandjudi ahende asɔ, akɔna ayoyɔsɔna dia nde monga ɔngɛnyi ayɛ? Ondo tamboka dia sho kokaka mbishola esadi eto onto lalanga mbidja dja l’atei w’etshumanelo oma lo yoho yande ya ntɛkɛta.
5. Ngande wakokaso ndjasɛdingola dia mbewɔ ɛtɛkɛta w’otondjatondja?
5 Ngande wakokaso mbewɔ dia ntondja ɛtɛkɛta w’otondjatondja? Yeso akate ate: “Unyo atoteketaka uma lu efula k’akambu weli l’utema.” (Mat. 12:34) Ɔnkɔnɛ, dui dia ntondo diahombaso nsala ele, nsɛdingola otema aso. Shi ondo sho pombaka ndjaka nsaki yatotshutshuya dia ntondja ɛtɛkɛta w’otondjatondja? Ɛnyɛlɔ, etena kokaso ɔnɛ ɔnangɛso kapanda ambokondja diɛsɛ dimɔtshi l’etshumanelo, onde sho mbetawɔka ɔnɛ nde ekɔ l’eyango w’amɛna, ko kana sho mvɔka tshɔdia lo mbuta ɔnɛ eyango wa kɔlɔ mbele la nde? Naka tekɔ la mbekelo ka mbidjaka tâmu lo eyango wele la anangɛso ndo akadiyɛso wa kambɛ Jehowa, kete teye dia Satana akadje tâmu lo eyango waki la Jɔbɔ wa kambɛ Nzambi. (Jobo 1:9-11) Lo dihole dia mvɔ tshɔdia lo eyango wele l’anangɛso kana akadiyɛso, sho pombaka nsɛdingola kɛnɛ katotshutshuya dia mbaɔnyɔla. Onde sho mɛtɛ tekɔ l’ɛkɔkɔ w’eshika wa nsala akambo lo yoho shɔ? Kana onde taya la lɔkɛwɔ la kɔlɔ lambokokanɛ l’andja ɔnɛ la mbokanaka kandjema?—2 Tim. 3:1-4.
6, 7. a) Naa ɛkɔkɔ ɛmɔtshi wakoka ndjotokonya dia sho mɔnyɔla anto akina? b) Kakɔna kahombaso nsala naka wambotosalɛ kɔlɔ?
6 Nyɛsɔ tende ɛkɔkɔ ekina wakoka ndjotokonya dia mɔnyɔla anto akina. Dui dimɔtshi ele, ondo sho nangaka nsala akambo wakoka mambiya anto akina. Ekɔ ngasɔ nɛ di’etena kɔnyɔlaso anto akina, sho mɛnyaka dia tekɔ ɔlɔlɔ mbaleka vɔ tshɛ. Kana sho mbeyaka ntatɛ mbisha tɛkɛ nɛndɛ l’ɔtɛ weso bu la diɛsɛ dimɔtshi diambokondja onto okina. Koko, teye dia naka sho mɔnyɔla anto akina l’ɔtɛ wa lotamanya, kandjema ndo wahatatondoya akambo amɔtshi, kete dja mbadjaso l’etshumanelo.
7 Mbeyaka monga ko tekɔ lo mfɔnya ɔnɛ tekɔ l’ɛkɔkɔ w’eshika wa mɔnyɔla anto akina. Sho mbeyaka nsala ngasɔ lo mbuta ɔnɛ ɔnangɛso kana kadiyɛso kakɔ akatɛkɛta kɔlɔ lo dikambo diami. Naka ngasɔ mbediɔ, kete teye dia nkaloya kɔlɔ lo kɔlɔ hokandola dui sɔ. Ndo nto, nsala ngasɔ ekɔ oko onto ladja esasɛ lo dja ndo lakimanyiya Satana dia nsala lolango lande, koko aha la Nzambi. (2 Tim. 2:26) Diakɔ mbele, sho pombaka mbokoya Yeso lo kɛnɛ kendana la dikambo sɔ. Bible mbutaka ɔnɛ: “Lam’akawôtenge, ndi kumbatenga,” koko “ndi akayakimo le one latulumbwanyaka ololo.” (1 Pet. 2:21-23) Yeso akayaɛkɛ le Jehowa dia ndamɛ nkandola akambo lo yoho ndo lo wonya walangande. Sho lawɔ pombaka ndjaɛkɛ le Nzambi lo yoho shɔ. Naka sho nkamba l’ɛtɛkɛta aso dimɛna, kete tayokimanyiya dia nama “kâmɛ lo dimama dia wɔladi” l’atei w’etshumanelo. Paulo akafunde ate: “Ɔnkɔnɛ, dimi lele lo lokanu l’ɔtɛ wa Nkumadiɔndjɔ, lambonyɔsɛngasɛnga dia nyu nkɛndakɛnda lo yoho yɔtɔnɛ la leeta lakanyelamɛ, la okitshakitsha tshɛ ndo la memakana, la solo dia lotutsha, nyakikanɛ onto la wonyande lo ngandji, nyadja welo wa l’otema ɔtɔi dia monga kâmɛ lo nyuma lo dimama dia wɔladi.” (Ef. 4:1-3, NW)
WƆMA NDO TƆSƐNGIYA T’OMA LE ANTO AKINA
8, 9. Lande na kakayofundɛ Pilato Yeso dilanya dia nyɔi?
8 Nyama kambondama lo djonga bu nto la wolo wa nsala kɛnɛ tshɛ kalangatɔ. Woho akɔ wâmɛ mbele, onto latala lo djonga ya wɔma ndo ya tɔsɛngiya t’oma le anto akina hatonga nto l’akoka wa nɔmbɔla akambo amɔtshi wa lo lɔsɛnɔ lande. (Adia Tukedi 29:25.) Kakianɛ, nyɛsɔ tɔsɛdingole bɛnyɛlɔ di’anto ahende wakatale lo djonga ya wɔma ndo ya sɛngiyama oma le anto akina, kele tende wetshelo wakokaso nkondja.
9 Ɛnyɛlɔ ka ntondo, ele kaki Pɔnsɔ Pilato laki nguvɛrnɛrɛ k’ase Rɔma. Nde akeyaka dia Yeso komonga l’onongo ndo mɛnamaka dia nde konanga mbodiaka. Diakɔ diakandate ɔnɛ Yeso bu “la dikambo dia ndi mvo.” Koko Pilato akayôfundɛka dilanya dia nyɔi. Lande na? Nɛ dia nde akasɛngiyama oma le olui w’anto. (Luka 23:15, 21-25) Dia ntshutshuya Pilato dia nde nsala kɛnɛ kakawalangaka, vɔ wakawotɛ vate: “Naka we ambutshungula untu one, keti we kema ongenyi wa Kayisa.” (Joa. 19:12) Mɛnamaka dia Pilato aki la wɔma wa nshisha dihole diande dia nguvɛrnɛrɛ kana ndjakema naka nde ntshungola Yeso. Ɔnkɔnɛ, nde aketawɔ nsala lolango laki Satana.
10. Kakɔna kakakonya Petero dia nde manguna Kristo?
10 Ɛnyɛlɔ ka hende, ele kaki ɔpɔstɔlɔ Petero laki ɔngɛnyi wa ma ma waki Yeso. Nde akasambisha anto lo sɛkɛ ɔnɛ Yeso mbele Mɛsiya. (Mat. 16:16) Nde akatshikala la kɔlamelo kânga l’etena kakatshike ambeki akina Yeso etena kakiwɔ koshihodia wetshelo ɛmɔtshi wakandawaetsha. (Joa. 6:66-69) Etena kakaye atunyi wa Yeso dia ndjowonda, Petero akakambe la yɔmbɔ yande dia nkokɛ Nkumɛnde. (Joa. 18:10, 11) Koko l’ɔkɔngɔ diko, Petero akayotala lo djonga ya wɔma ndo akanguna ɔnɛ nde heye Yeso Kristo. Lo tshenyi ya wonya shɔ, Petero akandama lo djonga ya wɔma w’onto ndo akashisha dihonga dia ntshikala la kɔlamelo le Yeso.—Mat. 26:74, 75.
11. Naa tolonga tɔmɔtshi taki Satana tahombaso mbewɔ?
11 Oko weso Akristo, sho pombaka nshika tanga la ntondo ka tɔsɛngiya t’oma le anto ta nsala kɛnɛ kahalange Nzambi. Ewandji aso w’olimu kana anto akina mbeyaka mpemba dia totshutshuya dia sho nsala akambo wele bu losembwe kana ndjasha l’awui wa mindo wa dieyanelo. Ambeki mbeyaka tshutshuyama oma le asekawɔ wa la kalasa dia mbuva lo ɛgzamɛ, menda esato wɛnyawɔ anto etakataka, nnɔ mfɔka, didjoyadjoya, ndjasha l’ɔnwɛlɔ wa wanu kana l’awui wa mindo wa dieyanelo. Ko kakɔna kakoka tokimanyiya diaha sho ntala lo djonga ya wɔma ndo ya sɛngiyama oma le anto akina dia nsala kɛnɛ kahalange Jehowa?
12. Wetshelo akɔna wakokaso nkondja oma l’ɛnyɛlɔ kaki Pilato nde la Petero?
12 Nyɛso tendake wetshelo wakokaso nkondja oma l’ɛnyɛlɔ ka Pilato nde la Petero. Kânga mbaki Pilato komonga l’ewo k’efula kendana la Kristo, nde akeyaka dia Yeso komonga l’onongo ndo komonga onto k’onto. Koko Pilato komonga l’okitshakitsha ndo kombokaka Nzambi ka mɛtɛ ngandji. Ɔnkɔnɛ, Diabolo akawonde esadi eto. Petero lo wedi ande, aki la ewo ka mɛtɛ ndo akokaka Nzambi ngandji. Koko kânga mbakidiɔ ngasɔ, l’etena kɛsɔ, nde komonga la dihonga, akayongaka la wɔma ndo akayɔsɛngiyamaka oma le anto akina. La ntondo ka Yeso mundama, Petero akawotɛ ate: “Kuyanga akina tshe wayutakana, dimi halutakana.” (Mako 14:29) Otondonga Petero akayaɛkɛ le Jehowa oko akasale omembi w’esambo, tshiki nde mɛtɛ otoyalɔngɔsɔla dia ndjoshika tanga la ntondo k’ehemba wakayôkomɛ. Omembi akɔ w’esambo akembe ate: “[Jehowa] eko lami wedi, handjuka woma. Kayeya untu ntshelami”? (Osam. 118:6) L’otsho w’ekomelo wa lɔsɛnɔ lande la nkɛtɛ, Yeso akɔshi Petero nde l’apɔstɔlɔ akina ahende ko akatshu la wɔ lo ekambɔ ka Ngɛtɛsɛmanɛ. Koko lo dihole dia vɔ nsungukala, Petero nde l’asekande wakalale. Yeso akawaemula ndo akawatɛ ate: “Nyosenaki, nyolombaki, nyutokoto l’ehimba.” (Mako 14:38) Yema tshitshɛ oma lâsɔ, Petero akalale nto ndo l’ɔkɔngɔ diko ndjotala lo djonga ya wɔma ndo ya sɛngiyama oma le anto akina.
13. Akokaso nsala dia nshika tanga la ntondo ka tɔsɛngiya ta nsala awui wa kɔlɔ?
13 Ɛnyɛlɔ kaki Pilato nde la Petero kokaka tetsha wetshelo okina w’ohomba efula: Diaha sho ntala lo djonga ya sɛngiyama oma le anto akina, sho pombaka monga l’ewo ka mɛtɛ, okitshakitsha, mbeya elelo aso, mboka Nzambi ngandji ndo mbôka wɔma, koko aha anto. Naka mbetawɔ kaso pikama lo ewo ka mɛtɛ, kete tayɔtɛkɛta la dihonga tshɛ akambo wendana la dietawɔ diaso. Dui sɔ diayotokimanyiya dia sho nshika tanga la ntondo ka tɔsɛngiya t’oma le anto ndo aha mbaoka wɔma. Ndo nto, tatofunake pondjo ɔnɛ tekɔ la mbetawɔ ka wolo. Lo dihole dia sho nsala ngasɔ, sho pombaka mbetawɔ l’okitshakitsha tshɛ ɔnɛ tekɔ l’ohomba wa nyuma kaki Nzambi dia sho nshika tanga la ntondo ka tɔsɛngiya t’oma le anto. Sho pombaka nɔmbaka Jehowa dia nde tosha nyuma kande ndo mbetawɔ dia ngandji kawokaso totshutshuya dia sho mamɛ lokombo ndo atɔndɔ ande. Ndo nto, sho pombaka tayalɔngɔsɔlaki la ntondo dia ndjoshika tanga l’ehemba wakoka ndjotokomɛ. Ɛnyɛlɔ, naka ambutshi talɔmbi Jehowa kâmɛ l’anawɔ la ntondo, kete dui sɔ kokaka nkimanyiya ana dia vɔ toshika tanga la ntondo ka tɔsɛngiya t’asekawɔ wawatshutshuya dia nsala akambo amɔtshi wa kɔlɔ.—2 Kor. 13:7.a
NDJAƐNDJA ONONGO AMBOLEKA
14. Kakɔna kalanga Satana tokonya dia sho mfɔnya lo kɛnɛ kendana la munga yakatasale?
14 Dia munda nyama lo djonga, mengenga kitshaka diangɔ dia wetsho, ɛnyɛlɔ oko atshuka kana esongo lâdiko dia deha ko nde diâmba lo onemba wa nyama. Nyama kele bu la yewo dilɛwɔlaka ko deha diakɔ kikamɛ ndo kiminola. Ndjaɛndja onongo amboleka kokaka monga tshondo ya wotsho wakoka tominola. Naka sho ndekaka mbidja yimba lo wandja wakatasale, kete sho mbeyaka ndjoyaoka oko onto “lambowediawediama tshe.” (Adia Osambu 38:3-5, 8.) Satana mbeyaka tokonya dia sho mfɔnya ɔnɛ Jehowa hatôtodimanyiya munga yakatasale ndo ɔnɛ sho hatotonga l’akoka wa nkitanyiya wadjango ande tshɛ.
15, 16. Ngande wakokayɛ mbewɔ djonga ya ndjaɛndja onongo amboleka?
15 Ngande wakokaso mbewɔ djonga ya ndeka ndjaɛndja onongo? Naka wɛ akasale pɛkato ka woke, kete sala la wolo dia nyomɔlɔngɔsɔla diɔtɔnganelo diele lam’asayɛ la Jehowa aha la ntshimbatshimba. Ɛnana la dikumanyi ndo lɔmbawɔ ekimanyielo. (Jak. 5:14-16) Sala kɛnɛ tshɛ kahombama dia nɔngɔsɔla kɔlɔ kosadiyɛ kɛsɔ. (2 Kor. 7:11) Naka wɛ ambolongola ohokwelo, kete tɔkɔmɔke nɛ di’ohokwelo ekɔ djembetelo yɛnya dia Jehowa kôkaka ngandji. (Heb. 12:6) Yashikikɛ diaha nsala pɛkato kakɔ nto ndo ewɔ awui tshɛ wakoka ndjokokonya dia wɛ ndjokisala. L’ɔkɔngɔ wa wɛ ndjatshumoya ndo ntshika pɛkato kakɔ, onga la mbetawɔ ɔnɛ olambo wa tshungo waki Yeso wayokomba pɛkato yakayasale.—1 Joa. 4:9, 14.
16 Anto amɔtshi tetemalaka ndjaɛndja onongo amboleka l’ɔtɛ wa pɛkato yakawasale, koko wambôdimanyiyamaka. Naka ngasɔ mbediɔ ndo lo dikambo diayɛ, kete ohɔ dia Jehowa akadimanyiya Petero ndo apɔstɔlɔ akina wakasɛkɛ Yeso paka l’etena kakinde l’ohomba awɔ. Jehowa akadimanyiya ndo pami kɛmɔtshi kakatshanyema oma l’etshumanelo ka la Kɔrɛtɔ l’ɔtɛ wakandasale monanyi, koko akayoyatshumoya. (1 Kor. 5:1-5; 2 Kor. 2:6-8) Bible tɛkɛtaka di’anto akina wakasale munga ya weke, koko Nzambi akâdimanyiya l’ɔtɛ wakawayatshumoya.—2 Ek. 33:2, 10-13; 1 Kor. 6:9-11.
17. Kakɔna kakoka olambo wa tshungo tosalɛ?
17 Jehowa ayokodimanyiya ndo ayohɛ pɛkato yakayasale naka wɛ ndjatshumoya l’otema ɔtɔi ndo mbetawɔ kɛtshi kande. Tɔfɔnyake pondjo di’olambo wa tshungo waki Yeso hawokoke nkomba pɛkato yayɛ. Naka wɛ mfɔnya ngasɔ, kete wɛ mbeyaka ndjotala lo djonga yaki Satana ya ndjaɛndja onongo amboleka. Oyadi kɛnɛ tshɛ kalanga Satana ketawoya, eya di’olambo wa tshungo kokaka nkomba munga y’anto tshɛ wakasale pɛkato ndo wakayatshumoya. (Tuk. 24:16) Ɔnkɔnɛ, naka sho monga la mbetawɔ l’olambo akɔ, kete hatotoyaɛndja onongo amboleka l’ɔtɛ wa pɛkato yakatasale ndo dui sɔ diayokoka tokimanyiya dia kambɛ Nzambi l’otema aso tshɛ, la yimba yaso tshɛ ndo l’anima aso tshɛ.—Mat. 22:37.
SHO MBEYAKA TOLONGA TAKI SATANA
18. Ngande wakokaso mbewɔ tolonga taki Satana?
18 Teye dia Satana hatewoyaki pondjo woho wa djonga wayondotâmba nɛ dia nde ekɔ l’oyango wa tonda. Koko lam’ele sho mbeyaka tolonga tande, sho kokaka tiewɔ. (2 Kor. 2:10, 11) Hatotondama lo tolonga tande naka sho nɔmba Jehowa lomba dia sho nshika tanga la ntondo k’ehemba. Ombeki Jakɔba akafunde ate: “Naka omotshi ambuhumba yimba, ndi alombe [Nzambi], katushaka antu tshe diango la lukahu, hâhangwela, ku ndi ayuwushayo.” (Jak. 1:5) Ɔnkɔnɛ, sho pombaka nsala akambo lo yoho yɔtɔnɛ l’alɔmbɛlɔ aso lo salaka wekelo w’onto ndamɛ mbala la mbala ndo lo nkitanyiya alako wa lo Bible. Ɔhɔmbɔ wa kɔlamelo ndo wa kɛsɔ ekɔ lo totondjɛ ekanda watokimanyiya dia sho mbeya tolonga taki Satana ndo tiewɔ.
19, 20. Lande na kahombaso mpetsha kɛnɛ kele kɔlɔ?
19 Dɔmbɛlɔ ndo wekelo wa Bible fudiaka ngandji kele la so ka nsala kɛnɛ kele ɔlɔlɔ. Diakɔ mbele, sho pombaka mpetsha kɛnɛ kele kɔlɔ. (Osam. 97:10) Nkana yimba lo etombelo wa kɔlɔ waya lo ndjasha l’akambo wa kɔlɔ tokimanyiyaka dia sho mbewɔ akambo akɔ. (Jak. 1:14, 15) Naka sho mpetsha kɛnɛ kele kɔlɔ ndo nanga kɛnɛ kele ɔlɔlɔ, kete tayewɔ akambo wakamba la Satana dia tonda lo tolonga tande.
20 Ande lowando lele la so le Jehowa lo woho watokimanyiyande diaha sho ntala lo tolonga taki Satana lee! Lo tshimbo ya nyuma kande, Bible ndo okongamelo ande, Jehowa toshimbɛka ‘oma le kanga kɔlɔ.’ (Mat. 6:13) Lo sawo diayela, tayɛna woho wakokaso mbewɔ tolonga tokina tohende taki Satana talekande munda ekambi waki Nzambi.
[Nɔte ka l’ɛse ka dikatshi]
a Ambutshi kokaka nkɛtshanya l’anawɔ asawo amɔtshi wakatondjama lo dibuku Les jeunes s’interrogent — Réponses pratiques, volume 2, lɛkɛ 132-133, lo Falase. Ɛnyɛlɔ oko sawo diele l’ɔtɛ a dui ɔnɛ: “Woho wa nshika tanga la ntondo ka tɔsɛngiya t’olui w’anto.” Vɔ kokaka nkamba l’awui asɔ l’Ɔtɛmwɛlɔ wa lo nkumbo wa la dikɔlɔ.
[Osato wa lo lɛkɛ 21]
Ɛtɛkɛta w’otondjatondja koka monga oko onto ladja dja l’etshumanelo
[Osato wa lo lɛkɛ 24]
Lande na kahayahombe ndjaɛndja onongo amboleka?