“Dimi Lakɛnyi, koko Dimi Koshihodia”

Etena kakimi dikɛnda, ambutshi ami wakadiake diwala ndo mama mbakahombe toodia dimi la nondo diami di’apami pende la la womoto. Nshi shɔ, akanga a mpoke wa lo wodja wa France kɔmbɔtɔka kalasa oko wodiosalema nshi nyɛ, ndo woho wakawetshaka komonga dimɛna. Koko, nshi yakimi dikɛnda laki la diɛsɛ diaki komonga l’akanga a mpoke efula. Lekɔ lo nanga nyotɛ diɛsɛ diakɔ.

Nshi mɔtshi, embetsha efula wakafɔnyaka dia akanga a mpoke wakakokaka mbeka lo menda tsho woho watɛkɛtawɔ. Koko, la France lɛnɛ akamole, ewandji wa lɛɛta wakashimbe di’ɔtɛkɛta w’akanga a mpoke mbetshama la kalasa. Lam’ele embetsha kombasɔnaka dia nkadimola, akanga a mpoke amɔtshi wakakɔmaka tsho anya etena kakiwɔ lo kalasa.

L’edja k’ɛnɔnyi ɛmɔtshi, laketshaka wenya efula lomingu tshɛ kaamɛ la onganga wakasakɛka anto wele bu l’akoka wa ntɛkɛta dimɛna. Wakakimɛka l’onyɔ kana lo wodi dia paka dimi ntɛkɛta tɔtɛkɛta takimi kombokaka ndo mboka. Dimi komonga l’akoka wa nsawola l’asekami akina. Ɔsɔ mɛtɛ aki ɛnɔnyi w’asui le mi.

Lam’akamakotsha ɛnɔnyi esamalo, wakatofundjaka lokombo lo kalasa y’akanga a mpoke. Oma l’etatelo, lakekesanɛka l’ana akina waki vɔ lawɔ akanga a mpoke. Lonyangu ko ndo lo kalasa shɔ, wakashimbe dia mbetsha ɔtɛkɛta w’akanga a mpoke. Naka sho sombɔ ko ntɛkɛta lo ɔtɛkɛta w’akanga a mpoke, wakatɔkɔmɔlaka ndo wakatohatolaka divo. Koko, takasawolaka lo woshɛshɛ lo nkamba la tɔjɛstɛ takatokana. L’ekomelo, lakayongaka l’akoka wa nsawola l’asekami wa la kalasa. Ngasɔ mbakamɛ ɛnɔnyi ami ɛnɛi w’ɔngɛnɔngɛnɔ.

L’amakamakotsha ɛnɔnyi dikumi, wakatofundja lokombo lo kalasa yaki l’ana wakokaka. Laki mɛtɛ la lonyangu efula. Lakafɔnyaka dia dimɛ oto mbele kanga lohoke l’andja w’otondo. Ase nkumbo kami kombidja yimba dia mbeka ɔtɛkɛta w’akanga a mpoke ndo konangaka dimi monga kaamɛ l’akanga a mpoke akina nɛ dia dɔkɔtɛlɛ akawatɛ dia nde koka sakɛmi ko dimi tatɛ ntɛkɛta. Lakohɔ lushi lɔmɔtshi lakatatshu tenda onganga ɔmɔtshi waki manyi l’akambo wa hemɔ y’akanga a mpoke. Nde aki la dibuku di’akanga a mpoke la mɛsa ande. Etena kakamɛnyi osato waki lo lohoso la dibuku sɔ, lakaditshume lohita dia nde pami diɔ. Dɔkɔtɛlɛ akanya dibuku ndo akadishɛ esadi eto.a

LAKATATƐ MBEKA AKAMBO WA MƐTƐ

Mama akatoodia lo yoho y’ɔtɔnɛ l’atɔndɔ wa lo Bible. Nde akatshɔka la so lo nsanganya y’Akristo la Mérignac suke la Bordeaux. Oko wakimi dikɛnda, dimi lakokaka paka towui tɔmɔ toto lo nsanganya. Koko, ase etshumanelo wakadjasɛka suke lami, wakɔsaka nɔtɛ ya kɛnɛ kakawetshaka lo nsanganya. Lakanandema oma lo ngandji kawɔ ndo woho wakawayashaka le mi. Mama akambetshaka Bible la ngelo koko dimi koshihodiaka kɛnɛ kakandambetshaka. Lakayaoke oko ɔprɔfɛta Danyɛlɛ, laki l’ɔkɔngɔ wa nde nongola prɔfɛsiya oma le ondjelo ɔmɔtshi, nde akate ate: “Dimi lakuki aui aso, keli dimi kunshihudia.” (Danyele 12:8) Ngasɔ, mbakidiɔ ndo lo kɛnɛ kendana la mi. “Dimi lakɛnyi, koko dimi koshihodia.”

Dimi lakatashihodiaka wetshelo w’etatelo w’akambo wa mɛtɛ wa lo Bible yema yema. Lakɔsaka kɛnɛ kakamekaka la nɛmɔ ndo lakasalaka la wolo dia kikitanyiya. waonga w’amɛna waki l’anangɛmi ndo l’akadiyɛmi, aki tshondo ya wetshelo le mi. Ɛnyɛlɔ, Bible tetshaka dia sho monga la solo dia lotutsha. (Jakɔba 5:7, 8) Dimi koshihodiaka kɛnɛ kalembetshiya monga la solo dia lotutsha. Etena kakamɛnyi asekami ambetawudi wakɛnɛmɔla dionga sɔ, mbakamayoshihodiaka elɛwɔ monga la solo dia lotutsha. Lo mɛtɛ, etshumanelo k’Akristo kaki tshondo y’ɔtshɔkɔ wa woke le mi.

LAKATATƐ NKƆMƆ, KOKO DUI DIMƆTSHI DIAKAKEKETSHA

Lushi lɔmɔtshi, lam’akimi l’ɛnɔnyi dikumi l’ɛmɔtshi lakɛnyi ɛlɔngɔlɔngɔ ɛmɔtshi waki akanga a mpoke wayasawola lo shinga. Lakatatɛ mbekesanɛ lawɔ lo woshɛshɛ ndo takatatɛ nsawola l’ɔtɛkɛta w’akanga a mpoke w’ase France. Lakatetemala mbɔtɔ lo nsanganya y’Akristo lɛnɛ akamatohomana l’ɔlɔngɔlɔngɔ ɔmɔtshi waki Ɔmɛnyi wa Jehowa welɛwɔ Stéphane lakayashaka efula le mi. Nde akasalaka la wolo dia nsawola la mi, ndo laki l’ɔngɛnɔngɛnɔ w’efula etena kakimi kaamɛ la nde. Koko, lakayɔkɔmɔka nɛ dia Stéphane akayondamaka ndo akayɔtɔlamaka lo lokanu l’ɔtɛ wa lomangemange lande l’Okristo. Laki la lonyangu heyama. Lakayotshikaka ntshɔ lo nsanganya l’ɔtɛ wa dui sɔ.

L’ɔkɔngɔ wa ngɔndɔ dikumi l’ɔtɔi, wakatondja Stéphane oma lo lokanu. Ande ɔngɛnɔngɛnɔ waki la mi etena kakatatɛ Stéphane nsawola la mi l’ɔtɛkɛta w’akanga a mpoke lee! Dui sɔ diakamambiya woho w’anyanya ndo lakayambola nte: Ngande wamondoteya ɔtɛkɛta w’akanga a mpoke? Tetele, nde akatoweka etena kakinde lo lokanu. Kam’akamɛnyi Stéphane atɛkɛta la mi lo nkamba la tɔjɛstɛ, laki l’ɔngɛnɔngɛnɔ w’efula nɛ dia lakeyaka dia akambo wambɔlɔngɔswama.

LAKAYOSHIHODIAKA AKAMBO WA MƐTƐ WA LO BIBLE

Stéphane akatatɛ mbetshami Bible. Oma l’etena kɛsɔ, lakayonga l’akoka wa nshihodia akambo wa mɛtɛ wakam’ekaka ntondo. Oko wakimi dikɛnda, lakangɛnangɛnaka esato w’amɛna efula wa tanema lo mikanda aso walembetshiya Bible. Lakasɛdingolaka esato ɛsɔ dimɛna ndo dui sɔ diakakimanyiyaka dia kakatshiya ɛkɔndɔ wa lo Bible lo yimba. Lakeyaka ɛkɔndɔ wendana l’Abrahama, ‘kanula’ yande ndo “olui a woke.” Koko, paka etena kakawayonembetshiyaka ɛkɔndɔ ɛsɔ l’ɔtɛkɛta w’akanga a mpoke mbakamayowashihodiaka dimɛna. (Etatelu 22:15-18; Ɛnyɛlɔ 7:9) Ɔtɛkɛta w’akanga a mpoke mbaki mɛtɛ ɔtɛkɛta ami.

Etena kakamayongaka l’akoka wa nshihodia wetshelo washama lo nsanganya, lakanandema efula ndo nsaki kami ka mbeya akambo wa mɛtɛ kakaleke mfula. Lo ekimanyielo k’ɔnangɛso Stéphane, eokelo kami k’akambo wa mɛtɛ wa lo Bible kakatetemala mfula ndo lo 1992, lakayakimɔ le Jehowa Nzambi ndo lakabatizama. Kaanga mbakamasale ehamelo ɛsɔ, laki paka l’ɔsɔnyi ndo takimi l’akoka wa nsawola l’anto akina dimɛna.

WOHO WAKAMALƆSHANA LA DIKI

Djui y’akanga a mpoke ya lɛnɛ akamasanganaka yakasanganyema kaamɛ la etshumanelo ka la Pessac, ngielongelo mɔtshi ya l’osomba wa Bordeaux. Dui sɔ diakakimanyiya efula ndo lakatetemala mpama lo nyuma. Kaanga mbakimi l’okakatanu dia nsawola l’anto akina, asekami Akristo waki komonga akanga a mpoke, wakasalaka kɛnɛ tshɛ kakawakokaka nsala dia ndjashikikɛ ɔnɛ lamboshihodia wetshelo. Gilles nde la Elodie ka wadɛnde wakadje welo wa laande dia nsawola la mi. Vɔ wakambelɛka mbala efula lakawɔ diatosanga la wɔ lonya kana nnɔ la wɔ dikɔhɔ di’eloko l’ɔkɔngɔ wa losanganya ndo lɔngɛnyi laso lakaleke keketala. Ande ɔngɛnɔngɛnɔ waki la mi dia monga l’atei w’anto wayela ɛnyɛlɔ ka ngandji ka Nzambi lee!

Aki l’etshumanelo kɛsɔ mbakamahomana la Vanessa ka wadiɛmi lalangami efula. Lakangɛnangɛna efula lo woho wakandayashaka le mi ndo woho wakinde la losembwe. Nde kɔmbɔsaka dia woho wakimi kanga lohoke akakoke todjɛ wekamu dia sho nsawola, koko nde akɔshi di’ɔsɔ aki diaaso diakandakoke mbeka ɔtɛkɛta w’akanga a mpoke. Lakawolange lo yɛdikɔ y’efula ndo takatshukana lo 2005. Kaanga mbemi l’okakatanu dia nsawola l’anto dimɛna, vanessa akakimanyiya dia ndɔshana la diki ndo nsawola aha l’okakatanu. Lekɔ mɛtɛ la lowando l’efula lo woho wakimanyiya Vanessa dia mɛmba ɛkɛndɛ ami.

WOSHASHA OKINA W’OMA LE JEHOWA

Ɔnɔnyi wakatatshukana, Bɛtɛlɛ k’Ɛmɛnyi wa Jehowa ka la Louviers l’osomba wa France wakambelɛ dia tolowanyema l’edja ka ngɔndɔ ɔtɔi l’awui w’okadimwelo. L’ɔnɔnyi ɔsɔ, ko Bɛtɛlɛ ka la France kele l’ohomba wa ntondja mikanda l’ɔtɛkɛta w’akanga a mpoke lo DVD. Oko waki Bɛtɛlɛ kɛsɔ l’olimu efula wa nsala, waki l’ohomba w’akadimodi efula.

Dimi la Vanessa takɔshi dia nkamba lo Bɛtɛlɛ aki diɛsɛ dia laande ndo woshasha w’oma le Jehowa Nzambi, koko laki la yema ya lonyangu. Lakayambolaka woho wakahombe ndjoyala djui yaso y’akanga a mpoke. Kakɔna kakatahombe nsala la luudu laso? Onde Vanessa ayotokondja olimu lɛnɛ atatatshu? Lo yoho ya diambo, Jehowa akatokandolɛ ekakatanu ɛsɔ tshɛ. Lakashihodia ɔnɛ Jehowa akatokaka ngandji ndo nde akɛnya ngandji kande le akanga a mpoke akina tshɛ.

WOHO WAKASUKƐ ANANGƐMI WA LO NYUMA

Lo nkamba olimu w’okadimwelo, lakayeyaka welo wakadjamaka dia nkimanyiya akanga a mpoke dia vɔ mbeya Nzambi. Ande ɔngɛnɔngɛnɔ waki la mi lo mɛna welo wakadjaka Analengo wakakambaka kaamɛ la mi dia nsawola la mi lee! Tɔjɛstɛ tongana t’ɔtɛkɛta w’akanga a mpoke takaweyaka ndo woho wakawasalaka la wolo dia nsawola la mi akaminandaka efula. Dimi kondjaokaka dia lekɔ okalema. Ngandji kakawambokaka kaki djembetelo ya kaamɛ kahadjama anya kele lam’asa ekambi waki Jehowa.​—Osambu 133:1.

Lekɔ la lowando l’efula le Jehowa lambokimanyiya lo tshimbo y’etshumanelo k’Akristo. Lekɔ nto la lowando l’ɔtɛ wakamakondja diɛsɛ dia nkimanyiya asekami akina w’akanga a mpoke dia mbeya Otungi aso wa ngandji ndo ndjasukanya la nde. Lekɔ lo nomɔlomɔ dia mɛna etena kayodihɔ atui w’akanga a mpoke ndo etena kayɔtɛkɛta anto tshɛ ‘ɔtɛkɛta wa pudipudi’ mbuta ate akambo wa mɛtɛ wendana la Jehowa Nzambi ndo l’asangwelo ande wakenga kumbo k’onto l’ɔnango ka l’andja w’otondo.​—Zefaniya 3:9.