Ambutshi le, nyosawolake l’ananyu la ngandji tshɛ

1, 2. Naa dionga diakɛnɛmɔla ambutshi otsha le anawɔ ndo ana otsha le ambutshi, ndo okakatanu akɔna wonga la wɔ mbala efula?

WAKAMBOLA ana efula wa l’États-Unis ɔnɛ: “Naka wɛ ambeya ɔnɛ ambutshi ayɛ wayovɔ loyi, kakɔna kayoyokombola mbatɛ ɛlɔ?” Lo dihole dia vɔ mbidja yimba l’ekakatanu ekina kana nkɛtshanya lo dui diakɔ, ana pursa oko 95 l’atei awɔ wakakadimola onto l’onto ɔnɛ dimi layowatɛ ɔnɛ: “Halange nyu mvɔ” ndo ɔnɛ “dimi nyokaka ngandji efula.”—Mbɔsama oma lo dibuku diele l’ɔtɛ a dui ɔnɛ Dikambo dia ambutshi (lo Angɛlɛ) diakafunde Shaunti Feldhahn nde la Lisa Rice.

² Aha la mbidja oshimu esɔ, ana mbokaka ambutshi awɔ ngandji ndo ambutshi nangaka anawɔ. Mɛtɛ ka dikambo sɔ ndekaka mɛnama lo nkumbo y’Akristo. Kaanga mbele ambutshi mbokaka anawɔ ngandji efula ndo mbalanga ana ambutshi awɔ efula, mongaka tshondo y’okakatanu lo tena dimɔtshi dia vɔ nsawola dimɛna. Kaanga mbahombanyu sawolaka, mbutanɛka akambo hwe hwe ndo ndjihwanɛka etema, lande na kahombanyu mbewɔ asawo amɔtshi? Awui akɔna wakoka nyodjɛ wekamu dia nyu sawolaka dimɛna? Ngande wakokanyu mbekola wekamu akɔ?

‘NYOTSHUNGOLAKE’ ETENA KA SAWOLAKA L’ANANYU

3. a) Lande na kele lo nkumbo efula, ase nkumbo mongaka l’okakatanu dia nsawola? b) Lande na kele nkumbo y’ase Isariyɛlɛ komongaka l’okakatanu dia nsawola?

³ Lo nkumbo efula, ambutshi mongaka l’okakatanu dia ntshungola etena ka nsawola l’anawɔ dimɛna. Koko, aha ngasɔ mbakasalemaka akambo lo nshi y’ase Isariyɛlɛ. L’ɔkɔngɔ wa nde mbasha ɛlɛmbɛ waki Nzambi, Mɔsɛ akatɛ ambutshi w’ase Isariyɛlɛ ate: “Kuwakokomiyaki an’aye, kuwatelakewo lam’udjashiye lu luudu laye, ndu lam’atayakendakenda lu mbuka, lam’etamiye, ndu lam’etoye.” (Euh. 6:6, 7) Lo nshi shɔ, ana efula wakongaka kaamɛ la ambutshi awɔ wa wamato la ngelo ndo akina la ambutshi awɔ w’apami lo ahole wakawakambaka elimu. Diakɔ diele, ambutshi waki l’etena k’efula ka monga kaamɛ l’anawɔ ndo ka nsawola la wɔ. Ɔnkɔnɛ, ambutshi waki l’akoka wa mbeya ehomba, nsaki ndo lonto l’anawɔ dimɛna. Woho akɔ waamɛ mbele, ana vɔ la wɔ waki l’etena ndo la diaaso di’efula dia mbeya ambutshi awɔ dimɛna.

4. Lande na kele nkumbo efula ya nshi nyɛ mongaka l’okakatanu dia nsawola?

⁴ Ɛlɔ kɛnɛ akambo wambotshikitana tshɛ lo tshɛ. Nɛ dia lo wedja ɛmɔtshi, ana tatɛka mbɔtɔ kalasa weke tɔkɛndakɛnda, mbala mɔtshi kaanga weke la ɛnɔnyi ehende. Ambutshi efula kambaka elimu mangana l’ahole wodjashiwɔ etale. Lo dihole dia vɔ nsawola l’anawɔ lo yema ya wenya tshitshɛ yongawɔ lalewɔ, ambutshi mbetshaka wenya akɔ lo nkamba la ɔrdinatɛrɛ, menda televiziɔ, telefɔnɛ ndo tɔkɛnyɔ tokina. Kɛsɔ mɛnyaka dia, ambutshi hawoyoleka monga kaamɛ l’anawɔ lo toho efula, mbuta ate waya oko angɛndangɛnda. Diakɔ diele vɔ hawoyoleka nsawola dimɛna lam’asawɔ.

5, 6. Ngande ‘watshungola’ ambutshi amɔtshi etena dia ndeka monga kaamɛ l’anawɔ?

⁵ Ambutshi le, shi nyu kokaka ‘ntshungola etena’ oma l’akambo amɔtshi wasalanyu l’oyango wa ndeka monga kaamɛ l’ase nkumbo kanyu? (Adia Ɛfɛsɔ 5:15, 16.) Nkumbo mɔtshi wakɔshi tɛdikɔ ta nkitshakitsha wenya wendawɔ televiziɔ ndo wakambawɔ la ɔrdinatɛrɛ. Nkumbo kina salaka la wolo dia ndɛɛka yangɔ vɔ tshɛ kaamɛ kaanga mbala ɔtɔi lo lushi. Ndo nto, yɛdikɔ ya dimɛna ya salaka ɔtɛmwɛlɔ wa lo nkumbo kimanyiyaka ambutshi dia vɔ ndjala kaamɛ l’anawɔ ndo dia nkɛtshanya akambo wa lo nyuma lo wɔladi. Mbɔsaka kaanga wonya wa tango ɔtɔi lomingu tshɛ dia salaka ɔtɛmwɛlɔ wa lo nkumbo ekɔ ohomba efula, koko ekɔ akambo efula walɔmbama dia ndjotatɛ mbɔtɔ lo sawo di’ɔhɔngɔ. Diakɔ diele, ambutshi pombaka sawolaka l’anawɔ mbala la mbala. La ntondo k’ɔnayɛ ntshɔ la kalasa, wɛ koka mbotɛ dikambo dimɔtshi diakoka mbokeketsha, tasɛdingodi la nde divɛsa dia lushi la lushi kana nsala dɔmbɛlɔ kaamɛ la nde. Nsala ngasɔ mbeyaka mbokimanyiya dia nde nsala etshikitanu w’efula l’akambo wayondosala lushi lakɔ l’otondo.

⁶ Ambutshi efula wakasale etshikitanu ɛmɔtshi lo mbetɛ nsɛnɔ yawɔ ɔsɛlɛngɛ l’oyango wa ndeka monga kaamɛ l’anawɔ. Ɛnyɛlɔ, Laura,a mama kɛmɔtshi kele l’ana ahende akatshike olimu ande wakawokonyaka dia nkamba lushi l’otondo l’oyango wa ndeka monga kaamɛ l’anande. Nde mbutaka ate: “La pindju tshɛ, takahandjɔnɛka vɔ watatshu la kalasa dimi latatshu l’olimu. Etena kakamakalolaka la dikɔlɔ la ngelo, lakatanaka ose olimu ami wa womoto aketanyisha ana ndo wakaladi. Woho wakamatshike olimu ami akakonya dia dimi monga la ekondjelo ka tshitshɛ, koko kakianɛ lamboleka monga suke dia nkimanyiya anami nɛ dia leyaka kɛnɛ kawakiyanya ndo ekakatanu wele la wɔ. Loohokamɛka kɛnɛ katawɔ lo alɔmbɛlɔ awɔ dia ndjowangola, mbakeketsha ndo mbalowanya.”

“[NYONGE] SUKE DIA MPOKAMƐ”

7. Wekamu akɔna wafukutanya ambutshi efula la ana dia nsawola dimɛna?

⁷ L’ɔkɔngɔ wa vɔ nkɔnya ɛlɔngɔlɔngɔ la esekaseka efula, afundji wa dibuku diele l’ɔtɛ a dui ɔnɛ Dikambo dia ambutshi (lo Angɛlɛ) wakɛnya dui dikina diadjɛ ambutshi la ana wekamu dia vɔ nsawola dimɛna. Vɔ wakate ɔnɛ: “Ana efula wakakiyanaka lo dikambo di’ambutshi awɔ ɔnɛ: ‘Vɔ hawotohokamɛ.’” Ɔsɔ mɛtɛ ekɔ dui dimɔtshi diadja wekamu. Ambutshi vɔ la wɔ mongaka l’okiyanu akɔ waamɛ lo dikambo di’anawɔ. Di’ase nkumbo nsawola dimɛna, onto l’onto pombaka mpokamɛ dimɛna kɛnɛ kata wonyande.​—Adia Jakɔba 1:19.

8. Ngande wakoka ambutshi pokamɛka anawɔ dimɛna?

⁸ Ambutshi le, onde nyu mɛtɛ pokamɛka ananyu? Dui sɔ mbeyaka monga tshondo y’okakatanu naka wɛ ambɔlɛmba kana etena kɛnama oko sawo diakɔ bu ohomba efula. Koko, eya dia sawo diakokayɛ mɛna oko bu ohomba le yɛ mbeyaka monga ohomba efula le ɔnayɛ. Ndjaala “suke dia mpokamɛ” kɛdikɛdi mbidja yambalo aha tsho lo dui diakotɛ ɔna, koko ndo lo woho wakotɛndediɔ. Wondjo wa dui diande ndo woho wasotshasotshande demba dia kotɛ dui diakɔ mbeyaka mɛnya woho wayaokande. Ekɔ ohomba efula nkamba la tombolambola dia wɛ nshihodia kɛnɛ kalangande kotɛ. Bible mbutaka ɔnɛ: “Esangweyu l’otema w’untu eli uku ashi wa dingunda. Keli kanga yimba ayukiduwula.” (Tuk. 20:5) Ekɔ ohomba efula dia wɛ monga la shɛnɔdi ndo la yimba djekoleko etena kakotolayɛ yaambalo y’ɔnayɛ lo dikambo dimɔtshi di’ohomba efula.

9. Lande na kahomba ana mpokamɛ ambutshi awɔ?

⁹ Ana le, onde nyu kitanyiyaka ambutshi anyu? Ɔtɛkɛta waki Nzambi mbutaka ɔnɛ: “On’ami, ulungi wetshelu wa sho, tutunaki alaku wa nyo.” (Tuk. 1:8) Tanyohɛke dia ambutshi anyu nyokaka ngandji efula ndo ndjakiyanyaka l’otema ɔtɔi lo dikambo dianyu. Ɔnkɔnɛ, ekɔ dui dia lomba dia nyu mbahokamɛ ndo mbakitanyiya. (Ɛf. 6:1) Naka nyu sawolaka dimɛna ndo shihodia dia ambutshi anyu nyokaka ngandji, kete nyayonga suke dia monga l’okitanyiya. Nyotɛke ambutshi anyu nsaki yanyu ndo ekiyanu anyu. Kɛsɔ ayowakimanyiya dia nyeya dimɛna. Lo wedi okina, nyu lawɔ nyosale la wolo dia mbaeya dimɛna.

10. Wetshelo akɔna wakondjaso oma l’ɔkɔndɔ wa Rɛhɔbɔama?

¹⁰ Etena kanyosha asekanyu alako, nyu pombaka monga la yewo y’efula dia mbahokamɛ. Vɔ mbeyaka nyotɛ awui wanyɔngɛnyangɛnya, koko mbeyaka monga ko alako awɔ hawotonyokimanyiya kaanga yema. Lam’ele vɔ bu la lomba ndo watahokɔ akambo efula oko epalanga, ɛlɔngɔlɔngɔ l’esekaseka efula hawɛnyi etale ndo mbeyaka monga ko haweye etombelo wakoka ndjonga lo nsala akambo amɔtshi. Tohɔ ɛnyɛlɔ ka Rɛhɔbɔama ɔnaki nkumekanga Sɔlɔmɔna. Etena kakandakome nkumekanga k’Isariyɛlɛ, otonga dui dia lomba dia nde ndjela alako w’oma le epalanga w’anto. Lo dihole dia nsala ngasɔ, nde akayele alako w’anyanya w’oma le ɛlɔngɔlɔngɔ w’asekande. L’ɔtɛ wa dui sɔ mbele anto efula wa lo diolelo diande wakayowɛkɔ. (1 Khum. 12:1-17) Lo dihole dia nyu ndjela ɛnyɛlɔ ka kɔlɔ ka Rɛhɔbɔama, nyosale la wolo dia sawolaka l’ambutshi anyu dimɛna lo mbatɛka akambo tshɛ hwe hwe. Nyotɛke ambutshi anyu kɛnɛ kele l’etema anyu. Nyokondja wahɔ oma lo alako wanyoshawɔ ndo nyokondja wetshelo oma lo lomba lele la awɔ.​—Tuk. 13:20.

11. Naa etombelo wakoka monga naka ambutshi hawodje anawɔ lo demba?

¹¹ Ambutshi le, naka hanyolange di’ananyu tshɔka le asekawɔ dia toyanga alako, kete nyowadjake lo demba ndo nyosawolake la wɔ mbala la mbala. Kadiyɛso kɛmɔtshi keke l’ɛnɔnyi dikumi l’ɛmɔtshi akafunde ate: “Mbala tshɛ kakamatɛkɛtaka di’ɔna pami ɔmɔtshi, ambutshi ami wakomalaka. Dui sɔ kɔngɛnyangɛnyakami ndo lakayɔsa yɛdikɔ yaha mbatɛka ndoko dikambo.” Kadiyɛso kekina k’osekaseka akafunde ate: “Ana efula waya l’ɛnɔnyi dikumi l’ɛmɔtshi nangaka di’ambutshi awɔ mbashaka alako, koko naka ambutshi awɔ hawɔsɛnyi wolo lo dikambo diawɔ, vɔ ndjotshɔka le anto akina dia toyanga alako, oyadi le wanɛ wahatahokɔ akambo efula.” Naka nyu mpokamɛ kɛnɛ tshɛ kanyotɛ ananyu la ngandji tshɛ, kete nyayɛna dia vɔ wayonyodihwɛ etema ndo wayoyela ɛlɔmbwɛlɔ kanyu.

NYONGE “ƆKƆKƐ DIA NTƐKƐTA”

12. Ngande wele kɛnɛ kakoka ambutshi nsala etena kawatɛ ana dui dimɔtshi mbeyaka mfukutanya dia sawo dia dimɛna monga?

¹² Dikambo dikina diadjɛ ambutshi wekamu dia nsawola l’anawɔ ele, etena kasalawɔ akambo la kɛlɛ ndo lo yoho yotshikitanyi la kɛnɛ kalongamɛ ana lam’awatɛwɔ dui dimɔtshi. Mbokɛmaka hwe dia, ambutshi w’Akristo nangaka nkokɛ anawɔ. Lo “nshi y’ekomelo” nyɛ, anto efula wekɔ lo waale wa lo nyuma ndo ekina. (2 Tim. 3:1-5) Koko, kɛnɛ kasala ambutshi dia nkokɛ anawɔ mbeyaka nkonya ana dia mbɔsa oko ambutshi awɔ wambotamba elelo.

13. Lande na kahomba ambutshi monga la yewo dia mbisha kanyi yawɔ esadi esadi?

¹³ Ambutshi pombaka mbewɔ dia mbishaka kanyi yawɔ esadi eto. Lo mɛtɛ, kema dui dia wɔdu dia tshikala ki etena katɛ ana ambutshi awɔ dui dimɔtshi dia lonyangu. Koko, ekɔ ohomba efula dia mbahokamɛ la yaambalo tshɛ la ntondo ka nyu ndjokadimola. Sɔlɔmɔna nkumekanga ka lomba akafunde ɔnɛ: “Le untu latukadimulaka diui ntundu ndi atuke dikambu, Ekadimwelu kande katuweteka enginya ndu watuwutshaka sonyi.” (Tuk. 18:13) Naka wɛ ntshikala ki, kete wɛ ayoka akambo efula ndo ɔnayɛ ayotetemala kotɛwɔ. Yanga dia mboka ɔkɔndɔ w’otondo la ntondo ka wɛ ndjowosha ekimanyielo kahombama. Ntondja “awui utundjatundja,” mbeyaka mbisha ɔna paa efula l’asolo. (Jobo 6:1-3) Oko wenyu ambutshi woka ana ngandji, nyokambe dimɛna l’atui anyu dia nshihodia akambo dimɛna ndo la nemi yanyu dimɛna diaha mbahomuya.

14. Lande na kahomba ana monga ɔkɔkɛ dia ntɛkɛta?

¹⁴ Ana ndo nyu lawɔ pombaka mongaka “ɔkɔkɛ dia ntɛkɛta” ndo tanyongake lowangolowango dia nkadimola wonya watɛkɛta ambutshi, nɛ dia vɔ wakalongola ɔkɛndɛ oma le Nzambi dia nyetshaka. (Tuk. 22:6) Mbeyaka monga ko vɔ wakahomana l’akambo wele oko wanyokomɛ. Ndo nto, vɔ ndjakiyanyaka lo kɛnɛ kendana la wandja wakawasale etena kakiwɔ weke ana ndo vɔ wekɔ lo nsala la wolo dia nyokokɛ diaha nyu ndjosala wandja akɔ waamɛ. Ɔnkɔnɛ, nyɔshi ambutshi anyu oko angɛnyi anyu, koko aha oko atunyi anyu; oko andaki anyu, koko aha oko andɔshi anyu. (Adia Tukedi 1:5.) Ɔna le, “ɔlɛmiya shɔ la nyɔ,” ndo ɛnyawɔ dia wɛ mbalangaka woho wakolangawɔ. Kɛsɔ ayowakimanyiya dia vɔ ‘kodia lo ohokwelo ndo lo alako wa Jehowa.’​—Ɛf. 6:2, 4.

TANYOKAKE “NKƐLƐ ESADI”

15. Kakɔna kayotokimanyiya diaha nshisha solo dia lotutsha ndo diaha monga l’ekakatanu l’anto wokaso ngandji?

¹⁵ Aha mbala tshɛ mbongaso la solo dia lotutsha kaanga otsha le wanɛ wokaso ngandji. Ɔpɔstɔlɔ Pɔɔlɔ akafunde ate: “Lambofundɛ ekilami ndo anangɛso wa kɔlamelo wele ambeki wa Kristo wele la Kɔlɔsayi nte: ‘Nyu waomi, nyotetemale nanga wadɛnyu ndo tanyowaomalɛke nkɛlɛ k’efula. Nyu ambutshi w’apami, tanyotshake ananyu nkɛlɛ nɛ dia watokoyɔkɔmɔ.’” (Kɔl. 1:1, 2; 3:19, 21) Ɔpɔstɔlɔ Pɔɔlɔ akakeketsha ase Ɛfɛsɔ ate: “Nyonya weho tshɛ wa lotunu la wolo, nkɛlɛ, odudu, ehangohango, ntɛngɔ ndo awui tshɛ wa kɔlɔ.” (Ɛf. 4:31) Naka sho monga la solo dia lotutsha, la memakana ndo ndjakimɛ, mbuta ate waonga wakenga olowa wa nyuma ka Nzambi, kete dui sɔ diayotokimanyiya dia monga la wɔladi kaanga etena keso l’ekiyanu.​—Ngal. 5:22, 23.

16. Ngande wakangola Yeso ambeki ande, ndo lande na kele woho wakandakandola dui sɔ koka tambiya?

¹⁶ Nyɛsɔ tɔsɛdingolake kakianɛ ɛnyɛlɔ ka Yeso. Tokanyiya yema woho wakandahombe ndjaoka etena kakandalɛka nde l’apɔstɔlɔ ande dambo dia dikɔlɔ di’ekomelo. Yeso akeyaka dia l’ɔkɔngɔ wa wenya engana eto nde ayosoyama ndo ayodiakema nyɔi ka paa efula. Okidiamelo wa lokombo la She ndo mpanda k’anto tshɛ kakalemanɛka la kɔlamelo yande. Koko, etena kakawalɛka dambo dia dikɔlɔ sɔ, “owanu wa wolo wakayotomba lam’asawɔ [apɔstɔlɔ] dia mbeya ɔnɛ loleki woke l’atei awɔ.” Yeso kombahangwɛhangwɛ kana mbatondjɛ ɛtɛkɛta wa kɔlɔ. Lo dihole dia nde nsala ngasɔ, nde akakane la wɔ yimba la lotutsha tshɛ. Yeso akawatɛ nto dia vɔ ntetemala mbosukɛ l’etena k’ehemba kɛsɔ. Kaanga mbakalɔmbɛ Satana dia mbafufola oko eponga, Yeso aki l’eshikikelo ɔnɛ vɔ wayotshikala la kɔlamelo. L’ɔkɔngɔ wa laasɔ, nde akadje sheke kaamɛ lawɔ.​—Luka 22:24-32.

17. Kakɔna kakoka nkimanyiya ana dia monga la wɔladi lam’asawɔ l’ambutshi awɔ?

¹⁷ Ana nyu lawɔ pombaka monga la wɔladi lam’asanyu l’ambutshi anyu. Ndjekoleko etena kakotshawɔ ɛnɔnyi dikumi l’ɛmɔtshi, vɔ mbeyaka mbɔsa oko woho waalɔmbɔla ambutshi awɔ mbaɛnyaka dia vɔ bu anto wa mbɛkɛ otema. Kaanga mbakokadiɔ mɛnama lo tena dimɔtshi ngasɔ, nyeye dia ambutshi anyu ndjakiyanyaka lo dikambo dianyu l’ɔtɛ wa ngandji kanyokawɔ. Lo mbahokamɛ la wɔladi tshɛ ndo lo nkamba kaamɛ la wɔ, wɛ ayɔlɛmiyama oma le wɔ ndo ayoyala la lokumu la dimɛna. Monga la dionga dia ngasɔ mbeyaka kokimanyiya dia wɛ ndeka monga la lotshungɔ l’efula l’akambo amɔtshi wa lo lɔsɛnɔ. Onto lele la ndjakimɛ ekɔ kanga lomba. Bible mbutaka ɔnɛ: “Kanga enginya atushulaka kele tshe keli l’utema andi. Keli kanga yimba atuyakimelaka la ki.”​—Tuk. 29:11.

18. Ngande wele naka ase nkumbo mbokana ngandji k’efula, kete vɔ wayosawolaka dimɛna?

¹⁸ Ambutshi wa ngandji ndo ana wa ngandji le, tanyɔkɔmɔke naka hanyosawola dimɛna lo nkumbo kanyu oko wakombolanyu. Nyotetemale nsala la wolo dia nkotsha oyango ɔsɔ ndo nyotetemale nkɛndakɛnda lo akambo wa mɛtɛ. (3 Jni. 4) L’andja w’oyoyo, anto wayokoma kokele wayotatɛ nsala akambo lo yoho ya kokele aha la mindjanɛ ndo aha l’ewanu. Koko, l’etena kɛnɛ efula ka l’atei aso salaka akambo wayowonyangaka l’ɔkɔngɔ. Ɔnkɔnɛ, tanyengengake dia nɔmbana edimanyielo. Ndo nto nyodimanyiyanake l’otema ɔtɔi. Nyosale la wolo dia “sanganyema dimɛna kaamɛ lo ngandji.” (Kɔl. 2:2) Ngandji kekɔ la wolo. ‘Ngandji ekɔ la solo dia lotutsha ndo ɔlɔlɔ. Onto lele la tɔ hoke kɛlɛ esadi. Nde hadia akambo wa kɔlɔ wosalɛwɔ, hangɛnangɛna l’akambo wa kɔlɔ, koko nde kukumɛka akambo tshɛ, mbetawɔka akambo tshɛ, nongamɛka akambo tshɛ ndo mbikikɛka akambo tshɛ.’ (1 Kɔr. 13:4-7) Nyotetemale mbokana ngandji ndo nyosawolake dimɛna lam’asanyu ko nyayonga l’ɔngɛnɔngɛnɔ lo nkumbo kanyu ndo nyayotombola Jehowa.