Tokondja ɛlɔlɔ tshɛ w’oma lo Kalasa k’Olimu wa Teokrasi
1 Kalasa k’Olimu wa Teokrasi tolowanyaka lo “wetshelo wa kɔmba” watosha diaaso dia mbewoya mɛtɛ yele lo Bible le asekaso. (2 Tim. 4:2) Lomingu tshɛ sho kondjaka elembetshiyelo w’ohomba watohotolɛ akambo efula wele lo Bible. Woho akɔna ayotokondja ɛlɔlɔ tshɛ watomba oma lo wetshelo w’ohomba washa kalasa kɛsɔ na?
2 Tohokɛ lotui ɔlɔlɔ l’ɛtɛkɛta wa mbɔtwɛlɔ w’omendji wa kalasa, wɛnɛ wakotola yambalo oya lo tokanyi t’eshika tokokiso mbeka lo edja ka losanganya. Tokanyiya lo wembola wokokinde mbetola ndo lo woho wakamba olimu l’ekadimwelo woshami l’olimu aso.
3 Dako dia wetshelo kema awui wa lo hiembola ato. Diɔ tondjaka ohomba wa tokanyi tɔsɛdingɔmi ndo ɛlɔlɔ wokoki kondja onto l’onto l’atei aso. Naka sho ndjalɔngɔsɔla la ntondo, kete tayoleka mbidja yambalo l’atshina w’akambo ndo tayokoka mbisha ekadimwelo l’ovuswelo wayela.
4 Naka tayadiaka nshi tshɛ etenyi ka Bible kakalɔngɔswama lomingu la lomingu, kete tayonyomoleka mbeya ohomba wa Dui dia Nzambi. Lo salaka eyangelo wa ladiko, sho kokaka mbishola kanda y’akambo w’ɔmɔmɔ w’eyoyo ndo w’eshika wayohamia yimba yaso ya mɛtɛ. Atshina w’akambo w’oma lo Bible hôhola paka etenyi kahomba mbadiema keto. L’ɔkɔngɔ a menda etenyi kakɔ tshɛ lo tshena pe, ombahemi a loseke ayoka epole ɔsɛkɛ l’atshina w’akambo ndo mɛnya woho wa kamba lawɔ olimu lo lɔsɛnɔ laso ndo l’ɔtɛmwɛlɔ aso. Tohokɛ lotui ɔlɔlɔ dia sho mbeya woho wa nyomoleka kamba olimu la wetshelo w’oma lo Bible.—Osam. 119:105.
5 Naka wambotosha ɔkɛndɛ w’ombeki, tolembete lo dikambo diakɔna diayotokamba. Tâle mbala la mbala alako wele lo Manuel pour l’Ecole watɛkɛta dia dionga di’ombahemi a loseke ndo todje weolo dia kamba lawɔ olimu. Lam’asɔnaso tokanyi ta sawo, toyange dia mbɔsa tɔnɛ tayonga ohomba l’esambishelo la nɛmɔ.—sg lɛk. 96-9.
6 Naka wɛ ekɔ kadiyɔ ko wambokosha ɔkɛndɛ wa sawo dia 3 kana dia 4, sala wolo dia mɛnya akambo lo yoho yatowosalemaka. Ɔtɛkɛtshi ayɛ mbeyaka mbidja tamu lo kɛnɛ tshɛ katayɛ; hemba dia mɛnya woho wa kimanyiya onto dia nde kana lomba lo atshina w’ɛlɛmbɛ wa lo Bible. (sg lɛk. 153-7) Dikambo sɔ mbishaka ampokami diaaso dia vɔ mɛna woho wa mbekola wekamu wa woho akɔ l’olimu. Nyoyalɔngɔsɔlɛ edja la ntondo ndo nyovusole sawo mbala efula wɛ l’ɔtɛkɛtshi ayɛ la ntondo. Hatonga ohomba mvusola etena kele losanganya lamboshila la tatɛ.
7 Ambeki wayosala sawo wambokeketshama dia mbidjasɛ l’ɛnɔngɔ wele katondo. Ɔsɔku mbah’ete wenya ndo nto mbishaka omendji wa kalasa diaaso dia mbisha onto l’onto alako. Anto tshɛ kokaka kondja wahɔ oma l’alako wa ngandji ndo w’eshika washande lam’akambande olimu la Manuel pour l’Ecole. Nde hayele waongelo w’ambahemi a loseke l’ɔnɔngɔ oko ɔlɔngamiwɔ lo dikatshi dia conseils oratoires; koko nde ayɔsɔna dikambo dimɔtshi diele ohomba le ombeki dia nde ndakema dia nyomoleka pama ɔlɔlɔ.
8 Lo ndjela kɛnɛ komiso la mɛna, tekɔ l’ɛkɔkɔ w’eshika wahombaso nɔngɔsɔlaka Kalasa k’Olimu wa Teokrasi ndo mbɔtɔka lɔkɔ lomingu tshɛ. Sho kondjaka wetshelo watosha diaaso dia ndjâla la lomba ndo etshundju l’olimu.—Tok. 1:5.