Bible: Kiɔkɔ y’Ekeketshelo ndo y’Elongamelo l’Atei w’Andja w’Osukusuku
1 Anto wekɔ lo tanema l’ekakatanu efula ɛlɔ kɛnɛ; lâsɔ vɔ wekɔ l’ohomba w’ekeketshelo ndo w’elongamelo. Bible kele tshɔi yakɔ y’ɛngɔ kokoki mbisha ekeketshelo. Tɔ toshaka elongamelo k’andja w’oyoyo ndo wa losembwe. (Romo 15:4; 2 Petero 3:13) Dibuku Auxiliaire, lo lɛkɛ 207, diekɔ lo nembetshiya ɔnkɔnɛ: “Otondonga aha Bible, tshike tototeya Jehowa, kânga ɛlɔlɔ wa diambo watomba oma l’olambo wa tshungo wa Kristo; aha tɔ, tshike tototeya akambo efula walɔmbama dia ndjâla la lɔsɛnɔ la pondjo lo Diolelo dia losembwe diaki Nzambi kana la tshina di’ɛlɔmbwɛlɔ kadiɔ.”
2 Lo Yitshu, tayokotola yambalo y’anto lo yoho ya lânde l’olimu wakamba Bible, Dui dia Nzambi, dia mbakimanyiya woho wa vɔ ntokomɛ ekakatanu waya oma l’andja ɔnɛ. Tayowasha Les Saintes Écritures— Traduction du monde nouveau la dibuku La Bible: Parole de Dieu ou des hommes? Kakɔna kayotokoka mbuta dia kimanyiya anto walanga dia vɔ mbeya ohomba wa Bible?
3 L’ɔkɔngɔ wa sho ndjalowola, sho kokaka mbuta kânga ɔnɛ:
◼ “Mɛtɛ wɛ mbetawɔka dia ekakatanu wotodingi nyangaka fukutanya wɔladi wa lo yimba yaso. Lende okokiso tana alako w’eshika watɛnya woho wa ntokomɛ ekakatanu wa ngasɔ? [Tshikɛ onto akɔ dihole akadimole.] Lakɛnyi dia Bible kokaka ntsha dui sɔ nɛ dia tɔ tolakanyaka woho wa ndjâla l’ɔngɛnɔngɛnɔ. [Ala Luka 11:28.] Oyango w’olimu aso ele dia keketsha anto dia vɔ mbala Bible ndo dia vɔ kondja ɛlɔlɔ oma lo wetshelo atɔ. Ehomɔ kɛnɛ ka wekelo wa Bible, La Bible: Parole de Dieu ou des hommes?, mbeyaka kokimanyiya lo dikambo sɔ. Ohenda kɛnɛ katatɔ lo kɛnɛ k’endana la kiɔkɔ y’ekakatanu efula wa l’andja. [Ala etelo ka hende ka l’odingɔ 9, lo lɛkɛ 187.] Naka wɛ kombolaka mbala dibuku nɛ, kete layɔngɛnangɛna dia kotshikɛ diɔ.”
4 Sho mbeyaka sɔna dia sala wɛnyanyelo ɔmɔtshi wa wɔdu oko wɔnɛ:
◼ “Tekɔ lo ndjatshutshuya dia keketsha anto dia vɔ ndjasha efula lo Dui dia Nzambi, Bible. Dimi nangaka kosha kiatshikatshi nyɛ Lande na kahombaye mbetawo Bible. Yɔ mɛnyaka lande na kakokaso kadimɔ otsha lo Bible dia ndjâla l’elongamelo ka mɛtɛ k’andja wa dimɛna efula. [Ntshɔka lo lɛkɛ 6 ndo ala Osambu 37:29 kâmɛ l’odingɔ wa komelo.] Lambokɔlɔmba dia wɛ mbala kiatshikatshi nyɛ kele koyombute kɛnɛ kakanayɛ lo dikambo di’elongamelo katɛnya Bible lam’ayomoyokenda mbala kayaye.”
5 Ondo apandjudi amɔtshi wayolanga sala wɛnyanyelo ɔnɛ wa mbala kakɔ ɔtɔi dia tatɛ mbeka l’onto Bible:
◼ “Lamboya a ndjokenda dia sho mbokana woho wa mbekaka layɛ Bible ofele lakayɛ. Bible akasambiyama oma le Nzambi ndo wetshelo atɔ kokaka tokimanyiya dia nɔngɔsɔla akambo. Ɔtɛkɛta wa nshi nyɛ wele lo Les Saintes Écritures — Traduction du monde nouveau sunganaka dimɛna lo wekelo w’onto ndamɛ. Mɛnamaka dia ekadimwelo kɛnɛ mbeyamaka le miliyɔ y’ambadi wa Bible l’andja w’otondo. Nte kɛnya lo tshena pe woho wokokiyɛ kamba latɔ olimu. [Ntshɔka lo lɛkɛ 1659 ndo kotola yambalo yande lo mbɔtwɛlɔ ka 36A. Lo ndjela saki kɛnyishande, sɛdingola divɛsa ɔtɔi kana ahende woshilami ndo nyɔkɛtshanya lo kanyi yotombi oma lɔkɔ. Lembetshiya lo na ele ɔsɛdingwelo w’avɛsa asɔ ayɛnya kɛnɛ kakalake Nzambi dia sala lo tshimbo ya Diolelo diakinde.] Layɔngɛnangɛna dia nyomoya a ndjosawola layɛ nto lo dikambo dia elongamelo ka Diolelo.”
6 Bible ekɔ kiɔkɔ y’ekeketshelo ndo y’elongamelo, ndo mɛtɛ kokoki tokonya lo lɔsɛnɔ la pondjo tanemaka lɔkɔ. (Joani 17:3, 17) Lam’akahanaso la anyaso ewo ka Bible, sho ngɛnyangɛnyaka Jehowa, ɔnɛ ‘lalanga dia anto a weoho tshɛ shimbamela.’—1 Tim. 2:4.