Towasha Diaaso dia Vɔ Mboka “Osangɔ Okina”
1 “Tayokoka osangɔ okina lo dikambo sɔ.” (Etsha 17:32, NW) Ngasɔ mbakate anto amɔtshi l’ɔkɔngɔ wa dako dia mamba diakasha Paulo lo dikona dia Malasɛ. Woho akɔ wâmɛ mbele ndo ɛlɔ kɛnɛ, anto amɔtshi kombolaka nyomoka awui akina efula lo dikambo dia losango la Diolelo lakatawaewoya lam’akatete mbala ka ntondo.
2 Tekɔ lo sala etenyi koleki ohomba ka wetshelo aso lam’akalolaso a tenda anto dia pɛtshahɛtsha saki kawɔ. Naka sho ndjalɔngɔsɔla dimɛna, kete tayokondja etombelo w’ɔlɔlɔ. Manuel pour l’École mbishaka alako anɛ lo lɛkɛ 49 ɔnɛ: “Tokoshihodia ntondo tokanyi toshami dia shikikɛ olembetshiyelo ɔmɔtshi. Yanga woho wa shikikɛ bonde ndo woho akɔna. Yatshutshuya dia tɛkɛta tokanyi takɔ l’ɛtɛkɛta ayɛ wɛmɛ. Eka kele oke tolembetelo t’oma lo Bible t’akambo wɔtɛkɛtami dimɛna. Yalɔngɔsɔla dia kamba olimu dimɛna l’avɛsa woshilami.”
3 Naka takatshike dibuku “La Bible: Parole de Dieu ou des hommes?”, sho kokaka mbuta kânga ɔnɛ:
◼ “L’ɔkɛtshanyelo aso wa mbala ketshi, takatɛkɛta dia lande na akokaso mbɛkama Bible. Dibuku diakamakotshikɛ mumbolaka dimbola nɛ: ‘Lande na kahombayɛ mbala Bible?’ [Ala mbɔtwɛlɔ lo lɛkɛ 5 ndo tshikɛ onto akɔ dihole akadimole lo dimbola dia komelo.] Bible totɛka ɔnɛ Nzambi ndamɛ ayanga kandola ekakatanu tshɛ wɛnya anto pâ ndo tɔ tɔlɔmbɔlaka lo mboka kahombaso ndjela dia kondja ɛlɔlɔ wayoyala l’etena kɛsɔ k’ɔngɛnɔngɛnɔ. [Ala Osambu 119:105.] Dibuku nɛ diekɔ ehomɔ kakalɔngɔsɔma dia wekelo wa Bible w’onto ndamɛ ndo wa lo nkumbo. Layɔngɛnangɛna dia kɛnya woho wakamba ladiɔ olimu.”
4 Lam’akalolaso a tenda wanɛ wakatatshikɛ kiatshikatshi “Lande na kahombaye mbetawo Bible,” sho mbeyaka mbuta ɔnɛ:
◼ “Sho tshɛ ndjakiyanyaka dia kɛnɛ kayotokomɛ lo nshi yayaye. Koko lo menda woho waya akambo wa l’andja nshi nyɛ, kakɔna kayotomba oko le yɛ? [Tshikɛ onto akɔ dihole akadimole.] Anto kokaka fɔnya paka fɔnya tsho lo kɛnɛ kayotomba, koko Nzambi mbeyaka kɛnɛ kayotomba shikaa. [Ala Isaya 46:10.] Ondo wɛ ayamba dia mboka ɔnɛ Bible ndakaka dia kem’edja nto, sho tayokoka sɛna l’ɔngɛnɔngɛnɔ l’andja w’oyoyo wambokadimɔ paradiso. [Ala odingɔ wa ntondo wa lo lɛkɛ 5.] Nte kote awui akina efula w’endana la daka dia diambo sɔ.”
5 Naka tambotshɔ a tenda onto ɔmɔtshi lakatatshikɛ “Traduction du monde nouveau,” ondo tayokoka kondja ɛlɔlɔ lo ntsha nganɛ:
◼ “Lakakotshikɛ Bible kɛmɔtshi mbala ketshi ndo lakakolake ɔnɛ layokalola a ndjokokimanyiya dia wɛ kamba latɔ olimu dimɛna. Tena dimɔtshi sho toyambolaka woho akɔna wokokiso tshikalaka la diokanelo di’ɔlɔlɔ kâmɛ la anyaso. Bible toshaka alako w’eshika ndo oma l’ekimanyielo ka Traduction du monde nouveau sho tanaka kɛnɛ kele laso ohomba esadi eto. [Ntshɔka lo lɛkɛ 1543-4 ndo enda lo mbɔtwɛlɔ “amour.” Kotola yambalo y’onto akɔ lo avɛsa wele oko wanɛ: 1 Koreto 13:4; Kolosai 3:14 ndo 1 Petero 4:8. Lembetshiya lo tshena pe woho wele naka onto ndjela alako asɔ kete nde kondja etombelo w’ɛlɔlɔ efula.] Ɔsɔ ekɔ ɛnyɛlɔ kɛmɔtshi kɛnya weoho akɔna w’alako w’eshika washa Bible dia kandola ekakatanu aso. Mbala kayaye, layɔngɛnangɛna dia kɛnya woho akɔna okina wokoki Bible tokimanyiya dia sho ndjâla l’ɔngɛnɔngɛnɔ ndo la wɔladi wa lo yimba.”
6 Ndoko ɛngɔ koleki oshinga wolo kokokiso kahana l’anyaso oko ewo k’oshika ka Dui dia Nzambi. Ewo kɛsɔ mbeyaka mbisha anto wɔma wa Jehowa ndo mbakeketsha dia vɔ kɛndakɛnda lo mboka kande ko kondja ɛngɛnɔngɛnɔ wa pondjo.—Tok. 2:20, 21.