Ekongelo Ka Losanganya L’otshimbedi Layaye
“Tolamake Lushi la Jehowa Tena Tshɛ lo Yimba,” ɔsɔ mbele ɔtɛ a dui wa losanganya l’otshimbedi layomɛ salema oma lo Lovula. (2 Pet. 3:12, NW) Losanganya lakɔ lakalɔngɔsɔma dia totshutshuya dia sho sala dikambo dimɔtshi. Kem’edja, Jehowa ayolomboya wanɛ wadjasɛ lanɛ la nkɛtɛ. Akɔna ayoka lo ‘lushi la woke la Nzambi Kanga-Wolo-Tshɛ’ na? Paka wanɛ wahalale djɔ lo nyuma ndo wasɛna lɔsɛnɔ loludi “l’etsha wa lɔkɛwɔ l’ekila ndo ditshelo di’anto wamamema Nzambi.”—Eny. 16:14; 2 Pet. 3:11, NW.
Dia onto panda lo lushi la Jehowa, ekɔ ohomba efula nde batizama. (1 Pet. 3:21) Apandjudi walanga batizama lo losanganya l’otshimbedi lɔsɔ pombaka mbewoya omendji-walɔmbɔla, ko nde mbɔsa tɛdikɔ tahombama.
Dako dimɔtshi dia tenyi nɛi diele l’ɔtɛ a dui ɔnɛ “Woho w’Onto Wahombaso Monga” diayɛnya hwe nganɛ wahomba onto sala dia namaka tena tshɛ lo yimba eongelo ka lushi la Jehowa. Dako dia lo sɛkɛ, diayonga l’ɔtɛ a dui ɔnɛ: “Sala oko Kanga Lomba Lam’ayasukana Lushi la Jehowa,” diayotolembetshiya kitshimudi ya ‘nyanga Jehowa, losembwe la okitshakitsha’ dia monga l’ɔnɔngɔ w’ehandɔ.—Zef. 2:3.
Losanganya l’otshimbedi layokomɛ l’alako ahende w’ekeketshelo wayoshama oma le emendji weteta ndo wayonga l’ɛtɛ w’awui ɔnɛ: “Onde Lɔsɛnɔ Layɛ Nɔmbwamaka la Akambo wa Mɛtɛ?” la “Toyalɔngɔsɔlɛ lo Namaka Lushi la Jehowa lo Yimba.” Alako asɔ wayotosha diaaso dia sho kanyiya nganɛ wele lɔsɛnɔ laso ndo sala etshikitanelo walɔmbama. Pɔlɔfɛsi ya lo Bible kamɛ ndo akambo wasalema l’andj’ɔnɛ mɛnyaka hwe ɔnɛ lushi la Jehowa laya suke. Ekongelo ka losanganya l’otshimbedi lɔnɛ ‘ayototshutshuya dia sho mongaka paka totshundju, ndo mambalɛka.’ (1 Pet. 5:8) Tɔshi tɛdikɔ t’eshika dia mbɔtɔ lo losanganya lakɔ.