Losanganya l’otshimbedi layotokimanyiya dia kokɛ lonyuma laso
1. Naa diaaso dimɔtshi diatosha Jehowa dia tokimanyiya dia kotsha ɔkɛndɛ aso wa sambisha lokumu l’ɔlɔlɔ?
1 La lokaho tshɛ, Jehowa tolowanyaka ndo tokeketshaka dia sho kotsha ɔkɛndɛ wakandatosha wa sambisha lokumu l’ɔlɔlɔ. (Mat. 24:14; 2 Tim. 4:17) Losanganya l’otshimbedi lasalema ɔnɔnyi l’ɔnɔnyi lekɔ yoho mɔtshi yakokaso nongola olowanyelo ndo ekeketshelo ka ngasɔ. Losanganya l’otshimbedi la l’ɔnɔnyi w’olimu 2010 layonga l’ɔtɛ a dui ɔnɛ: “Tokoke lonyuma laso.” Ɔtɛ a dui akɔ mbɔsama oma lo Romo 8:5 ndo Jude 17-19. Lɔ layotatɛ salema lomingu la Ngɔndɔ k’enanɛi 31, 2009.
2. a) Wahɔ akɔna wayotokondja oma lo Losanganya l’otshimbedi? b) Ngande wakakokimanyiya nsanganya y’etshimbedi yetshi lo kɛnɛ kendana l’olimu w’esambishelo?
2 Wahɔ wayotokondja: Ekongelo ka losanganya lɔsɔ kayokotola yambalo yaso lo wâle wele oko akambo watomanɛ wenya aso ndo wekola yimba yaso oma lo akambo woleki ohomba. Tayeka woho wakokaso ndɔshana la yimba ya ndiha washo lo akambo wa kɔlɔ ndo tayɔsɛdingola tolembetelo tɛnya di’onto ekɔ la lonyuma la wolo. Sawo dia tenyi tenyi diayoshama Lushi la lomingu diayɛnya woho wakoka onto l’onto ndo ase nkumbo takola wanya wahombama dia keketsha lonyuma lawɔ la ntondo ka tɔsɛngiya tataleke fula ndo ehemba wa weke wa mbetawɔ. Ekongelo kɛsɔ kayotokimanyiya dia sho kokɛ etema aso, nama lonyuma laso ndo tetemala nama lo yimba ɛtshɔkɔ wakongɛ wanɛ wakokɛ lonyuma lawɔ.
3. Datɛ diakɔna diayonga Losanganya lanyu l’otshimbedi layaye, ndo yɛdikɔ yakɔna yahombayɛ mbɔsa?
3 Kam’ayoyeya datɛ ndo dihole diayosalema Losanganya l’otshimbedi layaye, yalɔngɔsɔla dia monga lawɔ ndo ndjela tenyi diakɔ tshɛ dia nshi yakɔ hiende. Onga l’eshikikelo dia Jehowa tshɔkɔlaka onto lakamba olimu l’etete.—Tuk. 21:5.
4. Kakɔna keso l’eshikikelo dia nongola lo Losanganya laso l’otshimbedi layaye?
4 Lo mɛtɛ, Jehowa mbele Ombishi wa woshasha w’ɔlɔlɔ ɔsɔ. Losanganya lɔsɔ lakalɔngɔswama oma le olui w’ɔhɔmbɔ wa kɔlamelo layonga mɛtɛ kɛnɛ kele la so ohomba dia tetemala kamba olimu aso w’Okristo. Tekɔ la lowando le Jehowa l’ɔtɛ wa diangɔ tshɛ diatoshande la ngandji tshɛ dia tokimanyiya dia sho ‘kukutɛ etelo ka lo sɛkɛ k’elongamelo kaso aha la ndjɛkayɛka.’—Heb. 10:23-25; Jak. 1:17.