Ekadimwelo Lo Wembola Anyu

◼ Ayotosala naka ɔnangɛso lahomba mbisha dako dia lo sɛkɛ hakomi la wonya lo losanganya?

Akambo wahandakanyiyisha mbeyaka komɛ ɔnangɛso ko mboshimba dia nde koma la wonya dia ndjosha dako diakalɔngɔswama. Naka vɔ kokaka fɔnya ɔnɛ kem’edja nde ayokoma, dikumanyi mbeyaka mbɔsa yɛdikɔ dia tatɛ losanganya la wekelo wa Tshoto y’Etangelo; dako dia lo sɛkɛ diayoyoyela l’ɔkɔngɔ. Ko naka ambɛnama hwe dia ombahemi a loseke hatoya, ondo ombahemi a loseke ɔmɔtshi wa l’etshumanelo kokaka mbisha dako dimɔtshi diambondosalaka edja.

Ekongelo kakasalema dimɛna edja la ntondo kimanyiyaka nshi tshɛ dia mbewɔ dikambo sɔ. Ɔnangɛso lakasɔnama dia sala ekongelo k’alako wa lo sɛkɛ pombaka mɛnana l’ombahemi a loseke tshɛ kânga lomingu ɔtɔi la ntondo dia mbôhola ɔkɛndɛ wakawawosha. Nde ayɔsa diaaso diakɔ dia mbôhola wonya wa losanganya kâmɛ ndo dihole la numɛlɔ ka telefɔnɛ ka Mbalasa ka Diolelo, awosha tolembetelo tshɛ tahombama dia nde ntshɔ lɛkɔ. Ombahemi a loseke pombaka nembetɛ elembetshiyelo ɛsɔ dimɛna. Nde pombaka mbɔsa ɔkɛndɛ wakawawosha la nɛmɔ diahombama ndo mbɔsa tɛdikɔ tshɛ tahombama dia kotsha ɔkɛndɛ akɔ. Naka dikambo dimɔtshi diahandakanyiyisha diambôkomɛ, nde pombaka mɛnana esadi l’ɔnangɛso lele l’ɔkɛndɛ w’ekongelo k’alako wa lo sɛkɛ dia vɔ tayangi ɔhɛna. Pombaka sala tshɛ di’aha ndjotolaka tshikima aya ka onyɔ. Naka ombahemi a loseke ekɔ l’ɔkɔkɛ wa taahe tongana toto, kete nde pombaka sala tshɛ dia toma dui lo Mbalasa ka Diolelo, di’anangɛso têyi ndo mbeya kɛnɛ ka sala.

Naka ambahemi a loseke mbɔsa ɛkɛndɛ wakawawasha la nɛmɔ, naka ekongelo kɛmɔtshi kambosalemaka edja la ntondo, naka vɔ mbaohola lo woho wahombama edja la ntondo ndo mbidja yambalo tshɛ lo dikambo sɔ, kete aha la tâmu, etshumanelo ayokondjaka dako dia lo sɛkɛ dia dimɛna efula lomingu tshɛ.