Ekongelo ka Losanganya la lânde la lushi ɔtɔi la lo 2010
1. a) Ɛtɛ w’awui akɔna w’oma l’Afundelo wakasɛdingɔma lo nsanganya ya lânde ya lushi ɔtɔi ya l’ɛnɔnyi weke kambeta? b) Onde ekɔ awui amɔtshi wakatɛkɛtama lo nsanganya ya lânde ya lushi ɔtɔi yakete wakakokimanyiya l’esambishelo?
1 “Toshikikɛ awui woleki ohomba,” “Totshikale nge oko olui,” “Totetemale sambisha akambo wa mɛtɛ,” ndo “‘Sho tekɔ diwomba, Jehowa kele Okengi aso’.” (Fil. 1:9, 10, 27; Joa. 18:37; Is. 64:8) Ɔsɔ ekɔ ɛtɛ w’awui ɛmɔtshi l’atei wa wɛnɛ wakasɛdingɔma lo nsanganya ya lânde ya lushi ɔtɔi yakete. Onde wɛ ekɔ lo nomɔlomɔ dia mbɔtɔ lo Losanganya la lânde la lushi ɔtɔi la l’ɔnɔnyi w’olimu 2010? Lɔ layonga l’ɔtɛ a dui wɔsami oma lo 1 Koreto 7:29 wata ɔnɛ: “‘Etena kambotshikala kaya mondo.’”
2. Ngande wakokaso sambiya anto akina waasaso aso dikambo dia losanganya lɔsɔ?
2 Kotate mbewoya anto akina la waasaso tshɛ awui wendana la Losanganya la lânde la lushi ɔtɔi kam’ayowewoya datɛ dialɔ l’etshumanelo kanyu. Ambutshi amɔtshi kimanyiyaka anawɔ dia kongɛ losanganya lo funda datɛ dialɔ lo alamanaka wa nkumbo, kâmɛ ndo diangɔ diayotshɔ la onto l’onto lo losanganya ko mbadiaka nshi yambotshikala la ntondo ka losanganya lakɔ. Lo Ɔtɛmwɛlɔ anyu wa lo nkumbo wa la dikɔlɔ, nyu mbeyaka mvusolaka awui wakanyafunde oma lo nsanganya ya lânde ya lushi ɔtɔi yakete. Nyu kokaka nto nɔngɔsɔla otema anyu lo kɛnɛ kendana la dikambo sɔ lo mvusola awui wele lo dibuku Kondja wahɔ oma lo Kalasa k’olimu wa teokrasi, lɛkɛ 13-16 dia nyokimanyiya nyu la nkumbo yanyu dia nyu mbeya ‘mbidja yimba lo woho wahokamɛnyu.’—Luka 8:18.
3. Ngande wakokaso ndeka kondja wahɔ oma lo kɛnɛ kayetshama lo losanganya?
3 Tokambake la kɛnɛ kekaso: Mbala efula, anto mbutaka l’ɔkɔngɔ wa losanganya ɔnɛ: “Losanganya lɔnɛ laki dimɛna efula mɛtɛ!” Dui sɔ diokongaka nshi tshɛ mɛtɛ nɛ dia losanganya lekɔ l’atei wa diangɔ di’amɛna efula diatosha Jehowa. (Tuk. 10:22) Di’awui wekaso ntɔ elowa, sho pombaka kanaka yimba la wɔ ndo mbakimɛ. (Luka 8:15) Etena kayanyakalola oma lo losanganya, nyɔkɛtshanya awui wakatɛkɛtami lo losanganya l’ase nkumbo akina kana l’anto watasambe la nyu. Nyɔkɛtshanya eyango wahombanyu ndjadjɛ ndo awui wayonyokimanyiya l’olimu w’esambishelo. Sala dui sɔ ayonyokimanyiya dia mbohɔka awui wakanyoki lo losanganya.—Jak. 1:25.
4. Lande na kele losanganya lɔsɔ layonga losanganya la lânde le so?
4 Tena efula, sho ngɛnangɛnaka lam’alongolaso woshasha wa dimɛna efula. Onde hatolomɔlomɔ dia tohokamɛ kɛnɛ kambotɔlɔngɔsɔlɛ Jehowa lo Losanganya laso la lânde la lushi ɔtɔi layaye? Sho koka monga l’eshikikelo dia lɔ layotokimanyiya efula. Sho kokaka nongamɛ dia Jehowa Shɛso kele l’olongo ayotosha woshasha wa dimɛna wayotokeketsha ndo wetshelo wayotokimanyiya dia kotsha olimu wakandatosha.—2 Tim. 4:2; Jak. 1:17.