Ekongelo Ka Losanganya Layaye La Lânde La Lushi Ɔtɔi

Nsanganya ya lânde ya lushi ɔtɔi yakatatɛ nɔngɔsɔma lo 1987. Nsanganya shɔ ya lushi ɔtɔi keketshaka ekambi wa Jehowa ndo anto walanga wɔtɔ lɔkɔ. Tatɛ oma lo Ngɔndɔ ka Divwa 1998, tayonga l’ekongelo k’oyoyo ka losanganya la lânde la lushi ɔtɔi. Nyayokondja ɛlɔlɔ lo nyuma oma l’alako divwa, lokema l’ɛkɔnya ndo ɛkɔndɔ w’akambo wakatshama l’esambishelo.

“Tɔshi Mɛsa wa Jehowa la Nɛmɔ,” ɔsɔ mbele ɔtɛ a dui wa losanganya lakɔ. (Is. 65:14; 1 Kor. 10:21) Ɔsɔ ayokeketsha yɛdikɔ yakatɔshi ya mbidja ɔtɛmwɛlɔ wa Jehowa lo dihole dia ntondo lo nsɛnɔ yaso. (Osam. 27:⁠4) Omendji w’otshimbedi ayosha etenyi kele l’ɔtɛ a dui ɔnɛ: “Tɔsɛdingole Tokanyi t’Etema Aso.” Etenyi kɛsɔ kayɔtɛkɛta dia dionga diele laso lo kɛnɛ kendana la wɔtwɛlɔ wa nsanganya. Ɔtɛkɛtshi w’ɔngɛndangɛnda ayosha dako nɛ: “Lɛkaka lo Mɛsa wa Jehowa dia Shimbela Lonyuma Layɛ.” Wayokeketsha ndo akɛnda wele l’ɔlɔngɔswamelo wa Jehowa dia tshikala nge l’olimu wa Nzambi. Nyango dako diayosha ɔtɛkɛtshi w’ɔngɛndangɛnda diayonga l’ɔtɛ a dui w’ɔnɛ: “Tambokeketshama lo Nyuma dia Sambisha la Dihonga.” Dako sɔ diayotɛnya lo na atokimanyiya tɛdikɔ tɔsama l’etshumanelo dia sambisha dikambo dia Diolelo la dihonga. Akɔna ahalange kondja ɛlɔlɔ oma l’ekongelo kɛsɔ na?

Anto weke ka ndjakimɔ le Nzambi ndo walanga batizama pombaka mbewoya omendji-walɔmbɔla esadi. Etena kɛnɛ kambotɔtɔ l’ɔnɔnyi wa 12 wa nsanganya ya lânde ya lushi ɔtɔi, tambetawɔ ɔnɛ onto tshɛ layɔtɔ lɔkɔ ayotomba nge lo nyuma dia kamba olimu wambotshikala.