Woho wa Sambisha lo Mbilo k’Amundji w’Okanda
1. Naa wahɔ ɛmɔtshi wonga lo sambisha lo mbilo k’amundji w’okanda?
1 Onde wɛ nangaka sambisha lo mbilo kele anto nongolaka angɛndangɛnda dimɛna ndo lɛnɛ atanema anto lawakawɔ? Ekɔ ahole amɔtshi wa lo mbilo k’etshumanelo kanyu wakokayɛ sala dikambo sɔ. Woho akɔna? Ele lo ntshɔ dia tosambisha lɛnɛ atanema waa makashinyi. Apandjudi wasambisha lo makashinyi la makashinyi kondjaka etombelo w’amɛna efula.
2. Ngande wakoka nɔngɔswama esambishelo lo bɛtshi dia nkɛtɛ di’amundji w’okanda?
2 Lo mbilo ya tshumanelo dimɔtshi mbele ndo bɛtshi dia nkɛtɛ di’amundji w’okanda. Ɔnangɛso lendana l’awui wa mbilo kokaka nɔngɔsɔla waa kartɛ ya lânde dikambo di’ahole asɔ wasalema okanda wele anto tanemaka efula. Kartɛ ya mbilo yadjasɛ amundji w’okanda tanemaka lɛkɔ dia mɛnya hwe dia woho wasalema esambishelo lo mbilo k’amundji w’okanda la dia tshikitana la woho wasalema esambishelo lo mbilo yele bu y’amundji w’okanda. Lo mbilo kina, apandjudi kokaka sambisha lo mbilo y’amundji w’okanda woho wa sambishawɔ lo mbilo kina. Naka wɛ atasambishaka lo bɛtshi dia nkɛtɛ di’amundji w’okanda, kete tatɛ la sambisha lo makashinyi ɛmɔtshi engana wa totshitshɛ.
3. Kakɔna kayotokimanyiya dia sho kondja l’etombelo w’ɔlɔlɔ lam’atatasambisha lo makashinyi la makashinyi?
3 Tokambe la Mbɔtwɛlɔ ya Wɔdu: Lam’atayasambisha lo makashinyi la makashinyi, lɔta oko watoyɔlɔta otsha lo losanganya lo Mbalasa ka Diolelo. Ekɔ ohomba nto dia sɔna wonya wele olimu bu efula lo makashinyi. Naka kokaka, ɔtɔ lo makashinyi etena kɛnayɛ wate ndoko kidiya kakongɛ dia vɔ shidiya la nde. Lɔmba dia tɛkɛta la jɛra kana kangawɔ. Tɛkɛta lo tshena pe ndo sembɔ tɔɔ lo dikambo. Kakɔna kakokayɛ mbuta na?
4-6. Kakɔna kakokaso mbuta lam’asambishaso kapita kana jɛra?
4 Etena katɛkɛtayɛ la kapita kana la jɛra, wɛ kokaka mbuta ɔnɛ: “Amundji w’okanda mongaka l’akambo efula wa sala woho ɔnɛ wele hawoleke tanema lawakawɔ, diɔ diakɔ diambotoya dia ndjonyembola lo dihole dianyu di’olimu. Periodikɛ yaso mbishaka elongamelo lo kɛnɛ kendana l’akambo weta nshi nyɛ.” Oma lâsɔ tɛkɛta dikambo dimɔtshi diɔtɛkɛtshiwɔ lo tshena pe lo periodikɛ kɛmɔtshi kele layɛ.
5 Kana wɛ mbeyaka pemba la mbɔtwɛlɔ ka wɔdu kɛnɛ: “Anto efula kombolaka mbeya akambo efula wendana la Bible koko vɔ bu la wenya efula. Traktɛ kɛnɛ nembetshiyaka ekongelo ka woho wekaso l’anto Bible ofele kakoka kokimanyiya dia tana ekadimwelo lo wembola wendana la Bible wayambolayɛ.” Oma lâsɔ ta awui wele lo lɛkɛ 4-5 la traktɛ Aimeriez-vous en savoir plus sur la Bible?
6 Naka wɛ mɛnaka dia kanga makashinyi kana jɛra ekɔ l’olimu efula, kete wɛ mbeyaka mbosha paka traktɛ ndo mbotɛ ɔnɛ: “Layoya etena kayoyâsɔ yema. Dimi nangaka mbeya kɛnɛ kakanayɛ dia traktɛ kɛnɛ.”
7. Ngande wakokaso mbesa nsaki kɛnya anto lo mbilo k’amundji w’okanda?
7 Towese Nsaki Kakɛnya Onto: Wɛ koka kondja onto la mbeka lande Bible lo mbilo k’amundji w’okanda. Ombatshi mboka ɔmɔtshi wotshikitanyi akashaka kɔmɛrsa kɛmɔtshi periodikɛ mbala la mbala. Etena kakɛnya pami kɛsɔ lowando lande lo kɛnɛ kakandadiaka, ombatshi mboka akawɛnya woho wasalema wekelo wa Bible, lo kamba la biukubuku Katɔlɔmba. Wekelo wakalɔngɔswama dia salemaka paka lo dihole diakakambaka pami kɛsɔ olimu. Koko lo menda awui waketaka lo dihole di’olimu dia pami kɛsɔ, ombatshi mboka akakumiyaka sawo paka lo minitɛ 10 kana 15 mbala tshɛ. L’ɛnyɛlɔ kande, nyɛsɔ totetemale la nyanga anto wakokaso sambisha lo mbilo k’amundji w’okanda.