Tosambisha Diolelo
1 Lo Heberu 10:23, vɔ tɔlɔmbaka dia sho ‘tetemala la wotelo wa lo sɛkɛ w’elongamelo kaso,’ w’endana la Diolelo diaki Nzambi. Yeso akadjanga l’ɔlɔlɔ tshɛ dia lokumu l’ɔlɔlɔ la Diolelo sambishama lo wedja tshɛ. (Mako 13:10) Ekɔ ohomba sho mongaka la dui sɔ lo yimba lam’atatasambisha.
2 Lam’ahomanaso l’anto, sho pembaka tatɛ sawo lo dikambo dimɔtshi diayashawɔ kana di’endana lawɔ. Tena efula, sho mbutaka akambo weyawɔ dimɛna, oko odiakanelo l’ahole wosukanyi laso, ekakatanu wele la ɛlɔngɔlɔngɔ, okiyanu wa kondja kɛnɛ kele laso ohomba kana pâ k’ekondjelo. Lam’ele anto efula mbidjaka yimba paka l’‘ekiyanu ɛsɔ wa lo lɔsɛnɔ,’ tena efula vɔ totɛka kɛnɛ kâkiyanya lam’awɛnyaso ɔnɛ sho ndjashaka le wɔ ndo ɔnɛ sho mbaokaka. (Luka 21:34) Dikambo sɔ mbeyaka ndjotokimanyiya dia sho mbewoya elongamelo kaso.
3 Koko, naka hatolami, sawo mbeyaka ndjonga paka dia tokanyi ta kɔlɔ toto edja ndo tamboyotakɔ oweso wakataye dia ndjowaenda: sambisha losango la Diolelo. Naka mɛtɛ mbɛnyaso anto akambo wa kɔlɔ wele lo kiɔkɔ y’ekakatanu, kete oyango aso ele wa kotola yambalo yawɔ oya lo Diolelo, tshɔi yakɔ y’elongamelo k’anto. Aha la tâmu, tekɔ l’elongamelo ka dimɛna efula kahomba anto mbeya. Omalɔkɔ, oyadi kânga sho tatɛ la mbuta akambo amɔtshi w’endana la “tena dia pâ, dia wolo mbikikɛ,” tɔtɔlɛ sawo diaso esadi eto lo kɛnɛ k’endana ntondo la losango laso, “lukumu l’ololo la pundju.” Naka tayosala ɔsɔku, kete tayokotsha olimu aso l’ɔlɔlɔ tshɛ.—2 Tim. 3:1, NW; 2 Tim. 4:5; Eny. 14:6.