Sho mbewoyaka anto akina elongamelo kaso ka Diolelo
1 Lo nshi y’ekomelo ya pâ nyɛ, anto efula bu l’elongamelo. (Ef. 2:12) Akina ndjaɛkɛka lo ɛngɔnyi wa l’emunyi, le ewandji w’ana w’anto, lo awui wa siansɛ wa nshi nyɛ ndo lo awui akina, ko tete le sala ngasɔ bu dui dia lomba. Tekɔ l’ɔngɛnɔngɛnɔ efula dia monga l’elongamelo ka mɛtɛ lo kɛnɛ kendana la nshi yayaye, elongamelo kele ‘oko longo la masuwa le anima, kele mɛtɛ ndo shikaa’!—Heb. 6:19.
2 L’ɛlɔmbwɛlɔ ka Diolelo diaki Nzambi, nkɛtɛ kayokadimɔ paradiso. Wakiso wa ngandji wakavu wayolɔ. (Etsha 24:15) Wola, wɛngiya, hemɔ, lotshundu l’osombe ndo nyɔi hatonga nto. (Osam. 9:18; Mat. 12:20, 21; Eny. 21:3, 4) Ɔsɔ ekɔ alaka amɔtshi waki Jehowa wayanga kotshama ndoko edja. Dui diakɔna diendana l’elongamelo kaso dialongamɛyɛ lo yoho ya lânde?
3 Tosambisha lokumu l’ɔlɔlɔ: Hatohombe nama elongamelo ka Diolelo dikambo diaso shoamɛ. Ngandji kokaso Nzambi ndo wonyaso onto totshutshuyaka dia mbokoya Yeso ndo dia “nsambisha akanga a weula lukumu l’ololo, . . . dia ntutela wane wambundama dikambu dia etshungwelu, ndu akanga a tutshungu dia esenelo, la dia ntshungula wane wambusuyama.” (Luka 4:18) Ɔpɔstɔlɔ Paulo akasambishaka lokumu l’ɔlɔlɔ lo lobingu ndo l’ahole tshɛ wakatanemaka anto. Nde akayasha tshɛ lo olimu wa sambisha. (Etsha 18:5) Mbokoya ɛnyɛlɔ kande lo sambishaka l’ohetoheto ayotokimanyiya diaha “tukanyi t’akambu wa l’etena kene, lukesu l’ekundji” kitshakitsha elongamelo kaso k’Okristo.—Mako 4:19.
4 Elongamelo kaso ka Diolelo hahombe kitakita l’ɔtɛ wahomanaso la anto wele la wendjodi, wahɔshi losango la Diolelo la nɛmɔ efula kana watɔlɔsha lo sɛkɛ. Sho ‘kukutɛka etelo ka lo sɛkɛ k’elongamelo kaso aha la ndjɛkayɛka.’ (Heb. 10:23) Sho ‘hatoke lokumu l’ɔlɔlɔ sɔnyi.’ (Romo 1:16) Dietawɔ diaso diɛnama hwe ndo etete kaso mbeyaka ndjotshutshuya anto amɔtshi dia tohokamɛ.
5 Kânga mbele kema kɔlɔ kotola yambalo y’anto lo woho watalana awui wa lo andja ɔnɛ dia kotsha prɔfɛsiya ya lo Bible, sho kema esambisha w’awui wa lonyangu. Koko, olimu aso ndekaka mendana la elongamelo kaso ka Diolelo, mbuta ate lokumu l’ɔlɔlɔ la Diolelo diaki Nzambi. Nyɛsɔ tosambishake lokumu l’ɔlɔlɔ la dietawɔ tshɛ ndo l’ohetoheto ‘dia monga l’eshikikelo k’efula kendana la elongamelo polo l’ekomelo.’—Heb. 6:11.