Ekongelo ka losanganya l’otshimbedi layaye

Ɛlɔlɔ akɔna wakondjayɛ ɛlɔ kɛnɛ lo kɛndakɛnda kâmɛ la Jehowa na? Ngande wakokayɛ ntsha tshɛ di’aha eyango wele bu wa teokrasi ndjokoshimba dia wɛ mbetsha wahɔ wa Diolelo lo dihole dia ntondo lo lɔsɛnɔ layɛ na? (Mat. 6:33) Onde wɛ ekɔ l’okakatanu dia tshikitanya ɔlɔlɔ la kɔlɔ l’andja ɔnɛ wetɛ akambo wa kɔlɔ oko w’ɔlɔlɔ? (Heb. 5:14) Ɛtɛ w’asawo asɔ mbayɔmbɔma lo losanganya l’otshimbedi lele l’ɔtɛ a dui ɔnɛ: “Tokondja Ɛlɔlɔ oma ko Kakianɛ lo Kɛndakɛnda lo Mboka ka Nzambi.” Lɔ layomɛ oma lo Ngɔndɔ ka Divwa 1999.​—⁠Osam. 128:⁠1.

Dikambo di’oyoyo diayotɛna Lushi la Samalo lo losanganya lɔsɔ l’otshimbedi ele: woho wa ntshaka Losanganya l’Olimu. Omendji anyu w’otshimbedi ayewoya tshumanelo kɛnɛ kambɔlɔngɔswama woho w’onto tshɛ tayalɔngɔsɔdi dia ndjela losanganya l’otondo.

Etenyi kele l’ɔtɛ a dui ɔnɛ: “Ambatshi Mboka​—⁠Nyêndake Ɔlɔlɔ oko Wakɛndakɛndanyu” ayotɛnya woho wa sho monga la lomba ndo l’ekanelo k’ɔlɔlɔ dia ndjatshungwɛka etena k’ɔlɔlɔ dia kamba olimu w’ombatshi mboka. (Ef. 5:​15-17) Sawo diele l’ɔtɛ a dui ɔnɛ: “Nyewɔ Mboka Yɛnama oko Yekɔ Ɔlɔlɔ” ayotetsha woho wa sho mbeya kɛnɛ kele ɔlɔlɔ lo washo wa Nzambi l’akambo tshɛ wa lo lɔsɛnɔ laso. Dako diata ɔnɛ “Shɛngiya Yele l’Okotshamelo wa Prɔfɛsiya le So” ayotokimanyiya dia sho ndodja yimba ndo etema aso la ngandji k’Ɔtɛkɛta waki Nzambi. Dako dia lo sɛkɛ diele l’ɔtɛ a dui ɔnɛ: “Mboka ya Nzambi Yekɔ Mɛtɛ Ɛlɔlɔ!” diayoka epole ɔsɛkɛ lo ɛlɔlɔ wakondjaso kakianɛ lo tetemala kitanyiya adjango wosembwe waki Jehowa.

Onde wɛ nangaka mɛnya lo sɛkɛ oma lo batismu ka l’ashi ɔnɛ wɛ mbetawɔka kɛndakɛnda lo mboka yaki Nzambi oko okambi ande ɔmɔtshi wakayakimɔ le nde? Naka ɔsɔku, kete sawola l’omendji walɔmbɔla dia vɔ mbɔsa tɛdikɔ tahombama lo dikambo sɔ.

Sala tshɛ di’aha pandja losanganya lɔsɔ l’otshimbedi layosalema l’etena kahombama. Kônge nshi yakɔ hiende, nɛ dia ‘onto tshɛ lôka Jehowa wɔma ndo lakɛndakɛnda lo mboka yande ekɔ l’ɔtshɔkɔ.’​—⁠Osam. 128:⁠1.