Tɔngɛnɛngɛnɛ Dia Sambisha Anto Akambo Tshɛ
1 Onto tshɛ l’atei aso nangaka ntsha akambo weyande dimɛna. Lo ndjela Mako 7:37, elui w’anto wakataka lo dikambo dia Yeso ɔnɛ: “Ndi ambutsha akambu tshe ololo.” Diɔ diakɔ diakangɛnangɛnaka Yeso sala lolango la Jehowa! (Enda Osambu 40:8.) Naka tayokana yimba ɔlɔlɔ l’alako wayela anɛ, kete ndo sho lawɔ tayɔngɛnangɛna dia kitanyiya didjango dia Yeso, mbuta ate sambisha anto ndo mbâsambisha akambo tshɛ. (Etsha 10:42) Lo Ngɔndɔ ka Hende, tayosha anto dibuku dimɔ dia ndjɛkɛ 192 diakatombe la ntondo ka 1985, naka wekɔ lo lɔkɔtɔ, kana dibuku Loseno la Pondjo. Ngande wokokiso sambisha akambo tshɛ l’ekimanyielo k’ekanda ɛsɔ na?
2 Lam’ele anto efula ndjakiyanyaka dia ki k’alemba awɔ, wɛ kokaka mbuta ɔnɛ:
◼ “Kânga mbambohama awui w’enganga hakoke, hemɔ kekɔ lo tetemala mɛnya anto pâ efula. Oko le yɛ, akanayɛ dia dikambo sɔ na? [Tshikande akadimule.] Yeso Kristo akate ate elando, hemɔ ya lɔnyɔi, ayonga djembetelo mɔtshi ya nshi y’ekomelo. (Luka 21:11) Koko Bible mbutaka ndo dia etena kɛmɔ kayoshila hemɔ. [Adia Isaya 33:24.] Enda ɛkɔkɔ ɛmɔtshi watosha dibuku nɛ watosokoya dia sho mbetawɔ wetshelo ɔsɔ w’etshina w’oma lo Bible.” Shila tokanyi tɔmɔtshi tasungana tele lo dibuku diawɛnyayɛ, ko wɛ mboshadiɔ ndo mbotɛ oshinga adiɔ.
3 Etena kasambishayɛ lo tshakitudi suke l’ahole wasondjawɔ diangɔ, wɛ kokaka mbisha onto mɔyɔ ndo mombola ɔnɛ:
◼ “Onde wɛ hɛnyi dia lɔsɛnɔ laya wolo nshi nyɛ ko aya pâ efula dia ndjasɛnya dimɛna polo l’ekomelo ka ngɔndɔ? [Tshikande akadimule.] Onde wɛ fɔnyaka dia lushi lɔmɔtshi tayonga la diangɔ dia l’emunyi lo yɛdikɔ yakoka?” Tshikande akadimule. L’ɔkɔngɔ, shila divɛsa dimɔtshi diasungana diele lo dibuku diawɛnyayɛ. Tetemala ɔnɛ: “Dibuku nɛ nembetshiyaka woho wayokandola Nzambi ekakatanu wetsha lɔsɛnɔ wolo nshi nyɛ l’ekimanyielo ka Diolelo diande.” Shande dibuku. L’ɔkɔngɔ ko wɛ ndjowotɛ dia wɛ ambɔngɛnangɛna sawo diakɔ efula, ko wɛ mombola wate: “Onde sho kokaka ndjotetemala la sawo sɔ lushi lokina?” Lo yoho shɔ, ondo wɛ ayokoka kondja adrɛsɛ ande.
4 Naka wɛ ekɔ lo kamba la dibuku “Loseno la Pondjo,” kete ondo wɛ ayonga la diaaso dia pemba mbɔtwɛlɔ ka lo sawo kɛnɛ lo dikambo dia wɔladi l’andja:
◼ “Oko le yɛ, lande na kediɔ wolo nganɛ dia mbidja wɔladi l’andja? [Tshikande akadimule, ko wɛ ndjowɛnya osato wele lo lɛkɛ 20-1.] Osato ɔnɛ mɛnyaka dikambo dimɔtshi dia lo Bible diofundami lo dibuku di’Enyelo, kana Oshwelo. [Adia Enyelo 12:7-9, 12 lo odingɔ 17. L’ɔkɔngɔ ko wɛ mbadia awui walembetshiya osato akɔ.] Ɔnkɔnɛ, Diabolo akakadjema la nkɛtɛ, ko wɔladi wamboshishɔ l’andja. Dibuku nɛ kadimulaka wembola efula w’ohomba. Layɔngɛnangɛna kotshikɛdiɔ naka wɛ nangaka diâla.”—Dia asawo akina w’amɛna efula wa dibuku Loseno la Pondjo, enda nto lo lɛkɛ la komelo la numɛlɔ ya Olimu Aso wa Diolelo wa Ngɔndɔ ka Sato 1995, Ngɔndɔ ka Sato 1994 ndo Ngɔndɔ ka Ntondo 1993.
5 Lam’akalolayɛ dia tenda wanɛ wakɛnya saki, wɛ kokaka pemba dia tatɛ mbeka l’onto Bible lo ndjela mbɔtwɛlɔ ka sawo kɛnɛ:
◼ “Lam’akatasawola mbala ketshi, wɛ akate dikambo dimɔtshi di’ohomba efula. [Ta kanyi mɔtshi yakate ompokami ayɛ.] Lakakane yimba lɔkɔ, ndo te kɛnya kɛnɛ kakamɛnyi lam’akamasale eyangelo (recherches) ɛmɔtshi. [Sɛdingola la nde divɛsa dimɔ diasungana.] Tekɔ lo sɛngɔla anto dia mbeka la wɔ Bible ofele, woho wa vɔ nyomoleka mbeya atshina a wetshelo wele lɔkɔ lo tshenyi ya wonya oko wamboshila mbeya wa miliyɔ y’anto akina. Ɔsɛdingwelo ɔsɔ wa Bible kokaka ketawoya ɔnɛ alaka wa Nzambi wahete pa wayokotshama.” Shila wembola ɛmɔtshi wayokadimwama lo wekelo akɔ. Naka nde ambotona losha layɛ, lembetshiyande ɔnɛ sho mbekaka nto l’anto lo yoho y’esadi esadi, yɔ̂sa paka taahe 15 toto lo lomingu l’edja ka mingu 16. Ɛnyande biukubuku Katɔlɔmba, folayɔ lo wetshelo 1 ndo mbola ompokami ayɛ kana wɛ kokaka mbôlembetshiya, lo wetshelo ɔnɛ, woho watotekaka l’anto.
6 Naka tayokambaka olimu aso la kɔmi, kete tayongaka l’ɔngɛnɔngɛnɔ lɔkɔ. ‘Todjake yimba tena tshɛ’ dia sambisha anto akambo tshɛ, ndo tɔngɛnangɛnake dia kotsha ɔkɛndɛ aso wa sambisha lo toho tshɛ.—1 Tim. 4:16.