Têle Onto Tshɛ Lele La Posa
1 Oko akatatshi Amɔsɛ, nshi nyɛ, nkumbo k’anto kekɔ la ‘posa, aha k’ashi, koko ka mboka ɛtɛkɛta wa Jehowa.’ (Am. 8:11) Dia kimanyiya wanɛ wamboma weodi la posa kɛsɔ ka lo nyuma, sho mbaewoyaka tɛdikɔ takɔsɛ Nzambi dia tshungola anto w’ekitanyiya oma lo pɛkato la nyɔi, tɛdikɔ tɛnyami lo tshapita ya komelo ya dibuku di’Enyelo oko ‘ndjale k’ashi a lɔsɛnɔ.’ Tekɔ la diɛsɛ dia mbelɛ onto tshɛ lele la posa ka losembwe dia ‘ndjɔsa ashi a lɔsɛnɔ wɔsɔsa.’ (Eny. 22:1, 17) Ngande wayototsha dikambo sɔ lo Ngɔndɔ ka Sato? Lo mbisha anto wɛnya saki l’otema ɔtɔi dibuku La Révélation : le grand dénouement est proche ! Ondo tayolanga pemba mbɔtwɛlɔ nyɛ.
2 Anto efula ndjakiyanyaka lo dikambo dia yonge ya demba; diɔ diakɔ diele ondo mbɔtwɛlɔ kɛnɛ kayokɔngɛnyangɛnya:
◼ “Anto efula kiyanaka hakoke woho wamboleka mbidɛ oshinga w’ekanga dia sakemɛ dimɛna. Onde wɛ atakanaka dia dikambo sɔ? [Tshikande akadimule.] Onde wɛ ekɔ la kanyi mɔtshi lo kɛnɛ kakoka shidiya dikambo sɔ pondjo? [Tshikande akadimule.] Elongamelo kɛmɔ ka dimɛna efula tɔ kɛnɛ.” Adia Enyelo 22:1, 2. L’ɔkɔngɔ ko wɛ mbifola dibuku Révélation : dénouement l’osato wele lo lɛkɛ 308-9 ko wɛ nembetshiya osato akɔ l’ekimanyielo k’odingɔ 22 wa lo lɛkɛ 311. Dihiya wate: “Okanda ɔnɛ sɛdingolaka divɛsa ɔtɔi ɔtɔi dia dibuku di’Enyelo kana Oshwelo.” Naka ɔnɛ lasawola la yɛ ambɛnya saki mɛtɛ, shande dibuku l’oshinga wa nshi nyɛ. Ɔsa tɛdikɔ dia ndjowenda nto.
3 Lam’ayoyowembola, wɛ koka mbohola sawo dianyu dia mbala ketshi wate:
◼ “Mbala ketshi, takasawola nganɛ wayokoka hemɔ shila pondjo. Wɛ fɔnyaka dia lushi lɔmɔtshi ndoko onto layotata hemɔ nto? [Tshikande akadimule.] Enda dui dia diambo diatawɔ lanɛ.” Adia Isaya 33:24. L’ɔkɔngɔ fola biukubuku Katɔlɔmba lo wekelo 5, nyɔsɛdingole odingɔ 5 la 6 lo mboka wembola wɔtɔnɛ l’edingɔ akɔ l’etatelo ka wekelo ndo lo mbɔsa avɛsa amɔtshi woshawɔ. Lembetshiya ɔnɛ hemɔ la nyɔi ayoshila lam’ayokotshama sangwelo di’etatelo diaki Nzambi diendana la nkɛtɛ. Nyokane lushi la ndjosawola oma l’odingɔ 1 polo 4 la 7 wa wekelo akɔ wamɛ.
4 Naka wakatshi lo nsango ya vuavua ɔnɛ onto ɔmɔtshi akavwe nyɔi k’omamandji, kete wɛ koka pemba mbɔtwɛlɔ kɛnɛ:
◼ “Mɛtɛ wɛ akoki wata dia [ta lokumu lakɔ]. Lam’ashisha anto nsɛnɔ l’odiakanelo, efula ndjambolaka nganɛ wokokiwɔ tokeketsha nkumbo yovushisha. Akanayɛ na?” Tshikande akadimule. L’ɔkɔngɔ ko wɛ mbifola dibuku Révélation : dénouement lo lɛkɛ 299 dia mbɛ̂nya osato wa woho wayolɔ anto. Tetemala la mbuta ɔnɛ: “Efula mambaka lam’okawɔ ɔnɛ anto w’ɔlɔlɔ la wa kɔlɔ wayolɔ lo Paradiso ka la nkɛtɛ. [Adia Etsha 24:15, divɛsa dia l’odingɔ 9, lɛkɛ 297, ko wɛ mbisha diɔmbwɛlɔ diele l’odingɔ 10.] Dibuku nɛ mɛnyaka awui akina efula w’ohomba wendana la sangwelo dia Nzambi lo dikambo dia nshi yayaye. Dimi koka kotshikɛ dibuku nɛ naka wɛ nangaka mbeya awui efula lo dikambo sɔ.” Tɛnde dia wɛ ndjowenda nto ndo funda awui wakaleki kotola yambalo yande la ekiyanu ande.
5 Lo diembwelo di’oyoyo, sunganya sawo diayɛ la nde. Ondo wɛ ayokoka mbɛ̂nya nganɛ:
◼ “ Lo sawo diaso dia mbala ketshi, wɛ akate dui dimɔ diakangɛnyangɛnya diendana la sangwelo dia Nzambi lo dikambo dia nkɛtɛ. [Vusola dui diakandate.] Lambokondja tokanyi tɛnami nte tayokɔngɛnyangɛnya.” Fola biukubuku Katɔlɔmba lo wekelo 5. Adia edingɔ tshɛ wɛnama oko ayokotola yambalo y’onto akɔ ndo nyosawole lɔkɔ. L’ɔkɔngɔ a wɛ mbokana la nde dia ndjotetemala l’ɔsɛdingwelo wa wekelo akɔ, shande kiatshi ya leeta (naka yekɔ) yɛnya nshi la wenya wasalema nsanganya y’etshumanelo. Lembetshiya elɛwɔ dako dia lo sɛkɛ ndo elɛnde dia nde ndjodilonga.
6 Naka wɛ ndeka nanga sawo dia wɔɔdu dia kamba la kiatshikatshi, kete wɛ koka pemba nɛ:
◼ “Te kotshike kiatshi nyɛ yele l’ɔtɛ a dui ɔnɛ Elongamelo kakona kele la wakiso wa ngandji wakavu?” Shande yɔ ko wɛ mbotɛ dia nde ndjela wadielo w’odingɔ wa ntondo. Tshikande akadimule dimbola diele lo etelo k’ekomelo. Adia odingɔ wa hende, ko wɛ mbɛ̂nya osato wele lo lɛkɛ 299 la dibuku Révélation : dénouement. Tetemala la mbuta ɔnɛ: “Dibuku nɛ nembetshiyaka tshɛtshɛ nganɛ wayonga eolwelo ndo alaka akina wa diambo efula washa Bible wendana la nshi yayaye. Ɔsadiɔ, naka wɛ nangaka diada.” Tɛnde oshinga wa nshi nyɛ, ko wɛ mbɔsa tɛdikɔ dia ndjowembola.
7 Leeta lasɛngiyaso anyaso anto dia vɔ lietawɔ koka mbâkotola oya l’ashi wa lɔsɛnɔ watshulola Jehowa nshi nyɛ. Omalɔkɔ, tekɔ lo mbutɛ onto tshɛ lele la posa shate: “Yaka!”—Eny. 22:17.